පිවිසිය

ආයුබෝවන්!
තෙරුවන් සරණයි,

වරින් වර පුවත් පත් වල සහ වාර ප්‍රකාශනයන් හි පළ වූ මාගේ ලිපි සමුච්චය මෙම බ්ලොග් අඩවියෙහි ඇතුලත්ය. ඉතිහාසය පුරාවිද්‍යාව සිංහල ගොවිතැන වාස්තු විද්‍යාව වැනි විෂයන් අරභයා සංග්‍රහ කරන ලද මෙම ලිපි එක් තැනක ගොනු කොට තැබීමෙන් පාඨකයා හට පහසුවක් සැලසීම මෙහි අරමුණය. එයට අමතරව විවිධ කේෂ්ත්‍රයන් හි කරුණු ඇතුලත් නව ලිපි ද මෙයට එක් කරමි.
වසර දෙදහස් පන්සීයයකට වඩා එහා දිව යන ඉතිහාසයක් ඇති ජාතියක් වශයෙන් අපගේ පාරම්පරික උරුමයන් හි සුරැකියාව මුල් කොට මෙම සියලු ලිපි සම්පාදනය වේ. මෙහි අඩංගු කරුණු සහ පාරම්පරික දැනුම උපුටා ගැනීමට අවසර ඇත. එහෙත් එය ජාතියේ උන්නතිය වෙනුවෙන් පරිහරණය කරන්නේ නම් මාගේ ව්‍යායාමය සඵල වූවා වෙයි.
ඉතිහාසයේ ජාතිය හමුවේ පැවති අභියෝග රැසකි. ඒවා සියල්ලටම අප සාර්ථකව මුහුණ දුන්නෙමු. අද දින ද එය එසේ විය යුතුය. සිංහල බෞද්ධ සංස්කෘතියෙහි හරය මැනවින් වටහා ගෙන නැවතත් ඒ අභිමානවත් මහා සම්ප්‍රදාය තහවුරු කරලීමට සැවොම ‍එක්වෙමු.

Wednesday, September 15, 2021

 කතුවරයාගේ කෘති - නව වැන්න

යලට මහට කලට ගොවිතැන 

ප්‍රකාශයට පත් කිරීම - 2005

මෙම කෘතිය සිංහල ගොවිතැන පිළිබඳ දැනුම සංග්‍රහ කොට  ලියන ලද්දකි.


අන්තර්ගතය - පුරාණ පුස්කොළ ග්‍රන්ථයක් වන වැහි ලකුණු ශාස්ත්‍රය  මෙහි අඩංගු වේ. ඊට අමතරව යල් මෝසමට සහ මාස් මෝසමට ගොවිතැනෙහි නැකැත් සාදා ගන්නා ආකාරය ජ්‍යෙතිෂයට අනුව විග්‍රහ කිරීමද ඒ පිළිබඳව කරන ලද පර්යේෂණයන් ද මෙහි දක්වා ඇත.

කතුවරාගේ කෘති දසවැන්න -

මිහි මවට වස 

ප්‍රකාශයට පත් කිරීම -2013

නව සිය හැටේ දශකයේ සිට ඇරඹුණු හරිත විප්ලව ක්‍රියාදාමය නිසා සිංහල ගොවිතැන විනාශ මුකයට යෑමත් වස විස කැන්දන නූතන රසායනික ගොවිතැන හඳුන්වා දීමත් ගැන කෙරෙන පර්යේෂණාත්මක කෘතියකි.


කතුවරයාගේ කෘති එකොළොස්වැන්න -

වස විසට එරෙහි පාරිසරික නව නිපැයුම්

ප්‍රකාශයට පත් කරන ලද වර්ෂය - 2013

පරිසර හිතකාමී නව නිපැයුම් බිහිකරන ලද නව නිර්මාණ කරුවන් පිළිබඳව රිවිර පුවත් පතේ පළ කරන ලද ලිපි කීපයක් මුද්‍රණය කොට පළ කරන ලද්දකි.විශේෂයෙන්ම වස විස භාවිතය තුරන් කරලීම සඳහා කරන ලද නව නිපැයුම් විග්‍රහ කරමින් මෙම කෘතිය සම්පාදනය වී තිබේ.



කතුවරයාගේ කෘති දොළොස් වැන්න -

‌ෙඑතිහාසිත කූරගල පුදබිම නොහොත් ශ්‍රී පාද දිවා ගුහාව

ප්‍රකාශයට පත් කරන ලද වර්ෂය - 2013

කූරගල පුදබිම සම්බන්ධව කතුවරයා විසින් රචනා කරන ලද දෙවනි කෘතියයි.කූරගල නැවත බෞද්ධයන් වෙත දිනා ගැනීමේ අරගලය සහ ඒ පිළීබඳව අප්‍රකටව පැවති ලිපි ලේකන කීපයක් මෙහි අන්තර්ගතව ඇත.


කතුවරයාගේ කෘති දහතුන -

සිංහල බෞද්ධ රාජ්‍ය සම්ප්‍රදාය 

ප්‍රකාශයට පත් කරන ලද වර්ෂය - 2014

සිංහල බෞද්ධයන් ගේ උරුමය විනාශ වී යෑම සම්බන්ධව දිවයින පුවත්පතේ ලියන ලද ලිපි පෙළක් නැවත සංස්කරණය කර ග්‍රන්ථයක් වශයෙන් ප්‍රකාශයට පත් කිරීම මෙහිදී සිදු ව ඇත. අතීතයේ තිබූ සිංහල බෞද්ධ රාජ්‍යය කුමක්ද එහි වටිනාකම් කුමක්ද සහ හර පද්ධතිය කුමක්ද යන්න විග්‍රහ කිරීම මෙහි තේමාවයි.



කතුවරයාගේ කෘති දාහතර -

හෙළය අවදිකරවන එස් මහින්ද හිමි කෞතුකාගාරය

ප්‍රකාශයට පත් කරන ලද වර්ෂය -2014

 පූජ්‍ය එස්. මහින්ද හිමි පිළිබඳ  මැද පෙරදිග හෙළ බිම සංවිධානය විසින් කරන ලද අනුස්මරණ වැඩ සටහන ට සමගාමීව දහම් පාසල් තරඟාවලිය ක් පවත්ව න ලද අතර ජයග්‍රහණය කරන ලද සිසු සිසුවියන්ට තෑගි ප්‍රදාණය කරන ලදී. මේ අවස්තාවේ දී ඉදිිරිපත් කරන ලද අදහසක් අනුව එස්. මහින්ද හිමි අවසන් වරට වැඩ සිටින ලද මහ බෙල්ලන සුධර්මාරාමයේ කෞතුකාගාරයක් ඉඳි කරන ලදී.මෙම කෞතුකාගාරය කතුවරයා විසින් නිර්මාණය කරන ලද අතර මූල්‍ය අනුග්‍රහය සපයන ලද්දේ හෙළබිම සංවිධානය විසිනි. මෙම කෘතිය එම කෞතුකාගාරය සහ පූජ්‍ය එස්. මහින්ද හිමි යන් සම්බන්ධ ශාස්ත්‍රීය ලිපි අරභයා රචනා කන ලද්දක්.






Monday, September 13, 2021

රත කල්කය නොදී කෘතිම ප්‍රතිශක්තිය සඳහා එන්නත සෙවීම

 

                         




          සී.ඩබ්.ඩබ්.කන්නන්ගර අධ්‍යාපන ක්‍රම ආරම්භ වූයේ 1942 දී පමණය.1945 වසරේ නිදහස් අධ්‍යාපන පනත සම්මත වූවායින් පසු ස්වභාෂා සහ ද්වි භාෂා පාසල් සියල්ලේම රජය මූලික කරගත් අධ්‍යාපන ක්‍රමයක් ආරම්භ විය 1962 දී පාසල් රජයට පවරා ගැනීමෙන් පසු එවකට තිබූ බෞද්ධ පාසල්ද පරම විඥානාර්ථ පාසල්ද පල්ලි පාසල්ද රජයට ගෙන පොදු අධ්‍යාපන ක්‍රමයක් ස්ථාපිත කරන ලදී.බ්‍රිතාන්‍ය යුගයේ දී පාසල් පෙළ පොත් වල වූයේ එවකට යුරෝපයේ අනුදත් සෞඛ්‍ය පාඩමකි.පාසලේ දී විසබීජ හා ප්‍රතිශක්තිය ගැන උගෙනීමට දරුවාට සිදු විය.ක්ෂුද්‍රජීවින් ගැන උගෙනීමට සිදු විය.පිරිසිඳු කම ගැන උගෙනීමට සිදු විය.එහෙත් පාසලෙන් නිවසට ගිය දරුවා ගේ පරිසරය වෙනස් විය. හේනේ කුඹුරේ කමතේ මහන්සි වී වැඩ කිරීමට සිදු විය.ඇඟ පතේ මඩද ඇතැම් විට ගොම ද තැවරීම සාමාන්‍ය දෙයක් විය. කමතේ දී ගොම්පස් අල්ලන්නට යෙදුවේ දරුවන්ය.මේ දෛනික වැඩ කන්දරාව නිසා පාසලේ උගත් දේ පාඩමට සීමා විය.විසබීජ යනු හුදෙක් සංකල්පයක් පමණක් යැයි ඔවුන්  සිතන්නට ඇත.කන්නන්ගර මහතා ද මේවා දැන ගෙන ඉන්නට ඇත. ඔහු ප්‍රාථමික පාසල් වල ළමුන්ට නියෝගයක් නිකුත් කළේය. මේ නියෝගය මත උදේට හබරල ගොට්ටකට ගොම රැගෙන එන්නටද පසුව පාසල් ගෙවත්ත එළි පෙහෙළි කොට අල බතල මඤ්‌ෙඤාක්කා සිටුවන්නට   සිදු විය.ඉංග්‍රීසි ක්‍රමයට පණු බෙහෙත් ලබා දුනි.පණුවන් මැරීම ඉන් සිදු විය. නමුත් නිවසේ දී දුන්නේ බටකිරිල්ල අග්ගලා සහ සුරන් විදුර ගුලියයි.එහිදි පණුවන් මැරීම නොකොට පණුවන් හීන් කොට ගුද මාර්ගයෙන් ඉවත් කිරීම සිදු විය.  දරුවා ගෙදරදී විසබීජ හරණයට වඩා විසබීජ සමනය උගෙන ගත්තේ එසේය..වසරකට වරක් නිවසේදී  සියලුම දරුවන්ට විරේක බෙහෙත් දෙන ලදී.අරලු සෙනෙහකොළ තැඹිලි ගෙඩියේ ලා පින්නේ තබා උදේට පෙවීමද ඇතැම් අයට අරලු බුලු නෙල්ලි තිරැස්සවාලු මුද්දරම්පලම් ආදී කෂායද සමහරක් විට ඒ කෂායට එඬරු තෙල් දමා ලබා දීමෙන් විරේක ද කරන ලදී.මේ විරේකය නිසා බඩේ ආමය සමබර කර ගන්නා ලද අතර සිරුරේ සොරොව් වල සිරවී තිබූ මළ කොටස් බැහැර කර ගන්නා ලදී.

         දශක කීපයක් ගත වන විට විට මෙම නිවසේ සෞඛ්‍ය පිළීවෙත් වලට උපදෙස් දුන් ගමේ වෙද මහතාද නිවසේ සිටි මව් වරුන්ද වයොවෘද්ධ වී සිටියහ.මේ දැනුම ඉදිරියට ගෙන යෑමට  ලොකු මහත් වූ දරුවන්ට නොහැකි වූහ. ඔවුහු ඉගෙන ලොකු තනතුරු වලට පත් වී ගමේ දැනුම අමතක කළහ. ඒ අතර සෞඛ්‍ය පාඩමද වරින් වර වෙනස් විය.සෞඛ්‍ය අධ්‍යාපන කාර්යංශයක් බිහි විය. මව් කිරි සහ එළකිරි දීම ප්‍රවේශම් සහිත නොවේ යයි 1940 දශකයේ දී පත්තර වල දැන්වීම් පළ කරන ලද අතර ටින්කිරි විකුණා ගැනීමට උත්සාහ කරන ලදී. සෞඛ්‍ය අංශ ප්‍රබල වන විට මව්කිරි ඇරුණු කොට  මාස තුනක් පමණ වන තුරු ජලයවත් නොදිය යුතු යැයි නිර්දේශ කරන ලදී.බඩ විරේකය අවඥාවට ලක් කරන ලද අතර කැඳ බී පාසල් ඒමද උපහාසයට ලක් කරන ලදී.එසේම උපතේ පටන් දෙන රතකල්කය නොදිය යුතු යැයි සෞඛ්‍ය අධ්‍යාපන කාර්යංශයන් පත්‍රිකා පවා පළ කරන ලදී. රත් කල්කය දුන්නේ මව් කුසේ සිටි දරුවා ස්වභාවික ලෝකයට පැමිණෙන විට එම පරිසරයට හුරු වීම පිණිස දෙන සරල ඖෂධයක් විලසිනි. ඉන් ලේ පිරිසිදු වී මෘදුව විරේචනය වී ශරීරය සැහැල්ලු වී ලෙඩ රෝග වලට ඔරොත්තු දීමේ හැකියාව වර්ධනය කරන ලදී.

 

 

 

 

 

ආමය සමබර කරන ලදී.රත කල්කයේ වට්ටෝරු දෙකක් විය. එකක බරට බරක් සහිඳ ලුණු විය. ඇතැම් වෛද්‍යවරු පවසන පරිදි විරේක පංගුව එය වන්නට ඇත. උපතෙන් දින කට පමණ පසුව මෙම රත් කල්කය දීම ආරම්භ කරන ලදී. නමුත් ඇතැම් වෛද්‍යවරු කියන පරිදි උපතෙන් දින දාහතරකට පමණ පසු දීම වඩාත් යෝග්‍ය වේ.එයට හේතුව පෙකණි වැල වෙන් කල පසු තවදුරටත් මවත් දරුවාත් අතර සංයෝගය තිබෙන බැවිනි.කෙසේ නමුත් රත කල්කය දෙන පළමු දිනයේ දී දෙහි දළු මිටක් තලා ඉස්ම තනකිරි සමගද දෙවනි දිනයේ දී සුදුළූනු උණු අළු පල්ලේ  දමා තම්බා තලා  ගත් ඉස්ම සමගද තෙවනි දිනයේ දී ළපටි ඉඟුරු කැබැල්ලක් රෙදි කඩක ගැට ගසා කඩ පිම්මේ තම්බා පොඩි කර මිරිකා ගත් යුෂයෙන් දීම ද කළ බව පැරණි පතපොතේ සඳහන්ය.ඉන්පසූ වසර දෙකහමාරක කාලයක් තුළ වරින් වර මේ රත කල්කය දුන් බව පැහැදිලිය.හෙම්බිරිස්සාවක් ඇති විට කොත්තමල්ලි වතුරෙන්ද ලේ ශුද්ධ කිරීමට වදමල් තැම්බූ වතුරෙන් ද මළ වියළී ඇත් නම් අරළු තැම්බූ වතුරෙන්ද දුන් බව පැරණියන් කියති.

    පැරණියන් ගේ සෞඛය පිළීවෙත මෙසේ වුවද හැටේ දශකයේ දී පාසල් රජයට පවරා ගත් පසු ඇති වූ පරිවර්තනයේ දී පාසල් අධ්‍යාපනය තුළ දේශීය දැනුමට වටිනාකමක් හිමි නොවීය. හැත්තෑව දශකයෙන් පසු බිහි වූ දරුවන්ට රත කල්කය ගැනීමේ වාසනාව අහිමි කරන ලදී.බටහිර වෛද්‍යවරු තමන් සමීපයට පැමිණෙන පිරිසට උපදෙස් දෙන ලද්දේ රත කල්කය නොගන්නා ලෙසටය.ගලේ අඹරා දෙන රත් කල්කයට ගල් කුඩු එකතු වන්නේ යැයි ද ඒ නිසා රතකල්කය ගැනීම හානිකර විය හැකි යැයිද වරක් එක් වෛද්‍යවරයෙකු මා සමග පැවසීය. එවිට මා ආපිට ඔහුගෙන් විමසූයේ ඔබ ලුනු මිරිස් ආහාරයට ගන්නවාද යන්නයි.සැබවින්ම නිදහස් අධ්‍යාපනයෙන් ඉහළට ගිය පිරිසගේ අනුකාරකත්වය සහ පරස්පරය අපට සැම විටම දක්නට ලැබුණි.මේ නිසා වසර දහස් ගණනක් තිස්සේ අත් දුටු සෞඛ්‍ය පිළීවෙත් බැහැර වීමේ ප්‍රතිඵලය නම් ජනතාව තුල බෝ නොවන රෝග වැඩි වැඩියෙන් ප්‍රචලිත වීමයි.

    හැටේ දශකයේ දරුවන් අද තම දිවිමගේ අඩ සියවස පසු කරමින් සිටී.කොරෝනා වලින් වැඩිමනත්ව පීඩාවට පත් වන්නේ මොවුන්ය.කුඩා කළ සිරුරේ ශක්තිය අවදි කර නොගත් ඔවුහු දියවැඩියාව හෘද රෝග අම්ල පිත්තය මේදය බහුල වීම ආදී රෝග වලින් පෙළෙති. ඔවුන්ගේ දරුවන්ද එසේය.ළමා දියවැඩියාව බහුලව ප්‍රචලිත වී තිබේ.මෙයට වැරදි ආහාර රටාවද එක් හේතුවකි.වල්මත් වූ මේ පිරිස එන්නත් පස්සේ දිවීම පුදුමයට කරුණක් නොවේ.වර්තමාන රජයේ වෛද්‍ය නිළධාරීන් ගේ සංගමයද එන්නත් ගැනීමේ අවශ්‍යතාවය මතු කරන්නේ දේශීය වෙදකමට කිසිම ඉඩක් නොතබමිනි. පාසල් වියේ දරුවන්ටද එන්නත් නිර්දේශ කිරීමට තරම් මේ වෛද්‍යරු අපරික්ෂාකරී වී සිටින්නේ අනුකාරක අධ්‍යාපනයේ තරම අපට පෙන්වමිනි.ඔවුන් පවසන පරිදි විශේෂ අවශ්‍යතා තිබෙන දරුවන් යනු පෙර සඳහන් කළ බෝ වන රෝග බහුල දරුවන්ය.එන්නත දීමෙන් සිදු වන්නේ මේ දරුවන් තව දුරටත් අනතුරේ වැටීමයි.මන්ද ඔවුන්ගේ ස්වභාවිත ප්‍රතිශක්තිය තව දුරටත් හීන වන බැවිනි.කාලයක් තිස්සේ අපගේ අනාගත පරපුර අනතුරේ හෙළා දැන් කව දුරටත් ඒ පරපුර විනාශ කිරීමේ කුමන්ත්‍රණයක ඔවුන් නියැලී සිටින්නේ දැයි අපට බරපතල සැකයක් ඇතිවේ.

මතුගම සෙනෙවිරුවන්

 

 

 

Thursday, September 9, 2021

දඹුල්ලේ තලගොයි කථාව

 

 

 


                                               

             රන් ගිරි දඹුල්ලේ ලෙන් ගුහා සංකීර්ණයේ ඇතුලාන්තය දැඩි නිශ්ශබිදතාවයකින් වෙලී ඇත.බිම සවි කරන ලද පහනින් නැගෙන මන්දාලෝකයෙන් ඔප් නැංවෙන සිතුවම් මවන කාන්තිය සිත විනිවිද යන්නේ නැත. ශ්‍රද්ධා බැති සිතින් ඒ සීතල භූමි තලයේ වැතිර නමස්කාර කරමි. සිත එක්තැන් කළ මොහොත භාවනාවට වඩාත් සුදුසුය.  මීට දශක කීපයකට එපිට ඓතිහාසික රන්ගිරි දඹුළු විහාරයේ වැතිර මොහොතක් ලැබූ සැනසීම වර්තමානයේ දී නම්  ලබන්නට නොහැකිය.මහා කලබගෑනියකින් දඹුල්ල නගරය භ්‍රමණය වෙයි. ඉඳහිට වුවද මෙම කලබලය අලකලංචියක් බවට පත් වෙයි. ඒ ක්‍රිකට් තරු උල්කාපාත වලිනි. දඹුල්ලට පැමිණියෙකු ඒ ප්‍රදේශයෙන් පිටත් වන්නේ තල ගොයි මරා ගෙන යයි කථාවක්    ඇත. තලගොයා කෙසේ වුවත් දඹුල්ලේ වෙළෙන්දෝ ගෙවීන්ගෙන් ඉණ ඉහ අත ගා ගන්නට දක්ෂ වෙති. පෙරකී කලබලය රටටම දැනෙන්නට ගන්නේ එලෙසය.

       එහෙත් දඹුල්ලත් ඒ අවට පරිසරයත් මවා පාන්නේ අතිශය සුන්දර දැක්මකි.රජරටට දියවර සපයන ඓතිහාසික කලාවැවට පාත්වන ජල ධාරාව මාතලේ කඳුවැටි අද්දරින් පෙරී දඹුලු ඔයට එකතු වන්නේ මෙම ජනතාවගේ හදවත් තෙත් කරවමිනි. එය පසු ගිය දශක කීපය ඔස්සේ මහවැලියට සින්න වුවද ඉතිහාසය පුරාවටම මෙම හද ගැස්ම මේ ප්‍රදේශයේ නින්නාද වන්නට ඇත. දඹුල්ලේ තලගොයි කථාවේ උත්පත්තිය සිදු වන්නේ ඔවුන්ගේ ලෙන්ගතු කම් ක්‍රමයෙන් වියැකී යන යුගයේ දී වියයුතුය.

        දඹුල්ල කුරුණෑගල පාරේ කිලෝ මීටර් හතරක් පමණ ඉදිරියට ඇදෙන කල්හි ඓතිහාසික ඉබ්බන් කටුව පුරා සොහොන් භූමිය පසු කළ හැකිය. ඉන් අනතුරුව හමුවන්නේ තලකිරියා ගමයි. තල කිරියා ගම නමින් හැඳින්වෙන වැවක් අසබඩ පිහිටි මෙම ගම්මානය සීමා වන්නේ පහළ වැවෙනි. තල ගොයි කථාවට පසුබිමි වන පුවත මෙම ගමෙන් බිහි වූවක් යයි කියැවෙයි. එම නිසා තල කිරියාගම ජීවත් ව සිටින වැඩිහිටි දැනුමැතියන් මුණ ගැසීමේ  බලා පොරොත්තුවෙන් එහි ගියෙමි.   තලකිරියාගම පාර දෙපැත්තේ තිබෙන එළවුළු වෙළෙඳ සල් වලින් කියාපාන්නේ දඹුල්ලේ අභිනව සංස්කෘතියයි. එහෙත් එයට යටින් මේ ජනතාවගේ හද ගැස්ම සහ හෘද සාක්ෂිය නිරන්තරයෙන්ම දකින්නට හැකිය. තලකිරියාගම ජීවත්ව සිටි වයොවෘද්ධතම පුද්ගලයෙකු වූ හිඹුටත්තා නොහොත් කිරිබණ්ඩා මහතා දඹුල්ලේ තල ගොයි කථාවේ පැහැදිළි මූලාශ්‍රයක් විය. මීට වසර පහළොවකට පමණ පෙර මට ඔහු මුණ ගැසුණු අවස්ථාවේ දී කී කතා මෙලෙස සටහන් කරමි.

        තලකිරියාගම ජීවත්වන  මොරගස්පිටිය රාළ නමින් පැවතෙන ප්‍රධාන පරම්පරාව මාතලේ දිශාවේ මොරගස්පිටියෙන් සංක්‍රමණය වූවන්ය. ගමේ නාමය බිහිව තිබෙන්නේ මෙම සංක්‍රමණයත් තල වගා කිරීමත් නිසාවෙනි. කිරිබණ්ඩා මහතාගේ පුරාවෘත්තය ඒ දක්වා දිව යයි.        මොරගස්පිටිය ග්‍රාමය පිහිට තිබෙන්නේ මාතලේ දිස්ත්‍රක්කයේ ගලේවෙල මාර්ගයේ පල්ලෙපොලට නුදුරිනි. මෙම ප්‍රදේශය දේවානම්පියතිසිස රජු දවස දී ඉන්දියාවෙන් සපැමිණි බ්‍රාහ්මණ පෙළපත් වලට වාසභූමි විය.  මාතලේ කඩයිමි පොතේ එය සඳහන් ව ඇත්තේ මෙසේය. ශ්‍රී මහා බෝධීන් වහන්සේ වැඩමවා දුන් කල්හි කැටුව ආ මුදලිහුරු සෝමනාද නාග පට්ටලම හිරකර සිටියාය. ශ්‍රී විෂ්ණු බ්‍රාහමණ රාළ අලුවිහාරේ පොරොත්තුව හිටියාය. ශ්‍රී රාම බ්‍රාහ්මණ රාළ රත්වත්තේ පොරොත්තුව හිටියාය. සොලංග්‍රී බ්‍රාහ්මණ රාළ හුලංගමුවේ පොරොත්තුව හිටියාය. කොටුදෙය්‍ය බ්‍රාහ්මණ රාළ කොටුවේ ගෙදර පොරොත්තුව හිටියාය. ශ්‍රී දත්ත බ්‍රාහ්මණරාළ ගෙනා ධාතූන් වහන්සේ දකුණු දිශාවේ දාගැබ කරවා මොනරුවෙල පොරොත්තුව හිටියාය. අකුරන්බොඩ රාළ ගෙනා ධාතූන් වහන්සේ නැගෙනහිර දාගැබ කරවා එම අකුරන්බඩ පොරොත්තුව හිටියාය. කොස්වත්තේ රාළ ගෙනා ධාතූන් වහන්සේ නැගෙනහිර දාගැබ කරවා කොස්වත්තෙ පොරොත්තුව සිටියාය.  මොරගස්පිටිය රාළ මෙහි සඳහන් අකුරන්බඩ රාළ ගේ මස්සිනාය. අකුරණ දේශයෙන් පැමිණ මෙහි වසම ලැබ සිටින කල්හි ගෙනා ධාතූන් වහන්සේලා තැන්පත් කොට කළ අකුරම්බොඩ දාගැබ මෙන් දාගැබ් තුනක් බඳවන්නට මෙම පිරිස කටයුතු කළහ. වර්තමානයේ ඉතිරිව පවතින්නේ කොසොන්පුර රාළ කරවූ මුතු කොළ මුදුන දාගැබ පමණකි.



     ගමිණී අභය නොහොත්  ගැමුණු රජතුමා එළාර රජු ජය ගන්නට මයියංගනයේ සිට විජිතපුර දක්වා යන ගමනේ දී ජය ගත් එක් බලකොටුවක් පිහිටා තිබුණේ අකුරම්බඩය. එය පාළියෙන් අන්තරා සොබ්බ යනුවෙන් ද සද්ධර්මාලංකාරයේ අතුරඹ යනුවෙන් ද දක්වා ඇත. මෙම අතුරඹ බල කොටුව ජය ගත් ගැමුණු රජු එම සටන වස්ථාවේ දී ජීවිතක්ෂයට පත් මහාතුණ්ඩ නමි දෙමළා සිහිවන්ට තුණ්ඩාරාමය යයි විහාරයක් ද කරවූ බවජනප්‍රවාදයේ සඳහන්ය.     දෙවනි රාජසිංහ රජු ලන්දේසීන් සමග කරන යුද්ධයේ දී මෙම ඉතිහාසය සොයා බලා පයියාගල රාළ වැනි රාජ හිතේෂීවන්තයින්ට  මාතලේ දිශාව ලබා දී සේනාව රැස් කරන්නට අණ කරන ලද්දේය. එහෙත් රාජසිංහ රජු උභය කුල පාරිශුද්ධ නොවන බැවින් මෙහි සිටි මුදලි වරු රජුට පක්ෂපාත නොවීය. එසේම පත් කරන ලද දිශාවට  සේනාව රැස් කරන්නට ද ඉඩ නුදුන්නේය. ත්‍රිකුණාමල බලකොටුව ජය ගැනීම පිණිස ගල්ඔය කඳවුරු බැඳගෙන සිටි රජු මෙයින් උදහසට පැමිණ පෙරකී බ්‍රාහ්මණ පරම්පරා වලින් පැවතෙන කිරිඔරුවේ රාළ අකුරම්බඩරාළ රුසිගම රාළ කිනිගම රාළ දඹරාවේ රාළ බෝවත්තේ රාළ ආදී මුදලි වරු පදවි වලින් ඉවත් කොට එම ගම් විෂ්ණු නාථ ආදී දේවාල වල ගබඩාගම් බවට පත් කරන ලද්දේය. අකුරම්බඩ වැව ආසන්නයේ ඔලගම් වත්තේ  විෂ්ණු දේවාලයට අයත් ගබඩාගමේ වී අටුව පිහිටා තිබූ අතර අටුව බාර රාජකාරිය පවරා දී තිබුණේ තලකිරියාවේ පරම්පරාවකටයි. වසමේ රාජකාරියෙන් ඉවත් කොට ඇතැම් විට ජීවිතක්ෂයට පත් කරන ලද මුදලි වරුන් ගේ ඥාතීන් මේ වනවිට රජු හා නොමනාපයෙන් පසු වූහ. එසේම තම වසම් වල ඇතිවූ විපර්යාසය නිසා ගමි වාසීන් ට ඇතිවූ දුක් ගැහැට ද දැන සිටියහ.

     අකුරම්බඩ රාළ ගේ මස්සිනා ගේ පරම්පරාවෙන් පැවතෙන මොරගස්පිටිය එවක එහි සිටි ප්‍රබල රදළයෙකු විය. එම පරම්පරාව ගැන කියැවෙන ජන කවියක එදා එම ප්‍රදේශයේ නිළමේ වරුන් අතර තිබූ සමිබන්ධය  සඳහන් කර ඇත.   ඇහැලේපොළය ගලගම දේදුනු පිටිය-මඩුවන්වෙල ජයබිම මැද්දේ කැටිය-කැප්පෙටිපොල ඒදුම මොරගස්පිටිය-අගුණාවලය වල්ගම යස කෙම්පිටිය. යනුවෙන් කියැවෙන  අතර යථොක්ත මොරගස්පිටිය රාළ එදා   දෙවනි   රාජසිංහ රජුගේ උදහසට පාත්‍ර නොවුනද සිය ඥාතියාට කළ ආරෝව නිසා කෝපයට පත් ව උන්නේය. දිනක් මහ රාත්‍රියේ අකුරම්බඩ ඔලගම වත්තට වැදුණු ඔහු ඇතුළු පිරිස අටුව කඩා වී එළියට ගෙන ඒවා නින්දගමේ ජනතාවට බෙදා දුන්නේය. ඉන් පසු ස්වකීය හිතැසි ඥාතීන් පිරිසක් සමග වල් වැදුණු මොරගස්පිටිය රාළ කිරිඔරුව ඔස්සේ දඹුල්ලට ගොස් එවකට දඹුලු විහාරයේ වැඩහිටි නායක ස්වාමීන් වහන්සේ බැහැ දුටුවහ.   

    නායක ස්වාමීන් වහණ්සේ සමග මාතලේ රදළයින්ට තිබූ ඥාතීත්වය මෙම අවදියේ ඉතා ප්‍රබල විය. රාජද්‍රෝහී වුවද විහාර ස්ථානයකදී කවරෙකුට වුවද අභය ලැබීම සම්ප්‍රදායයි. දඹුලු විහාරයට අයත් රාජකාරි ඉඩම් අතරින් තලකිරියාගම මෙම අනාථ වූවන් සනාථ කරවිය හැකි සශ්‍රීක භූමියක් බව නායක ස්වාමීන් වහන්සේ දැන සිටියහ. එම නිසා රාජකාරියට යටත් කොට මොරගස්පිටිය පරම්පරාවට තලකිරියාගම පදිංචිව සිටීමට අවසර ලැබුණි.

        තලකිරියාගම ගම් වාසීන් තල සිය ප්‍රධාන ආර්ථික භෝගය බවට පත් කර ගත්හ. යල් කන්නයට වැටෙන තල වැස්සෙන් පෙඟෙන ගොඩ කරයේ තල වගා කරමින් ඔවුහු සිය ජීවිකාව සරු කර ගත්හ. තල ගසේ මල් පිපෙන සමය ඔවුන් ගේ ජීවිත වලද වසන්තයයි. බක් මහේ අලුත් අවුරුද්ද ගෙවී වෙසක් මහ ලබන කාලයේ තල මල් රැගෙන දඹුලු විහාරයට ගෙන ගොස් පූජා කිරීම සුලභ දර්ශනයක් විය. දඹුලු විහාරයේ අලුත් සහල් මංගල්ලය ද මෙම රාජකාරි ඉඩම් වල ජීවත් වන ජනතාව එකමුතු කල අවස්ථාවක් විය.  පෙරහැරින් ගම වටා යන කරත්ත කරුවන් දඹුලු විහාරයට වඩම්මවන ලද අපූරු පූජාවක් ද මේ අතර විය. ඒ විශාල තල ගුලියකි .

       බඩ ඉරිගු කුරහන් තල ආදී කටුසර භෝගයන් ගෙන් සශ්‍රීක වූ  තල කිරියාගම විසිවන ශත වර්ෂයේ මුල් භාගය වන විට මහා පරිවර්තනයකට පත් වෙමින් සිටියහ.  දඹුලු විහාරය වන්දනා කිරීමත් වට වන්දනාවේ යාමත් සිංහල බෞද්ධයින් ගේ අගනා සිරිතක් බවට පත් වූයේ එවක ඇතිවූ බෞද්ධ ප්‍රබෝධය හේතු කොට ගෙනයි. ඒ හෙයින් දඹුල්ල කුරුණෑගල පාරේ තලකිරියාගම පාර දෙපැත්තේ කඩ තට්ටු කීපයක් තබා තල කුරහන් මගින් කරන ලද වෙළෙදාම මෙලෙස වට වන්දනාවේ යන පිරිස් අතර ඉතා ජනප්‍රිය විය.  ඔවුහු දඹුලු ගලේ නැගීමට ප්‍රථම පාර අද්දර සිය වාහන නවත්වා තල ගොවීන් ගේ නිෂ්පාදන මිළදී ගැනීමට උත්සුක වූහ. මුදල් භාවිතය සමිබන්ධව එතරම් වටිනාකමකින් කටයුතු නොකළ ඒ යුගයේ ඉතාමත් අඩුලන්සුවකට තල හෝ කුරහන් මිළදී ගන්නට වන්දනා කරුවන්ට හැකි විය.                                                 දඹුලුත් ගොසින් පේවී වැඳලා එන්නේ - තල ගොවියන් මරා රවටා බඩු ගන්නේ යයි ජන වහරට කථාවක් එක් වන්නේ මෙලෙසය. සැබැවින්ම ඓතිහාසික සත්‍ය සිදුවීම් ගණනාවනට මුහුණ දුන් ජනතාවක් තවත් පරම්පරා ගණනාවකට පසු සිය අනන්‍ය වූසංස්කාතික රටාවෙන් බැහැරව දඹුල්ලේ වෙළෙද ප්‍රවාහයට එක්වී සිටින ආකාරය අද දැක බලා ගත හැකිය. ඔවුන් ගේ ජීවන රටාව තුළ ඇති සැබෑ ලෙන් ගතු කම ඉස්මතු කරවිය හැකි හෘදයාංගම සම්බන්ධතාවයක් ඇති නොවන තරම්ය. එවැනි පරිසරයක තම පරම්පරාගත ඉතිහාසය තුලින් හෝ පන්නරය ලැබීමෙන්  ජාතික අභිමානයක් බිහි වුවහොත් සැගවුණු ලෙන්ගතු කම තිගැස්මක් වනු නිසැකය.

                  

                                                            මතුගම සෙනෙවිරුවන්

 

 

 

 

මෙම ලිපියට කරුණු සැපයූ අකුරමිබොඩ බී.එමි සෝමතිලක ආරචිචි මහතාට ස්තූතිය පළ කරමි.

Wednesday, September 1, 2021

පොලොන්නරු ධනපති ඇච්චනි වැව් මව් කෙළසීම නවත්වව්

 

 

 


                        

          උපතිස්ස රජු විසින් සතරවන සියවසේ තැනූ තෝපාවැව බැම්මේ අපරාධයක් සිදු වෙමින් පවතී.බැම්මේ අගිස්සේ රළපනාව වෙනස්කරමින් ඇවිදින මංතීරුවක් සාදන්නට නාගරික සංවර්ධන අධිකාරියත් වාරිමාර්ග දෙපාර්තමේන්තුවත් උත්සාහ දරමින් සිටී.මේ හෝරාව යක්ෂයාගේ හෝරාවයි.වසංගතය පතුරවමින් බිහිකර ඇති ශාපය පරාක්‍රම සමුද්‍රයේ දෙවියන් සක්මන් කරන තැන සිට දෙගුණ තෙගුණ වෙමින් පුළුල් වන්නට ඉඩ කඩ යෙදී තිබේ.මේ බලධාරීන්ට දෙවියන්ගේ හාල් කැවිලා දැයි කෙනෙකු ප්‍රශ්ණ කර තිබේ.සැබවින්මමේ ශාපය තමන්කඩුව හා රජරට හරහා පතිත වුවහොත් ගොවි ජනතාවට සුණු සාල් වත් නොමැති වනු නිසැකය.  කන්තලේ වැව් බැම්ම කඩා දමා එදා 1986 දී ආර්.ප්‍රේමදාස කළ අපරාධය මේ අවස්ථාවේ දී යලි මතක් කරගත යුතුය.

     දෙවන උපතිස්ස රජු තෝපාවැව සකස්කරන ලද්දේ එවකට පැවති නියඟය තුළ තිබූ අභියෝගයන් ජය ගැනීම සඳහාය. පරාක්‍රම සමුද්‍රයේ වඩාත්ම ගැඹුරු ප්‍රදේශය පිහිටා තිබෙන්නේ තෝපා වැවේය.මෙය හුදෙක් ඉංජිනේරුමය කාර්යයක් පමණක් නොවීය.පුලතිසි සෘෂි භාෂිතය අනුව යමින් කළ ආධ්‍යාත්මික මෙහෙයුමක් වන්නට ඇත.ඒ නිසාම හතරවන සියවසේ සිට අද දක්වාම මෙම තෝපා වැව බිඳී ගොස් නැත.බ්‍රිතාන්‍ය පාලන සමයේ දී 1936 දී තෝපා වැව ඔබ්බෙන් තිබූ එරමුදු වැවේ කඩාඬුව පිළිසකර කොට 1944 දී මුල් වරට පරාක්‍රම සමුද්‍රය යළි පුරවන ලද්දේය.මෙහි වැඩ අවසන් කරන ලද්දේ 1948-52 කාලවකවානුව තුළදීය.1978 සුළි සුළඟින් පසු 1979 සිට වැව් බැම්මේ රළපනාව යලි සකස් කරන ලද්දේය.ඒ සඳහා ගල් කියුබ් 45000 ක් යොදවා ගෙන ඇතැයි කියති.උපතිස්ස රජුත් මහා පරාක්‍රම බාහු රජුත් මේ මහා ජලස්කන්ධයෙන් බලාපොරොත්තු වන ලද්දේ හාත්පස පැතිරී ගිය මහා නිම්න භූමිඅස්වද්දා බත සරි කර එවකට පැවති යුද්ධ වලදී අවශ්‍යතාවය වන ආහාර ස්වයංපෝෂිත බව ඇති කරලීමටය.නමුත් නිශ්ශංකමල්ල රජු වැවට සමීපයේ මාළිගයත් රාජ සභාවත්  සෑදීම කරණ කොට එවකට පැවති පොලොන්නරු නගරය නාගරික වශයෙන් පුලුල් කරන ලද්දේය.එහිදීද වැවක තිබෙන නිර්මිතයන්ට කිසි විටක හානි පමුණුවා නැත.ඒ වෙනුවට පරාක්‍රම සමුද්‍රය පිරී ඉතිරී යන විට වැවෙන් රාජසභාව පැත්තට විවර වන තඩාගයක් නිර්මාණය විය.අද එහි සොරොව් සහ නටබුන් දක්නට ඇති නමුත් තඩාගය නැත.මහපාර තැනවීමේ දී එය විනාශ වී තිබේ.

    නිශ්ශංක මල්ල රජු පවා වැවේ නිර්මිතවලට හානි නොකරන්ට ඇත්තේ වැවක ඉහත්තාව නොහාත් තාවුල්ල පැන්නුම රළපනාව වැව් බැම්ම මෙන්ම බිසෝ කොටුවද වැදගත් ස්තානයන් ලෙසට සැලකීමෙනි. ඒවා වෙනස් කරලීමට හෝ විකෘති කරලීමට පැරණියන් කිසිවිටක උත්සාහ නොකළහ.මහ වැව් ඉස්මත්තේ තිබෙන වැව් එල්ලංගා පද්ධතිය ඔවුහු පණ මෙන්ම ආරක්ෂා කරන ලදහ. පරාක්‍රම බාහු සමයේ දී අමුණු 165 ක් ගොඩ නන්වන ලද්දේ යැයි කියති. මේ අමුණු සියල්ල ඉතා සරල තාක්ෂණයෙන් යුක්ත නිර්මතයන් විය.අංගංමැඩිල්ලෙන් හරවන ලද ජලය පරාක්‍රම සමුද්‍රයට ගලා එන්නේ මේ සරල ශිල්පීයාව අපට පසක් කර දෙමිනි.      පොල‌ොන්නරුවේ තෝපා වැව කෙළවරේ පවතින පුලතිසි ප්‍රතිමාව දෙස් විදෙස්හි පතළය.එය අපගේ සෘෂි භාෂිතයේ සංකේතයයි.එතැන බැම්මේ කෙළවර වර්තමාන තානායම දක්වා භූමිය සැබවින්ම ශුද්ධ භූමියකි.වැව් බැම්මේ තිබෙන පත්තිනි දේවාලයත් එහි කරන පූද පූජා අදියත් පරාක්‍රම සයුරෙන් ජලය ලබා ගන්නා ගොවි ජනතාවගේ දෛනික ජීවිතයේ අංගයන් වෙති.

 

 

 

ඇතැමෙක් පවසන පරිදි මේ වැව් බැම්ම දිගේ ඇතම් විට දේවතා එළි ගමන් කරති.එවැනි තවත් ස්ථානයක් වන්නේ තිවංක පිලීමගෙයයි.එහිද මේ වන තෙක්ම දේවතාවුන්ට සැරි සැරිය හැකි පූජනීයත්වයක් තිබේ.මෙවැනි ශුද්ධ වූ පරිසරයක පිහිට තිබෙන වැව් බැම්ම මත සුදු දිසාපතිවරයාගේ නිල නිවස සාදන ලද්දේය.ඉන්පසු එය තානායම බවට පත් විය. මේ නිර්මිත  ප්‍රථම වරට කෙළසන ලද්දේ එලෙස ඉංග්‍රීසීන් විසිනි. ඔවුහුවැව නැවත ප්‍රකෘතිමත් කළද මේ පූජනීය පරිසරය විකෘති කරන ලද්දේය.නමුත් එදා සිට මේ පරිසරය ඊටත් වැඩිමනත්ව විකෘති කිරීමටලක ලක් නොවිණ. නවනගරයත් කදුරුවෙලත් වන්දනා කාරුවන් නිසාම යැපුණි.මේ නගරය නවීන අංගගොපාංගයන්ගෙන් සමන්විතව වැඩි දියුණට පත් කරන ලද්දේ පොලොන්නරු මහජනමන්ත්‍රී වරයා වූ හිටපු ජනපති වරයාගේ අතිනි.හුදකලාව පැවති නව නගරයත් කදුරුවෙලත් යා කරමින් නවීන මාර්ග ආදී යටිතල පහසුකුම් සංවර්ධනය විය.මින්නේරිය වැව් රක්ෂිතයත් එහි පවතින කුලුවැව් පද්ධතියත් විනාශ කරන ලද්දේද මේ දේශපාලනඥයන් විසිනි.එහි පැවති වීර මොර පලු වැනි අගනා ශාක විනාශ කරනු ලැබූ අතර ඒ වෙන්නට තේක්ක සිටුවනු ලදහ.      2012 වර්ෂය වන විට මේ දෙශපාලනඥයන් පරාක්‍රම සමුද්‍රය අවට භූමි භාග තමන්ගේ අත්අඩංගුවට ගන්නට විය.එසේම වැව් හෑරිල්ලට අවශ්‍ය ව්‍යාපෘති සකස් කර ගනිමින් විශාල ‌ඩෝසර සහ ට්‍රැක්ටර යොදා ගනිමින් වැවේ වැලි ඉවත් කර ගන්නා ලදහ.

       වැව් හෑරිමට සහ ඒ අවට දියුණු කරලීමේ අනෙක් අරමුණ නම් වැව් තාවල්ලේ සහ බැම්මේ සංචාරක හොටල් නඩත්තු කරලීමයි. දැනටමත් ගිරිතලේ පරක්‍රම සමුද්‍රය වැනි වැව් වල මෙලෙස හෝටල් ඉඳි කර තිබේ. පරක්‍රම සමුද්‍රයේ එරමුදු වැව ආසන්නයේ එහි කලිඟු බැම්මේ ඉහත්තාවේ සකස් කර තිබූ පැරණි අරලිය හෝටලය වැවේ ගිල්ම දක්වා තවත් පුලුල් කර තිබේ. මේ නිසා වැව පිරුණු කල්හි හෝටලයේ තණ තලාව ජලයෙන් යටවෙයි. මෙහිදී අදාළ හෝටලය හිමි කර ගෙන තිබෙන පුද්ගලයා විසින් ප්‍රදේශයේ වාරිමාර්ග බලධාරීන්ට  දේශපාලන බලපෑම් ඇති කර ජලය අක්කර අඩි විසිදහසක් පමණ අඩුකර ලීමට ක්‍රියා කර තිබුණි. පරාක්‍රම සමුද්‍රයේ වැව් ගිල්ම යටතේ තවත් හෝටලයක් ප්‍රදේශයේ ප්‍රබල දේශපාලනඥයෙකු විසින් දැනට ඉඳිකර ගෙන යමින් පවතී

            පොලොන්නරුව නාගරික වශයෙන් දියුණු කරලීමට ගත් උත්සාහයේ ප්‍රථිපලය වූයේ මුදල් හා තනතුරු බලය තිබෙන ව්‍යාපාරිකයන්ගේ සහ දේශපලානඥයන්ගේ වෙනම බමුණු කුලයක් බිහි වීමයි. කොළඹ අධ්‍යාපනය ලැබීමෙන් හෝ තම ව්‍යාපාරික බලය පදනම්ව නැගුණු මේ පන්තිය අද ගොවීන් ගේ දරුවන්ට වඩා ඉහළින් වැජඹෙති.කෙතේ කමතේ ට්‍රැක්ටරයේ දහදිය හෙළමින් බත සරිකරලීමට වෙහෙසෙන ගොවි පන්තියේ දරුවන්ට වඩා මේ ඇච්චන්ට ඉහළින් වැජඹෙන්නට අවශ්‍ය වේ.ඒ ඇතැම් විට කොළඹ පුරුද්දටය.නිරුවත් දෛයින් තණ පලසක පවා ගමන් කළ නොහැකි ඔවුන් ජොගින් සූෂ් දමාගෙන ජොගින් ට්‍රැක් වලට දිව යන්නට පුරුදු වී සිටිති.ඒ පස්සේ තුවා වතුර බෝතල් අරන් දුවන ආරක්ෂකයන් ද නැතිවා නොවේ.මේ ඇච්චන්ට දොස් කිව නොහැකිය. උන්ගේ අප්පලා පොලොන්නරු ගොවීන්ගේ සාරය උරාබී තර වූවන්ය..පොලොන්නරුවේ දුප්පත්කම වී වලට නිසි මිලක් නැති කමය.වරක් මේ ගොවීහු වස බීහ.

 

 

 

 

දැන් තෝපාවැව කණ්ඩිය හාරා ඇවිදින මංතීරුවක රුදාව හට ගෙන තිබෙන්නේ ගොවීනට නොව පෙර කී ඇච්චන්ට සහ උන්ගේ අප්පලාටය.ඔවුන්ට මේ මංතීරුව ගොවීන් ගේ කෘෂි පාරකට වඩා වැදගත්ය.මෛත්‍රීපාල සිරිසේන මහතා මෙහිදී විරුද්ධත්වය ප්‍රකාශ කර තිබුණද ඔහුද අදාළ සංවර්ධන කමිටු වල සිටින්නට ඇත. රුපියල් මිලියන එකසිය දහනමයක් යනු කජු ඇට කොස් ඇට නොවේ.සැලසුම් කළවුන්ට මෙන්ම කරවන්නනන්ටද හොඳ ඉල්ලමකි.ගෙවල් කීපයක් හදන්නට සිමෙන්ති ද  රැස්කර ගත හැකිව තිබේ.

     එහෙත් අතීයේ සිටි වාරි නිළධාරීන් එසේ නොවේ ඔවුහු තමන්ගේ පුද්ගලික ජීවිතයද කැප කරමින් වැව ආරක්ෂා කළහ. 1936 වකවානුවෙහි එරමුදු කපොල්ල අලුත් වැඩියා කරන විට එය භාරව සිටියේ සමන්තුරේ ඉස්මයිල් නම් මහතෙකි. මේ කාලයේ ඔහු මේ වැඩේ පිළිබඳව දැඩි උනන්දුවකින් කටයුතු කරන ලද්දේය.මේ කාලයේ ඔහුලේ පුත්‍රයා අසනීප වී යැයි ඔහුට පණිවිඩයක් ලැබුණි. ඔහු අලුත්වැඩියාව අතරමග නිවසට නොගියේය.අනතුරුව දරුවා මිය ගිය බවද ආරංචි වුවද වැඩය අවසන් කිරීමේ දැඩි අධිෂ්ඨානයෙන් සිටි ඉස්මයිල් මහතා පැය විසිහතරක් ඇතුලත අවසන් කටයුතු සිදුවන බව දැන දැනද පුත්‍රයාගේ අවමගුල සාභාගි වීමට නොගිය බව පැවසේ.ඒ කැප කිරීම නිසා පසු කාලයේ ඔහු වෙනුවෙන් විශේෂ සැමරීමක්ද කර තිබේ. මේ පරාක්‍රම සමුද්‍රයේ මෑත අතීතයයි.අද සිටින නිළධාරීන් එසේ නොව්. ඔවුහු දේශපාලනඥයන්ට ව්‍යපාරිකයන්ට නතු වී තමන්ගේ රාජකාරිය පාවා දෙති.තෝපාවැව වැව්බැම්මේ පූජනීයත්වයට වඩා ඔවුනට ඉංජිනේරුමය කාර්යයන් ඉතා වැදගත්ය.

මතුගම සෙනෙවිරුවන්

 

Wednesday, August 11, 2021

එන්නත් බලහත්කාරය සමාජ දේශපාලන සුන්නතක ආරම්භයක් ද

 

 

 


                     

         කොරෝනා  වසංගත තත්වය යටතේ මේ වනවිට ලංකාවේ විශාල වශයෙන් අසාදිතයන් වාර්තා වීමට පටන් ගෙන ඇත. පසුගිය සිංහල අවුරුද්දෙන් පසුව වේගයෙන් ව්‍යාප්ත වූ මේ තත්වය පාලනය කර ගැනීමට ආණ්ඩුව සමත් වී නැත.වසංගතය පාලනය කරලීමට තිබෙන එකම විසඳුම එන්නත් කර ගැනීම යයි ජනපති වරයා පුන පුනා පවසයි. පවතින තත්වයේ හැටියට ඉන් පලක් වී නැත. එන්නත් මාත්‍රා දෙකම ලබා ගත් පුද්ගලයන්ද විශාල වශයෙන් ආසාදනයට ලක් වන බවට නිතිපතා වාර්තාවේ. එසේම මරණයට පත් වූ පිරිස් ගැනද වරින් වර වාර්තා වී ඇත.එන්නත් ලබා ගත් පුද්ගලයන් ගේ ශරීර තුළ ස්වයංව විවිධ ප්‍රභේද හට ගන්නා ආකාරයද නිරීක්ෂණය වී ඇතැයි මේ පිළිබඳව සමීක්ෂණයන් කළ වෛද්‍යවරු පවසයි. නමුත් මෙම තත්වය පිළි ගැනීමට ආණ්ඩුව මැළි වී තිබෙන අතර නිරෝධායන නීති පදනම් කොට ගෙන ජනතාව පීඩාවට පත් කීරීමද දිගින් දිගටම සිදු වේ. ඒ අතර එන්නත් නොගත් සියලු දෙන අනිවාර්යෙන්ම එන්නතකරණයට ලක් විය යුතු බවටද රජයේ ප්‍රකාශයකයන් පවසයි. එසේ සිදු නොවුණහොත් බස් රථ වල ගමන් කිරීමද රජයේ ආයතන වලට ඇතුල් වීමටද පළාත් අතර ගමන් කිරීමට අවසර නොදීමට නීති ගෙන එන බව ආණ්ඩුවේ නිවේදන වලින් දැක්වෙයි.මෙම තීරණය ආණ්ඩුවේ ස්වයං දේශපාලන තීරණයක්ද නැතහොත් විදෙස් බලපෑමකින් සිදු වූවක්දැයි ගැටළුවකි.

    කොරෝනා වෛරසය චීනයේ වූහාන් වල විද්‍යාගාරයක නිපදවීමක් බවට මේ වන විට තිබෙන සාක්ෂී විශාලය.ජෛව  අවි පිළිබඳ විද්‍යාඥයෙකු වූ ප්‍රැන්සිස් බොයිල් ඒ බව පවසා තිබේ. චීනයේ කරන ලද අත්හදා බැලීමකට ඇමරිකාවේ සී.ඩී.සී. හි ප්‍රධානියා වන ඇන්තනී පවුචි විසින් 2015 දී ඩොලර් මිලයන 3.7 ක්  ලබා දුන් බවද එම විද්‍යාගාරයෙන් එම වෛරසය මුදාහැර ඇති බවටද තිබෙන තොරතුරු ද මේ වන විට වේගයෙන් හුවමාරු වෙයි.කොරෝනා වෛරසය මර්දනයට අවශ්‍ය උපකරණ වලට පේටන්ට් බලපත්‍ර ලබා ගෙන තිබෙන්නේද  මීට වසර කීපයකට පෙර බව සැළ වෙයි.

       කොවිඩ් මර්දනය සඳහා ඇමරිකාව නිපදවන එන්නත් තුනක් වෙයි. එකක් ෆයිසර්ය.දෙවැන්න ජොන්සන්ය.අනෙක මොඩර්නාය.මින් ෆයිසර් බයෝටෙක් නම් එන්නත  MRNA තාක්ෂණයෙන් නිපදවා ඇත.නමුත් මොඩර්නා එන්නතට 060606 යටතේ පේටන්ට් හිමි වී ඇත්තේ  S M 102  ලිපිඩ තාක්ෂණයෙන්  නිපදවීමෙනි. යම්කිසි ජල්ලි විශේෂයක් සහ නැනෝ කොටස් මෙහි අඩංගු බව එම සමාගම ප්‍රකාශ කර තිබේ. මෙම එන්නතේ නිර්මාණ කරුවා බිල් ගේට්ස්ය.ඔහු යටතේ පාලනය වන ඖෂධ සමාගම මගින් මෙම එන්නත නිපදවා ඇත්තේ කොරෝනාව මර්දනය කිරීමට එහා ගිය යටත් විජිතවාදී ආරමුණකින් බව විද්‍යාඥයන්ගේ මතයයි. ඩෙල්ටා ලැම්ඩා එප්සයිලන් ආදී වශයෙන් නොයෙකුත් ප්‍රභේද ලංකාවට පැමිණෙන්නට ඉඩ සලස්වා එන්නත ගැන බිය ඇති කර අවසානයේ ලිපිඩ ජල්ලිය  සහිත මොඩර්නා එන්නත ලබා ගැනීමට මානසික පසුබිම  සාදන ආකාරය නිරීක්ෂණය වන බව  විද්වතුන් පවසයි. එන්නත් නිසා ඇති වන විපර්යාසයන් පිළිබඳ වෛද්‍ය ගාමිණී අභය මහතා දක්වා ඇත්තේ මෙවැනි අදහසකි .    . RNA, DNA වෙනස් කරන එන්නත් කළ අයගේ ශරීරවල නොයෙකුත් ප්‍රභේද නිපදවෙන බව ඒඩ්ස් වෛරසයේ ව්‍යුහය සොයාගෙන නෝබල් ත්‍යාගය දිනාගත් ප්‍රංශ වෛරස පිළිබඳ විශේෂඥයා පවසා ඇත. 

මීට පෙර ඇති වූ වසංගතවල මෙතරම් ප්‍රභේද නොතිබුණ බව දන්නා කරුණකි. එක් ප්‍රභේදයකට දුන් එන්නත්වලින් තවත් ප්‍රභේදයක් පාලනය කළ නොහැකිය. RNA, DNA වෙනස් කරන එන්නත්වලින් ප්‍රතිශක්ති සෛලවලට දෙන උපදෙස අනුව, ඒ සෛල මුලදී නිපදවන්නේ ප්‍රතිදේහ නොව, වෛරසයේ ඇති ප්‍රෝටීනයි. ඒ නිසා එවැනි එන්නත් කළ අය වෛරස ප්‍රෝටීන කර්මාන්ත ශාලා බවට පත්වී ඇත. ප්‍රතිදේහ ජනක සෑදෙන්නේ පසුවය. තවද ඒ එන්නත් මගින් සෛලවලට දෙන පණිවිඩ අනුව සෛලය එහි සෑදෙන වෛරස ප්‍රෝටීනවලට පමණක් ප්‍රතිශක්ති නිපදවීමට යොමුකර ඇත. එවැනි අවස්ථාවක තවත් ඊට වැඩිය වෙනස් වෛරසයක් ඇතුළු වුවහොත් ඒ උපදෙස මාරු කිරීමට බැරිය. ප්‍රතිඵලය ඒ අයට අලුත් වෛරසය පහසුවෙන්ම වැළඳීමයි. ඒ නිසා එවැනි එන්නත් කර ගත් අය අලුත් වෛරසවලට දරුණු ලෙස ගොදුරු වීමය .RNA, DNA වෙනස් කරන එන්නත් ලබාගත් අයට අනෙකුත් වෛරසවලට මුහුණදීමේ නොහැකියාවට විද්‍යාඥයන් විසින් වෛරස ප්‍රතිශක්ති බැහැරවීම (Viral Immune Escape) යැයි කියනු ලැබේ. මෙය අලුත් දෙයකි. එවැනි දෙයක් සිදු වූයේ දීර්ඝ ලෙස නිසි පරීක්ෂණ නොකරන ලද මිනිස් සෛලවල ප්‍රධාන අණදෙනකරුවන් වන RNA, DNA වෙනස් කරන එන්නත් නිසාය.සම්පූර්ණයෙන්ම මරණ ලද වෛරස අඩංගු එන්නත්වල (Killed Vaccines) මේ ප්‍රශ්නය නැත. එන්නතේ ඇති මැරුණු වෛරසයට ප්‍රතිදේහ සැදීමට සෛල උත්තේජනය කරාට පසු වෙනත් අලුත් වෛරසයක් ශරීරයට ඇතුළු වුවහොත් ප්‍රතිශක්ති සෑදීමේ යන්ත්‍රණය (Immunity Producing Mechanism) යම් වෛරසකට පමණක් බලෙන් යොමු කර නැති නිසා අලුත් වෛරසයටද ප්‍රතිශක්ති නිපදවීම සාමාන්‍ය ලෙස සිදුවේ. ඒ නිසා අලුත් වෛරසය බෝ වීම අඩුවේ.(Lanka News Web )

     2019 දී මෙම වසංගතය පැමිණීමට වසර හතරකට පෙර නෙදර්ලන්ත රාජ්‍ය සංවිධානයක් සමග එක්වූ විද්‍යාඥයෙකු කොරෝනා සඳහා වන පර්යේෂණ  සඳහා පේටන්ට් බලපත්‍ර ලබා ඇත.එසේම ලෝක ප්‍රකට එන්නත් නිපදවන්නෙකු වන බිල් ගේස්ට් 2018 ඔක්තෝබර්  මාස‌යේ දී නිවියෝර්ක් නගරයේ ඉවෙන්ට් 201 නමින් සමුලුවක් පවත්වා ඇත. එහිදී ඔහු පවසා ඇත්තේ ඉදිරියේ දී ලෝකයම වෙලා ගන්නා වසංගතයක් පැමිණෙන අතර ඉන් මිලියන 30ක් පමණ මිය යන බවයි. ඔහුගේ අවසාන අපේක්ෂාව වී ඇත්තේ තම සමාගමට ලාභ ගෙන දිය හැකි හොඳම නිෂ්පාදනය වැක්සීනය බවයි. ඒ සඳහා සූදනම් වීම අත්‍යවශ්‍ය බවද ඔහු දක්වා තිබේ. රොකපෙලර් පදනම 1913 දී පිහිටවූ ඇමරිකාවේ ප්‍රබල සමාගමකි.තෙල් නිසා බලවත් වූ සමාගමකි.මෙම පදනම ලෝකයේ නොයකුත් ව්‍යාපෘති සඳහා මුදල් යොදවා තිබේ.ලෝක සෞඛ්‍ය කොමිසමට ඔවුහු මුදල් යෙදවූහ.  දෙවන ලෝක යුදධයෙන් පසුව හරිත විප්ලව ක්‍රියාදාමය ආරම්භයට මුදල් යෙදවූ සමාගමක් ලෙසට ද මෙය හැඳින්වේ.. රසායනික පොහොර වලින් සහ පලිබෝධ නාශක  වලින්  සහ අභිජනන බීජ වලින් ආසියාව මෙහෙයවීමට සැලසූම් කරන ලද්දේ මේ පදනම ඇතුලු ඇමරිකාවේ දවැන්තයන් විසිනි. චීනයේ මහජන සෞඛ්‍ය කටයුතු වලටද මෙම පදනම මුදල් යොදවා තිබේ..2010 දී මෙම පදනම අනාගතය සඳහා කෙටුම්පත නමින් ලියවිල්ලක් නිකුත් කර ඇත. එහි සඳහන්ව ඇත්තේ 2020 දී ඇති වන වසංගතයක් සඳහා සූදානම් වීමේ අවශ්‍යතාවයයි. අනතුරුව වසංගතයෙන් පසුව තවත් ලියවිල්ලක් නිකුත් කරන මෙම පදනම නව පාලන පද්ධති බිහි කරන්නේ කෙසේද යන්න සාකච්ඡා කරයි.ඔවුහු අවධානය කරන්නේ එන්නත මගින් මෙම පාලන පද්ධති සම්පූර්ණ කරගත හැකි බවයි. සෑම පුද්ගලයෙකුටම ඩිජිටල් හැඳුනුම් පතක් ලබා දිය යුතු බවත් වැක්සීනය මගින් එම සම්බන්ධීකරණය ඇති කර ගත හැකි ආකාරයද දක්වා තිබේ.මොඩර්නා එන්නත පිළිබඳ තාක්ෂණය විශේෂ වන්නේ මෙය සඳහා යැයි විද්‍යාඥයන් පවසති.

  ජනපති උපදේශක ලලිත් වීරතුංග මහතා ද මෙය පුනරුච්චාරණය කරයි. වැක්සීනය අනිවාර්යයනේම ගත යුතු බවද ඉදිරියේ දී හැඳුනුම්පතක් නිකුත් කිරීම අරමුණ බවද දක්වා තිබේ.කොවිඩ් 19 යනු දේශපාලන අරමුණු සදහා නිර්මාණය කළ ව්‍යාජ වසංගතයක් බව මේ වන විට හෙළි වෙමින් පවතින වකවානුවක ලලිත් වීරතුංග ලා පමණක් නොව අපගේ අභීත රණවිරුවෙකු වූ ශවේන්ද්‍ර සිල්වා මහතාද පලිප්පු දමා ප්‍රකාශ කරන්නේ එන්නතින් තොර විසඳුමක් නොමැති බවයි.එසේම ලංකාවේ සෞඛ්‍ය පීළිබඳ ඇමති වරුන් තිදෙනෙකු සිටින බවද දේශීය වෛද්‍ය ඇමති ඊට අයත් නැති බවද ඔහු ව්‍යංගයෙන් පවසා සිටී.

     ලංකාවේ නව ජනාධිපතිවරයෙකු පත් කරලීමට හැට නව ලක්ෂයක ජනතාව උත්සුක වූයේ රට අධිරාජ්‍යවාදයෙන් බේරා ගැනීමටයි. විශේෂයෙනන්ම ඇමරිකාව ප්‍රමුඛ ලෝක බලවතුන් විසින් අල්ලේ නටවන ලංකාවක් සඳහා රනිල් වික්‍රමසිංහ පාලනයෙහි න්‍යාය පත්‍රය ඉදිරියට ඇදී යද්දී මෙරට ඉඩම් ඇමරිකානු සමාගම් වලට බිලි දීමට කැස කවද්දී ජනතාව එයට එදිරි වූහ.එම රජය පෙරලා සිංහල බෞද්ධ යන්ගේ බහුතර චන්දයෙන් දේශමාමක රජයක් පත් කරගත්හ.නමුත් දැන් ගෝඨභය රාජපක්ෂ කටයුතු කරන්නේ සිංහලයන් අවශ්‍ය නැති විදියකටය. සිංහලයන්ගේ අපේක්ෂා තුට්ටුවකට මායිම් නොකීරීම ඔහුගේ පුරුද්දක් බවට පත් වී තිබේ. සිංහල වෙදකම විසින් වසර දහස් ගණනක් තිස්සේ මෙරටේ සෞඛ්‍ය පිළිබඳ තීරණ ගනිමින් තිබියදී.ඔහුගේ කොවිඩ් මර්දන බලකායට එකදු දේශීය වෛද්‍යවරයෙකු යොදවා ගත්තේ නැත.නිරෝධායන නීති වෙනස් කොට දේශීය වෛද්‍යවරුන්ට කොවිඩ් සඳහා වෙදකම් කිරීමට අවසර ලබා දීම කළ යුතු යැයි ඉල්ලා සිටියද ඒ කිසිවකට කන්නුදුන්හ. අන්තිමේදී ආයුර්වේද රෝහල් වල ප්‍රතිකාර වලට පමණක් අවසර ලැබුණේ. බටහිර වෛද්‍යවරුන්ගේ අධීක්ෂණයට පත් කරමිනි.මේ වන විට එම රෝහල් වල ප්‍රතිකාර ලැබූ කිසිවෙකුත් මිය ගොස් නැත.සියලුම දෙන සුව වී නිවෙස් බලා ගොස් තිබේ.

     මෙහිදී අප තේරුම් ගත යුත්තේ ජනපතිවරයා නොදැනුවත්වම විදේශීය කුමන්ත්‍රණයකට හසුවී තිබේද යන්නයි. ටැන්සානියාවේ මුරුන්ඩි වල සහ හයිටි වල ජන නායකයින් ඝාතනය පත් වී ඇත්තේ ලෝක සෞඛ්‍ය සංවීධානයට අවශ්‍ය පරිදි ඒ රටවල කටයුතු කරලීමට ඉඩ නොදීම නිසාය.එ වැනි බයක් අපගේ ජනාධිපතිවරායාටද තිබෙනවා විය හැකිය.එසේත් නැතිනම් ඔහු කෙලින්ම ඇමරිකානු න්‍යාය පත්‍රයකට නතු වී කටයුතු කරනවාද විය හැකිය.එන්නත් අනිවාර්ය කිරීමද පොදු ආයතන වලට බස්රථ වලට කෝච්චි වලට ඇතුලු වීම වළක්වන නීති ගෙන ඒම ඇමරිකානු න්‍යාය පත්‍රයේ කොටසකි.එය චීනයද අනුමත කරනවා විය හැකිය.මානව හිමිකම් උල්ලංඝණය කරන මෙවැනි ගෝත්‍රිත නීති හිට්ලර් විසින් ද පනවන ලදී. ඔහු මනුෂ්‍යයන් යොදවා විවිධ විද්‍යා පර්යේෂණ කරන්නට උත්සාහ ගත්හ. ලෝක යුද්ධයෙන් පසුව නියුරන්බර්ග් කෝඩ් යනුවෙන් නීති සංග්‍රහයක් ඇති කර ලද්දේ මිනිසා ජෛව පර්යේෂණ සඳහා යොදවා ගැනීම වළක්වාලීමටයි.හරිහැටි පර්යේෂණ නොකරන ලද එන්නත්කරණය නිසා අද ලංකාවේ ජනතාව පර්යේෂණාගාර මීයන් බවට පත් වී සිටිති.කොවිඩ් වල ප්‍රභේදයන්ට එන්නත වැඩ කරන්නේ කෙසේදැයි සෙවීමට කොවිඩ් 19 තොරතුරු මධ්‍යස්ථානයක් පත් කරතිබෙන්නේ ලෝක සෞඛ්‍ය සංවිධානයේ අධාර මගිනි.නියුර්න්බර්ග් නීති සංග්‍රහයද බීජිං ප්‍රඥප්තියද (දේශීය වෛද්‍යක්‍රම මගින් ලෙඩ සුව කර ගැනීම )ගෝඨාභය ආණ්ඩුව ගාණකට නොගන්නා බව පෙනේ.නමුත් මිය යන්නේ අසරණ මිනිසුන්ය.මෙරට සෞඛ්‍ය හැසිරවිය යුත්තේ දේශජ දැනුමකින් බව දැන්වත් පාලකයන් තේරුම් ගත යුතුය.

මතුගම සෙනෙවිරුවන්

Wednesday, August 4, 2021

බුලත් හුරුල්ල පැළවීමේ කථාව

 

                                       

            ගජබා රජ්ජුරුවන්ගේ කාලයේ නීල මහා හෝධයා සමග දකුණු ඉන්දියාවට ගොහින් ලංකාවෙන් ගෙන ගිය සෙබළු දොළොස්දාහ වෙනුවට තවත් දොළොස්දහක් කැටුව ලංකාවට පැමිණි කථාව අනුව රටේ  තැන් තැන්වල ඒ අය පදිංචි කළා. පස්යොදුන් කෝරළයේ මහපත්තුවේ අගලවත්තට නුදුරුව තිබෙනවා ඔලීගේවත්ත කියල තැනක්. මේ කියන සොළින්ගෙන් පැවත එන්නන් එහි හිටිය කියලයි ජන ප්‍රවාදයේ එන්නේ. ඔය කියන කාලයේ පත්තිනි දේව වන්දනාව පිලිබඳ හැඟීම ජනතා සිත්සතන් තුළට කාන්දු වුණ බව ද ඇත්තයි. ඔය කියන්නේ ක්‍රි.වර්ෂයෙන් දෙවැන්නේ. බෙල්ලනත් අගලවත්තත් අතර තියන තෙලහිටියාව කියන හරියට පේනවා විශාලගල් කුලක්. එයට කියන්නේ උස්ගල කියලයි. මේ උස්ගල මුදුනේ තමයි පැරණි පත්තිනි දේවාලය පිහිටා තිබී තියෙන්නේ. රන් හළඹ මෙහි තැන්පත් කර තිබූ නිසා අදටත් රන්ගල කියලා කියනවා. මේ දේවාල පරම්පරාව හැඳින්වූයේ බෙන්තර මහාසාමි යනුවෙන්. බෙන්තර ගලතුරුමුල සිටලා මෙහිපැමිණි බවයි කියන්නේ. මේ පරම්පරාවේ දයාරත්න කියලා දැන උගත් පුද්ගලයෙක් හිටියා. මෙහි ඉතිහාසය ගැන ඔහු කියන්නේ මෙහෙමයි.

         බෙල්ලන කපු ගම පිහිටි දේවාල කන්ද බෙල්ලන හංදිය නොහොත් රංගෙදර හංදිය අසලයි. දේශීය ජන වහරේදී මේ මේ  කන්දේ උස්ගල මුදුනේ ලංකාවේ පැරණිම සුදුහුණු පිරියම් කල දේවාලය පිහිටා තිබූ බව අසා ඇත.මෙම දේවාල කන්දට බටහිර බෑවුමේ එම දේවාලය බැබළු බ්‍රහ්මචාරී දේව බැතිමතුන් විසූ දේව විමානය නොහොත් සඝගල ඇත.මේ ප්‍රදේශයේ කුඹුරු නම් අතර රාජ පුරන්දරගේ නාමය හමුවෙන්නේ සොළීන් සමග පැමිණි අය නිසයි. මෙම දේවාලයට  අන්ඇදි පිට්ටනියක්ද තිබී ඇත. මේ නිසා රාජ නියමයෙන් දේවාලය සඳහා වෙන්කර තිබූ ඉඩ කඩම් නිසා කපු ගම වූ බවයි කියැවෙන්නේ.

        මෙම දේවාලකන්ද අදටත් හාස්කම් පිරුණු තැනක්. හොඳට පේවී නොගියහොත් අතරමංකරනවා. මීට වසර හතරකට පෙර එවැනි සිද්දියක් වාර්තා වූ බව වත්මන් කපු මහතා පවසා සිටියා. දේවාල මඩුවට කෝටු කපන්නට රන්ගලට ගිය පිරිස අතරමංවෙලා ගාලක පැටලිලා ආපසු එන්නට බැරිව හිඳිද්දී ඔහුට හමු වෙලා තිබෙනවා.   මේ දේවාලය ආරම්භ වූ කාලය පිළිබඳ නිශ්චිතවම කිව නොහැකි වුවත් මීට වසර දෙසීයකට පමණ පෙරදී මෙහි සිටි බෙන්තර මහසාමිලාගේ අර්නෝලිස් පත්තිනි මහතා සිය තේවා කටයුතු කර තියෙන්නේ රන්ගල කන්ද මුදුනේ නොවෙයි. කුමන හෝ හේතුවක් නිසා දේවාල හළන් පහතට වඩම්මවලා කපුගම කියන ගම්මානයේ තැන්පත් කරලා තිබෙනවා. ඉතින් අර්නෝලිස් පත්තිනි හාමි ගේ කාලයේ සිදුවූ හාස්කම් දෙකක් ජනප්‍රවාදයට එක් වෙලා තියෙනවා.

         දවසක් පත්තිනි හාමිට කියලා තේවාවක් කරගන්නට ගැමියෙක් එනවා. පත්තිනි හාමි නිතරම දේවාලයෙ සිටින්නේ නැහැ නොවැයි. ගැමියා බලා හිඳලා ගෙනා බුලත් හුරුල්ල දේවාලය කනප්පුව උඩ තියලා පල්ලම් බැස්සා. සවස් යාමයේ පත්තිනි හාමි ආපසු දේවාලයට පැමිණියා. පැමිණි පසු නිවසට නොයා කෙළින්ම යන්නේ දේවාලයටයි. මෙන්න අපූරු සිදු වීමක්. බුලත් හුරුල්ල පැළවෙලා. මේ පැළ වූ බුලත් වලින් හැදුණු පැළ රාශියක් දේවාලය වටේටම අදත් තිබෙනවා.ඉතින් එදායින් පස්සේ මේ දෙවාලය හුරුළු ගෙදර දේවාලය කියාලයි හැඳින්වෙන්නේ.

        අරනොලිස් පත්තිනි හාමි යහපත් පුද්ගලයෙක්. ඔහු දේවාල රාජකාරි වලට අමතරව ගොවිතැන් කලා. එළවුළු අල භෝග වැවීම මගින් ගෙදර දොරට අවශ්‍ය අඩුම කුඩුම සපායාගත්තා . අමුඩයකින් සැරසිලා කොරටුවේ හිටින පත්තිනි හාමි ඉදිරියේ දවසක් කත්කාරයෙක් පෙනී හිටියා. දුර බැහැරක ඉඳන් එන නිසා පත්තිනි හාමි ඇහුවා ගොයියෝ ඔය කදේ මොනවාදැයි කියලා. සිංහලයන් ගේ සිරිත ඒක නොවැ. ඉතින් කත් කාරයා ගත් කටටම කීවේ. කදේ තියෙන්නේ උඳු කියලයි. උන්නැහේ කිව්වේ කටට ආපු බොරුවක්. කදේ තිබුණේ හාල්. නෑගම් ආපු ගමනක්. ඉතින් මේ කත් කාරයා පත්තිනි හාමිඑක්ක තවත් කථාවට නොවැටී යන්නට ගියා. නෑ ගෙදර ගිහින් කද වහුම් ඇරලා ලිහන්න ලෑස්ති වෙනකොට අපූරු දෙයක් සිදු වෙලා තිබුණා. කත් කාරයා කිව්වා වගේම කතේ පුරෝලා තිබුනේ උඳු. ඉතින් ගෙදර උදවිය ඇහුව මගදි කවුරුත් මුණ ගැහුණද කියලා. අමුඩයකින් සැරසිලා  කොරටුවක වැඩ කරගෙන උන්නු ලොක්කෙක් මුණ ගැහුණා කියලා කිව්වා. ගෙදර අයට කාරණය තේරුණා. මේ හමු වෙලා තියෙන්නේ පත්තිනි හාමි බව දැන ගත්තා. විගැහින් ලෑස්ති වෙලා. අර ගොයියත් කැටුව දේවාලයට ගියා. ගිහින් පඬුරු ඔප්පු කරලා බුලත්දීලා කිව්වා වෙච්චි හරිය. පත්තිනි හාමි හිනැහිලා කීවා මෙහෙම. ආ ඕක ඔය හැටි ගණන් ගත්තේ මොකටදැයි. මට පණිවුඩයක් ඒව්වා නම් ඉවරයිනෙ.ඉතින් කට්ටිය ආපසු ගෙදරටම ආවා. ඇවිත් බැලින්නම් උඳු ටික ආයේ හාල් වෙලා. හුරුළු ගෙදර පත්තිනි දේවලයේ හාස්කම් අදටත් ඔහොම තමයි.

මතුගම සෙනෙවිරුවන්

Friday, July 23, 2021

අධ්‍යාපනයේ කොත ලූ වල කොතලාවල පනත

 

 

                              

අතීත කථාව -

රයිගම රාජධානි සමයේ දී වර්තමාන බණ්ඩාරගම අසල වැව් රාශියක් ඉඳි විය.රජුගේ මාළිගය පිහිටි භූමියේ පිහිටි පොකුණකට පිරිසිඳු ජලය ගෙන ඒමේ අවශ්‍යතාවයක් ඇති විය. මේ යුගයේ දී මාළිගයට නුදුරින් අසු නාවන පොකුණ නමින් තවත් තැනක් විය.ඒ අසල දාගැබක් ද විය. වරක් මේ දාගැබේ කොත අතුරුදහන් විය.පසුව අසුනාවන පොකුණේ තිබී මේ කොත සම්බ වී යැයි පැවසේ. කොත හොරකම් කිරීම භුතයෙකු විසින් කළ වැඩක් ලෙසට මිනිසුන් විසින් විශ්වාසයක් විය. පසුව මේ පොකුණ කොතලූ වල නමින් ද පසු කාලීනව කොතලාවල වැව ලෙසටද හඳුන්වා ඇත.උයන් වත්ත වැව ලෙසට ද ව්‍යවහාර වේ. මේ ප්‍ර දේශයේ සිටි බණ්ඩාර පවුල් වලට පසුකාලීනව කොතලාවල නාමය ඈඳුණ අතර යටත් විජිත සමයේ සිටි ප්‍රසිද්ධ චරිතයක් වූයේ ජොන් ලයනල් කොතලාවල යි. ඔහුගේ පුත්‍රයා වූ ජෙනරල් ජොන් කොතලාවල මේ රටේ තුන්වන අග්‍රාමාතයවරයා වූ අතර කුරුණැගල පාර්ලිමේන්තු පදවිය දිගු කාලයක් හොබවන ලද්දේය. මින්නේරිය ව්‍යාපාරය ඇරඹූණේ මෙතුමා අතිනි පේරාදෙණිය විශ්ව විද්‍යාලය ඇරඹුනේ ද මෙතුමා අතිනි.ඔහුගේ අභාවයට පෙර අක්කර 48 කින් යුතු සිය නිවස වූ කඳවල වලව්ව ත්‍රිවිධ හාමුදාව උදෙසා ආරක්ෂක විද්‍යා ඇකඩමියක්  පවත්වා ගෙන යෑමට  පවරා දුන්නේය

යටත් විජිත සමයෙන් පසු ලංකාවේ මෑත කාලීන අධ්‍යපන ධාරාව ආරම්භ කරනුයේ භික්ෂූන් වහන්සේලා විසිනි. 1869 දී දොඩන්දූව සහ පාණදුරයෙන් ඇරඹුණ මේ පාසල් බෞද්ධ පාසල් ලෙසට හැඳින්වුණි.කර්නල් ඔල්කට් පැමිණි පසු ස්වාමීන් වහන්සේලා සමග එක්ව පරමවිඥානාර්ථ සමාගම ඇති කර ඒ මගින් රට පුරා ඉස්කෝල පද්ධතියක් ඇති කරන ලදී. නැවතත් පිරිවෙන් අධ්‍යාපනය ආරම්භ කිරීමට භික්ෂූන් වහන්සේලා ඉදිරිපත් වූයේද මේ කාලවකවානුව තුළය.  රත්මලානේ පරමධම්ම චේතිය පිරිවෙන විද්‍යෙදය පිරිවෙන විද්‍යාලංකාර පිරිවෙන මෙන්ම දොඩන්දූව කුමාර කන්ද පීරිවෙන එහි මුල් පෙලේ විය.නිදහස් අධ්‍යපන ක්‍රමය ස්ථාපිත වූ පසු කන්නන්ගර මහතා මෙරට තිබූ බෞද්ධ පාසල් රාශියක් දියුණු කිරීමට අත දෙමින් ඒවා මධ්‍ය මහා විද්‍යාල හා බැඳුණු පාසල් බවට පත් කරන ලද්දේය.අනතුරුව 1959 දී විද්‍යෙදය පිරිවෙන සහ විද්‍යාලංකාර පිරිවෙන විශ්ව විද්‍යාලයක් බවට පත් කිරීමට බණ්ඩාරනායක මහතා කටයුතු කලේය.විදුදය ජයවර්ධන පුර විශ්ව විද්‍යාලය බවටත් විද්‍යාලංකාරය කැළණිය විශ්ව විද්‍යාලය බවටත් පත් වූයේය. ජයවර්ධන පුර විශ්ව වීද්‍යාලය දැනට පිහිටා තිබෙන භූමිය පූජ්‍ය වැලිවියේ සෝරත නාහිමියන් ගේ ඉල්ලීම පිරීද  උන්වහන්සේගේ ශිෂ්‍ය පැලියානේ සුනේත්‍රා දේවී පිරිවෙනේ පූජ්‍ය මැදගොඩ සුමනතිස්ස හිමියන් විසින් පරිත්‍යාග කරන ලද්දකි.පිරිවෙන්  විශ්ව විද්‍යාල බවට පත් වන අතර 1962 දී පාසල් රජයට පවරා ගත් කල්හි පෙර පැවති  බෞද්ධ පාසල් සියල්ල ද රජයයට අයත් කර ගන්නා ලදී.

වර්තමාන කතාව -

      ජෙනරල් ජෝන් කොතලාවල මහතා බලාපොරොත්තු වූයේ ආරක්ෂක අංශ සාමාජිකයන් සඳහා උසස් අධ්‍යාපනයක් ලබා දීමටයි. 1981 වර්ෂයේ දී කොතලාවල ආරක්ෂක විද්‍යාපීඨය බිහි වන්නේ ඒ අනුවයි.ඉන්පසු 1988 දී මෙම ආරක්ෂක විද්‍යා පීඨයේ සහතික පිළිගැනෙන මට්ටමින් සංශෝධනය වන අතර 2007 දී එම ඇකඩමිය විශ්ව විද්‍යාලයක් බවට පත් කිරීමට කටයුතු යොදා ඇත.. ඉන් පසුව ආරක්ෂක අංශ වල සාමාජිකයන් පමණක් නොව මුදල් ගෙවා ඉගෙනුම ලැබිය හැකි සිවිල් පුරවැසියන්ටද එම ස්ථානය විවෘත කරන ලදී.එය සිදු වූයේ වෙනත් පෞද්ගලික වෛද්‍ය පීඨ වලින් පිටවෙන සිසුන්ට මෙම විශ්වවිද්‍යාලය ට අනුබද්ධ වන ආකාරයටයි.මෙම තීරණයෙන් පසුව ආරක්ෂක අංශ සාමාජිකයන් පමණක් නොව   විශ්ව විද්‍යාල වරම් ලැබූ සිසුන් ද ඇතුලත් වීමට ඉඩ හරින ලදී.මුදල් ගෙවා ඉගෙන ගැනීමට කැමති සිසුන්ට විදෙස් වලට නොයා මෙහි ඉගෙන ගැනීමට අවස්ථාව සැලසීම එහි අරමුණ විය. 2018 දී යහ පාලන රජය කාලයේ මෙම කොතලාවල පනත නැවත අලුතින් ඉදිරිපත් කරන ලදී.එහි අරමුණ වන්නට ඇත්තේ ඒ වන විට ජනප්‍රිය මට්ටමේ තිබෙන පෞද්ගලික විශ්ව විද්‍යාල බල ගැන්වීමයි. එම පනතම නැවත වර්තමාන රජය විසින්ද දැන් පාර්ලිමේන්තුවට ඉදිරිපත් කර ඇත.මෙම පනතේ තිබෙන සුවිශේෂය නම් විශ්ව විදයාල ප්‍රතිපාදන කොමිෂන් සභාවේ බල සීමාවෙන් එපිට පැවැත්මට තිබෙන හැකියාවයි. 1981 දී ඇකඩමියක් ලෙසට ස්ථාපනය වන විට. එය ආරක්ෂක අංශය යටතේ තිබුණද විශ්ව විද්‍යාලයක් බවට පත්වන විට  පත්‍රිපාදන කොමිසමට යටත් විය යුතුය.නමුත් අලුත් පනතින් මේ ව්‍යුහය වෙනස් වෙයි.දෙවැන්න නම් මෙම කොතලාවල විශ්ව විද්‍යාලය පදනම් කරගෙන රට පුරා පෞද්ගිලක විශ්ව විද්‍යාල බිහි කර ගැනීමට තිබෙන ඉඩ කඩයි.ඒ සමගම ජාත්‍යන්තර විශ්ව විද්‍යාල සමග ඒකාබද්ධ වීමට තිබෙන අවස්ථාද පුලුල් වන බව මෙහි සඳහන්ය. එවිට ශරියා නීතිය ඉගැන්වෙන හිස්බුල්ලගේ පූනානි විශ්වවිද්‍යාලයද මේ යටතට ගත හැකි වනවා පමණක් නොව ශරියා නීතිය තිබෙන අරාබි රටවල් සමග ඒකාබද්ධ වීමටද අවස්ථාව සැලසේ.

     කොතලාවල ආරක්ෂක විශ්ව විද්‍යාලය මෙවැනි තත්වයකට පත් කිරීම එක් අකින් කොතලාවල මහතා අභිබවා යන්නකි.අනෙක් අතින් පවතින රාජ්‍ය විශ්ව විද්‍යාල බිඳ වැටීමට ඉඩ සලස්වා වෙනත් පෞද්ගලික අධ්‍යාපන ධාරාවක් බලවත් කිරීමට ගන්නා උත්සාහයකි.  පෙර දැක්වූ පුරිදි මෙරට විශ්ව විද්‍යාල පද්ධතිය පමණක් නොව පාසල් පද්ධතියද නිරිමාණය කරලීමට මෙරට භික්ෂූන් වහන්සේලා දැක්වූ දායකත්වය සුවිශේෂීය. උන් වහන්සේලා ගේ කැපවීම අති මහත්ය. මෙම පාසල් සහ පිරිවෙන රජයට පවරා දීමට කටයුතු කරන ලද්දේ පූජනීය හැඟිමකින් යයි කිව හැකිය.මෙම බෞද්ධ අධ්‍යාපන  ආයතන ස්ථූපයක කොතක් වැනිව ගෞරවනීය හැඟිමක් ජනිත කරවූ  පද්ධතියකි .එහිදී පන්සල් වල පැවති ඉඩකඩම් රාශියක්  රජය සතු කරමින් කළ කැපකිරීම රජයේ වගකිමක් බවට පත් විය. කෝට්ටේ රජ මහ විහාරය සතුව තිබෙන ඉඩම ආනන්ද ශාස්ත්‍රාලයට පවරා දුන් පසු එය රජය සතු වීම උදාහරණයකි.එම භූමියේ පැරණි සීමා මාලකය පවා අදද දක්නට ලැබේ.

    කොතලාවල විශ්ව විද්‍යාලයේ පාලකයන් මෙන්ම මෙම ආයතනයට සිසුන් ඇතුලත් කළ දෙමාපියන්ද නගන එක් තර්කයක් ඇත. එනම් රාජ්‍ය විශ්ව විද්‍යාල වල තිබෙන විනය පිරිහීමයි.එය සැබෑවකි. මේ රටේ රාජය විසින් මෙහයවා පවත්වාගෙන ගිය බොහෝ ආයතන වල විනය පිරිහුණි. පක්ෂ දේශපාලනය එයට ප්‍රමුඛ හේතුවයි.ලංගම වැනි ආයතන මෙන්ම සමූපකාරයද ඒ තත්වයේ ලා පෙන්විය හැකිය.ඇතැම් ආයතන බංකොලාත් වන්නට ඉඩ හැර වසා දැමුණි. ඇතැම් ආයතන විකුණා දැමින.1977 න් පසු ඇති වූ විවෘත ආර්ථික සංකල්ප වල තිබුණු අතිශය පෞද්ගලික කාරණා මත රාජ්‍ය මැදිහත් වීම ක්‍රමයෙන් අඩපණ කර ඇත.

  බටහිර ලෝකයට පමණක් නොව අද පෙරදිග අතැම් රාජ්‍යයන්ටත් අධ්‍යාපනය කර්මාන්තයකි. රාජ්‍ය මැදිහත් වීම මත හෝ පෞද්ගලික ප්‍රාග්ධනය මත අධ්‍යාපනය විකිණීම සිදු වෙයි. නමුත් අපගේ සංස්කෘතිය තුළ අධ්‍යාපනය යනු සුපිරිසුදු ක්‍රියාවලියකි. ඒ මගින් දෙන දැනුම මිළ කළ නොහැකිය.එය පූජනීය වූ තරමට රටේ අභිමානවත් පරපුරක් බිහි කරන්ට හේතු වේ. විශ්ව විද්‍යාලයකින් පිට වන්නා රටේ සංස්කෘතිය ස්පර්ශ කරන ස්වාධීන පුද්ගලයෙකු විය යුතුය.ඔහුගේ වගකීම රට වෙනුවෙනි.එසේම මේ විද්වතුන් අතලොස්ස විසින් රටට ස්වාධීන ප්‍රතිපත්තියක් සකස් කර දිය යුතුය.එසේම මග පෙන්වීම් කල යුතුය. දේශපාලකයන් වෙනුවෙන් විද්වතුන් බිහි කිරීමේ ක්‍රියාවලිය මෙරට විශ්ව විද්‍යාල තුළ ආරම්භ කිරීම නිසා රට පිරිහී ඇත. හමුදා විනයක් යටතේ විද්වතුන් බිහි කිරීමද එයට දෙවනි නොවේ. මෙරට බෞද්ධ අධ්‍යාපනය විසින් දායාද කරන ලද පූජනීය වූ උසස් අධ්‍යාපන ආයතන රැක ගැනීම සියලු දෙනගේම යුතුකමක් වන්නේ එහෙයිනි.කොතලාවල පනත ඉවත් කිරීමට බල කළ යුත්තේ මේ කරුණු සැලකිල්ලට ගෙනය.

මතුගම සෙනෙවිරුවන් 

Tuesday, July 20, 2021

පොල් පැළ කහ පැළ වැවූ පසු කුමක්ද ඇතිවන ප්‍රතිඵල

 

 

                                   

                                 

         රජය පසුගිය කාලයේ ගත් යහපත් තීරණයක් වූයේ විදේශ වලින් කහ ගෙන්වීම තහනම් කිරීමයි.විදේශ විනිමය හිඟයකට මුහුණ  දුන් පසු එවැනි තීරණයන් ට යෑමට සිදු වන බව සැබෑය. එහෙත් මේ තීරණය නිසා ලංකාවේ කහ වගාවට හොඳ කලක් උදාවිය. බොහෝ දෙනෙකු ගෙවත්තේ කහ වැවීමට උනන්දු වූ අතර ඇතැම් ගොවීන් විශාල වශයෙන් කහ වැවීමට උනන්දු වූහ. කුලුබඩු අලෙවියේ ප්‍රධාන ව්‍යාපාරික සමාගම් කීපයක්ම විශාල වශයෙන් කහ වැවීමට ආයෝජනය කළ ආකාරය දැක ගත හැකි විය.සැබවින්ම ඉන්දියාවේ භාවිතා වන කහ විශේෂයට වඩා දෙගුණයක කර්කියුමීන් දේශීය කහ ප්‍රභේදවල තිබෙන බව කෘෂි විද්‍යාඥයන් දැන සිටියහ. නමුත් ඔවුහු මේ වගාව සඳහා ගොවීන් උනන්දු නොකළහ. තමන්ගේ රැකියා වපසිරිය තුළ යම් උපදෙසක් දීමෙන් නැවතුණු අතර දිරි ගැන්වීමක් නොවුණි.විශේෂයෙන්ම දේශීය කහ වියළීම සඳහා තාක්ෂණය දියුණු කර දීමට සැබෑ සහයක්  අපනයන කෘෂීකර්ම දෙපාර්තමේන්තුවෙන් නොලැබුණු බවද කිව යුතුය.කහ ගෙන්වීම සපුරා තහනම් කළ පසු මෙරට කහ අස්වැන්න සැලකිය යුතු මට්ටමින් දියුණු වූ අතර විදේශීය කහ ප්‍ර භේද යන්ද ලංකාවේ වගාවට එකතු වී තිබේ. විශේෂයෙන්ම අම්පාර දිස්ත්‍රික්කය තුළ එම ප්‍රභේද  කාලයක් සිටම ජනප්‍රිය වී තිබුණි.

    මෙරට ජනතාවගේ ගෙවතු වල වැවෙන ප්‍රධාන භේගයක් වන කහ මගින් ඉටු කරන සෞඛය ආරක්ෂාව පිළිබඳ පැරණියන් හොඳ හැටි දැන සිටියහ.එම නිසා වර්ෂයක් පුරා භාවිතයට අවශ්‍ය කහ වියළා ගැනීමට ඔවුහු සමත් වූහ. කහ බීජ පැළ වන වේලාව ගැන ඔවුහු හොඳින් හැටි දැන සිටිහය.එසේම කහ වියළා ගැනීමටද වියළා ගත් කහ වලින් වියමනට අවශ්‍ය කහ අඹරා ගැනීමටද අවශ්‍ය දැනුම පාරම්පරිකව පැවත පැමිණියහ. නමුත් විවෘත ආර්ථික සංකල්ප රටට පැමිණි පසු වෙළෙඳ පළ කහ සකසන්නන් බහුල වූහ. ඉන්දීය කහ වෙළෙඳ පළ සිසාරා කහ සොයාගත් මේ වෙළෙන්දන් කර්මාන්ත කරුවන් කහ කුඩු කර වෙළෙඳ පළට නිකුත් කළහ.ක්‍රමයෙන් නාගරිකයන් බවට පත් වූ පිරිසක් මෙයට ආකර්ශනය වූ අතර ගැමියන්ද කල් යන විට  වෙළෙද පලෙන් කහ ලබා ගැනීමට උත්සුක වූහ. පසුගිය කාලයේ කහ තහනම් කරන විටත් තත්වය එසේ විය. අපනයන කෘෂිකර්ම දෙපාර්තමේන්තුව විසින් කහ වගාව ප්‍රවර්ධනය කිරීම මන්දගාමීව සිදු කරන ලද්දේ මේ පසුබිම මතය. ඒ නිසා ගෙවතු වල කෙරෙන කහ වගාව පිළිබඳ සංඛ්‍යාලේඛන පවා කෘෂිකාර්මික සංගණනය තුළ දක්නට නොහැකි විය. 2020 වර්ෂයේ සිට ඇරඹෙන නව කහ පුබුදුව මත  දිවයින පුරාවටම විශාල ප්‍රමාණයක් කහ වගාව සිදු කර තිබේ.ගෙවතු වලද සැලකිය යුතු මට්ටමේ කහ වගාව ප්‍රචලිත වී තිබෙන නමුත් මේ පිළිබඳ ගණනය කිරීම් අවම මට්ටමක පවතී.

          පොල් වගාව සම්බන්ධව නම් සංඛ්‍යා ලේඛන විශාල වශයෙන් දක්නට හැකිය. දිවයින පුරා පොල් වගාව වතු ආශ්‍රිතවද ගෙවතු මට්ටමින් විසිරි ආකාරයෙන්ද සිදු වෙයි. වාර්ෂික පොල් අස්වැන්න ගෙඩි මිලියන 2800 ක් පමණ වේ. ඒ තත්වයට පැමිණෙනන්ට අවශ්‍ය පොල් ගස් සංඛයාව 40361.023 කි. තැඹිලි ගස් 941.165 ක් දක්නට ඇති බව සංගණන වාර්තා දක්වයි.වතු වැවිලි ක්ෂේත්‍රයේ ගස් 711585ක් දක්නට ඇත. රජයේ නව වැඩ පිළිවෙල යටතේ පොල් පැළ ලක්ෂ 40 ක් සිටු වීමට යෝජනා කෙරී තිබේ. එම ඉලක්කය සාර්ථක වුවහොත් රටට අවශ්‍ය මාලු පොල්ද කොප්පරාද වෙනත් පොල් නිෂ්පාදනද යහමින් ලබා ගත හැකිය.ලංකාවේ පොල් විවිධත්වයක් පවතින අතර කුන්දිරා කමන්දලා නවසි බෝදිරි පොල්ලෙපොල් සියම් පොල් ආදී විවිධ වර්ගයන් දක්නට හැකිය. තැඹිලි වර්ග කීපයක්ද දක්නට ඇත.

 මෙවැනි තත්වයක් යටතේ ලංකාවේ ආර්ථික ඉලක්ක කරා ළඟා වීට අවශ්‍ය සම්පත් වුවමනාවටත් වැඩියෙන් තිබෙන ආකාරය සැලකිල්ලට ගත හැකිය.මේ තත්වය මෙසේ වුවද හුදු ස්වයංපේෂිත බව හා ආහාර සුරක්ෂිතතාවයට වඩා ඔබ්බෙන් රටේ ආර්ථිකය ගැන සිතන්නට අපට අද සිදුව තිබේ. හේතුව විදේශ විනිමය හිඟකමයි. අනවශය ප්‍රමාණයට වඩා භෞතික සම්පත් ගොඩ ගසා ගැනීමට ණය වීම නිසා මේ හිඟය නිර්මාණය වී තිබේ.මේ අතර කෘෂිකාර්මික නිෂ්පාදන අපනයනය කර ගැනීමේ දී තිබෙන සීමාවන් අතික්‍රමණය කර ගැනීමටද නොහැකි වී තිබේ.මෙවැනි තත්වයකට එකම විසඳුම ඩොලර් ණයට ගැනීම යයි සිතුවහොත් එය මුළාවකි. පසුගිය වසර තිහක් පමණ කාලයක් තුළ ගත් ණය ගෙවා ගැනීමට නොහැකිව ජාතික සම්පත් සහ ඉඩම් පවා විකුණන මට්ටමකට රට පත්ව තිබේ. එවැනි මාර්ගයක තව දුරටත් ගමන් කිරීම බෙහෙවීන් අනතුරුදායකය.එම නිසා මෙරට ජාතික නිෂ්පාදනයන් තුළින් විදේශ විනිමය සොයා ගැනීමේ විකල්ප මාර්ගයකට අප අද එළඹිය යුතුව ඇත්තෙමු.

    පොල් සහ කහ වගා කිරීම අහාර සුරක්ෂිතතාවයෙන් ඔබ්බට ගෙන යා යුත්තේ එබැවිනි. අප දන්නා පරිදි පොල් නිෂ්පාදන රාශියක් වෙති. අපනයන තත්වයේ විශිෂ්ට දිසිඳි පොල් අප සතුය. දැනටමත් ඉතාමත් පිරිසඳු පොල් තෙල්  අපනයනය සිදු කෙරයි.පොල් ගසෙන් නිපදවන විවිධ නිෂ්පාදනයන්ට විශාල ඉල්ලුමක් ඇත. පොල් ගස් තුනක් පමණ තිබෙන නිවසකට මාලු පොල් වශයෙන් යොදා ගනු ලබන ප්‍රමාණය නිවැරදිව ගණනය කළහොත් අතිරික්තය අලෛවි කල හැකිය.පොල්කටු සහ පොල් ලෙලි ද එලෙස අලෙවි කළ හැකිය.අවශ්‍ය නම් රැකියාවකට නොයන පුද්ගලයෙකුට පොල්කටු නිෂ්පාදන රාශියක් නිවසේදීම සිදු කළ හැකිය.දැනට වාර්ෂික පොල් තෙල් පරිභෝජනය මෙට්රික් ටොන් 180000 ක්පමණ වේ. මේ තත්වයට ළඟා වීමට කොප්පරා මෙට්රික් ටොන් 13000 ක් පමණ මසකට අවශ්‍ය වේ.ගෙවතු වලින් ලබා ගන්නා අතිරික්ත පොල් අස්වැන්නෙන් ගුණාත්මක කොප්පරා නිෂ්පාදනය කළ හැකි අතර පිරිසිඳු පොල් තෙල් නිකුත් කළ හැකි වනවා නිසැකය.කහ වල තත්වයද එසේමය නිවසකට කහ පඳුරු විස්සක් හොඳටම ප්‍රමාණවත්ය.ඊට අමතරව කහපැළ තවත් විස්සක් ගෙවත්තේ පැළ කරනු ලැබවහොත් වෙළෙඳ පළට දැමීමට තරම් කහ නිෂ්පාදනය වේ.ආහාර ගුණවත් කිරීමට සහ ඖෂධ පිණිස කහ භාවිතා කිරිමට අමරතව වෙනත් නිෂ්පාදන දැනට නොමැති නමුත් ඉදිරියේදී එවැනි කාර්මික නිෂ්පාදන ඇති කරමින් වෙළෙඳ පළ පුළුල්කළ හැකිය.

     සැබවින්ම ගාහස්ථව නිෂ්පාදනය කරන බොහෝ දේ ආහාර වලට ලබා ගැනීමෙන් පමණක් රටේ දළ ජාතික නිෂ්පාදනයට එකතු නොවේ. වෙළෙඳ පල ආර්ථිකයක් තිබෙන බැවින් ඒ නිෂ්පාදන මිළ කිරීමකට පත් විය යුතුය. එසේ කිරීමට නම් රජය මැදිහත්ව කර්මාන්ත කරුවන් පෙළ ගස්වා ගෘහස්ථ නිෂ්පාදන මිළදී ගැනීමට වැඩ පිළිවෙලක් සකස් කළ යුතුය.කහ පොල් පමණක් නොව කෙසෙල් තැඹිලි කුන්දිරා පුවක් ගම්මිරිස් කරාබු කෝපි කොකෝවා සාදික්කා මෙන්ම බෙහෙත් පැලෑටිද ඒ ගණයට අයත් වේ.ගෘහස්ථ නිෂ්පාදන මිළ කිරීමෙන් ග්‍රමීය ආර්ථිකය ශක්තිමත් වන අතර ජාතික ආර්ථිකයට අවශ්‍ය විදේශ විනිම ඉලක්ක වලටද ළඟා විය හැකිය.එසේ නොවුණහොත් කහ පැළ බෙදා දීම පොල් පැළ බෙදා දීම වැනි ක්‍රියාවලින් පළක් ගැනීමට නොහැකිව වනු ඇත.

මතුගම සෙනෙවිරුවන්

Friday, July 9, 2021

වැව් මව් පහස නොලැබූවන්ගේ වැව් හෑරිල්ල ගැරිල්ලක් පමණයි

 

      


                         

      වැව යනු පැරණි සිංහලයාගේ අනන්‍යතාවය පෙන්වන මහා ව්‍යායාමයකි.. වැවක් ඇති තැන බතක් ඉදෙන අතර රටක් සවිමත් කරන්නට වැව් සවිය පමණක්ම ඇතැයි ඒ පැරණියන් ගේ විශ්වාසය විය.ලංකාවේ පැරණිම වැව ගැන මහාවංශයේ සඳහන් වන්නේ පණ්ඩුකාභය අවදිය ගැන විස්තර කිරීමේදීය. නමුත් පැරණි සිංහලයන් කඳු උඩ ජීවත් වෙමින්  පසුව අනුක්‍රමයෙන් පහළට විත් ගම් අටවා ගෙන සාරවත් භූමි වල ගොවිතැන් බත් කිරීමට පටන් ගත් පසු ගම්වැව් ඇති කළ බව සොයා ගත හැකිය..  නියන් කාලයට ජලය ලබා ගැනීමට මෙන්ම කඳුරු පෝෂණයටත් අවශ්‍ය ලෙස ගම් වැව් තාක්ෂණය දියුණු කර ගත් ආකාරය නිරීක්ෂණය කරගත හැකිය.ඔවුන්ගේ මුල් වැව් හැදෙන්නේ කඳුඋඩය. අනතුරුව කන්දෙන් පහළ මූකලානේ වැව් ඇටවෙයි.මේ වැව් පසු කලෙක කුළු වැව් වශයෙන් හැඳින්වූහ.කුලුවැව් වලින් ඇදී ගෙන එන ජලය ගම් වැවට පාත් වෙයි.

      ගම් වැවේ අංගෝපංග රාශියකි. එහි පළමු  මෙන්ම වැදගත්ම අංගය වන්නේ වෑකන්දයි. ඉතා කෙටි වෑ කඳු මෙන්ම දිගු වෑ කඳු වලින්ද ගම් වැවට ඇදී එන ජලය රඳවා තබා ගනී. සුදුසු වැටි දෙකක් යොදා ගෙන ඇතැම් විට සමෝච්ච රේඛා දිගේ මේ වැව් බැමි ඉඳි කරනු ලබයි.  හලන ලද පස් දමා තලා ගවයින් ලවා පාගවා  බැම්ම ශක්තිමත් කරනු ලබති. වෑ කන්දට පහළින් වැව පැත්තට වන්නට සොරෙව්ව සෑදීම කරත්. සොරොව් වර්ග කීපයකි. මහ කොටුව යනුවෙන් පැරණියන් වහරට ගත්තේ මහ වැව් වල බිසෝකොටුවයි. හීරු කොටුව යනු මඩ හොරොව්වයි.කැට සොරොව් ගම් වැව් වලටයි. වැව් පතුළ තෙක් ජලය හිඳුණු පසු ගවයන් ලවා වැව මඩ කරවා රොන් මඩ කන්දරාව වෙල් කරා ගෙන යෑමට මේ සොරෙව්ව සාදා ඇත. තෙවැන්න නම් බූටිය නම් සොරොව්වයි. තුංගය නමින් භාවිතා කරන පැරණි සොරොව් වර්ගයක් තිබී ඇත. එය රහසිගතය. එය පොළව අභ්‍යන්තරයේ පවතී. වැව වාන් දමන්නට ආසන්නයේ මේ තුංගයෙන් පිටවන ජලය නිසා ආසන්නයේ තිබෙන පතහ උතුරන්නට පටන් ගනී. එවිට වැව රැක ගන්නට කළමනා යුතුකම් වලට පෙළ ගැසේ.

        ආඬියා යනුවෙන් කියවෙන උල්පත් ආගාරය ගල් ආගාරය ඖෂධ ආගාරය ගෙඹි ආගාරය රැස් ආගාරය පෙණ ආගාරය කුඩුම්බා ආගාරය භූමිටු ආගාරය යනුවෙන් වැවට ජලය ගලන උල්පත් ගැන සඳහන් කළ හැකිය. ගල් ආගාරය ජල පෙරනයකි. බෙහෙත් ආගාරය ඖෂධ පැලෑටි සංරක්ෂණය සඳහාය. ගෙඹී ආගාරය ජලජ ජීවින් ගේ පැවැත්මටයි. රැස් ආගාරයෙන් කෙරෙන්නේ ජලය ජලය ගැටීමෙන් ඇති වන ශක්තිය ප්‍රයෝජනයට ගැනීමයි. පෙණ ආගාරය මගින් ජලයේ පිරිසිඳු බව තීරණය කෙරේ.කුඩුම්බා ආගාරය මගින් ජලය පිට කිරීම පාලනය කරයි. භූමිටු ආගාරය යනු උල්පත් පෝෂණයට උදව් දෙන ස්ථානයකි.      වෑකන්ද නිසා පිරෙන ජලයෙන් වැවේ උපරිම ජල ප්‍රමාණය අල්ලා වැවේ ගිල්ම ගසයි. ජල තාවා දිය නිසා වැවේ තාවල්ල ඇති වේ. ආතේඩය යනු තාවල්ලට තවත් නමකි. තාවල්ලට ඉහළින් පෝටා වැටි ඇත. ඉහත්තාවෙන් එන ජලයේ රොන් මඩ නවතා ලන්නට මේ පෝටා වැටි උපකාරී වේ. වැව් ඉහත්තාව ළඳු කැළෑ වලින් යුතු පෝෂණිය පෙදෙසකි.කුඹුක් මයිල පළු වීර නැබඩ බක්මී  වැනි වනස්පතීන් ඇත.මේවා චන්ද්‍ර ගණයේ ශාක ලෙසට හැඳින්වේ.වැව් දිය තුළ කැරැන් වැනි ශාක පැතිර පවතින්නේ වාෂ්පීකරණය අඩු කිරිමටයි.එසේම ලවණතාවය පාලනය කිරීමටයි.. වැවේ පතුල දීගතය යනුවෙන් හඳුන්වයි. සෝලමය ඡවිත්‍රය රුසිය යනුවෙන්ද නම් ඇත. වැව් බැඳීමේදී වැව් පතුලේ ඇති පාෂාණ නිධි භූගත උලපත් ආදිය ගැන උනන්දුවක් ඇති කර ගත යුතුය.

 


 

වැවක සඳහන් කළ යුතු වැදගත් තැන් අතර රළපනාවද දැක්විය හැකිය. සෙමින් වුවත් වැව දිය පතුලේ ඇතිවන චලනය රැළි වශ‍යෙන් මතුපිටට විත් විහිදී යෑමේදී නිරන්තරෙයන් වෑකන්දේ හැපේ. කාලාන්තරයක් තිස්සේ දිය රැළි හැපීම කරන කොට වෑ කන්ද සේදීමකට ලක් වේ මෙය වැලැක්වීම පිණිස වෑකන්දේ වෑවට නිරාවණය වන කොටසේ කළු ගල් ඇතිරීම කළහ. විශාල වැව් වල විශාල කැපූ ගල් කුටට්ටි ඇතිරීම දක්නට තිබේ.

        වැවකින් ජලය පිට කිරීමට සොරොව්ව භාවිතා කරනවා සේම එයට අවශ්‍ය ඇළ මාර්ග තැනීමද කරති. එයින් එකක් නම් කුටීර ඇළයි. එය කිසි දිනක හිඳෙන්නේ නොවේ. අනෙක් ඇළ නම් මඩහොරෙව්වෙන් පිට කරන ඇළයි. වැවක වතුර පරිහරණයේදී තොට යන වචනය යෙදේ. එහිදී පෙයිය තොට යනු වැවේ කුඹුක් ගස් මණ්ඩියක තිබෙන පිරිසිදු වතුර කඩයි. එහි දිය නෑම සතුන් සේදීම තහනම්ය. අනෙක නම් නාන තොටයි. එහි කරන්නේ දිය නෑම පමණකි. වැවට බැසීම සදහා ඇතැම් විට ගලින් පඩි තනා තිබේ. භික්ෂූන් වහන්සේලාට දිය නෑම පිණිසද වෙනමම නාන තොටක් පරිහරණය කිරීම පැරණියන් ගේ සිරිත විය. සතුන් සේදීමටද එසේමය. මෑතක් වන තුරුම පෙයිය තොට මගින් ගත් ජලය නිවෙස් වල පරිහරණයට ගැනිම සිරිත විය. එයට හේතුව වැවේ මතුපිට ජලය මෙන්ම කුඹුක් වැනි ශාක වලින් පෙරෙන ඖෂධ ජලය බීමට සුදුසු වීමයි.රජරට අයට එදා වකුගඩු රෝග නොසෑදෙන්නට එක් හේතුවකි එම පිළිවෙත.

      ගම් වැවක අංග මෙසේ වන අතර ගම් වැවට සමානතරව නිවුන් වැව් පිහිටීමක්ද විය. ගම් වැව් පිහිටා තිබෙන්නේ එකක් යටිවත එකක් පිහිටා තිබෙන ආකාරයටයි. මෙය වැව් එල්ලංගාව ලෙසට හැදින්වෙයි. එල්ලංගාව සැම තැනකම තිබූයේ නොවේ. පිහිටි රටට එය වඩාත් ආවේණික විය.නිවුන් වැව් යොදා ගන්නේ දැඩි නියන් කාලයක ප්‍රයෝජනයට ගන්නටයි. මේ නිවුන් වැව් කීපයක් එක්කර තැනූ පරාක්‍රම සමුද්‍රය පොළොන්නරුවේ මහා සාගරය ලෙස හැඳින්වෙයි.වැව ගැන ලියා ලැබූ පුස්කොළ ග්‍රන්ථයක් පැරණියන් අතර තිබී එය තමාද දුටු බව   මුදියන්සේ තෙන්නකෝන් මහතා පවසයි.එය නම් කර තිබුණේ ජල බිංදු ජල ප්‍රමාණ ජල දීපිකා යනුවෙනි. එවැනි තවත් ග්‍රන්ථයක් මල්වතු මහානායකව සිටි පුරිජ්ජල සරණංකර මහානායක හිමිපාණන් සන්තකයේ තිබී සුදු දිසාපතිවරයෙකු රැගෙන ගිය කතාවක් ද අසා තිබේ. කෙසේ වෙතත් මේ ශිල්පියාව ගැන සටහන් වූ අගනා දැනුම් සම්භාරයක් අද අප අතරින් ගිලිහී ගොස් ඇත.නමුත් පෙර සිටි අප මුතුන් මිත්තන් ගේ ශක්තිය මත ඒ දැනුම යලි යලි මතුවෙයි.එය සැඟවිය නොහැකිය.

   මෑතකදී වැව ගැන නව සාකච්ඡාවක් ඇති වී තිබේ. දකුණු පළාතේ තිබෙන ‌ෙඑතිහාසික වැවක වූ තිස්ස වැව ඉහත්තාව හාරා රොන්මඩ ඉවත් කර වැලි ගැරීමට චීන සමාගමක් පැමිණීම ඊට හේතුවයි. රුහුණු මාගම රාජධානියේ කිරිඳි ඔය නිම්නයේ පවතින වීරවිල වැව දෙබරවැව යෝධකණ්ඩිය සහ තිස්ස වැව සියවස් ගණනාවක සිට විකාශනය වෙමින් පැවති  වාරි සභ්‍යත්වයක කොටසකි. ඌව කඳුකරයෙන් නිරන්තරයෙන් ගලා බසින උල්පත් කඳුරු පෝෂණය කරගනිමින් කුලුවැව් සහ ගම් වැව් සාදා ගනිමින් ආරම්භ වූ මේ වාරි පැතිරියාව මාගම රාජධානිය බිහිවීමත් සමග වේගවත් පිම්මකින් සංවර්ධනය විය. ඉහත්තාවේ තිබුණු කුලු වැව් සහ ගම් වැව් නිසා තිස්ස වැව රොන්මඩ වලින් නොපිරුණු බව පැරණියන් දනිති.

        වාරිමාර්ග දෙපාර්තමේන්තුවේ  අධ්‍යක්ෂක ජනරාල් වරයෙකු ව සිටි ඒ.ජේ.බී. පොන්රාජ් නම් මහතමයෙකු 1988 දී සකස් කළ (Technical Guide lines Irrigation Department) නම් ග්‍රන්ථයේ හැටියට 1900 -1988 දක්වා වූ කාලයේ වැව් වල රොන් මඩ ඉවත් කිරීමක් සිදුව නැත. එවැනි ක්‍රියාවක් සිදුකලා නම් මෙම ග්‍රන්ථයේ එයට අවශ්‍ය මාර්ග උපදේශ දැක්විය යුතුව තිබුණි.  කෙසේ වෙතත් අසූව දශකයෙන් පසුව චන්ද්‍රිකා බණ්ඩාරනායක මැතිණියගේ යුගයේ දී ආරම්භ වූ වැව් දසදහසේ ව්‍යාපෘතිය යට‌තේ වැව් හෑරීමක් සිදු වී තිබේ. මේ හෑරීම නිසා යම් විනාශයක් සිදු වුවද වාරිමාර්ග දෙපාර්තමේන්තුවේ අධීක්ෂණය යටතේ සිදු වීම නිසා විනාශය යම් තරමකින් වළක්වා ගත හැකි විය. 2008 වර්ෂයේ දී කුරුණෑගල දිස්ත්‍රික්කයේ වැව් කීපයක රොන් මඩ ඉවත් කිරීම සඳහා එවකට කුරුණෑගල භාරව සිටි ඉංජිනේරු වරුන් අවසර දී තිබුණි. මෙම ක්‍රියාව රොන් මඩ ඉවත් කිරීමක් පමණක් නොව වැලි ගැරිල්ලක් ද විය. විශේෂයෙන්ම බතලගොඩ වැව එසේ හෑරීමට උත්සාහ කරන ලදී. ලලිත්කොතලාවල මහතාට අයත් සමාගමක් විසින් කළ මෙම මැදිහත් වීම වාරිමාර්ග දෙපාර්තමෙන්තුවේ පරිසර අංශයේ මැදිහත් වීම මත නවතා දමන ලද්දේ ඉන් වැව් වලට වන විනාශය සලකා බැලීමෙනි. අද වන විට නැවත මතුව තිබෙන්නේ ඒ පැරණි උත්සාහයයි. චීනයෙන් ආනයනය කරන ලද යන්ත්‍ර භාවිතා කර ඔවුන්ගේ ද උපදෙස් මත තිස්ස වැව හාරා වැලි ගැරීම එහි අරමුණයි. මෙම ලිපියේ කලින් සඳහන් කළ පරිදි වැව ඉතා සංවේදී ප්‍රදේශයකි. ‌ෙඑතිහාසික වැවක් නම් වැව් බැම්ම ආසන්නයේ පමණක් නොව වැව් ඉහත්තාවේ මෙන්ම අවටත් පුරාවස්තු සැඟව තිබෙන්නට පිළිවන.තිස්ස වැවත් වීරවිල වැවත් අවට පරිසරය අභය භූමියක් බවටද ප්‍රකාශයට පත් කර තිබේ. එවැනි තත්වයක් යටතේ හිතූමතයට වැව් හෑරිල්ල සිදු කළ නොහැකිය.රොන්මඩ ඉවත් කිරීම වාරිමාර්ගයේ අධීක්ෂණය යටතේ කළ හැකි වුවද වැලි ගැරිල්ල සම්පූර්ණයෙන්ම නීති විරෝධීය.යන්ත්‍ර මගින් වේගයෙන් ඇදගන්නා රොන්මඩ හා ජලය නිසා වැව් පතුලටද ඉහත්තාවටද සිදු විය හැකි හානිය විශාලය.වැව් යට තවමත් සැඟය තිබෙන පැරණි වැව් ක්‍රමවේදයන්ද මේ නිසා සම්පූර්ණයෙන්ම විනාශයට පත් විය හැකිය. එම නිසා වැව ගැන දැනුම්වත් වෙමින් සංවර්ධන ව්‍යාපෘතීන්ට අත ගැසීමට රජයට වගකීමක් තිබෙන බව මෙහිදී මතක් කර දිය යුතුය..

මතුගම සෙනෙවිරුවන්