සංඝමිත්තා බෝධි මලුව ඇමද සුවපත් වූ දෙමළ කාන්තාව

 

                     

           දේවානම් පියතිස්ස රජ දවස මිහිඳු මහ රහතන් වහන්සේ ප්‍රමුඛ දූත පිරිස ලංකාවට වැඩම කරන ලද්දේ ධර්මාශෝක අධිරාජයා ගේ ධර්ම දූත මෙහෙවර සම්පූර්ණ කිරීමට යි.මිහින්තලා පුදබිමේ දී සම්මුඛ වූ මෙම දූත පිරිස පිළිබඳව රජු සැබවින්ම කල්තියා දැන සිටින්නට ඇතැයි සිතේ .කාලාන්තරයක් තිස්සේ ශාක්‍ය රාජ වංශයත් සමග මෙරට රජවරුන්ට තිබූ අවිච්ඡින්න සම්බන්ධය මීට හේතුවයි.විඩූඩභ විසින් කරන ලද ශාක්‍ය සංහාරයෙන් අනතුරුව රාජ වංශිකයන් සෑහෙන පිරිසක් ලංකාවේ නැගෙනහිර පළාතට පැමිණියහ. ඒ ප්‍රදේශයෙන් හමු වූ ශිලා ලේඛන සහ පූජනීය ස්ථාන වලින් හමුවන සාධක ඊට සාක්ෂි සපයයි. මෙරට සිටි රාජ වංශිකයන් සහ කාලිංග රජ පෙළපත් අතර ඇති වූ විවාහ සබඳතා පිළිබඳවද යම් මූලාශ්‍ර දක්වන තොරතුරු මගින්ද අපට පෙන්වා දෙන්නේ දීර්ඝ කාලයක් තිස්සේ රජ පෙළපත් අතර තිබූ බැඳීමයි. දෙවන පෑතිස් රජ දවස දී පිහිටවූ බුද්ධ ශාසනයත් අනතුරුව සංඝමිත්තා තෙරණින් වහන්සේ ගේ වැඩම වීමත් ශ්‍රී මහා බෝධියේ දක්ෂිණ ශාඛාවක් මෙරට රෝපණය කිරීමත් අහඹු සිදු වීම් ලෙසට සැළකිය නොහැකිය.අනාගතයේ දී බුද්ධ ශාසනය පිහිටන දිවයින සිංහල ද්වීපය වීම මෙයට ප්‍රධාන හේතුවයි.

       බෝධිවංශයේ සඳහන් ආකාරයට ජයශ්‍රී මහා බෝධි ශාඛාව ලංකා ධරණී තලයේ රෝපණය වී පැතිරී යන්නේ මෙසේය.'දෙවනපෑතිස් රජ එක දවසින් දඹුලු තොටට ගොස් සන්හුන්වූ රළ ඇති සමුද්‍රයෙහි සුපිපි පස්වනක් පියුම් දැක පහවූ සමුද්‍ර ඝෝෂා ඇති  ආකාශයෙහි දිව්‍යා තූර්ය නාදය අසා සියලු පංඤ්චාංගික තූර්ය නාදයෙන් පිරිවරන ලදුව දෙදුම්මල් පහන් ආදියෙන් පූජා කොරෙමින් ප්‍රීති වේගයෙන් කරවටක් පමණ සමුද්‍ර ජලයට බැස එම්බල කොල දශබල ධාරී වූ බුදු රජානන් වහන්සේ ගේ සිනිඳු වූ ඕජාවත් වූ  රශ්මි ජාලිවන් විහිදවන්නා වූ මහබෝධින් වහන්සේ වැඩිසේක් වේදැයි ප්‍රසන්න සිත් ඇතිව මහා බෝධින් වහන්සේ ඔසවා මුදුන් මස්තකයෙහි පිහිටුවා මිනිසත් බව ලැබීම සඵල යැයි සිතමින් බෝධි ගුප්ත කුමාරයන් ප්‍රධාන කොට ඇති සොලොස් ජාති සම්පන්න කුලයන් හා සමග හිසින් ගෙනවුත් සමුද්‍රයෙන් ගොඩ නැගී සමුද්‍ර තීරයෙහි සිත්කලු මණ්ඩපය ක වඩා සියලු ලංකාද්වීපයෙහි රාජ්‍යයෙන් මහා බෝධින් වහන්සේට පූජා කොට සොලොස් කුලයන්ගේ අතට රාජ්‍යය හැර තුමූ දොරටුපාල තනතුරෙහි සිට තුන් දවසක් මුළුල්ලෙහි අනේක ප්‍රකාර පූජා කරවූහ.'

          දෙවන පෑතිස් රජු ඉන් ඉක්බිතිව නැගෙනහිර තිස්ස විහාරය පිහිටන්නා වූ තැනට බෝධින් වහන්සේ වැඩම කොට අනතුරුව අනුරාධපුරයට මහත් හරසරින් වැඩම කළ බව වංශ කතා වල දක්වා තිබේ.අනුරාධපුර මහමෙව්නා උයනෙහි බෝධි රෝපණය කරවූ දිනයෙහි.අසූ රියනක් පමණ ඒ බෝධින් වහන්සේ අහසට පැන නැගී ප්‍රාතිහාර්ය පෑ බව සඳහන්ය. ඉන් පසු එයින් අටගත් බෝ ඵල අටක් විය. ඒ අෂ්ඨ ඵල බෝධින් වහන්සේ ලා අතරින් පළමු බෝධි අංකුරය දඹුලු තොටින් එන ගමනේදී බෝධිය පිහිටි තැන රෝපණය කළ බව බෝධි වංශය සඳහන් කරයි.අනෙක්වා තිවක්ක බ්‍රාහ්මණ ග්‍රාමයෙහිද සෑගිරියහිද කසුන්ගිරියෙහිද ථූපාරාමයෙහිද  ප්‍රථමක චෛත්‍ය ස්ථානයෙහිද කාජරගාමයෙහි සහ චන්දන ග්‍රාමයෙහිද පිහිටුවා ලූ බව දක්වා ඇත.මේ අතරින් ප්‍රථම අෂ්ඨ ඵල බෝධින් වහන්සේ හඳුන්වනු ලබන්නේ සංඝමිත්තා බෝධිය යනුවෙනි.

    වර්තමාන දඹකොළ පටුන නොහොත් සම්බිලිතුරෙයි එකළ ප්‍රසිද්ධ වරායකි. මෙම ස්ථනයෙහි මුහුද යම් තාක් දුරකට යනතෙක් නොගැඹුරුය. නාවුක යාත්‍රා  නැංගුරම් ලෑමට සුදුසුය. පැරණි යාත්‍රා මන්ඩපයක සලකුණු එහි ඇත. මෙම ස්ථානයෙහි තිබී පුරාවිද්‍යා අංශ වලට ලැබුණු පුරාවස්තු කීපයක් ඇත.හිරිගල් වලින් තැනූ කොත් කැරැල්ලක් ඒ අතර වෙයි.අතීතයේ දී මේ අසළින් සිරිපතුල් ගලක් හමුව තිබේ.ඒ පැරණි වාලුකා විහාරයේ නටබුන්ය.නමුත් මෙම ස්ථානය අවට දැනට රෝපණය වී වැඩී තිබෙන්නේ පසුගිය ත්‍රස්තවාදී සමයෙන් පසුව නාවුක හමුදාව විසින් රෝපණය කරන ලද බෝධින් වහන්සේ නමකි.ඒ නිසා සැබෑ සංඝමිත්තා බෝධිය කුමක්දැයි මෑතක් වන තුරු පැණයක් නැගී තිබුණි.

      ත්‍රස්තවාදී  යුද්ද සමයට ප්‍රථම යාපන අර්ථ ද්වීපය සමකාමි ප්‍රදේශයක් විය. ලන්දේසි සමයේ ගෙනවුත් පදිංචි කරන ලද මලබාර් දෙමළ ජනයාගෙන් මෙම ප්‍රදේශ නැවත ජනාවාස ව තිබුණද අතීත ප්‍රෞඩ සංස්කෘතික සළකුණු එහි දක්නට  ලැබුණි. ලන්දෙසි සමයේ දී ඔවුන්ගේ රෙපරමාදු දේවස්ථාන මේ ප්‍රදේශයේ පිහිටුවා ලීම කල අතර ඒවා සාදන ලද්දේ සැබවින්ම බෞද්ධ සිද්ධස්ථාන තිබූ තැන් වල බව පිලිප්පුස් බල්දෙයස් නම් ලන්දේසි පූජකයා විසින් දක්වා ඇත. නමුත් අතැම් ස්ථාන නිරුපද්‍රිතව ජනයා අතර හුදකලාව පිහිටියේය. දඹකොළ පටුනට කිලෝමීටර දෙකක් පමණ දකුණෙන් චුලිපුරම් නම් ග්‍රමයෙක් වෙයි. එහි සිංහල තේරුම චූලපුරයයි. ශ්‍රී මහා බෝධින් වහන්සේ වැඩමවා පැමිණි සොලොස් කුලයන් අතර ලම්බකර්ණ වංශයට අයත් බෝධිගුප්ත සුමිත්ත යන දෙකුමරුවන් අතුළු කුමරුවන් අට දෙනෙක් වූහ. ඒ පිරිස සමග විවාහ වූ කීරවැලි පරපුරද චන්ද්‍රවංශික පරපුරුද දූල වංශයට අයත්ය. මේ චූල වංශික පරපුරු වලට වාස භූමි වූ ස්ථානයක් ලෙසින් චූලපුර හඳුන්වා දිය හැකිය.

        අෂ්ඨ ඵල බොධි අංකුර දිවයිනේ නන් දෙස පිහිටුවා ලූ පසු මෙම චූලංශයට අයත් පරපුරු ඒ බෝධි ශාඛාවන් සමග පදිංචි කරවා තිබෙන බව පෙනේ.යාපන අර්ධද්වීපයේ වත්මන් මල්ලාකම් උතුරු පෙදෙසට අයත්ව පිහිටා තිබෙන චුලිපුරම් ගම්මානය මෙලෙස චූලවංශික පරපුරට දායාද කළ ගම්මානයක් විය.බෝධීන් වහන්සේ රෝපණය කරන ලද්දේ එහිය.බෝධිය රෝපණය කොට තැනූ විහාරස්ථානයත් එයට යාබද ජල පොකුණත් නිසා එහි විශේෂත්වයක් තිබේ. මෙම විහාරය ලන්දේසි සමයේදී විනාශයට පත්වන්නට ඇත. පසුව මෙම ස්ථානය අසල මඩමක් නොහොත් අම්බලමක් පැවති බවට සාධක හමුවෙයි. ඊට හේතුව මනා ජල පහසුවක් තිබීමත් කාරතිවු හරහා යාපනයේ නැගෙනහිර දෙසට ගමන් කිරීමේ මාවත් මේ හරහා පිහිටීම නිසාත්ය.1940 දශකයෙන් පසුව පරාලෙයි යනුවෙන් වර්තමානයේ දක්වන මෙම පෙදෙස තුළ පිහිටි බෝධිය අසළ ඝනදෙවි කෝවිලක් ඉඳි කර තිබේ.ඉන්පසු 1950 දශකයේ දී යටකී මඩම ආශ්‍රිතව මුරුගන් කෝවිලක් ස්ථාපිත කර වැඩි දියුණු කර තිබේ.

    මෙම මුරුගන් කෝවිලේ සිටි බලගුරු සාමි නම් පූජකවරයා මේ මෑතකදී මිය ගිය අතර ඔහු හොඳින් සිංහල සහ ඉංග්‍රීසි භාෂා හැසිරවූ තැනැත්තෙකි. ඔහු මෙම ස්ථානය පිළිබඳ කියා ඇත්තේ මෙවැනි අදහසකි. 'ඉස්සර දකුණේ අය නයිනතිවු යන්න කරත්ත වලින් එනවා. ඇවිත් ඉස්සරම මෙතැනට වඳිනවා.භාර වෙනවා. ඊට පස්සේ නයිනතිවු යනවා.ඔවුන් කීවේ සංඝමිත්ත බෝධිය කියලයි.මුරුගන් කෝවිල අතුගාලා පිරිසිඳු කළ අම්මා කෙනෙක් ඉන්නවා.  මේ අම්මාට පිළිකාවක් තිබෙනවා කියා දොස්තරලා කීවා. මේ අම්මා හැමදාම බෝධිය ළඟ අතුගාලා පහන් පත්තු කරනවා. පස්සේ ඒ පිළිකාව සනීප වුණා. ඒ වගේ හාස්කම් තිබෙනවා. යුද්දෙන් පස්සෙ දකුණේ අය එන්නේ නෑ. ඔවුන්ට එන්න කියන්න. මේතැන ඔවුන්ට වැදගත් තැනක්'.

            යාපන අර්ධ ද්වීපයේ සැඟ වුණු ‌ෙඑතිහාසික බෞද්ධ උරුමයේ වැදගත්ම තැනක් ලෙසට දෙමළ ජනතාව විසින්ද සළකන මේ ‌ෙඑතිහාසික බෝධිය 2022 වර්ෂයේ දී පුරාවිද්‍යා දෙපාර්තමේන්තුව විසින් ස්මාරකයක් ලෙසට ගැසට් මගින් ප්‍රකාශයට පත් කර තිබේ. මේ සිද්දිය ආරංචි වූ යාපන දිස්ත්‍රික් පාර්ලමේන්තු මන්ත්‍රී ශ්‍රී ධරන් එයට විරෝධය පළ කොට ජනපතිවරයාට  කරුණු ඉදිරිපත් කර ඇති බව වාර්තා වී තිබේ.ලන්දේසි සමයේ පැමිණ උතුරේ බෞද්ධ සිද්ධස්ථාන අතර පදිංචි වුවද බෞද්ධයාගේ වන්දනා මානය ගැන උපේක්ෂා සහගතව සිතන සාමාන්‍ය දෙමළ ජනතාවට වඩා මේ දේශපාලනඥයන් බලන්නේ වෙනත් කෝණයකි. ඔවුහු තමන්ට නැති උරුමයක් මවා පාමින් දෙමළ තරුණයන් අවුස්සා ත්‍රස්තවාදයට පොළඹවති. එසේත් නැති නම් ජාත්‍යන්තරයට ගතු කියති.ශිවසේනා නාග සේනා වැනි ඉන්දීය බළල් අත් බවට පත් වී සංහිඳියාව නැති කරති. වෙසක් පොසොන් සමයේ යාපනයේ ජනතාව බලා සිටින්නේ අතීතයේ මෙන් යළිත් දන්සැල් විවෘත වන තුරුය වන්දනා නඩ පැමිණෙන තුරුය. ඒ ඔවුන් අත තිබෙන යමක් විකුණා යමක් හරි හම්බ කර ගැනීමටය. දෙමළ ජාතිවාදී අන්තවාදී දේශපාලඥයන්ට මේ සංස්කෘතිය වහකදුරුය. තමන්ගේම ජනතාව කුල හීනයන් ලෙසට සළකා පිළිකෙව් කරන ඔවුහු මානව හිමිකම් ගැන පැමිණිලි කිරීමට ජිනීවා යති. අපට සංඝමිත්තා බෝධිය වැදගත් වන්නේ  බුදුදහම මෙරටට පැමිණි පසු ඇති වූ වැදගත්ම සිද්දිය වන ජය ශ්‍රී මහා බෝධින වහන්සේ වැඩමවීමෙන් ඇතිවූ ප්‍රබෝධය ට පසුබිම් වීමට හේතු වූ බැවිනි.. ඒ ජය ශ්‍රී මහ බෝධින් වහන්සේගෙන් හටගත් අෂ්ඨ ඵල බෝධින් වහන්සේ අතරින් අග්‍ර ඵලය රෝපණය කළ ඒ ශුද්ධ භූමිය තවමත් බෞද්ධයන් වෙනුවෙන් විවෘතව තිබේ.දෙමළ ජනතාව සමග ඒ මිතුදම අලුත් කරගන්නට මේ බෝධින් වහන්සේ උපස්ථම්බක වේනම් එය කෙතරම් වාසනාවක්ද.

මතුගම සෙනෙවිරුවන්

               

දේශගුණික විපර්යාස මුවාවෙන් ගොඩ නගන ගෝලීය ආධිපත්‍ය

 

 

 

                        

         දැඩි නියන් තත්වයක් හමුවේ උඩවලව ජලාශය සිඳී යෑමත් සමග පරිසරය හා බැඳුණු සංසිද්ධින් රැසක් මේ වන විට කතාබහට ලක් වෙමින් පවතී.දේශගුණික විපර්යාස හමුවේ ඇති වන එල්නීනෝ තත්වයක් මීට හේතු වන බව විද්‍යාඥයන් දක්වා ඇත. අප දන්නා පරිදි අවුරුද්දේ නිකිණි මාසය යනු ඉඩෝර සමයකි. යල් මෝසම් අහවර වි ගොයම් කපා පාගන ලංකාවට සුර්යා මුදුන් වන සමයකි. එම කාලය තුළ වැව් සිඳී යෑම ගංගා ඇළ දොළ ජලය හිඟව යෑම දක්නට හැකිය. පොළවේ ජල මට්ටම පහත බැස ළිං ජලය පවා වේලි යන බව අප පැරැන්නන් අත් දැකීමෙන් දනිති. මෙවැනි තත්වයකට එල්නිනෝ යයි නමක් තැබීම පිළිබඳ යම් කිසි විමතියක්ද ඇති වේ. කෙසේ වෙතත් මෑත කාලයේ සිදු වූ දැඩි පරිසර හානි එනම් කැලෑ කැපීම් කඳු කැපීම් වගුරු බිම් විනාශ වී යෑම ආදී කරුණුද මහවැලියේ අත්තනෝමතික සංවර්ධනය නිසාවෙන්ද මෙන්ම පාලකයන් ගේ අධර්මිෂ්ඨ ක්‍රියා මත කලට වැසි නොවැටීම මෙන්ම වැසි සමයේ සිදු වන ගං වතුර විනාශයන් අපට දක්නට හැකිය.නමුත් පාලකයන් ගේ ඇස් ඇරී නැත. ඔවුහු ලෝකයට පෙනෙන්නට ගෝලීය සමුළු වලට සාභාගි වෙමින් නොයෙකුත් ගිවිසුම් වලට අත්සන් තබති.

     එක්සත් ජාතීන් ගේ සංවිධානය හරහා මුළු දුන් පරිසර සංවාදයන්හි අවසන් ප්‍රතිඵලය ලෙසට හැඳින්විය හැක්කේ පරිසරය ආරක්ෂා කර ගැනීම උදෙසා සම්මුතීන් වලට එකග වීමයි.කාර්මික විප්ලවය හේතු කොට ගෙන බිහි වූ නව කර්මාන්ත කෘෂිකර්මයට යොදා ගැනෙන පලිබෝධ නාශක ආදී සියල්ලම යම් කිසි පාලනයකට යටත් විය යුතු යැයි නීති රීති පැනවිණ.අසූව දශකයේ දී මෙරට පරිසර අමාත්‍යංශයක් පවා පිහිටුවනුයේ මෙකී විෂයයන් ඔස්සේ රාජ්‍ය සංවර්ධන කටයුතු තුලිත කර ගැනීමටයි.මේ සඳහා විදේශ අරමුදල් වලින් ලැබුණ දායකත්වය සුළු පටු නොවේ. ලංකාවේ විදේශ සංචිත තර ගැනීම පිණිස මෙම විෂය යොදවා ගන්නට ඇතිය යන සිතුවිල්ල පැණ නගින්නේ වර්තමානය වන විට පරිසර අංශයන් වෙත ගලා එන අරමුදල් අඩු වී ඇති බැවිනි. කෙසේ වෙතත් වෙන කවරදාටත් වඩා අද වන විට දේශගුණික විපර්යාස නමැති මාතෘකාව ඔස්සේ විදෙස් අරමුදල් සක්‍රීය වී ඇත.1997 වර්ෂයේ දෙසැම්බර් මස දී ජපානයේ කියෝතෝ හි ඇති කර ගත් සම්මුතිය එනම් රටවල් 191 ක් විසින් ගිවිස ගත් කෙටුම්පත අනුව හරිතාගාර වායුන් අවම කර ගැනීමට එකඟ විය. ඉන්පසු 2015 නොවැම්බර් මස දී රටවල් 128 ක් එක්වී පැරිස් සම්මුතියට 2016 දී අත්සන් කළහ. ගෝලීය උෂ්ණත්වය සෙල්සියස් අංශක දෙකකින් පමණ් ඉහළ යා හැකිය යන පුරෝකථනය අනුව එය ඉහළ යෑම වළක්වා ගැනීමට හරිතාගාර වායුන් අවම කර ගැනීමට සියල්ලෝම කටයුතු කළ යුතු යැයි එහිදී ද එකඟ වී තිබේ.නමුත් ඩොනල්ඩ් ට්‍රම්ප් ජනාධිපතිවරයා 2017 දී මෙම සම්මුතියෙන් ඉවත් වීම සඳහා පියවර ගනු ලැබූයේ. ඒ මගින් ඇමරිකාවේ සංවර්ධනයට බාධා ඇති වන බව පවසමිනි.

       දේශගුණික විපර්යාස යනු මිනිස් ක්‍රියාකාරකම් මධ්‍යයේ වායුගෝලයේ සමතුලිත්වය බිඳ වැටීමයි යන්න සාමාන්‍ය අර්ථ දැක්වීමයි.මිනිසා ගේ ක්‍රියාකාරකම් විශේෂයෙන්ම කර්මාන්ත මගින් පිටවන හරිතාගාර වායුන් නිසා පෘතුවියේ උෂ්ණත්වය වෙනස් වීම නිසා ගෝලීය දේශගුණික තත්වයන් විපර්යාසයට බදුන් වන බව විද්‍යාඥයන් පවසා ඇත. 19 වන සියවස වන විට සාමාන්‍යයෙන් පෘතුවියේ පැවති උෂ්ණත්වය වනුවේ සෙල්සියස් අංශක 1  ට අඩුවෙන්ය. මේ වන විට සෙල්සියස් අංශක 1.2 දක්වා එය වැඩිවී තිබේ යැයි කියති. 

 2050 වන විට සෙල්සියස් අංශක 2.0 දක්වා වැඩි වී හිමකඳු දිය වී ගංවතුර ඇති වී නියන් සායෙන් පීඩිත වී මහ විනාශයක් සිදු වීමට ඉඩ ඇතැයි ඔවුන් අනතුරු අඟවති. ඒ නිසා 2030 වන විට මෙම උෂ්ණත්වයට ප්‍රධාන හේතුව වන කාබන්ඩයොක්සයිඩ් වායුව නිකුත් කිරීමේ තත්වය බිංදුව දක්වා අගයකට පැමිණිය යුතු යැයි සම්මුතියක් ඇති වී තිබේ. ගෝඨාභය රාජපක්ෂ මහතා 2020  දී ස්කොට්ලන්තයේ ග්ලාස්ගෝව් හිදි පැවති cop 26(ගෝලීය දේශගුණික විපර්යාස සමුලුව ) සමුළුවට සාභාගි වී ප්‍රතිඥා කීපයක්ම ඉදිරිපත් කරන ලද්දේය. පුනර්ජනනීය බලශක්ති වෙත පූර්ණ වශයෙන් පරිවර්තනය වීම පොසිල ඉන්ධන දහනය කරන වාහන වලින් ඉවත් වීම ආදීය එහි විය. එසේම ඒ වන විට ඔහු ක්‍රියාත්මක කරලීමට පටන් ගෙන තිබූ කාබනික කෘෂිකර්ම ව්‍යාපෘතිය පිළිබඳවද ඔහු දීර්ඝ පැහැදිලි කිරීමක්ද කර ඇත. ඒ මගින් ඔහු බලාපොරොත්තු වන්නට ඇත්තේ මේ ව්‍යාපෘතියට අවශ්‍ය විදේශ අරමුදල් ලබා ගැනීමටයි.   

     ගෝඨභය රාජපක්ෂ අභිබවා යමින් මේ වන විට රනිල් වික්‍රමසිංහ මහතා පැරිස් සම්මුතියට අත්සන් කර තිබේ.පෙර සඳහන් කළ පුනර්ජනීන බලශක්තියට පරිවර්තනය වීම මෙහි ප්‍රධන ඉලක්කයකි.රට පුරා සූර්ය බල ශක්ති ව්‍යාපෘති ක්‍රියාත්මක කරලීම විදුලි වාහන ප්‍රචලිත කිරීම සඳහා විශේෂ වැඩ සටහනක් කිරීමට ඔහු බලපොරොතතු වේ.මේ සඳහා දැන් සෘජුවම ඉන්දියාවේ අදානි වැනි සමාගම් මැදිහත්ව සිටී. සූර්ය බලාගාර සුළං බලාගාර   ආදියේ ආධිපත්‍ය තුල නව පරිසර ධනවාදයක් නිර්මාණය වෙමින් තිබේ.මොවුන් ගේ මූලික සංකල්පය නම් දේශගුණික විපර්යාස සිදු කරන පොසිල ඉන්ධන භාවිතයෙන් ඉවත් වීම සිදු කළ යුතු බවයි. ධනවාදී රටවල් එය වඩාත් කර්යක්ෂමව භාවිතා කරමින් තෙවනි ලෝකයේ රටවලට ඒවායින් ඉවත් වීමට බල කර ඇත. යටකී ගිවිසුම් ඒ සඳහාය. නමුත් ඔවුන් නොකියන කාරණයක් මේ වන විට එළියට පැමිණ තිබේ. එනම් පෘථිවි චුම්බක ක්ෂේත්‍රය ක්‍රමයෙන් දුර්වල වීමයි.රොයිටර් පුවත් සේවය වාර්තා කරන ආකාරයට පසුගිය වසර 160 ක කාල වකවානුව තුළ මේ වෙනස් වීම මැන ඇත.

          චුම්බක ක්ෂේත්‍රය තුල සිදුවන මේ වෙනස් කම් ගැන රොචෙස්ටර් විශ්ව විද්‍යාලයේ භූ භෞතික විද්‍යාඥ වරයෙකු වූ ජෝන් ටාර්ඩුනෝ දක්වන අදහස අපට වැදගත්ය. අතීතයේ දී පෘථිවි චුම්බක ක්ෂේත්‍රය පෙරළී උතුර සහ දකුණ මාරු වී අද පවතින තත්වයකට පත් වූ බව කියයි. මෙවන් වෙනසක් අවසාන වරට සිදුව ඇත්තේ වසර 780000 කට පෙර බව මෙහිදී දක්වා ඇත.අධික ගෝලීය උෂ්ණත්වයට ද ලොව පුරා පැතිර යන වසංගත තත්වයන්ටද මෙම වෙනස්වීම් හේතු සාධක වන බව ලෝක ප්‍රකට සඟරාවක පළ වූ ලිපියක් මෙහි දී උපුටා දැක්විය හැකිය.(  Iraqi Geological Journal Hijab and Al-Dabbas 53 (2C), 2020: 13-2) ඒ සඟරාවේ පල වූ ලිපිය අනුව වර්ෂ 1790 දී රුසියාවේ ඇති වූ වසංගත තත්වයේ සිට 2020 ලෝකයේ ඇති වූ කොරෝනා වසංගත තත්වය දක්වා තිබෙන දත්ත පරිශීලනය කිරීමෙන් චම්බන ක්ෂේත්‍රයේ වෙනස්කම් අනුව ලෝකයේ දේශගුණික සහ සෞඛ්‍ය විපර්යාසයන් සිදු වන බවට යම් මතයක් ඇති කර තිබේ.

       නමුත් ගෝලීය ධනවාදය විසින් අපට බල කරනුයේ පොසිලඉන්ධන දහනයෙන් ඉවත් වීමට පමණය. එසේම ඔවුහු දේශගුණය පාලනය කිරීමටද දැන් උපක්‍රම හඳුනාගනිමින් ඇත. ඒ සඳහා තුන්වන ලෝකයේ රටවල දක්ෂ පක්ෂ විද්‍යාඥයන් නාසා වෙත් කැඳවා ගෙන ශිෂ්‍යත්ව දී ඒ රටවල යම් දැනුම් සම්භාරයන් උකහා ගැනීමටද තුන්වන ලෝකයේ රටවල් වලට එරෙහිව යොදා ගැනීමට උත්සාහ දරමින් ඇත. මෙයින් ලබා ගත් දැනුම උපයෝගී කර ගනිමින් ස්වභාවික විපර්යාස වෙනුවට කෘතිමව සකස් කළ විපර්යාස වෙත අප යොමු කරමින් සිටී.යම් යම් කලාප වලට පමණක් බලපාන  භූමි කම්පා  අධික වැසි තත්වයන් මෙන්ම නියන් තත්වයන්ද නිර්මාණය කරගැනීමට දැන් ඔවුන් සමත් වී ඇති බව වාර්තා වේ. 

 ලංකාවේ මෑත කාලයේ දී සිදු වූ පරිසර වෙනස් කම් සහ දේශගුණික වෙනස් කම් පමණක් නොව කොරෝනා වසංගත තත්වයන්ද අතිශයින් ගුප්ත කාරණා මත පදනම් වන බව අපට දැනේ.රටක් දේශපාලන වශයෙන් වෙනස් කිරීමට පමණක් නොව ආර්ථික වහයෙන් කඩා වැට්ටවීමට සමත් මෙම කුරිරු තාක්ෂණික විප්ලවයන් හැටේ දශකයේ දී සිදු වූ හරිත විප්ලවයට වඩා භයානක වේ.උඩවලව ජලාශය අරභයා පැණ නැගී ඇති ගැටළුව සමනලවැව ජලාශයෙන් වතුර නිකුත් නොකිරීම යන තැනට ඌණනය කර තිබේ.ඒ නිසා ගැටළුව දෙශපාලන පක්ෂ වල ගොදුරක් බවට පත් වෙමින් තව තවත් උගුල් වලට සිරවෙමින් සිටිමු.වලවේ පෝෂක ප්‍රදේශ සහ උඩවලවට ජලය ලැබෙන බෙලිහුල්ඔය අවට වසර පහලොවකට පමණ පෙර සිට තේක්ක වැවීම ගැන දැන් කතාබහ නොකරති.මෙවැනි ප්‍රශණයන්ට අදාල පසුබිම විග්‍රහ කිරීම වෙනුවට විද්‍යුත් මාධය විසින් ජනතාව තොරොම්බල් කරලීම විශාල ඛේදවාචකයකි. මේ  අතර පොසිල ඉන්ධන පළවා හැරීමෙන් ඇතිවන රික්තය පුරවන අදානිලාගේ බහුජාතික සමාගම්ද දක්නට හැකිය. ජල විදුලිය නැති වන විට ගල් අඟුරු හෝ ඩීසල් විදුලියද ඔවුනට කැපය. සුළං බලාගාර සඳහා ඔවුන් ඉල්ලන භූමිය අප ලබා දිය යුතුය.රට වටා තිබෙන ඉන්ධන සම්පත හාරා ගැනීමට ඉඩක් නොලැබේ.පැරිස් සම්මුතිය යනු මේ හිර කිරීමේ ගිවිසුමයි. රනිල් වික්‍රමසිංහ සිදු කරනුයේ මෙම කොන්ත්‍රාත්තුව සම්පූර්ණ කිරීමයි.මන්ද එරික් සෝල්හයිම් ප්‍රධාන තැන් ගන්නා ගෝලීය දේශගුණික සමුලුවේ රනිල් වික්‍රමසිංහයන්ටද යම් භූමිකාවක් හිමිව ඇති බැවිනි.

මතුගම සෙනෙවිරුවන්

 

මහා විහාර ව්‍යාපෘතිය පෙන්වා ත්‍රිකුණාමලය බිලිදෙන ට්‍රෝජන් සංකල්ප

 

         අග්‍රාමාත්‍ය නරේන්ද්‍ර මෝදි හමු වී මෙරටේ ආර්ථික දේශපාලනික ව්‍යුහයට  ඉන්දීය මැදිහත් වීම තහවුරු කළ රනිල් වික්‍රමසිංහ මහතා ලංකාවට පැමිණි විගසම සිදු කරන ලද්දේ අනුරාධපුරයට ගොස් අටමස්ථාන නායක ස්වාමීන් වහන්සේලා මුණ ගැසී සංස්කෘතික සාකච්ඡාවකට මුල පිරීමයි.ඉන්දීය බලහත්කාරය ඔස්සේ බලය බෙදීම හරහා රට දෙකඩ වන තත්වයකට තල්ලු විය හැකි බව හොඳින්ම දැන දැන ගිවිසුම් කීපයක් අත්සන් කළ ජනපතිවරයාට වහාම මහා විහාරය මතක් වූ යේ ඇයි. මීට කලින් කුරුන්දි විහාර ප්‍රශ්ණය සහ ඉඩම් ප්‍රශ්ණය ඇද ගත් අවස්ථාවේ දීද මහා විහාරයට වඩා කුරුන්දි වෙහෙර  ඉඩම් ලොකුද යන්න ගැන විවාදයක් ඇති කල බව කවුරුත් දනී.එම කතාව මගින් කියැවෙන්නේ  මහා විහාර සීමාවේ පවතින ස්ථාන කැණීම් කොට සංරක්ෂණය කරනවා විනා  රටේ විවිධ ස්ථාන වල පවතින ‌ෙඑතිහාසික නටබුන් කැණීම් කොට සංරක්ෂණය කිරීම ට හදිසි නොවිය යුතු බවයි.

            මිහිඳු මහ රහතන් වහන්සේ මිස්සක පව්වට වැඩම කොට ලක් බුදු සසුන ස්ථාපිත කළ පසු දේවානම්පියතිස්ස රජතුමා අලි ඇතුන් ඈදා රන් නගුලින් අනුරාධපුර මහා  සීමාව ලකුණු කළ  හැටි මහා වංශ ගත ඉතිහාසයෙන් දැන ගත හැකිය.මහා වංශයේ දැක්වෙන පරිදි පණ්ඩුකාභය රජතුමා පැරණි අනුරාධ ගමෙහි වෙසෙමින් නව අනුරාධ නාගරය නිර්මාණය කර තිබේ. මේ නගරයට අදාල වැදගත් ස්ථාන විසි අටක් ගැන සඳහන් වේ. ඒ අතරින් අභය වැව ජය වැව කාලවේල දෙවොල චිත්‍රරාජ දෙවොල වාලමුඛී නිවස්නය නීච සූසානය සැඩොල් ගම් ආදිය ගැන වෙසෙසින් සඳහන් කරයි.පූර්ව අනුරාධපුර සමයේ පැරණි අනුරාධ ගම දැනට තිබෙන පස් තට්ටු වලින් යට අඩි ගණනාවක් ගැඹුරින් පිහිටා තිබූ බව ඇතුලු නුවර කැණීමෙන් සනාථ වී ඇත. අබි අනුරදිය යනුවෙන් සඳහන් වළන් කැබැල්ලක් හමු වීමෙන් පසු ස්ඵුට වූයේ බ්‍රාහ්මී අක්ෂර වල පරිණාමය මහින්දාගමනයට ප්‍රථම සිදු වූ බවයි.

        දෙවන පෑතිස් රජු   මිහිඳු මහ රහතන් වහන්සේගේ උපදෙස් පරිදි මහා සීමාව පිහිටුවාලූයේ පැරණි අනුරාධපුර නගරයේ පැරණි ස්ථානයන් අසු වන පරිද්දෙනි.මහා සීමාව කොලොම්හොයේ පහණ තොටින් ඇරඹී දක්ෂීණා වෘත්තව ගමන් ගෙන දක්ෂිණ ස්ථූපයට දකුණෙන් ගමන් කර විජයාරාමඋයන පසු කර අභය වැවේ බටහිර පැත්තේ වූ කොක්ගල අසළින් උතුරට හැරී මහා සූසානයට ඇතුළු වී තිබේ.ඉන්පසු  මහා සූසානය මැදින් ගමන් කර නැගෙනහිරට බරව ගොස්  පුර දොවොල් පසු කරමින් පසු බැස නැවත දකුණු දිශාමුඛව ගමන් කර ඇත. එහිදී හමු වන්නේ දිගු ගල් විල නොහොත් දීඝ පාෂාණයයි. මෙය වත්මන් බුලන් කුලම යයි මහාචාර්ය ඒ .ඇස් හොට්ටි ආරච්චි මහතා පවසයි. අනතුරුව කම්මාර දේවතාවගේ දොවොල් හමු වෙයි.ඉන්පසු නීච සූසානයයි. එයද පසු කළ කල්හි මස්තොටු පිරිවෙනයි.පසුව පරිභ්‍රාජකයන් සිටි තැන පියමන් කරමින් ගොස් කොලොම් නදියේ දී මහා සීමාව සම්පූර්ණ කර තිබේ.අනුරාධපුර මහා සීමාවේ එක් පර්ශවයක් තනිකරම කොළොම් නදියෙන් ආවරණය වන්නේය.

      දේවානම් පියතිස්ස රජු ගෙන් පසුව අනුරාධපුර නගරය බෞද්ධ කේන්ද්‍රස්ථානයක් වශයෙන් ක්‍රමානුකූලව ගොඩ නැන්වෙයි.රුවන් මැලි සෑය ජය ශ්‍රී මහා බෝධිය ථූපාරාමය ජේතවනය  මිරිසවැටිය ඉසුරු මුණිය ආදී වශයෙන් සංඝාරාම උපෝසථ ශාලා දන් ගෙවල් පිරිවෙන් භෛෂජ්ජ ශාලා රජ මාළීගා වැව් අමුණු තැනවේ.නමුත් මෙරට වාසීන් තුළ බෞද්ධ සංකල්ප බිහිවන්නේ මහින්දාගමනයටත් පෙර සිටය. 

 මහා වංශයෙන් ඊට ලැබෙන ආලෝකය මද වුවද බුදුන් වහන්සේගේ ඥාති පරම්පරාව සමග තිබූ අඛණ්ඩ සම්බන්ධතාවය මත අනුරාධපුරයත් දිවයිනේ නැගෙනහිර පළාතත් සංවර්ධනය වූ බව පැහැදිලි කරගත හැකිය.අනුරාධපුර ශිෂ්ටාචාරය සතුරු ආක්‍රමණ හමුවේ බිඳ වැටීමෙන් පසුව සිංහල රාජධානිය ක්‍රමයෙන් පොලොන්නරුවටත් අනතුරුව දඹදෙණිය යාපහුව කුරුණෑගල ගම්පළ කොට්ටේ සීතාවක සහ මහනුවර වශයෙන් විතැන් වීම සිදු වෙයි. මෙහිදී මහා විහාර වාසී භික්ෂුන් වහන්සේලා සිය රැකවරණය උදෙසා රජුන් සමිපයේ ද දිඹුලාගල වැනි වනපත්‍ය ආරණ්‍ය වලද අච්ඡගිරි නොහොත් වලස්ගලද පැවැතුණු බව ශාසන ඉතිහාසය දක්වයි. අවසාන වශයෙන් සෙංකඩගල මහනුවර අස්ගිරියටත්  පුෂ්පාරමයටත් වර්ධනය වී වත්මන් මහා විහාරය නිර්මාණය වෙයි.

          රනිල් වික්‍රමසිංහ ජනපතිවරයා මහා විහාරය පිළිබඳ පුරාවිද්‍යා අධ්‍යක්ෂ ජනරාල්වරියටත් මධ්‍යම සංස්කෘතික අරමුදලේ අධ්‍යක්ෂ වරයාටත් පාඩම් කියාදෙන තත්වයට වැටී තිබෙන බව පෙනේ. ජනපතිවරයාගේ ඉතිහාස කීයවීම තුළ ඔහු දෙමළ නිජබිම පිළිගනී. ඒ අනුව නොර්වේ ඇමරිකා මෙන්ම ඉන්දියාව සමගද අවබෝධතා ගිවිසුම් අත්සන් කරයි. උතුර සහ නැගෙනහිරට ස්වයං පාලනයක් දීමටද ඉඩම් බලතල දේශපාලඥයන්ටද දීමට උත්සුක වන්නේ මේ මිථ්‍යා අදහස් වලින් ඔහු තරව බැඳී ඇති බැවිනි. මෙලෙසම ඔහු මහා විහාරය ගැන හිතලු මවාගෙන සිටින්නේ යැයි මට සිතේ.මහාවංශය, මහා සම්මත මනු වංශය, මහා විහාර ආදී වදන් වල මහා යන්නෙන් නැගෙන අදහස විවිධය.මහා වංශය යනු උභයකුල පාරිශුද්ධ සූර්යවංශ රාජ පරම්පරාවයි.  බුදුන් වහන්සේ ගේ ශ්‍රාවකයන් ගෙන් පැවතෙන භික්ෂුන් වහන්සේලාගෙන් මහා විහාර පරම්පරාව සමන්විත වේ. .අනුරාධපුර යුගයේ සිට අඛණ්ඩව මෙම පරම්පරාවන් සීතාවක යුගය දක්වා පැවත පැමිණ ඇත. නමුත් සතුරු ආක්‍රමණ හමුවේ ශාසනික පැවැත්ම අභියෝගයට ලක් වීමෙන් පසු උපසම්පදාවට භික්ෂූන් නොමැති විය. කීප වරක්ම උත්සාහ කොට සියම් දේශයට හසුන් පත් සමග දූතයන් පිටත් කර සියම් උපාලි හිමියන් මෙහි වඩම්මවා නැවත මහා විහාර පරම්පරාව ස්ථාපිත කර ඇත.

             රනිල් වික්‍රමසිංහ මහතා අනුරාධපුරයේ වැඩ සිටින මහා විහාර වංශික භික්ෂූන් වහන්සේලා අභීමුවේහිදී මහා විහාරය ලෝක පූජිත තැනක් කිරීමට අවශ්‍ය කැණීම් සංරක්ෂණ කටයුතු යෝජනා කරයි.ඒ සඳහා පුරාවිද්‍යාඥයන් කොපමණ සිටින්නේ දැයි ප්‍රශ්න කරයි.මෙම ප්‍රශ්ණයට පිළිතුර  කල්තියා බුද්ධ ශාසන අමාත්‍යංශයේ ලේකම් වරයාගෙන් ලැබ ගත හැකිව තිබුණි. නමුත් මාධ්‍ය ඉදිරියේ ඔහු එය ප්‍රකාශ කරනු ලබන්නේ වෙනත් අදහසක් ඇතිව යැයි සිතේ. ඒ අතර ලුම්බිණයේ කැණීම් වලින් මතු කරගත් දේ ගැනද දක්වයි. ඒ කැණීම් කරන ලද්දේ  රොබින් කණින්හැම් නම් පුරාවිද්‍යාඥයෙකි.ලංකාවේ පුරාවිද්‍යා දෙපාර්තමේන්තු නිළධාරීන් පැත්තකට දමා විදෙස් රටකින් පුරාවිද්‍යාඥයෙකු ගෙන්වා පර්යේෂණ කිරීම රනිල් වික්‍රමසිංහ ජනපතිවරයාට නම්බුවකි.මහාචාර්ය ශිරාන් දැරණියගල ද එසේ කර ඇත.ඒ නිසා සමනල වැව යකඩ උදුන්ද අපට අහිමි විය.මෙවැනි විදෙස් විද්වතුන් පර්යේෂණයන් කරන විට ජාත්‍යන්තර න්‍යාය පත්‍රයක් ක්‍රියාත්මක වේ. මහාවිහාර සීමාවේ පවතින පැරණි පිරිවෙන්  යටින් මේ විදේශීය විද්වතාට කෝවිල් වල නටබුන්ද සොයා ගන්නට වුවමනාවක් ඇති වේ නම් එයද සිදු විය හැකිය.පොලොන්නරුවේ ශිව දේවාල පරිශ්‍රයේ පර්යේෂණ අගල් කීපයක් ඇති කලේ ඒ සඳහාය. නමුත් එහිදී බෞද්ධ පිළිමගෙයක නටබුන් මතු වූ බැවින් ඒ පර්යේෂණය නවතා දමා ඇතැයි කියති.මෙරට වර්තමාන ඉතිහාසය දෙමළ ඊලාම් ඉතිහාසයක් බවට පත් කිරීමට වලි කන පිරිසකට උඩගෙඩි දෙන ජනපතිවරයා මහා විහාරය ගැන කතා කරමින් උතුර සහ නැගෙනහිර පෙදෙස් වල බෞද්ධ නටබුන් සුන්නත්දූලි කිරීමට විදේශීය සමාගම් වලට අවසර දේ. 

මේ වන විට ත්‍රිකුණාමලයේ සාම්පූර් පෙදෙසේ අක්කර පන්සීයක භූමි කඩක සුළං බල ව්‍යාපෘතියක් ඇති කිරීමට අදානි සමාගමට අවසර දී ඇත. මොවුන් සුළං ජනන යන්ත්‍ර සවි කිරීමට යන තැන් අතර ගල්ලෙන් ආරාම සංකීර්ණ සහිත කඳු මුදුන්ද හමුවේ.පුරාවිද්‍යා හානි අගැයුම් වාර්තාවක්ද නොමැතිව මෙම ව්‍යාපෘතීන්ට අවසර දීමට උත්සාහ කරන අතර  ඉන්දියාවට ගොස් මෙවැනි ව්‍යාපෘති කීපයකට අවශ්‍ය ගිවිසුම් වලට අත්සන් තබා තිබේ.මහා විහාර භික්ෂූන් වහන්සේලා ගේ අවධානය අනුරාධපුරයේ තබා රට වටා තිබෙන ජාතික උරුමය ඩෝසර කිරීමට සහ ඉඩම් මංකොල්ලයට  පසුබිම සකසන නූතන නිදහස් ආර්ථික පිළිවෙත මගින් කියැවෙන්නේ බෞද්ධයනි නුඹලා වැඩි වශයෙන් දඹදිව වන්දනාවට පැමිණෙත්වා. නුඹලාගේ බෞද්ධ ස්මාරක කෝවිල් බවට පත් කර ඉන්දීය සංචාරකයන් ලංකාවට පැමිණෙන්නට මග සලසමි යන්නයි. ත්‍රිකුණාමලයේ වැදගත්ම බෞද්ධ ස්මාරකය වන ගෝකණ්නය අද හින්දු කෝවිලකි. එම භූමිය තුළ ඉන්දීය සංචාරකයන්ට විශ්‍රාම ශාලාවක් සෑදීමට නැගෙනහිර ආණ්ඩුකාරවර සෙන්දිල් තොන්ඩමන් වලිකයි.ලංකාව ඉන්දියාවේ ආර්ථික දේශපාලනික ප්‍රාන්තයක් බවට පත් කිරීමට මෙම මෙහෙයුම ප්‍රමාණවත්ය.

මතුගම සෙනෙවිරුවන්

ඉන්දියානු ආක්‍රමණයේ තවත් පැතිකඩක් ආයුර්වේද පනතින් හෙළිවෙයි

 

 

                        

            දේශීය වෛද්‍ය ඇමති සිසිර ජයකොඩි මහතා  ගේ අමාත්‍යංශයෙන් සකස්කරන ලද ආයුර්වේද සංශෝධන පනතක් පසුගිය ජූනි මස 12 වන දා ගැසට් පත්‍රයේ පළ කරතිබේ.එම පනත 2023/0705 වන දින  පාර්ලිමේන්තුවට ඉදිරිපත් කර ඇති අතර ඉතා ඉක්මනින් සම්මත කරගන්නා බව මේ වන විට දැනුම් දී තිබේ.මෙම පනතේ තිබෙන විවිධ පරස්පරතා සහ අඩුපාඩු පැහැදිලි කර දීමට අමාත්‍යවරයා හමු වීමට ගිය පාරම්පරික වෛද්‍යවරුනට සහ සිවිල් ක්‍රිකාරීන් කීප දෙනෙකුට ඔහු පවසා තිබෙන්නේ  ආයුර්වේද පනත සංශෝධනය කිරීම මගින් බාධාවක් නොමැතිව කංසා නීතිගත කිරීමට හැකි වන බවයි.කෙසේ වෙතත් මේ වන විට මෙම සංශෝධන පනත ආණ්ඩුක්‍රම ව්‍යවස්ථාවට පටහැනි බව පෙන්වා දෙමින් දේශීය වෛද්‍යවරු පිරිසක් ශ්‍රේෂ්ඨාධිකරණයට පෙත්සමක් ඉදිරිපත් කර තිබේ.

            ලන්දේසීන් සහ ඉංග්‍රීසීන් යටතේ පැවති ආණ්ඩු ක්‍රමයන්හි දේශීය වෙදකමට නිසි තැනක් අත් වූයේ නැත. ග්‍රාමීය වෛද්‍යාවරයා ඔවුන්ට වෙදරාළ විය.ඒයි වෙදරාළ මෙහෙට වරෙන් යයි ඇමතූ සුදු දිසාපතිවරු මෙන්ම සිංහල දිසාපතිවරුද  එකල වූහ. 1926 දී පමණ රාජ්‍ය මන්ත්‍රණ සභාවේ දී දේශීය වෙදකමට ලැබිය යුතු තැන පිළිබඳ කතාබහක් ඇති විය. ඒ අනුව බාලසිංහම් නම් මන්ත්‍රී වරයා යටතේ ස්වදේශ වෛද්‍ය උපදේශක සභාවක් පත් කරන ලදී. මෙම තත්ත්වය මත 1928 කෝට්ටේ පාරේ වෛද්‍ය විදුහලක්ද රෝහලක්ද බෙහෙත් සාදන ස්ථානයක්ද ඇති කරන්නට ඉංග්‍රීසි ආණ්ඩුව කටයුතු යෙදූහ. පසුව එස්.ඩබ්.ආර්.ඩී. බණ්ඩාරනායක මහතා මෙම උපදේශක සභාවේ සභාපති වූවායින් පසුව 1937 ද පමණ කවිරාජ් දාස් ගුප්තා මහතා යටතේ කොමිෂන් සභාවත් පත් කර තිබේ. එසේම 1950 දී සිංහල වෙදකම පිළිබඳ පැවැත්වූ කොමිෂන් සභා වාර්තාවක් ඇති අතර රජය අද පිළිගනු ලබනුයේ 1947 වසරේ මුලු දුන් ආයුර්වේද කොමිෂන් සභා වාර්තාවේ නිර්දේශයන්ය  මෙහි කොමිෂන් වාර්තාව අනුව ආයුර්වේද දෙපාර්තමේන්තුවක් පිහිටුවා වෛද්‍ය වරු ලියාපදිංචිය ඇරඹී දේශීය ආයුර්වේදය නව මුහුණු වරකින් ඉදිරියට පැමිණියේය.

         1956 ජයග්‍රහණයේ දී බණ්ඩාරනායක මහතා නැවතත් දෙශීය වෙදකමට අවශ්‍ය ස්ථානය ලබා දීමේ අභිප්‍රායෙන් සිටියද එතුමාගේ හදිසි අභාවයෙන් පසුව එය ඇණ හිටින. නමුත් 1960 බලයට පත් වූ සිරිමා බණ්ඩාරනායක රජය යටතේ ආයුර්වේද පනතක් පාර්ලිමේන්තුවට ඉදිරිපත් කරන ලදී. මෙම පනත ඉදිරිපත් කරන ලද්දේ සෞඛ්‍ය ඇමති වෛද්‍ය ජේ. පී. ඔබේසේකර මහතා විසිනි.මෙම පනතේ දී ආයුර්වේද වෛද්‍ය ක්‍රමය තුළට දේශීය වෙදකම ඇතුලත් කර වෛද්‍යවරුන්ට ලියාපදිංචිය ලබා දී ඇත. නමුත් දේශීය වෙදකම පිළිබඳ ග්‍රාමීය වෛද්‍යවරුන්ට තිබෙන පරිචය සහ පළපුරුද්ද මත තවමත් ආයුර්වේදයට වඩා ග්‍රාමීය වෛද්‍යවරුන් ගෙන් ජනතාවට සේවයක් සිදු වේ.ඒ නිසා 1961 ආයුර්වේද පනත වෙනස් විය යුතු යැයිද දේශීය වෛද්‍යවරුන්ගේ අනන්‍යතාවය සහතික කරන්නා වූ පනතක් සකස් කරගත යුතු යැයිද හඬක් වූ බැවින් රාජිත සේනාරත්න සෞඛ්‍ය අමාත්‍යවරයා ගේ පාලන සමයේ දී ඒ සඳහා කමිටුවක් පත් කර පනත් කෙටුම්පතක් භාර දී ඇත. නමුත් මෙම පනත් කෙටුම්පත් ද සැළකිල්ලට නෙගෙන නව සංශෝධිත පනත ඉදිරිපත් කර ඇති බවද ග්‍රාමීය වෛද්‍යවරුන්ගෙන් හෝ සංරක්ෂණ සභා වලින් කිසිම යෝජනාවක් නොගෙනම යම් කිසි රහස්‍ය ක්‍රමවේදයකට සකස් කර ඇති බවද වෛද්‍යවරු චෝදනා කරති.          1961 පනතේ ආයුර්වේදය යන අර්ථනිරූපනයට සිද්ධ යුනානි දේශීය චිකිත්සා ක්‍රමවල වෛද්‍ය කර්මය හා ශල්‍ය කර්මයද ආසියාතික රටවල දේශීය වූද ඒ ඒ රටවල රජය මගින් පිළිගනු එසේ යැයි  පිළිගනු ලැබූද වෙනයම් වෛද්‍ය ක්‍රමයක්ද ඇතුළත් වෙයි යන්න අඩංගුය.

 

 

 මෙම සංශෝධිත පනතේ දී එම නාමය  කප්පාදු කර දේශීය චිකිත්සා ඖෂධ ප්‍රතිකාර යනුවෙන් ලඝු කර තිබේ. ඒ අනුව ඖෂධ ප්‍රතිකාර නොවන මැතිරීම් නූල් බැඳීම් ආදිය මෙන්ම විවිධ කෙම් ක්‍රමයන්ද ගෙඩි පැලීම් ආදී දේශීය ශල්‍ය කර්මද ඇතැම් විට නස්‍ය කර්මද තහනම් වන අතර එවැනි ප්‍රතිකාර කරනු ලබන දේශීය වෛද්‍යවරුන් අත්අඩංගුවට ගැනීමට බලය ලබා දී තිබේ. එසේම ඔසු උයන් පවත්වාගෙන යෑමට පෞද්ගලික අංශයටටද ඉඩ ලබා දෙනු ලබන අතර අපනයනය සඳහා එම ඔසු භාවිතා කළ හැකි වේ. මෙම පනතේ සගවා තබා ඇති කාරණය නම් කංසා වගාව ප්‍රචලිත කිරිමයි. දේශීය වෛද්‍යවරුයෙකුට සිය වට්ටෝරුවකට අනුව කංසා පැලෑටියක් වගා කර ගැනීමට සහ යොදා ගැනීමට නීත්‍යනුකූල තත්වයක් මෙහිදී ඇති කර නොමැතිය. ඒ වෙනුවට ඔහුගේ සමස්ත ඔසු වගාවත් ලියාපදිංචි කරවීමට බල කර තිබේ.සැබවින්ම කංසා වගාකිරීමට දේශීය වෛද්‍යවරුන්ට අවසර ලබා ගත් හැක්කේ අන්තරායකර ඖෂධ පනත ට වගන්තියක් එකතු කිරීමෙන් පමණකි.මෙම පනතේ ප්‍රතිපාදන යටතේ විදේශික සමාගම් වලටද ඖෂධ වගාවට  අවස්ථාව හිමිවන අතර දැන ගන්නට තිබෙන අතර උතුරේ ඉඩම් ඩයස්පෝරාවට සහ  ඉන්දියානු සමාගම් වලට ලබා දී වැඩි දියුණ කරන ලද (හයිබ්‍රිඩ්) කංසා වගාව මගින් අපනයනය සඳහා පමණක් වගා කිරීමට දරන උත්සාහයක් ද ප්‍රකට වෙයි.වෙසෙසින්ම ඉන්දියානු ප්‍රතිකාර මධ්‍යස්ථාන මෙරට විවෘත කරලීමටද දේශීය වෙදකම සමතලා කොට උතුර සහ නැගෙනහිර පෙදෙස්වලද පසුව මුලු ලංකාවේමද ඉන්දියානු ආයුර්වේදය ප්‍රචලිත කිරීමේ වෑයමක්ද මෙහි වෙයි.දැනට ලංකාවේ වගා කරන කංසා මෙරටට ආවේණික පාරම්පරික පැලෑටියකි.අපනයනය සඳහා සැකසීමේ දී එවැනි පැලෑටි වලට දැනට වෙළෙඳ පළක් නැත. එබැවින් වැඩි දියුණු කරන ලද කංසා යොදා ගැනීමට උත්සාහ කරනවා විය හැකිය.අපනයනය මගින් ඩොලර් ඉපැයිය හැකියැයි අමාත්‍යවරයා සඳහන් කරනුයේ මෙකී අරමුණු පදනම් කොට ගෙනය. ජනපතිවරයා විසින් මෙම පනත පිළිබඳ දැඩි උනන්දුවක් දක්වා ඇත්තේ ෙපර කී පරිදි උතුර සහ නැගෙනහිර පෙදෙස් වල ඉඩම් ඩයස්පෝරාවට සහ විදේශික සමාගම් වලට ලබා දීමට මෙයින්  මග විවර වන බැවිනි.

        මෙරට සිංහල වෛද්‍යක්‍රමයට තිබෙන ඉතිහාසය අනුව විවිධ යුග වල නොයෙකුත් දැනුමින් පෝෂණය වෙමින් ඒ ඒ පළාත්වල ඔසු වර්ග භාවිත කරමින් සාර්ථක ප්‍රතිකාර ලබා දෙන පාරම්පරික වෛද්‍ය කමයක් පවත්වාගෙන යන පිරිසක් ඇති වූහ.වට්ටෝරු වෙදකම් යයි සමහරක් බටහිර වෛද්‍යවරුන් විසින් ගර්හාවට පත් කරන ලද්ද් මෙම පාරම්පරික වෙදකමයි. තමන්ගේ පළාතට ආවේණික ඖෂධ වර්ග භාවිතා කරන හෙයින් ද තමන් විසින්ම ඖෂධ නිෂ්පාදනයේ යෙදෙන හෙයින්ද මේ ප්‍රතිකාර ක්‍රම වල සාර්ථකත්වය ඒ වෛද්‍යවරුද ජනතාවද අත්දුටුවහ.එදා වෛද්‍යවරයා ප්‍රතිකාර කරන ලද්දේ බුලත් අතටය. මුදලට නොවේ.බෞද්ධ සාරධර්මයන්ගෙන් හැඩ ගැසුණු වෛද්‍ය  සම්ප්‍රදායට බුදුන් වහන්සේ විසින් දේශනා කළ අනු දැන වදාල ක්‍රමවේදයන්ද ඇතුළත්ව තිබේ.දැන් මෙම පනත මගින් සිංහල වෛද්‍ය සම්ප්‍රදායට අනුව සකස් වී තිබෙන මෙකී බොහෝ දේ ක්‍රමානුකූලව ශූන්‍ය කිරීමට උත්සාහ දරා තිබේ.එසේම සම්බාහන ශිල්පීන් සහ ශිල්පිනියන් යනුවෙන් මෙම පනතේ ස්ත්‍රී ලිංග පුරුෂ ලිංග පද යෙදීමද සැකයට තුඩු දෙන්නකි. වෙනත් කිසිම පනතක නැති මෙම විලාශය මෙයට ආදේශ කරන්නට ඇත්තේ සම්බාහන මුවාවෙන් ගණිකා වෘත්තිය නීතිගත කිරීමට දැයි සැකයක් උපදී.කොරෝනා සමයේ දී වීරයෙක් බවට පත්වුණු සිසිර ජයකොඩි අමාත්‍යවරයා ද්‍රෝහියෙකු කර ඔහු ලවා කොස් ඇට බෑවීම තුළින් එක ගලෙන් කුරුල්ලන් කීප දෙනෙකුම මරා ගැනීමේ වෑයමක් ද තිබෙන්නේ යැයි මෙහිදී  අප තේරුම් ගත යුතුය.

මතුගම සෙනෙවිරුවන්

කුරුන්දි වෙහෙර ගැන ඉංග්‍රීසියෙන් බොරු කියන පාලකයා කවුරුද

 

 

 

                    

            ජනපති රනිල් වික්‍රමසිංහ මහතා තමන්ගේ එක් පසෙකින් දෙමළ ජාතික සන්ධනයේ මන්ත්‍රීවරු ද තවත් පසෙකින් පුරාවිද්‍යා අධ්‍යක්ෂ ජනරාල් අනුර මනතුංග මහතා ද බුද්ධ ශාසන අමාත්‍යංශයේ ලේකම් සෝමරත්න විදාන පතිරණ මහතා ද තබා ගෙන ඉතිහාස පන්තියක් පවත්වා ඇත. ජනපතිවරයා චතුර ලෙස ඉංග්‍රීසි කතා කරන්නෙකි. තර්ක කරන්නෙකි. එබැවින් ඔහුගේ ඉතිහාස පන්තිය අනුර මනතුංග මහතාට එක පැහැර තේරුම් ගන්නට බැරි වන්නට ඇතැයි සිතමි. මුලතිවු දිස්ත්‍රික්කයේ පිහිටි කුරින්දි විහාරය පිළිබඳ ජනපතිවරයා කරන කතාව ජාතික වශයෙනුත් ජාත්‍යන්තර වශයෙනුත් ගත් විට බරපතල ප්‍රකාශයකි. ලංකාවේ ඉතිහාසය විකෘති කරමින් ද්‍රවිඩ බෞද්ධ විහාරයක් පැවති බවට ඔහු කළ ප්‍රකාශය ඛණ්ඩනය කරන්නට අනුර මනතුංග මහතාට නොහැකි විය. නැතිනම් ජනපති ගේ ඉංග්‍රීසි භාෂා ව්‍යවහාරයෙන් ඔහු අසරණ වන්නට ඇත. සාමාන්‍යයෙන් ජනපති රනිල් වික්‍රමසිංහ මහතාගේ හැසිරීම අතිශයින් ව්‍යාකූලය. ඔහු එකක් කියමින් තවත් අදහසක් දක්වන්නෙකි. ඛල්ලාට නාග රජු විසින් අනුරාධපුර යුගයේ සාදවන ලද කුරුන්දි විහාරය පසුකාලීනව අග්ගබෝධි තුන්වන මිහිඳු සතරවන  උදය වැනි රජවරු විසින් ප්‍රතිසංස්කණ‌ය කර ඇත. මෙම විහාරය පසුභාගයේ දී කුරන්දාවශෝක විහාරය ලෙසට හඳුන්වා දී ඇත.කාලිංග මාඝ ගේ බලකොටුවක්ද මෙහි පිහිටා තිබුණු අතර දෙවන පරාක්‍රමබාහු රජු විසින් එය විනාශ කරතිබේ. පෙර කී රජවරු විසින් පිහිටවූ සෙල් ලිපි වලින් ඉතිහාසය පැහැදිලිව පෙනෙද්දී ද්‍රවිඩ බෞද්ධ විහාරයක් ගැන කියන රනිල් වික්‍රමසිංහ දෙමළ ජාතික සන්ධානය ඉදිරියේ කරනුයේ දේශපාලන රංගනයකි.

          ඉදිරි ජනපතිවරණයකදී හෝ වෙනයම් දේශපාලන ප්‍රතිසංස්කරණයකදී දෙමළ දේශපාලනඥයන් ගේ සහාය රනිල් වික්‍රමසිංහයන්ට අවශ්‍ය වෙයි. මෙම සාකච්ඡාව සම්බන්ධයෙන් එතැන සිටි සෝමරත්න විදාන පතිරණ ලේකම් වරයා සිය අමාත්‍ය විදුර වික්‍රමනායක වෙත ඉදිරිපත් කරන වාර්තාව මගින් ඒ බැව් සනාථ වෙයි.   මෙම දිනයේ පළමු සාකච්ඡාවේ දී  පුරාවිද්‍යා ස්ථාන ගැසට් කිරීමට කටයුතු කළ යුතු බව නිළධාරීන් ඉදිරියේදී ප්‍රකාශ කරන ජනපති වරයා දෙමළ ජාතික සන්ධාන සාකච්ඡාවේ දී  අනුර මනතුංගයන් හෑල්ලුවට ලක්කරමින් ඔහුගේ මහාචාර්ය පට්ටමද හෑල්ලුවට ලක් කරමින් කුරුන්දි විහාරය සහ ඉතිහාසය විකෘති කරමින් පුරාවිද්‍යා ස්ථාන වල මායම් කණු ගැලවිය යුතු යැයි කියමින් කරන කතාව මේ රටේ දේශපාලනය පිළිබද මහා ඛේදවාචකයක් ඉසිමතු කරන්නෙකි.

    දෙමල සන්ධානය සහ ඔවුන්ගේ ප්‍රාදේශීය දේශපාලනඥයන් යනු ඉඩම් මංකොල්ලකරුවන්ය. මුලතිවු පිහිටා තිබෙන නාගචෝල රක්ෂිතය 1932 දී හෙක්ටයාර් 6825 ක වපසරියකින්  ගැසට් කරන ලද්දකි. එම රක්ෂිතය තුළ අක්කර 78 ක කුරුන්දි විහාර ආරාම සංකීර්ණ රක්ෂිතය පිහිටා තිබේ.. පාරක් තොටක් නොමැතිවව තීබූ මේ පෙදෙස ත්‍රස්තවාදී යුද්ධයෙන් පසුව එළිපෙහෙලි විය. අසල ගම්වල සිටි දෙමළ ජනතාව දෙශපාලඥයන්ගේ මෙහෙයවීම පිට මේ රක්ෂිතය එළිකොට කුඹුරු අස්වැද්දූහ.ඒ අනුව හෙක්ටයාර් 1200 ක් පමණ පෙදෙසක් ඔවුන් විසින් විනාශ කරතිබුණි. දෙමළ ජාතික සන්ධානයේ ප්‍රාදේශීය දෙශපාලනඥයෙකු වූ ශෂි කුමාර් විසින් පමණක් අක්කර සියයකට වඩා ඉඩම් ප්‍රමණයක් අල්වා ගෙන තිබිණ. 2018 න් පසු මේ දෙශපාලඥයන් විසින් කුරන්දි විහාර පැරණි පොකුණ විනාශ කර ඩෝසර දමා මහා වැවක් සාදන්නට යෙදිණ .

 

 

එසේම 1905 බෙල් වාර්තාවේ දක්වා තිබෙන කුරුඳු නගරය හෙවත් ජනාවාසය විනාශ කොට කුඹුරු අස්වද්දන්ට යෙදිණ. මේ එළ පෙහෙලි කිරීම් සම්බන්ධව නඩු දෙකක් වන සංරක්ෂණ ආඥා පනත යටතේ පවරා තිබේ.2019 දී ඔවුහු කුරුන්දි විහාර කඳු ගැටය ආසන්නයේ ම පිහිටි පුරාවස්තු සහිත අක්කර පහක පමණ ප්‍රදේශයක් ද ආක්‍රමණය කරමින් එළි පෙහෙළි කිරීම් කළද පෙර කී නඩුව නිසා ඒ ව්‍යයාමය වැලක්විණ. අනතුරුව 2020 න් පසුව කුරුඳු විහාර රක්ෂිතයේ කළ ගවේශණයකින් පසුව අක්කර 229 ක් පුරා පැතිර පැවති කුරුඳු නගරයේ නටබුන් සොයා ගන්නට යෙදුණි. ඒ වටා මායිම් කණු සිටවන්නට ද යෙදුණි. මේ සීමාවට පෙර සඳහන් කළ අක්කර පහද ඇතුලත් වී තුබුණි. ජනපතිවරයා ඉදිරියේ දී දෙමළ ජාතික සන්ධාන පාර්ලිමේන්තු මන්ත්‍රී සුමන්තිරන් පවසන්නේ සියවස ගණනාවක් තිස්සේ මේ ගොවීන් පෙර කී අක්කර පහේ ගොවිතැන් කළ බවයි. මෙය අමූලික බොරුවකි. ඒ බොරුව පිළිගත් ජනපති වරයා කවුරුත් නොදන්නා ඉතිහාසයක් දක්වමින් ඉංග්‍රීසියෙන් ශිල්ප දක්වන්නට යෑමෙන් සාකච්ඡා සභාව කෝලම් මඩුවක් බවට පත් වී ඇත.

            මේ සියල්ලටම හේතුව ජනපතිවරයා සිය විධායක බලය පිලිබඳ නොවැටහීමෙන් කටයුතු කිරීම යයි සිතමි.විධායකය ව්‍යවස්ථාදායකය සහ අධිකරණය යනුවෙන් කොටස් තුනකට කඩා ඇති කළ දේශපාලන අධිකාරිය තුළ විධායකයට අසීමිත බලයක් නැත. ඔහු අමාත්‍ය මණ්ඩලයේ ප්‍රධානියා වන අතර ආන්ඩුවේ ප්‍රධානියාද වෙයි. එසේම රටේ සන්නද්ධ අංශයේ ප්‍රධානියා ද වෙයි. නමුත් ආණ්ඩුක්‍රම ව්ව්‍යස්ථාවේ 33 (ඊ) වගන්තිය ප්‍රකාරව ආණ්ඩුක්‍රම ව්‍යවස්ථාවේ හෝ වෙනත් යම් ලිඛිත නීතියක හෝ විධි විධාන වලට පටහැනි නොවන්නා වූද ජාත්‍යන්තර නීතිය චාරිත්‍ර වාරිත්‍ර හෝ භාවිතය අනුව සියලු ක්‍රියා කිරීමට බලතල ඔහුට ඇත්තේය යනුවෙන් සඳහන්ය.දැන් වත්මන් ජනපතිවරයා මේ ව්‍යවස්ථාමය තත්වය පිළිපදින්නේද නැත. ඔහු වරෙක මහවැලි ඉඩම් දෙමල ජනතාවට බෙදා දීම අරභයා මහවැලි අධිකාරි පනත උල්ලංඝණයට සැරසෙයි. නැතිනම් මහවැති අධිකාරිය විසිරුවා හරින බවට පාරම්බායි. තවත් වරෙක 1985 ඉඩම් පරිහරණ සැලැස්මට යා යුතු බවද අවධාරණය කරයි. 1985 ඉඩම් පරිහරණ සැලැස්ම යනු 1983 දී ඉඩම් හා මහවැලි සංවර්ධන අමාත්‍යංශය විසින් ඇති කරන ලද ඉඩම් පරිහරණය පීලිබඳ පිහිටුවා ලූ ආයතනයයි. එය තවත් සංවර්ධනය වී 2007 දී නව ඉඩම් පරිහරණ සැලැස්මක් ඇති කරමින් අක්ශාංෂ දේශාංහ අනුව ඉඩම් නිශ්චිත කිරීම අරඹන ලදී.ජනපති වරයා කියනුයේ මේ දියුණු සැලැස්ම පැත්තකින් තබා 1985 යන්නටය. එහි රහස නම් ඒ යුගයේ දී පුරාවිද්‍යා රකෂිත හඳුන්ගෙන තිබුණේ 276 ක් පමණක් වීමයි. නමුත් 2012 න් පසු පුරාවිද්‍යා ස්ථාන 1700 කට වඩා උතුර සහ නැගෙනහිර පළාත් වලින් සොයා ගන්නට යෙදිණ. මේ සියලු ඉඩම් වල විශේෂයෙන්ම බෞද්ධ පුරාවස්තු තිබීම දෙමළ ජාතික සන්ධානයට පමණක් නොව මුස්ලිම් කොන්ග්‍රසයට ද බලවත් හිසරදයකි.දකුණු ඉන්දියාවේ ශිව සේනා නාග සේනා සහ උතුර් සේනා යනුවෙන් දක්වන දේශපාලන සංවිධාන සමග එක්වී  උතුර සහ නැගෙනහිර පළාත් වල ආගමික සංහාරයක් කොට ඒවායේ ශිව ලිංග තැන්පත් කරලීම දෙමළ ජාතික සන්ධානය ඇතුළු අන්තවාදීන් ගේ වෑයමයි. රනිල් වික්‍රමසිංහ ජනපති වරයා උඩගෙඩි දෙන්නේ මේ අන්තවාදයටයි.

            ජනපති වරයා ඉංග්‍රීසියෙන් බොරු කීමට සමතෙකි. ඔහුගේ වාග් විලාශය චතුරය . ඒයට තාර්කික වශයෙන් ඉංග්‍රීසියෙන් පිළීතුරු දීමට ලෙහෙසි පහසු නැත. ඒ නිසා ඉංග්‍රීසි බසින් ඕනාම බොරුවක් කියන්නට ඔහුට හැකිය. කුරුන්දිය යනු  ද්‍රවිඩ බෞද්ධ විහාරයක් යැයිද පොත්තකූට නම් ද්‍රවිඩයෙක් මෙය හැදූ බව කියනන්ට ඔහු තතනයි. පොත් කූට යනු සුලු අගබෝ රජුගේ රාජ සභාවේ සේවය කළ ද්‍රවිඩයෙකි. ඒ යුගයේ ලම්භකර්ණ වංශිකයන් අතර තිබූ බල අරගයෙන් ප්‍රයෝජනය ගත් පොත්ත කූට රාජ්‍යය පැහර ගෙන දත්ත වල්පිට නම් රාජ වංශිකයෙකු සිංහාසනයේ තබා රට පාලනය කරල්ය.

 

 සිංහල රජුන් දුර්වල වන විට විදේශික සතුරන් බලවත් වෙයි. පොත්ත කූට රට අල්ලා ගත් පමණින් කුරුදු විහාරය ද්‍රවිඩයන් සෑදවූවක් බව ඔප්පු කරන්නට නොහැකිය. එම භූමියෙන් සම්භ වී ඇත්තේ සිංහල ශිලා ලේඛන පමණකි.ඒබැවින් මේ බොරු වලට සහ ආණ්ඩුක්‍රම ව්‍යස්ථාව උල්ලංඝණය කිරීම් වලට සීමාවක් තිබිය යූතු බව අපගේ හැඟිමයි.  රනිල් වික්‍රමසිංහගේ සෘජු තර්ජනය කිසා පුරාවිද්‍යා අධ්‍යක්ෂ ජනරාල් ඉල්ලා අස්වී තිබේ. එය බරපතල වැරදි පූර්වාදර්ශයකි.මෙයට කලින් කලුදියපොකුණ පුරාවිද්‍යා සංකීර්ණය හෝටලයකට දිය යුතු යැයි ආචාර්ය සෙනරත් දිසානායක හිටපු අධ්‍යක්ෂ ජනරාල්ටද තර්ජනය කර තිබෙන්නේ ද රනිල් වික්‍රමසිංහ මහතාය.  විද්වතුන් ට බලපෑම් කිරීම සහ ආයතන වලට අනිසි ඇගිලි ගැසීම් නිසා  ආයතන පවත්වාගෙන යෑමට නොහැකි වනු ඇත.මෙම ගැටළුවට සංස්කෘතික අමාත්‍ය විදුර වික්‍රමනායක මහතාද සෘජුව වගකිව යුතුය. ජනපතිගේ අනිසි බලපෑමට කලින් අමාත්‍යවරයාද කීප විටක්ම මෙලෙස පුරාවිද්‍යා ස්ථාන අන්සතු කිරීමට බලපෑම් කර තිබේ යැයි දැන ගන්නට ඇත.මෙම තත්වය මත මේ රටේ ජාතික උරුමයන් ආරක්ෂා කර ගැනීමට හැකි වෙයිද යන කාරණය අභියොගයක් වශයෙන් අප ඉදිරියේ පවතී.

මතුගම සෙනෙවිරුවන්

කිලිනොච්චි බෞද්ධ ස්මාරකය අභිබවා කෝවිලක් මතුවූයේ කෙලෙසකද

 

 

                  

             උතුරු පළාතේ කිලිනොච්චි දිස්ත්‍රික්කයේ කරච්චි ප්‍රාදේශීය ලේකම් කොට්ඨාශයේ ශිවනගර් නමින් හඳුන්වනු ලබන  ප්‍රදේශයේ ඌරතිපුරම් ගම්මානයේ කෝවිලක් අසබඩ කරන ලද පරීක්ෂණයකදී සිරිපතුල්ගලක් ආදී බෞද්ධ නටබුන් සොයා ගනු ලැබූ බව  මහාචාර්ය පද්මනාදන් මහතා මාධයයට ප්‍රකාශ කරතිබුණි. මේ පුවත පසුගියදා දිවයින පුවත් පතේ පළ ව තිබුණි.නමුත් මෙම ස්ථානයේ ඉතිහාසය පිළිබඳ විමසිල්ලෙන් සිටි  අපට නම් ඒ පුවතේ අලුත් දෙයක් තිබුණේ නැත. වර්තමානයේ ශිවනගර් යනුවෙන් හඳුන්වන ග්‍රාමයේ පැරණි වැවක් අසල තිබී 1956 දී නශ්ඨාවශේෂ රාශියක් හඳුනාගන්නට යෙදුණු ආකාරය පැරණි පුරාවිදු වාර්තා වල දැක්වෙයි. .ඒ අනුව එම පෙදෙස රජයේ ඉඩමක් ලෙසට සිතියම් වලට ඇතුලත් කර ඇත.1958 දී  පුරාවිද්‍යා කොමසාරිස්ව සිටි පී.ඊ.පී. දැරණියගල මහතාගේ පාලන වාර්තාවේ එම කටයුත්ත දක්වා ඇත්තේ මෙසේය.

     'උතුරු පළාතේ උරතිරපුරම් ජනපදයේ තිබෙන දාගැබක් විනාශ කොට ඇති බවට වාර්තා වී තිබේ.උරතිරපුරම් වැව දක්වා මාර්ගයක් තැනවීමේදී කරන ලද සමතලා කිරීම් වලදී මෙම දාගැබ හඳුනාගන්නට යෙදී ඇත.පාර කැපීම වහාම නවත්වන ලදී.දාගැබ අසල ගල්කණු කීපයක්ද හඳුනාගන්නට යෙදී ඇත.නව කෝවිලක් මෙම නටබුන් අසලම දැනට ඉඳි කරමින් ඇත(A modern kovil is under conatruction ).කොවිලේ ගෙඩනැගිල්ල සඳහා අත්තිවාරම් කැපීමේ දී සිංහ හිස සහිත මැටි භාණ්ඩ කීපයක්  සහ පැරණි කාසි හමුව තිබේ.මෙම ස්ථානයේ දේවාලයක් ද තිබෙන්නට ඇතැයි සිතිය හැකිය.' මෙම නටබුන් හඳුනාගන්නට යෙදුණද ස්ථානය පුරාවිද්‍යා ස්මාරකයක් බවට ගැසට් කරනු ලබන්නේ 2016 වසරේ දීය(අංක 1960/ 2016-03-24 ).ඒ වන විට ප්‍රදේශය ශිවනගර් ලෙසට නාමකරණය වී ඇති හෙයින් එම නමින්ම ගැසට්ටුවට ඇතුලත් වී තිබේ.

        උරතිපුරම් ආසන්නයේ එයට උතුරින් කලපුව ආසන්නයේ සපුමල් කුමරු ගේ ගමන් මාළිගාවක් පිහිටා තිබී ඇත.සපුමල් කුමරු ආර්ය චක්‍රවර්තී රජුන් පරාජයට පත් කිරීම පිණිස යාපනය දෙසට ගමන් කරන ලද්දේ මන්නාරම් මුහුදු තීරයට සාපේක්ෂ පුනරීන් මාර්ගයෙනි. යපනය කලපුවෙන් එගොඩ වී කොඩිකාමම් දක්වා සතුරන් හඹා ගොස් අත්අඩංගුවට පත් කරගෙන ඇත.ඉන්පසු මේ සතුරු ඈඳුත්ත   කෝට්ටේ අග රජු වෙත  ඉදිරිපත් කළ බව ඉතිහාසයේ දක්වයි. මේ ජයග්‍රහණය ලබා ගැනීමට ප්‍රථම පුනරීන් පෙදෙසේ පැවති පැරණි කතරගම දේවාලයක් වන්දනාමනා කර ඇත.වරින් වර උතුරට එල්ල වූ පාණ්ඩ්‍ය ආක්‍රමණ වලින් පසුවද කාලිංග මාඝ ආක්‍රමණ වලින් පසුවද මෙම පෙදෙසේ දේව ඇදහිලි ජනප්‍රිය වී තිබුණි. නමුත් උරතිරපුරම් හි පවතින සිරිපතුල් ගල අපට කියාපාන්නේ ස්තූපයේ පැරණි බවයි.නැගෙනිහිර පළාතේ කන්නියා සපුමල් ගස්කඩ ආදී තැන් වලදී හමුවන ස්තූප වට කොට සිරිපතුල්ගල් තැබීම සිදු කර ඇති බව පැහැදිලිය.ක්‍රි.පූ. සියවස් වල සිට පොලොන්නරු යුගය දක්වා කාලය තුළ වැඩී ගිය බෞද්ධ ශිෂ්ඨාචාරයක් මෙහි පැවති බවට සාක්ෂි තිබේ.

     තිස්ස නම් බෞද්ධ උපාසකයෙකු නාගද්වීපයේ බොහෝ භික්ෂූන් වහන්සේලා සිටී යැයි අසා  පුනරීන් සිට යාපන කලපුවෙන් එගොඩ මෙගොඩ ගිය සැදැහැවතුන් වෙනුවෙන් යාත්‍රා සේවයක් කළ බව ඉතිහාසයේ දැක්වේ. ඒ නිසාම ඔහු ආරියගාල තිස්ස නමින් හැඳින්විණ. යාපා පටුනේ දී පැවැත්වූ මහණ උපසම්පදා කර්මයක් ගැන කෝට්ටේ යුගයේ දී සඳහන්ව ඇතැයි පූජ්‍ය එල්ලාවල මේධානන්ද හිමියන් දක්වයි.ඉරණමඩු වැවෙන් පෝෂණය වන සශ්‍රීක වෙල්යායන්ගෙන් සමන් විත මෙම පෙදෙස පැරණි බෞද්ධ ජනපදයකි. මන්නාරම් පැරණි මාර්ගය දෙපස විශාල බෞද්ධ සමාරක රැසක් හමුවන්නේ ඒ නිසාය. උරතිපුරම් විහාරයද එවැනිම වූ වැදගත් සිද්ධස්ථානයකි පරංගින් විසින් යාපන පෙදෙස අත්පත් කර ගැනීමත් කන්ද උඩරට සිංහල පාලනයෙන් ගිලිහී යෑමත් හේතු කොට ගෙන කිලිනොච්චිය නොහොත් වන්නි පෙදෙස ජන ශූන්‍ය වුණි. පසුව ලන්දේසීන් විසින් සිය වහල් සේවය සඳහා ගෙන්වා ගන්නා ලද මලබාර් වහලුන් මේ පෙදෙසේ පදිංචි කරන්නට යෙදුණි. අද අපට දක්නට ලැබෙන දෙමළ ජනගහනය මෙකී වහල් පූර්වගාමීන් ගෙන් පැවතෙන්නවුන්ය.

      සපුමල් කුමරුගේ යාපන ගමනය නිසා මේ පෙදෙසේ පැවති දේවාල සංස්කෘතිය තව දුරටත් වැඩි දියුණු වී තිබේ. මේ කාලයේ දී බුද්ධ මන්දිරය අසළ විෂ්ණු කතරගම වැනි දේවාල සකස් කිරීම බෞද්ධ සංස්කෘතියට අයත්ය. උරතිපුරම් හි පැවති බෞද්ධ ස්මාරකය අසලින් ලැබුනු පුරාවස්තු කීපයක් අදටත් කෝවිල සන්තකව පවතින බව පුරාවිද්‍යා දෙපාර්තමේන්තුව දක්වයි. 1958 කාලයේ පටන් උරතිපුරම් දාගැබ විනාශ වන්නට කටයුතු යෙදුණු බවට පුරාවිද්‍යා වාර්තා දක්නට ඇත. මෑත කාලයේ දාගැබ පවතින රජයේ ඉඩම දීමනා පත්‍රයක් මගින් කෝවිලට පවරා දී ඇත.උතුරු පළාතේ පවතින දැනට ශේෂව දක්නට ලැබෙන පුරාවස්තු අතර උරතිරපුරම් දාගැබ සහ නශ්ඨාවශේෂ ඉතා වැදගත් බැවින් ඒවා ආරක්ෂා කර ගැනීමේ අදිටනින් උතුරු පළාත් පුරාවිද්‍යා කාර්යාලය රජයට යෝජනාවක් ඉදිරිපත් කරනු ලබන්නේ 2020 වසරේ දීය. ඒ අනුව 2021 මාර්තු මාසයේ දී දාගැබ සංරක්ෂණ කටයුතු ආරම්භ කරලීමට කැණීම් කණ්ඩායම් පිටත් කර යැවිණ. නමුත් ‌කෝවිල් පාලක මණ්ඩලය මෙයට විරෝධය දක්වන ලද බැවින් දෙපාර්තමේන්තුවට කැණීම නතර කරන්නට සිදු විය. ඒ සම්බන්ධව කිලිනොච්චි පොලිසියට පැමිණිලි කොට ඇති අතර එම ඉල්ලීම දැනට උසාවියට ඉදිරිපත් කර තිබේ.

      මේ රටේ විවිධ ස්ථානයන්හි විවිධ පුරාවස්තු දක්නට ලැබේ. බොහෝ පුරාවස්තු බෞද්ධ සිද්ධස්ථාන ආශ්‍රිතව පවතින අතර ඒ වායේ යම් කැණීමක් හෝ අලුත් වැඩියාවක් කරන කල්හි එයට විරුද්ධව යෑමක් නැත. ඒ ස්ථානවල වැඩ වසන ස්වාමීන් වහන්සේලා ගේ සහයෝගයෙන් එම කැණීම් කරගෙන යනු ලබයි.නමුත් උතුරු සහ කැගෙනහිර පළාත් වල සිංහල නීතියක් බල පැවැත්වෙන්නේ නැත. යම් පැමිණිල්ලක් පුද්ගලයෙකුට විරුද්ධව ඉදිරිපත් කළද ආණ්ඩුවේ නිළධාරීන්ට එරෙහිව ඉදිරිපත් කළද උසාවි වල තීන්දු ලබා දෙන්නේ දෙමළ පාර්ශවයට වාසි සහගත වන ආකාරයෙනි.නෙදුන්කේනි වසමේ වඩුන්නාගල නැතහොත් වෙඩිකිරිනාමලේ බෞද්ධ ලෙන් සංකීරණය මත පැවති දාගැබ  පොලිසිය බලා සිටියදීම  විනාශ කර ඇත.ඒ මත දැන් ශිව ලිංගයක් තබා ඇත.

           උරතිපුරම් කෝවිලට ඉතිහාසයක් නැත. එහි ඉතිහාසයට දෙමළ සම්භවයක් තිබෙන බව ඔප්පු කිරීම ට උතුරේ විශ්ව විද්‍යාල වල මහාචාර්යවරුන් උත්සාහ කරනවා විය හැකිය.උතුරේ සිටි එක් මහාචාර්යවරයෙකු යාපන කෞතුකාගාරයේ තැන්පත් කර ඇති බෞද්ධ නටබුන් හින්දු නටබුන් ලෙස වර්ග කිරීමකට උත්සාහ ගත් බව අපට සැළව තිබේ.මහාචාර්ය පද්මනානන් මහතා ද උත්සාහ ගන්නට ඇත්තේ උරතිරපුරම් කෝවිලට දෙමළ ඉතිහාසයක් සදන්නටයි.එපමණක් නොව මෙම බෞද්ධ පුරාවස්තු දාගැබ අසලින් ඉවත් කර යාපන කෞතුකාගාරයට ගෙන යා යුතු බවටද ඔහු යෝජනා කරයි.නමුත්   මෙවෙර එම විකෘති කිරීම කළ  නොහැකි වුණි.ඊට හේතුව වත්මන් කෝවිලේ තිබී බෞද්ධ පුරාවස්තු හමුවීමයි. අනුරාධපුර යුගයට අයත් ඌරතිපුරම් දාගැබ සහ පිළීමගෙයි ඉතිහාසය විකෘති කිරීමට ඔහුට නොහැකිය. මෙහි තිබූ සිරිපතුල මගින් බෞද්ධ ස්මාරකයේ සැබෑ තත්වය ඉස්මතු වී පෙනේ . දැන් ඔවුන් සංවිධානය වී වර්ෂ 3000 ක් පැරණි කෝවිලක් මෙහි තිබුණේ යැයි ප්‍රකාශ කරති. කෝවිල් පාලක සභාවද අන්තවාදී දෙමළ දේශපාලනඥයන්ද එකතු වී උද්ඝෝෂණ සංවිධාන කරති. ඒ නැති ඉතිහාසයකට පලිප්පු දමන්නටයි. සඳුන්රුක කෙතරම් ගල ගෑවත් සුවඳ මිස ගඳක් නැත. උතුර සහ නැගෙනහිර පළාතේ කැලෑ පීරමින් සෙවුවත් වර්ෂ 150ට වඩා පැරණි කෝවිලක් හමුවන්නේ නැත. බෑලූ සෑම අතකම දක්කට තිබෙන්නේ බෞද්ධ නටබුන්ය.

මතුගම සෙනෙවිරුවන්

විග්නේශ්වරන් ගේ ජාන හුටපටය සහ නොදන්න දෙමළට ගොස් වරිගෙ නහ ගැනීම

 

 

 

           

         කාලයක් නිහඬව සිටි සී.වී. විග්නේශ්වරන් මහතා මෑතකදී සිය කටහඬ අවදි කර තිබෙනු දුටුවෙමි.එහෙත් ඔහු ඉතාමත් ඉක්මනින් යළි නිහඩ විය. ඊට හේතුව ඔහු කරන ජාතිවෘදි ප්‍රකාශ සම්බන්ධව පොලසිපතිට පැමිණිලි කිරීමයි.. උතුරේ මහ ඇමතිව සිටි සමයේ දී විද්‍යුත් මාධයයන්ට පුවත් සපයන පුද්ගලයෙකු ලෙසින් ප්‍රකට සිටි එතුමා  කොළඹ මල්පාරේ සිට නැවතත් අරුම පුදුම මතිමතාන්තරයක් දක්වා තිබුණි .ඔහුගේ ජීවිත කාලයේ වැඩිමනත්ව කොළඹ සිට සිංහලයන් සමග එකට වැඩ කර තිබුණද මහින්ද රාජපක්ෂයන්ගේ තෙරීම මත මහ ඇමති වූ දා පටන් ඔහුගේ ප්‍රකාශයන් අතර සිංහල ජනතාවට එරෙහි වෛරී ප්‍රකාශ බහුල විය.මේ කතා සාමාන්‍ය දෙමළ ජනතාවට එල්ල කොට කියන්නක් නොවේ.ඔහු නියෝජනය කරන දෙමළ වෙල්ලාලර් කණ්ඩායම් එල්ල කොට කියන්නක් බව පැහැදිලි වේ. උතුරේ චන්දයකදී වෙනත් නියෝජනයක් නොමැති බැවින් දෙමළ ජනතාව විසින් තමන්ව තෝරා පත් කර ගන්නා බව ඔහු දනී.නමුත් ඒ අතර තවත් දෙමළ දේශපාලනඥයන් අතරින් ඔහුට කැපී පෙනෙන්නට අවශ්‍ය වී තිබේ.රනිල් වික්‍රමසිංහ මහතා විසින් යාපනයේ පැවති තෛපොංගල් උත්සවයේ දී සහ නිදහස් දින කතාවේ දී දක්වා සිටි 13 වන සංශෝධනය සපුරා බලාත්මක කරලීම තේමා කර ගනිමින්  ඔහුගේ ප්‍රකාශය නිකුත්ව තිබුණි. ඒ අතර ඔහු ඉංග්‍රීසියෙන් ලියූ ලිපියක්ද මහානායක ස්වාමීන් වහන්සේලා වෙත නිකුත් කර තිබුණි.දෙමළ දේශයක් වෙනුවෙන් ප්‍රකාශ නිකුත් කරන විග්නේශ්වරන් අනෙකුත් නීතිඥවරුන් මෙන්ම ඉංග්‍රීසිය මව් බස කර ගත්තෙකි.

    විග්නේශ්වරන් විසින් මෑතකදී තවත් ප්‍රකාශයක් කරතිබේ.සිංහල ජනයා පැවත පැමිණෙන්නේ දෙමළ ජනයා ගෙන් බව ඔහු එක හෙළා කියාපායි.එයට සාධක වශයෙන් ඔහු ඊනියා ඩී.එන්.ඒ. පරීක්ෂණයක් ගැන දක්වා ඇත.ජාන ඉංජිනේරු විද්‍යාවේ දියුණු ව සමග ලෝකයේ මෑත කාලීනව ජන වර්ගයන්හි ජාන සම්මිශ්‍රණය පිළිබඳව පර්යේෂණ රාශියක් සිදු කර තිබේ.එම පර්යේෂණයන්හි මූලික පදනම වන්නේ ජාන මගින් හඳුනා ගැනීමේ ක්‍රම දියුණු කිරීම පොදු මානව වර්ගයක් බිහි කිරීමට අවශ්‍ය ජාන හුවමාරුව සිදු කිරීම මෙන්ම රෝගයන් සදහා නවීන ජාන ප්‍රතිකාර හඳුන්වා දීමත්ය.රට රටවල් වල පවත්වා ගෙන යනු ලබන විශ්ව විද්‍යාලයන්හි කරන මේ පර්යේෂණයන් සඳහා ඇමරිකාව ප්‍රමුඛ බලවත් අයතනයන්හි මූල්‍ය අනුග්‍රහය ලැබේ.එවිට ඒ දත්ත ඔවුන් සන්තක වන නිසා මේ පර්යේෂණයන් විවිධ ක්ෂේත්‍රයන් අරභයා සිදු වෙයි. උදාහරණයක්  වශයෙන් කොරෝනා එන්නත පිළිබඳව කළ පර්යේසණ දැක්විය හැකියි.ලංකාවේ ජයවර්ධනපුර විශ්ව විද්‍යාලයේ විද්වතුන්ටද එවැනි අරමුදල් ලැබී තිබුණි.

        මෑත කාලයේ දී සිංහල ජාන සම්භවයත් එම ජාන ඉන්දීය ජන වර්ගයා සහ වෙනත් ආසියානු රටවල් අතර තිබෙන සම්බන්ධයත් සෙවීමට විවිධාකාර පර්යේෂණ රාශියක් සිදු කර තිබේ. ඉන්දීය ජාන ඉංජිනේරුවකු වූ රෝයි චවුද්‍රි 1985 දී කළ පර්යේෂණයකදී ඔහු සඳහන් කර තිබෙන්නේ බෙංගාලි ජනතාවට වඩා දකුණු ඉන්දීය ද්‍රවිඩ ජන වර්ගයන්ට  සිංහල ජනයාගේ සම්බන්ධයක් තිබෙන ආකාරයයි.. ඉන්පසු ගෞතම් ක්ෂත්‍රියා 1995 දී කළ පර්යේෂණයද එබන්දකි. ඔහු දක්වා ඇත්තේ දකුණු ඉන්දීය සම්මිශ්‍රණය සියයට හැට නවයක්ද බෙංගාලි සම්භවය සියයට 25 ක් ද වන  බවයි. 1976 දී ක්‍රික් නම් විද්‍යාඥයෙකු කළ පර්යේෂණයකදී දක්වා ඇත්තේ සිංහල ජනයා කේරළ වර්ගයාට තිබෙන සම්බන්ධයක් පිළිබඳවයි.අනතුරුව 2014 වසරේ දීද මෙවැනිම ජාන පර්යේෂණයක් සිදු කර තිබේ. ලංකාවේ ජීවත්වන ලංකා දෙමළ ඉන්දියානු දෙමළ  මුස්ලිම් යන පිරිස සමග සිංහලයාගේ සබඳතාවය සෙවීම මෙහි අරමුණ වී තිබේ.

 

 

 විද්‍යාවේ දියුණුව සඳහා  මෙම පර්යේෂණ සිදු කිරීම ඵලදායී වුවද මෙහි යටි අරමුණ වන්නේ වෙනත් කරුණකි. වසර දහස් ගණනක් තිස්සේ අවිච්ඡින්නව පැවතෙන සිංහල ජනතාවගේ අභිමානය සහ සංස්කෘතික අනන්‍යතාවය මානසික වශයෙන් දිය කර හැරීම මෙකී අරමුණු අතර තිබෙනවා විය යුතුයි..තමන් ශුද්ධ වූ ජන වර්ගයක් නොව විදේශිකයන් සමග සම්බන්ධව පැවතෙන්නක් වූ බව විද්‍යාත්මකව පැහැදිලි කිරීම නිසා මේ අභිමානය දිය කර හැරේ.විද්‍යාවෙන් පැහැදිලි කළහොත් ඕනෑම බොරුවක් සමාජ ගත කිරීම වර්තමානයේ දී ඉතා ලෙහෙසිය පහසුය. විශේෂයෙන්ම උතුර සහ නැගෙනහිර පළාත් දෙමළ ජනයාගේ පාරම්පරික වාස භූමි ලෙසට කලක පටන් කරන ප්‍රකාශ සමග දෙමළ ජනයාට සිංහලයා සමග තිබෙන සම්බන්ධය දිග හැරීම මත මේ ප්‍රදේශ වලට තිබෙන අයිතිය තහවුරු කර දිය හැකි බව මේ පර්යේෂණයන්ට මුදල් දෙන පිරිස දනී. විග්නේශ්වරන් ගේ ප්‍රකාශයේ සත්‍යතාවය සැගවී පවතින්නේ මෙවැනි පසුබිමක් මත  බව කිව මනාය.

    2021 දී කොළම විශ්ව විද්‍යාලීය ජින්ටෙක් ආයතනය විසින් ද මෙවැනිම ජාන පර්යේෂණයක් සිදු කර තිබේ.කොළඹ විශ්ව විද්‍යාලයේ ආචාර්ය ගයනි ගල්හේන ජින්ටෙක් ආයතනයේ නදීක පෙරේරා සහ විවෘත විශ්ව විද්‍යලයේ මහාචාර්ය ගයා රණවක යන තිදෙන විසින් පුද්ගලයන් 838 දෙනෙකු ගේ ජාන දත්ත පදනම් කරන ලද විශ්ලේෂණයේ දී නිගමන වශයෙන් ප්‍රකාශ කොට තිබෙන්නේ සිංහලයාගේ ජාන සම්මිශ්‍රණය තුළට ලංකා දෙමළ යනුවෙන් හඳුන්වන පිරිස සහ මුස්ලිම් පිරිසකගේ ජාන වඩා සමීප බවයි.නමුත් මේ පර්යේෂණයන්ට ‌ලංකාවේ ‌ෙඑතිහාසික තත්වයන් යොදා ගත් බවට සාධක නැත.

      ලංකාවේ ඉතිහාසය තුළ ප්‍රාග් ‌ෙඑතිහාසික තත්වයක් සහ ‌ෙඑතිහාසික තත්වයක් විද්‍යාමාන වේ. ප්‍රාග් ‌ෙඑතිහාසික තත්වය ජන ප්‍රවාද ගත තොරතුරු අනුව රාවණා ඇතුළු යක්ෂ රාක්ෂ නාග ජන වර්ගයන්ගෙන් සමන්විතය.මොවුන් පොදුවේ අසුරයන් වශයෙන් හැදින්වෙයි.අසුරයන් දකුණු ඉන්දියාවේ ද බහුලව වාසය කළ බව රාම රාවණා පුවත ඇසුරෙන් දත හැකිය.‌ෙඑතිහාසික යුගයේ දී විජයාගමනයටත් ප්‍රථම උතුරු ඉන්දියාවේ සිට පැමිණ ක්ෂත්‍රියන් ලංකාවේ පාලනබලය ලබා ගත් බවද පසුව ශ්‍රී මහා බෝධිය සමග පැමිණි කුල දහ අටක ජනයා ලංකාවේ පදිංචි කළ බවද වංශ කතා පැහැදිලි කර දෙයි. ඉන්පසු ගජබා රාජ්‍ය සමයේ දී ඉන්දියාවේ සිට විසිහතරදහසක් ජනයා ලංකාවට ගෙනා බවද දැක්වේ. ලංකාවේ පැරණි කුල ක්‍රමය අනුව බ්‍රාහ්මණ වෛශ්‍ය ගොවි සහ ක්ෂුද්‍ර යන කුලකයන් ගත් විට බ්‍රාහ්මණ සහ වෛශ්‍ය වැඩි පිරිස උතුරු ඉන්දීය ක්ෂත්‍රියන් වෙති.ගොවි කුල ජනයා පැරණි යක්ෂ රාක්ෂ නාග ජන වර්ගයන්ට අයත් අතර අනෙකුත් ජන වර්ගයන් සේවා කුල වශයෙන් දකුණු ඉන්දියාවෙන් සහ උතුරු ඉන්දියාවෙන් පැමිණි පිරිස වෙති. මෙම තත්වය මත ලංකාවේ ජාන සම්භවය ඉතාමත් සංකීර්ණ තලයක පවතී සිංහලයාගේ වර්ණ දේහ කෙතරම් කාලයක් සිට මෙලෙස සම්මිශ්‍රණය වූවා දැයි සිතීම අතිශයින් උගහටය. නමුත් ‌ෙඑතිහාසික යුගයේ  සිටම ඉන්දීය මහ ද්වීපයෙන් වෙන් වූ පොදු අනන්‍යතාවයකින් යුක්ත පොදු භාෂාවක් කතා කරන සංස්කෘතියක් ඔවුන් ඇති කර ගෙන තිබේ. මෙම සස්කෘතිය තුළට අවශෝෂණය වන්නෝ දෙමළ වේවා මුස්ලිම් වේවා  චීනුන් හෝ ජපනුන් වේවා යුරෝපීයන් වේවා කාලයත් සමග සිංහලයන් බවට පත් වී තිබුණි.

     දකුණු ඉන්දියාවේ තත්වය ඊට මදක් වෙනස්ය. ක්‍රි.පූ . පස්වන සියවසේ සිට යවනයන් විසින් ආක්‍රමණය කිරීමෙන් පසු අප්‍රිකානු සම්භවයක් සිහිත ද්‍රවිඩ කම්කරුවන් හෝ සෙබළුන් හෝ වහලුන් වශයෙන් කාවේරි ගංඝා නිම්නයේ පදිංචි කරවන ලදහ.

 

 යවනයන්ගේ බලය බිද වැටුණු පසු මෙකී ද්‍රවිඩ ජනයා ධනයෙන් සහ බලයෙන් වැඩිතර වී දකුණූ ඉන්දීයාවේ විවිධ රාජ්‍යයන් බිහි කළහ. එවිට එහි ජීවත්ව සිටි අසුර ජනයා නැතිනම් යක්ෂ රාක්ෂ ගෝත්‍ර සියල්ල ද්‍රවිඩීකරණය වූහ. ද්‍රවිඩ ලෙසට අද හැඳින්වෙන්නේ භාෂා පවුලකි. දෙමළ තෙලිඟු  මලයාලි කන්නඩ ආදී වශයෙන් භාෂා පවුලකි. මෙම භාෂෘවන් කතා කරන ජනයා අද පොදුවේ ද්‍රවිඩයන් ලෙසට හඳුන්වයි. දකුණු ඉන්දීය  මෑත කාලීන සංස්කෘතිය බිහි කිරලීමට විදෙස් වලින් පැමිණි ද්‍රවිඩ මූලයන් වැදගත් වනුයේ එලෙසයි. හතරවන කාශ්‍යප රජුගෙ පුත්  මාන කුමරු කේරළයේ පල්ලව රාජ්‍යයට පැන ගොස් එහි රාජ්‍ය සභාවේ කාලයක් සේවය  කොට නැවත ලංකාවට පැමිණ සිංහල රාජ්‍ය බලය නැවත ලබා ගෙන මානවර්මන් අභිධානයෙන් රජකම් කළේය. ඔහු සමග කේරළයෙන් පැමිණි ජනී ජනයා මෙන්ම ඔහුගේ පුත් පරම්පරාවේ පල්ලව දේශයේ සිටි අලකේශ්වර පරපුරද වරින් වර ලංකාවට පැමිණියහ.විද්‍යාඥ ටික්කම මහින්ද කුමාර මහතාගේ පර්යේෂණ තොරතුරු වලින් මේ කරුණු පැහැදිලිවේ. ක්‍රික් ගේ පර්යේෂණයන් අනුව අපට කේරළ සබැඳියාව ඇති වන්නේ මෙම පසුබිම තුළය.

    මෙලෙස මෙරට අනන්‍යතාවය ජාන සම්මිශ්‍රණයකින් සිදු වුවද මෙරට සංස්කෘතිය ගොඩ නැගීමට උතුරු ඉන්දීය ක්ෂත්‍රියන්  දක්වන ලද දායකත්වය සුවිශේෂී වෙයි. භාෂා පෝෂණය සිරිත් විරිත් බුද්ධ ශාසනය  සාර ධර්ම සියල්ල එම සම්බන්ධයේ ප්‍රතිඵලයක් ලෙසට පවතී.පැරණි ස්වදේශිකයන් වූ යක්ෂ ගෝත්‍රයන්හි භාෂා ලක්ෂණ සහ චාරිත්‍ර ධර්මයන්ද මේ පොදු සංස්කෘතියට එක්වී තිබේ. ඒ නිසා අදටත් උතුර සහ නැගනහිර ප්‍රදේශ වල පමණක් බෞද්ධ ස්මාරකයන් 1500 කට වඩා අපට හඳුනාගන්නට ලැබී තිබේ.චෝල පාලන සමයේ ඉඳි කරන ලද බෞද්ධ ගොඩනැගිලි ඇරණූ කොට වෙන කිසිම ස්මාරකයක් ද්‍රවිඩ ජන වර්ගයා විසින් කර නැත. දෙමළ සෙල් ලිපි පවා උතුර සහ නැගෙනහිර පවතින්නේ ඉතාමත් සීමිත සංඛ්‍යාවකි. මහා පරාක්‍රමබාහු රජු විසින් කළ දෙමළ සෙලි ලිපියක් නාග ද්වීපයේ පවතී. එයද සිංහල රජුගේ ආඥාවක් ප්‍රදර්ශනය කර වූවකි. විග්නේශවරන් කියන ලෙසට ඔවුන්ට වසර 3000 ක් පැරණි ඉතිහාසයක් පැවතියේ නම් මේ ප්‍රදේශයන්හි භාෂාව දෙමළ විය යුතුය. ඉන්දීය අසුර ජනයා ද්‍රවීඩිකරණය වුවද ලංකාව එලෙස ද්‍රවීඩීකරණය කිරීම පහසු නොවූයේ සිංහල රජ වරුන් අභිමානයෙන් යුතුව මෙරටේ අනන්‍යතාවය වෙනුවෙන් සටන් වැදුණු නිසාය. අප පරාජයට පත් වූයේ යුරෝපීයන්ට පමණි. එයද රැවටීම නිසාය. ඉන්පසු මලබාරයෙන් දුම්කොළ වගාවට ගෙනෙන ලද වහලුන් නිසා ලංකාවේ දෙමළ ජනගහනයක්ද වෙළදාමට පැමිණි  දකණු ඉන්දීය මරක්කලයන් නිසා මුස්ලිම් ජනගහනයක්ද ඇති විය. විග්නේශ්වරන් සහ සම්බන්ධන්ද පැවතෙන්නේ මෙකී වහල් පරම්පරායෙන් බව ඔවුන් දත යුතුයි.  උතුර සහ නැගෙනහිර වීසූ සිංහලයන් පිරිසක්  ද ද්‍රවිඩීකරණය වූ යේ සිංහල පාලනයෙන් ඒ ප්‍රදේශ ගිලිහී ගිය බැවිනි. ඒ අතර වැද්දන් ද විය. නොදන්නා දෙමළට ගොස් වරිගෙ නහ ගැනීම යයි පාඨයක් ජන ප්‍රවාදයන්ට එක්වූ යේ මෙලෙස දෙමළ ඉස්කොල වලින් දෙමළ ඉගෙන දෙමළ වර්ගයා බවට පත් වූ සිංහලයන් නිසාය.කෙසේ වෙතත් ජාන පර්යේෂණයන් මගින් හෝ බලය බෙදීමෙන් හෝ මෙරට එකසේසත් කළ නොහැකිය.අතීතයේ සිටම පැවති ලෙසට සිංහල පොදු සංස්කෘතියකට අනෙකුත් ජන වර්ගයා එකතු වීමෙන් පමණක් සාර්ථක වේ .අතීත සූත්‍රයන් අදටත් වලංගුය.

මතුගම සෙනෙවිරුවන්