සූරියගොඩ සුමංගල ඔක්ස්ෆඩ් වැඩම කළ පළමු භික්ෂුව

 

                                      

                වසර එකසිය පහකකට පසු එංගලන්තයේ ඔක්ස්ෆඩ් සරසවියට ස්වාමීන් වහන්සේ නමකට ඇතුළු වීමට වරම් ලැබී තිබෙන බව දැන ගන්නට ඇත.. පූජ්‍ය වාඩිගල සමිතරතන හිමියන් ට ඒ දුර්ලභ අවස්ථාව හිමි වී තිබේ.ලග්ගල වාඩිගල ප්‍රදේශයේ උපත ලැබූ උන්වහන්සේ පිරිවෙන් අධ්‍යාපනයෙන් පසුව පේරාදෙණිය විශ්ව විද්‍යාලයට ඇතුලුව දර්ශන අංශයෙන් මූලික උපාධිය සම්පූර්ණ කරන ලද්දේය. අවස්ථා කීපයකදීම උන්වහන්සේට උසස් අධ්‍යාපනය ලැබීමට ශිෂයත්ව ලැබුණු අතර තායිලන්තයේ විශ්ව විද්‍යාලයක් මගින් විශිෂ්ට තරුණ බෞද්ධ විද්‍යා සම්මානය ලබා දී තිබුණි. අනතුරුව 2024 දී උන්වහන්සේට එංගලන්තයේ සොර්ස් විශ්ව විද්‍යාලය මගින් ශිෂ්‍යත්ව ලැබී බෞද්ධ අධ්‍යනය පිළිබඳ ශාස්ත්‍රීය උපාධියක් කිරීමට වරම් ලැබුණු අතර බුද්ධඝෝෂ හිමියන්ගේ භාවනා විවේචය යනුවෙන් නවතම පර්යේෂණයක් කිරීම නිසා විද්වතුන් අතර ඉහළ පඬිවරයෙකු ලෙසට බුහුමන් ලැබීය.ලෝකයේ නොයෙකුත් විශ්ව විද්‍යාල වලට ශාස්ත්‍රීය නිබන්ධන ඉදිරිපත් කළ උන්වහන්සේ ථෙරවාදී බෞද්ධ අධායපනය අනාගත මානවයා වෙත සුරුකීම සඳහා විශාල මෙහෙයක් ඉටු කරමින් ඔක්ස්ෆඩ් බෞද්ධ සංගමය ආරම්භ කරන ලද්දේය. මේ වන විට උන්වහන්සේ ඔක්ස්ෆඩ් විශ්ව විද්‍යාලයේ ශාස්ත්‍රපති උපාදිය සම්පූර්ණ කරමින් සිටී.

ඔක්ස්ඪඩ් වැඩම කළ ප්‍රථම භික්ෂූන් වහන්සේ

      ඔක්ස්ෆඩ් යනු බ්‍රිතාන්‍ය වාසී විද්වතුන් ගේ මහ දෙවොලයි. ඒ දෙවොලට ඇතුලු වීමට උත්සාහ කළ සිංහල ජාතිකයන් අතර ඒස්.ඩබ්. ආර්. ඩී . බණ්ඩාරනායක වැන්නවුන් විය. නමුත් ඒ තත්වය එකළ සුලභ නොවීය. වර්ෂ 1919 දි ඒ වරම ලැබූ මෙරට ප්‍රථම භික්ෂූන් වහන්සේ වූයේ පූජ්‍ය සූරියගොඩ සුමංගල තෙරණුවෝය.බ්‍රිතාන්‍යයේ හෙන්රි මැන්චෙස්ටර් ඔක්ස්ෆඩ් විශ්ව විද්‍යාලයේ උන්වහන්සේ උගෙනුම ලැබූ බව දක්වා ඇත. භික්ෂුවක් ලෙසට තම තරුණ වියෙහිදීම 1903 වසරේ දී සංයුක්ත නිකාය ගාථා සන්නය ඉංග්‍රීසි බසට පරිවර්තනය කළ උන් වහන්සේ ඉන්පසුව 1914 දී ධම්මපදය ඉංග්‍රීසි භාෂාවට පරිවර්තනය කරන ලද්දේය..පසුව දශකුමාර චරිතයද ප්‍රකාශයට පත් කර ඇත.මේ ග්‍රන්ථයන් ප්‍රකාශයට පත් කරන ලද්දේ ප්‍රාචීන භාෂෝපකාර  සමිතිය සහ රාජකීය ආසියාතික සඟරා ප්‍රකාශන මගිනි.ප්‍රාචීන භාෂා පිළිබඳ මහත් උනන්දුවක් දැක්වූ හෙන්රි මැකලම් ආණ්ඩුකාරවරයා ගේ අනුග්‍රහයෙන් පූජ්‍ය සූරියගොඩ සුමංගල හිමියන්ට ඔක්ස්ෆඩ් මැන්චෙස්ටර් විශ්ව විද්‍යාලයට දෙවසරක ශිෂ්‍යත්වයක් ලැබුණේ පෙර අපරදිග භාෂා පිළිබඳ උන්වහන්සේ සතුව තිබූ දැනුම නිසාවෙනි.නමුත් ඒ අධ්‍යාපන කටයුතු කරගෙන යෑමට මූල්‍යමය හයියක් උන්වහන්සේට නොතිබුණි. ඒ සඳහා උපකාර කරන ලද්දේ හේවාවිතාරණ පදනම් මගිනි.මේ යුගයේ දී ලංකාවේ සිටි ඉංග්‍රීසි විද්වතුන් පවා පෙරදිග භාෂා අධ්‍යනය පිළිබඳ උනන්දුවක් දැක්වූහ. රීස් ඩේවිඩි පඬි තුමා එක් අයෙකි. යටත් විජිත ආණ්ඩුවේ අධ්‍යාපන අධ්‍යක්ෂ වරයා වූ ඊ.බී. ඩෙන්හැම් මහතා ද මේ පීළිබඳව මහත් උනන්දුවක් දක්වා ඇත. ඒ අනුව මහා බ්‍රිතාන්‍යයේ වැඩි දුර අධ්‍යාපනය පිණිස  වැඩම කළ සූරියගොඩ සුමංගල හිමියන් යළි ලංකාවට වැඩම කළ පසු ලංකා විශ්ව විද්‍යාලයේ පෙරදිග භාෂා අධ්‍යන අංශය ආරම්භ කිරිමට උනන්දු කර අනුග්‍රහය ලබා දී ඇත.

උපන් බිම  පැවිදි වීම සහ අධ්‍යාපනය

            පස්යොදුන් කෝරළයේ දියපත්තු ගම සූරියගොඩ ග්‍රාමයේ  සූරියආරච්චිගේ පොඩිසිඤ්ඤෝ නමින් 1879 නොවැම්බර් 09 දින උපන් උන්වහන්සේ පෙර අපරදිග භාෂා නිපුණත්වයකින් යුක්ත වූ මහා පඬි රුවනකි.යටත් විජිත සමයේ දී ආරම්භ කල පිරිවෙන් අතර විශේෂිත පෞරුෂයක් හිමිව තිබූ රත්මලානේ පරම ධම්ම චේතිය පිරිවෙනේ දී 1888 වසරේ පොසොන් පුර පසලොස්වක දා පැවිදිව පූජ්‍ය වලානේ සිද්ධාර්ථ සහ පූජ්‍ය මහගොඩ ඤාණිස්සර නා හිමි දෙපළගෙන් මූලික අධ්‍යාපනය ලැබූ  උන්වහන්සේ.පාළි සංස්කෘත සහ සිංහල යන  පෙරදිග භාෂාවන්හි නිපුණ වූහ. පසුව ලංකා විශ්ව විද්‍යාලයට ඇතුළු වූ උන්වහන්සේ සිංහල සාහිත්‍ය සහ සංස්කෘතික ව්‍යාකරණය පිළිබඳව විශේෂ උපාධිය ලැබූහ. එංගලන්තයේ ඔක්ස්ෆඩ් මැන්චෙස්ටර් විද්‍යාලයේ ඉගැනුම ලැබීමෙන් අනතුරුව ඔක්ස්ෆඩ් සිරි කුරුස විශ්ව විද්‍යාලයේ ආචාර්ය වරයෙකු වශයෙන් සේවය කිරීමට වරම් ලැබූ උන්වහන්සේ අපරදිග විද්වතුන්ගේ දක්ෂතාවය යුරෝපීයන් වෙත දැක්වූ මහා පඬි රුවනකි.බ්‍රිතානය මහ රජුගේ දරුවන්ට පවා උන්වහන්සේ අධ්‍යාපනය ලබා දී ඇත.ක්‍රිස්තියානි අධ්‍යාපනයෙන් පෝෂිත ඔක්ස්ෆඩ් වැනි ආයතනයක ථෙරවාදී බුදු දහම පිළිබඳ ශාස්ත්‍රීය අධ්‍යාපනයකට දොරටු විවර වීම විශේෂිත අවස්ථාවක් විය. එරට සංස්කෘතිය අනුව භික්ෂූන් වහන්සේලාට විශේෂ සැළකිල්ලක් නොදැක්වුවද  උන්වහන්සේ විසින් පෙන්වූ ශාස්ත්‍රීය ශික්ෂණය ට අපරදිග වියතුන් ඉහළම ගෞරවයක් ලබා දුන්හ.

උපැවිදි වීම සහ ගිහි ජීවිතය සහ සමාජ සේවය

       සිය සේවා කාලය නිම වී නැවත සිය මව්බිමට වැඩම කළ උන්වහන්සේ පෙර සඳහන් කළ පරිදි  ලංකා විශ්ව විද්‍යාලයේ විශේෂ  අංශයක් විවෘත කර ශිෂ්‍යයන් හට මග පෙන්වූහ.නමුත් යම් අවාසනාවන්ත සිද්දියක් නිසා උන්වහන්සේ ගේ පැවිදි ජීවිතයට මහත් අභියෝගයක් එල්ල විය. මහා බ්‍රිතාන්‍යයට වැඩම කළද එහි ප්‍රමුඛ විශ්ව විද්‍යාලයක මහත් ‌ෞරවයකට පාත්‍ර වුවද ලංකා වාසීන් පිළිබඳව යටත් විජිතයේ මිෂනාරීන් දක්වන ලද්දේ සතුරු ආකල්පයකි. ඒ නිසාම මිෂනාරීන් පරයා පෙරදිග විද්වතුන් නැගී සිටීම කිසිසේත්ම නොරිස්සූහ. මේ තත්වය තුළ සූරියගොඩ සුමංගල තෙරණුවෝ නවසිය විස්ස දශකයේ මැද භාගයේ  දී උපැවිදි වූහ. සුමංගල සූරියගොඩ නමින් ගිහියෙකු වශයෙන් පෙනී සිටියද සිය කුශලතාවයන් සහ අචාර්ය වරයෙකු වශයෙන් දැක්වූ දක්ෂතාවය මදකුදු අත් නොහළහ. උන්වහන්සේ මූලික අධ්‍යාපනය ලැබූ රත්මලානේ පරම ධම්ම චේතිය පිරිවෙනේ වරක් ප්‍රධානත්වයට පත් ව සිටි අතර එම පිරිවෙන සමග දැඩි සම්බන්ධයක් ඇතිව සිටි මතුගම මාටින් සෙනෙවිරත්න මහතා සමග එකතුව පස්යොදුන් කෝරළයේ තම ගම්පියසට ආසන්නයේ අගලවත්තට නුදුරු දාපිළිගොඩ ග්‍රාමයේ දී  සමුබුද්ධ රාජ විද්‍යාලය යනුවෙන් ඉංග්‍රීසි විද්‍යාලයක්  ආරම්භ කරන ලද්දේය.ඒ පෙර අපරදිග ශාස්ත්‍රීය අධ්‍යාපනය තම උපන් ප්‍රදේශයේ දරුවන් වෙත ලබා දීමේ අරමුණෙනි.උපැවිදි වූ පසු  යෝජනාවක් අනුව මාතර ප්‍රභූ පරපුරකින් විවාහයක් කරගත් සුමංගල සූරියගොඩ මහතාට සනත් බෝධිප්‍රියා සහ ස්වර්ණා යනුවෙන් දරුවන් තිදෙනෙකු විය. සූරියගොඩ චරිතාපදානය රචනා කරනු ලබන්නේ බෝධිප්‍රිය සුභද්‍රා සූරියගොඩ දියණිය විසිනි.

දේශපාලනයට පිවිසීම

      නව සිය තිහේ දශකයේ  දී පස්යොදුන් කෝරලයේ ලූල්බද්දුවේ උපන් ආචාර්ය සී.ඩබ්.ඩබ්. කන්නන්ගර මහතාද ප්‍රකටකට විද්වතෙකු විය. ගාල්ල ප්‍රදේශයේ දී ඔහු දේශපාලනයටද පිවිස සිටියේය. ඉන්පසු 1936 රාජ්‍ය මන්ත්‍රණ සභාවට මතුගම ආසනයෙන් ඉදිරිපත්වන්නට ඔහුට සිදු විය. ඔහුගේ ප්‍රධාන ප්‍රතිවාදියා වූයේ සුමංගල සූරියගොඩ මහතාය. මෙම චන්ද විමසීම පක්ෂ මට්ටමින් නොතිබුණ අතර අපේක්ෂකයා හඳුනා ගනු ලැබූයේ වර්ණයකිනි. කන්නන්ගර මහතාට කොළ වර්ණය ලැබුණු අතර සූරියගොඩ මහතාට රතු වර්ණය ලැබුණි.මේ මැතිවරණ වලදී චන්ද පෝස්ටර් හෝ චන්ද රැස්වීම වලටත් වඩා කවිකොළ ඉතා ජනප්‍රිය වූ කාලයකි එය. සූරියගොඩ මහතාට විරුද්ධව සිරිසේන නම් කවියෙකු පැබඳූ කවි කොළයක මෙසේ ලියා තිබුණි.

එංගලන්තේ සිට යළි ලකට හිරුගොඩ පිවිසෙනා සඳ

 සුන් කරන් නොවැ සංගෙ ඔක්කොම තවත් මොහු ගුණ කියනු කුමටද

දැන් තබන් උස පොටට ඇස් යුතු සිව්ර එන්නට දුනොත් අප සඳ

වෙන් සුරින් දුද කිපෙයි අප හට සසුන් බාරව සිටින දිය නද

 1936 පෙබරවාරි 27 වන දින පැවැත්වූ මැතිවරණයේ දී සුමංගල සූරියගොඩ මහතාට වඩා වැඩි චන්ද 4459 ක් ලබා ගනිමින් කන්නන්ගර මහතා ජය ගනු ලැබීය. සූරියගොඩ මහතාට චන්ද 8859 ක් ලැබී තිබුණි.ජීවිතය අවසාන කාලයේ දී පානදුර ප්‍රදේශයේ පදිංචිවසිටි සුමංගල සූරියගොඩ මහතා 1936 නොවැම්බර් මස 06 දින අබාවයට පත් විය.

සැබවින්ම ශාස්ත්‍රීය අධ්‍යාපනයේ ඉහළටම ගියද  භික්ෂූන් වහන්සේ ලා වෙත  තත්කාලීන සමාජයෙන් ලැබෙන අභියෝගය සුළු පටු නොවේ. වර්තමානයේ වුවද ඒ අභියෝගයන් වෙනස් වී නැත. නිර්මල බුදු දහම සහ ‌ෙථරවාදී ශික්ෂණයන් පිළිබඳ අපරදිග වාසීන් දක්වන ආකල්පයන් කුමක් වුවද ආසියාතික සංස්කෘතියට ලෝකය තුළ එල්ල වී ඇති බලපෑම නිසි පරිදි තේරුම් ගත යුතුය.එක් ආඥාවක් එක් ලෝකයක් යනුවෙන් මුදල් මත සහ රොබෝවරුන් මගින් පාලනය කිරීමට උත්සාහ කරන අනාගත සමාජයක නිර්මල බුදු දහම සහ සංස්කෘතින් පැවතිය යුතු ආකාරය පිළිබඳ ප්‍රබල සංවාදයක් ජනිත විය යුතුය. අපරදිග විශ්ව විදයාලයන්ට පිවිසෙන බොහෝ විද්වතුන් ගම රට පමණක් නොව සිය දෙමව්පියන්ද අමතක කර ඇත. ඇතැම් භික්ෂූන් වහන්සේලා  උපැවිදි වී විහාරස්ථාන පාළුවට ගොස් ඇත. මේ තත්වය මැනවින් අවබෝධ කරගත් කළ බුදු සසුනටත් සමස්ත මානව වර්ගයාටත් සේවය කිරීම අසීරු නොවේ.එසේම අපරදිග ලෝකයේ විද්වතුන් විසින් ශාස්ත්‍රීය අධ්‍යාපනයට දක්වන ගෞරවය  උපයෝගී කොට ගෙන ශ්‍රී ලංකාවට ලෝකය තුළ හිමි නිසි තැන ලබා ගත හැකිය.

 මතුගම සෙනෙවිරුවන්

      

මෙරට සල්ලි පිටරට රැඳවූ නීතියේ වෙනසකට කාලයයි

 

                           

           ලංකාවේ සිට විදෙස් වලට භාණ්ඩ අපනයනය කිරිමේ පුරුද්ද දුරාතීතයේ සිටම මෙහි පැවතුණි.ඒ නිසා  විදෙස් මුදල් සම්භාරයක් මෙරටට ලැබුණි.යුරෝපීයන්ගේ පැමිණීමත් සමගම වැවිලි ආර්ථිකයකට පදනම වැටුණු අතර බ්‍රිතාන්‍ය අනුදත් මුදල් ඒකක වලින් ගනුදෙනු කිරීම ස්ථාපිත විය.නිදහසෙන් පසු බ්‍රීතානය ආර්ථික ආධිපත්‍ය ඇමරිකාවට මාරු වෙන කල්හි බ්‍රිතාන්‍ය රන්පවුමට වඩා ඇමරිකන් ඩොලරයට ලෝක ආර්ථිකයේ විශේෂ තැනක් හිමි විය. 1944 බ්‍රෙටන්වුඩ් සම්මේලනයෙන් පසුව ලෝක ප්‍රාග්ධන ආධිපත්‍ය හැසිරවීම පිණිස ජගත් මූල්‍ය අරමදුල , ආහාර හා කෘෂීකර්ම සංවිධානය ,ලෝක සෞඛ්‍ය සංවීධානය ඇතුලු මූලායකන රැසක් බිහි වීමෙන් ආසියාතික රටවල ණය මත යැපෙන ආර්ථික තත්වයක් වර්ධනය වී තිබේ.මේ ණය උගුල සක්‍රීය කරනුයේ ලෝක දේශපාලනයේ බල තුලනය හරහා වීම විශේෂයක් වෙයි.  මෙම ලෝක දේශපාලන තත්වයේ වර්ධනයන් සිදු වීමට ප්‍රථම 1948 දී නිදහස ලැබෙන කාල වකවානුව තුළදී සහ තවත් දශකයක පමණ කාලයක් තිස්සේ බ්‍රිතාන්‍ය ආධිපත්‍යයේ දුර්වල වීමක් නොවුණි.ඒ නිසා විදෙස් මුදල් ගනුදෙනු සඳහා 1953 අංක 24 දරණ විනිමය පාලන පනත යටතේ ක්‍රියාත්මක නීතියක්  බලාත්මක විය.

            මෙම පනත යටතේ ලංකාවෙන් අපනයනය කෙරෙන සියල්ල සඳහා අයවිය යුතු මුදල් ආපසු ලංකාට ගෙන ආ යුතු විය.ඒ පිළිබඳ නිවැරදි දත්ත පද්ධතියක් මහ බැංකුව සතු විය. විදේශ විනිමය සැඟවීම අපරාධමය වරදක් ලෙස සැලකිණ. ඒ නිසා අපරාධකරුවකු ඇරෙන්නට කිසිවෙකු විදේශ විනිමය වංචා කිරීමකට උත්සාහ නොගත් අතර විදේශීය ප්‍රේෂණ රට තුළට අපහසුවකින් තොරව  පැමිණියේය. විවෘත ආර්ථික ක්‍රියාවලිය රට තුළට හඳුන්වා දෙනු ලැබූවද මේ විදේශ විනිමය පාලන පනත යටතේ තිබූ රෙගුලාසි වල වෙනස්කමක් ඇති නොවීය.ඒ යුගයේ දී ආනයන දිරිමත් කරන වැඩ පිලිවෙලක් තිබුණද ණය ලබා ගැනිමේ නිරන්තර උත්සාහයක් තිබුණද අපහසුවකින් තොරව විදේශ ප්‍රේෂණ පැමිණි නිසා ආර්ථික අර්බුදයක් නිර්මාණය නොවීය.

           චන්ද්‍රිකා බණ්ඩාරනායක ජනාධිපතිනියගේ යුගයේ දී රනිල් වික්‍රමසිංහ අගමැති වූ අතර ඔහුගේ නව ප්‍රතිසංස්කරණ හැඳින්වූයේ යළි පුබුදමු ශ්‍රී ලංකා යනුවෙනි.මේ යටතේ 2003 වර්ෂයේ දී අගමැතිවරයා විසින් විදේශ විනිමය කළමනාකරන පනතක් හඳුන්වා දීම සඳහා පාර්ලිමේන්තුවට ඉදිරිපත් කරන ලදී.මේ මගින් බලාපොරොත්තු වූයේ 1953 පනත සංහෝධනය කරමින් නව ප්‍රවේශයක් ගනිමින් මෙතෙක් අපරාධමය වරදක් ලෙස හැඳින්වූ විදේශ විනිමය වංචා සමාන්‍ය සිවිල් නීතියට යටත් කිරීමය.එසේම පනත අනුව තීරණ ගැනීමේ බලය මහ බැංකුවේ මුදල් මණ්ඩලයෙන් ඉවත්කර මුදල් අමාත්‍යංශයේ මුදල් ලේකම් වරයාට පැවරීමේ වුවමනාවක් ද විය. එහෙත් මේ පනතට විරුද්ධව නීතිඥ කල්‍යානන්ද තිරාණගම මහතා විසින් ඉදිරිපත් කළ මූලික අයිතිවාසිකම් පෙත්සමක් නිසා  පාර්ලිමේන්තුවේ  තුනෙන් දෙකේ බලයෙන් සහ ජනමත විචාරනයකින්   සම්මත කිරීමට තීන්දු ලැබුණු හෙයින් අගමැතිගේ අභිලාශය ඉටු නොවිණ.

     2015 දී යහපාලන රජය පත්වූ පසු අග්‍රාමාත්‍යවරයා බවට පත් වූයේ ද රනිල් වික්‍රමසිංහ මහතාය. ඒ අමාත්‍ය මණ්ඩලයේ මුදල් ඇමති ධූරය රවි කරුණානායක මහත් විසින් හෙබවීය. මේ කාලයේ දී නැවත 2003 වසරේ ගෙනා විදේශීය විනිමය කළමනාකරන පනත නව මුහුණුවරින් එලි දක්වන්නට රජය කටයුතු කරන ලද්දේය. 2017 අංක 12 යනුවෙන් දක්වන ලද එම පනත විදේශ විනිමය පනත යනුවෙන් දැක්විණ. මේ යටතේ වූ ප්‍රමුඛ කාර්යය නම් විදේශ විනිමය පාලන දෙපාර්තමේන්තුවක් පිහිටුවා මහ බැංකුවේ මුදල් මණ්ඩලය පාලනය කිරීමේ සහ තීරණ ගැනීමේ බලතල අමාත්‍යවරයා වෙත පැවැරීමයි. ඊට අමතරව මෙතෙක් විදේශ විනිමය වංචා අපරාධමය වරදක් ලෙස සලකන ලද අතර රේගු ආඥා පනත යටතේද දඬුවම් පැමිණවිය හැකි විය. මේ පනත මගින් ඒ නෛතික බලය දුර්වල කරන ලදී. අපරාධමය වරද සිවිල් වරදක් බවට පත් කෙරිණ. එමෙන්ම අතීතයට බලපාන ලෙසට නීති සංශෝධනය කෙරිණ. එනම් මාස පහළොවක් ඉකුත් වූ පසු නඩු පැවරිය නොහැකි විය.මේ නිසා මුදල් අමාත්‍යවරයා වූ රවි කරුණානායක විසින් අතීතයේ දී  කරන ලදැයි චෝදනා එල්ල වූ  යම් විදේශ විනිමය වංචා වලට නඩු පැවරිය   නොහැති වුණි. මෙම පනත විවාදයට ගත් අවස්ථාවේ දී අගමැති රනිල් වික්‍රමසිංහ මහතා ඉදිරිපත් කළ අදහස් මෙසේය.

'ඒකාලයේ අපි ‌ගොඩක් භාණ්ඩ අපනයනය කලේ සමාජවාදී රටවලටයි. නමුත් ඉන්පසුව ආර්ථිකය නිදහස් වීමට පටන්ගත්තා. අපේ රටේ තිබුණු විනිමය පාලන ක්‍රමය යම් මට්ටමක සිර කර තිබුණේ. නමුත් ජයවර්ධන ජනාධිපතිතුමාගේ කාලයේ විනිමය නිවහල්කරණයක් කළා. එහෙත් අපේ නීතිය. ඊට අනුකූලව සංශෝධනය කර නෑ. අපේ රටට සංක්‍රමණිකයන් එවන විදේශ විනිමය සම්බන්ධයෙන් ඔනෑම පුද්ගලයෙකුට පුළුවන් විදේශ විනිමය ප්‍රමාණයක් ගේන්න. ඩොලර් 10000 – 15000 අතර එය ප්‍රකාශ කළාට පස්සේ වරායේ දී හා ගුවන් තොටුපල දී ගේන්න පුළුවන් රටින් පිට ගිණුම් පවත්වාගෙන යන්න පුළුවන් .රටින් පිට පුද්ගලයෙකුට ශ්‍රී ලංකාවේ ගිණුම් පවත්වාගෙන යන්නත් පුළුවන්. අපි තව දුරටත් විනිමය නිදහස් ක්‍රමයක් කරනවා නම් එය අපේ නෛතික අණ පනත් වල තිබිය යුතුය. අපී කාලීනව පනත් සංශෝධනය කළ යුතුයි.අපි දැන් විදේශ විනිමය පාලනය කරන්නේ නෑ.පරිපාලනයයි කරන්නේ.විදේශ විනිමය කියන්නේ ධනපතියන් අතර පවතින දෙයක් නොවේ.විදේශ වලින් රටට ආයුතු මුදල් ගෙන්වා ගැනීමට අප කටයුතු කළ යුතුයි. ඔවුන් අපරාධකරුවන් ලෙස සැළකිය යුතු නැහැ. සියයට 1% ක ප්‍රේෂණ ගාස්තුවක් අය කරලා මුදල් ලංකාවට ගේන්න අවසර දෙනවා. රාජ්‍ය මූල්‍ය පාලනය කරන්නේ පාර්ලිමේන්තුවයි. අපි විදේශ විනිමය පාලනය කිරීම ලිහිල් කර තිබෙනවා.'

      මෙම පනත යටතේ මහ බැංකුවේ මුදල් මණ්ඩලය සතු බලතල එනම් විනිමය පාලනය කිරීමේ බලතල අමාත්‍යවරයාගේ උපදෙස් පරිදි සිදු කිරීමට අවස්ථාව උදා විය. පරිසීමිත වෙලෙන්දන් යනුවෙන් විශේෂිත විනිමය වෙළඳ ප්‍රජාවක් නිර්මාණය විය. අපනයනය මගින් ලද මුදල් පිළිබද නිවැරදි දත්ත මහ බැංකුව වෙත නොලැබිණ. එසේම විදේශීය රටක විවෘත  ගිණුම් ආරම්භ කිරීමටත් විනිමය වෙළදාම් කිරීමටත් තිබෙන ඉඩකඩ පුළුල් පරාසයකින් වර්ධනය විය. විදේශ විනිමය ප්‍රවර්ධනය කිරීමේ අරමුණින් මේ නව පනත හඳුන්වා දුන්නද ඉන් සිදු වූයේ කළු සල්ලි වෙලඳ පළක් නිර්මාණය වීමයි.එම නිසා මෙරටට පැමිණිය යුතු විශාල ඩොලර් ප්‍රමාණයක් විදෙස් බැංකු වල  තැන්පත් වීම සිදු විය.

     2019 දී ගෝඨාභය රාජපක්ෂ මහතා බලයට පත් වූ පසු මෙම පනත අහෝසි කොට නව විනිමය පාලන පනතක් හඳුන්වා දිය යුතුව තිබුණද ඒ වෙනුව යම් සංශෝධන කීපයක් පමණක් සිදු කළ බව පැහැදිලි විය.ඉන් එකක් නම් 2021 දී කරන ලද රෙගුලාසි පැණවීමයි. කෙසේ වෙතත් 2022 දී ගෝඨාභය මහතා අරගලය හේතුවෙන් ජනාධිපති පදවිය අතහැර ගිය පසු බලයට පත් වූ රනිල් වික්‍රමසිංහ මහතා ගේ පාලන කාලයේ අධිකරණ ඇමතිවරයාව සිටි විජේදාස රාජපක්ෂ මහතා මෙම පනත නිසා විදෙස් රටවල තැන්පත් කර ඇති ඩොලර් බිලියන පනස් තුනක් පිළිබඳ තොරතුරු පාර්ලිමේන්තුවට ඉදිරිපත් කරන ලද්දේය. මෙම පනත වෙනස් කොට විනිමය පාලන නීති නැවතත් ගෙන ඒමට විමල් වීරවංශ මහතා ඇතූළු මන්ත්‍රීවරු  කීප දෙනෙකු ඉල්ලා සිටි අතර පනත සංශෝධනය කිරීමේ යෝජනාව න්‍යාය පුස්තකයටද ඇතුළත් කර තිබුණි. නමුත් අවසාන මොහොතේ රනිල් වික්‍රමිසංහ එම තීරණය වෙනස් කරන ලද්දේය. ඔහුගේ පිළිතුර වූයේ IMF විසින් එම පියවරට විරෝධය පළ කල බවයි.  අවසානයේ ජාත්‍යන්තර මූල්‍ය අරමුදල ඇර වෙනත් විකල්පයක් රටට නොවීය.IMF උගුල නිසා ලෝක ප්‍රාග්ධන වෙළන්දන්ට ලංකාව තුළ ව්‍යාපර කිරීමට අවස්ථාව සැලසෙයි. එසේම මේ පනත නිස ඔවුන් උපයන ධනය කිසිම බාධාවක් නොමැතිව රටින් පිට කිරීමට හැකි වෙයි. වර්තමාන මුදල් ඇමති ජනාධිපති අනුර දිසානායක මහතා සහ විජිත හේරත් විදේශ ඇමතිවරයා යහපාලන සමයේ දී විදේශ විනිමය පනත පිළිබඳ විවාදයේ දී ඒ පනතට විරුද්ධව දැඩිව අදහස් ඉදිරිපත් කරන ලද්දේය. ඒ අනුව දැන් ඔවුන්ට මේ පනත නැවත සංශෝධනයට බාධාවක් නැත.IMF මග අනුගමනය කළද මේ ප්‍රශ්ණයේ දී යම් කේවල් කිරීමක් කළ හැකි විය යුතුය.විදේශ විනිමය පාලන නීති වර්තමානයට ගැලපෙන පරදි හඳුන්වාදී විදෙස් රටවල තිබෙන මුදල් ආපසු සිය රටට ගෙන්වා ගැනීම අත්‍යවශ්‍ය කරුණකි. එවිට ණය අර්බුදය පහසුවෙන් විසඳා ගැනීමට එක් මාර්ගයක් විවෘත වේ.

මතුගම සෙනෙවිරුවන්

      

තුනෙන් දෙකේ බලය භාවිතා කල යුත්තේ කුමන අරමුණක සිටිමින් ද

 

                            

         සුභවාදී චින්තනයෙන් යුතුව මහ මැතිවරණයේ චන්දය භාවිතා කළ හැට අට ලක්ෂයක් පමණ වන ජනතාවක් රටට නව පණිවුඩයක් ලබා දී ඇත.එහි පළමු වැන්න නම් තව දුරටත් රට තුළ බෙදීම් අවශ්‍ය නොමැති බවයි. දෙවැන්න ජනතා විමුක්ති පෙරමුණ විසින් අතීතයේ දී  අනුගමනය කළ දේශපාලන ක්‍රියාමාර්ග තව දුරටත් කතා කිරීමෙන් පලක් නොවන බවයි. තෙවැන්න නම් ගතානුගතික දේශපාලන සංස්කෘතිය වෙනුවට නව දේශපාලන සංස්කෘතියකට තිබෙන කැමැත්තයි.දූෂණ සහ අක්‍රමිකතාවන් නැති  රටක් රාජ්‍ය සේවයක් බිහි කර ගැනීම වැදගත්ම අරමුණකි.රට පුරාවටම සෑම දිස්ත්‍රික්කයකම මාලිමාව ඉහළින් ඔසවා තබා ඇත්තේ මේ කාරිය ඉටු කරගන්නට බව අප තේරුම් ගත යුතුය.ඒ සඳහා පාර්ලිමේන්තුවට පත් කර යවා ඇත්තේ ද නවක පිරිසකි.

       පාර්ලිමේන්තුව යනු නීති අණ පනත් සම්මත කරන ස්ථානයයි. ඒ අණ පනත් හදන්නේ නීති කෙටුම්පත් දෙපාර්තමේන්තුවයි. මෑත කාලයේ දී විශේෂයෙන්ම රනිල් වික්‍රමසිංහ පාලන කාලයේ දී මේ අණ පනත් විදේශීය තානාපති කාර්යාල සහ රාජ්‍ය නොවන සංවීධාන වලින්ද සකස් කර දුන් බව නොරහසකි. ඒ නිසා නව රජයෙ කාර්ය භාරය වන්නේ පනත් සෑදීමට නියමිත රජ්‍ය අංශය ශක්තිමත් කිරීමයි.වර්ෂ 1806 සිට ඉංග්‍රීසීන් විසින් ගැසට් මගින් ප්‍රකාහයට පත් කළ නීති රැසක් මේ රටේ තිබේ. ඒවා බොහෝ දේ ඒක්කෝ අහොසි විය යුතුය. නැතිනම් යාවත්කාලීන විය යුතුය.

       මාලිමාවට චන්දය ලබා දුන් ජනතා අපේක්ෂා අතර ප්‍රමුඛව ගැනෙන තවත් කාරණයක් මෙහිදී මතක් කල යුතුය. දූෂණය වංචාව සහ නාස්තිය අවම කර ගැනීමට රජය පෙරමුණ ගතු යුතු බව පුන පුනා දක්වා ඇත.. හිටපු විගණකාධිපති තුමා වන ගාමිණී විජේසිංහ මහතා නැවත නැවත පවසා ඇත්තේ පළමුවත් විගණනය දෙවනුවත් විගණනය සහ තුන් වනුවත් විගණනය යනුවෙනි. ඒ සඳහා තිබෙන ප්‍රධන බාධකය නම් විගණකාධිපති තුමාට පාර්ලිමේන්තුවේ මුදල් කාරක සභාවට සෘජුව සම්බන්ධ වීමට තිබෙන නොහැකියවයි. සොල්බරි ව්‍යවස්ථාවේ ඒ බලය ඔහුට දී තිබුණ  නමුත් 1972 සහ 1978 ව්‍යවස්ථාවෙන් ඒ බලය  විගණාකාධිපතිගෙන් ඉවත් කර අමාත්‍යවරයාට ලබා දී ඇත. එසේම රාජ්‍ය සංස්ථා සහ වෙනත් අයතන වල විගණනයන් කීරීමට පෞද්ගිලක විගණකයන්ට අවස්ථා ලබා දීම ද සිදු කර ඇත. එසේම වංචා දූෂණ වලදී නඩු පවරීමේ කටයුතු නීතිපති දෙපාර්තමේන්තුවට පමණක් බලය ලබා දීමයි.වංචනිකයෙකුට එරෙහිව පුරවැසියෙකු විසින් නඩුවක් පැවරීම ට තිබෙන පහසුකම් ඉතා අවමය. එම අයිතිය පුළුල් කළ යුතු අතර එය දිසා අධිකරණය දක්වා පහළට ගෙන ආ යුතු බව විද්වතුන් ගේ මතයයි.

      මෙවර මහ මැතිවරණයෙන් උතුරේ සාම්ප්‍රදායික දේශපාලනය පුපුරුවා හැර ඇත.මෙය සිදු වී ඇත්තේ බොහෝ කාලයකට පසුවයි. හැටේ දශකයේ දී විශේෂයෙන්ම ශ්‍රී ලංකා නිදහස් පක්ෂයට බැඳී සිටි දෙමළ දේශපාලකයන් උතුරේ සිටියහ. බෙදුම්වාදී යුද්ධ සමග ඒ අය දකුණේ දේශපාලනයෙන් ඈත් වූ අතර එල් .ටී.ටී.ඊ. සංවධානයේ දේශපාලාන හස්තයේ ආධිපත්‍ය උතුර නියෝජනය කරන්නට විය. ඒ නිසා ත්‍රස්තවාදී යුද්ධයෙන් පසුව දිගින් දිගටම පොලිස් ඉඩම් බලතල ඉල්ලමින් ස්වයං තීරණය ට බල කරමින් දකුණේ දේශපාලනය සමග කේවල් කළහ. එසේම ඉන්දියාවට පක්ෂපාතී වූ බෙදුම්වාදීන් පිරිසක් බලවත් වී සිටියහ. උතුරේ සහ නැගෙනහිර නිතරම ජාතිවාදී කලබල සහ ගැටුම් ඇති කලේ ඔවුන් විසිනි. උතුරේ ජනතාවට සිංහලයන් සමග කටයුතු කිරීමට තිබෙන කැමැත්ත පාගා ගෙන සිටි නමුත් මෙම චන්දයේ දී ඒ සියලු බැමි පුපුරුවා හරිමින් සුභවාදී චින්තනයකින් යුතුව ඔවුහුද චන්දය භාවිතා කර තිබේ.නමුත් ඔවුන්ගේ අභිලාශයන් කුමක්දැයි නිගමනය කිරීමට අප ඉක්මන් විය යුතු නැත.

           මෙම පණිවුඩයෙන් කියන්නේ කුමක්ද. තවදුරටත් බෙදුම්වාදය අවශ්‍ය නොවන බවයි.නාස්තිකාර වියදම් සහිත පළාත් සභාව වැනි දේශපාලන බරව කකුලක් නඩත්තු කිරීමට අවශ්‍ය නොවන බවයි. නමුත් මේ පළත් සභා ගැටළුව සරල නැත. ඉන්දු ලංකා ගිවිසුම ප්‍රකාරව නීති ගත කල 13 වන සංශෝධනය හරහා බලාත්මක වූ මේ නීතිය. පෙන්නමින් කෙවල් කිරීම නිතර සිදු වේ. ජාත්‍යන්තර වශයෙන් ඉස්මතු වී ඇති මානව හිමිකම් සංවිධාන සහ දෙමළ බෙදුම්වාදීන්ට පක්ෂපාති රටවල් මේ  බලය බෙදීම පිළිබඳ මූල ධර්මය ගැන තරයේ විශ්වාස කරති. එසේම ලක් රජයට බල කිරීම කරති.  ඒ නිසා තුනෙන් දෙකක බලයක් ලැබුණු පමණනින්ම හෝ උතුරේ ජනතාව මාලිමාවට පක්ෂව චන්දය දීමෙන් පමණක්ම හෝ මේ තත්වය අභිබවා යා නොහැකිය.ඒ සඳහා බෙදුම්වාදයේ මූලික තත්වයන් විග්‍රහ කර ගැනීමට රජය සහ ජනතාව පෙළඹිය යුතුය. විශේෂයෙන්ම 1595 න් පසුව උතුරේ සිටි සිංහල ජනතාව එළවා දමා වාර්ගික ශුද්ධකරණයක් කල පෘතුගීසීන් මෙන්ම ලන්දෙසීන් ගේ කොලනි ප්‍රතිපත්තියද ඉංග්‍රීසීන් ගේ සහ මිෂනාරීන් ගේ බෙදා රට පාලනය කිරීමේ ප්‍රතිපත්තියද විශ්ලේෂණය කරගත යුතය. මේ නිසාමේ රටේ සිංහල ජනතාවට ‌ෙඑතිහාසික වශයෙන් සිදු වූ අසාධාරණය මෙතෙක් නිවැරදි කර නැත. රහතුන් වහන්සේලා වැඩ සිටි උතුරේ ‌ෙඑතිහාසික සිද්ධස්ථාන සැම විටම උපයෝගී වූයේ රටේ සාමය අති කර දීමටයි. විශේෂයෙන්ම දකුණු ඉන්දියාව හරහා ලංකාවට පැමිණෙන වෙළෙඳ බලය සහ නාවුක බලය මත සිදු වන දේශපලන පෙරළි සමහන් කර ලීමට උතුරේ වැඩ සිටි මහා සංඝරත්නය පෙරමුණ ගත් ආකාරය සිහිපත් කළ යුතුය. මහ පරාක්‍රමබාහු රජතුමා නයිනතිවු දෙමළ ශිලා ලේඛනය පිහිටුවා ලූයේ උතුරු මුහුදේ මුහුදු බත් වන නාවුක යාත්‍රා වලින් අය විය යුතු ආපදා වන්දිය ලබා ගැන්මටයි. රට එක සේසත් නම් රටේ පාලකයා ශක්තිමත් නම් එවැනි තීරණ ගත හැකිය.

   දැන් රටේ පාලකයා අනුර කුමාර දිසානායක වෙයි. ඔහු රටේ ජාතික ආරක්ෂාව භාර සේනාධිනායකයා වෙයි. ඊට අමතරව ඔහුගේ පක්ෂය මූලික කරගත් ආණ්ඩුවක් විසින් ඉදිරියේ දී රටේ පාලන බලය හසුරුවනු ඇත. එවිට රටේ අණ පනත් සෑදීමට ඒ සඳහා රටේ ජනතාවගේ කැමැත්ත ලබා ගැනීමට හැකියාව ලැබේ. මේ රටේ ජනතාව අතරින් දකුණේ ජනතාව පමණක් නොව උතුරේ බහුතරයද බෙදුම්වාදයට විරුද්ධය.කඳුකර ජනතාවද එලෙසය. කුල පීඩනයෙන් සහ දරිද්‍රතාවයෙන් පිරී උතුරේ නැගෙනහිර සහ කඳුකර  ජනතාව ට ඉහළට ඒමට සිංහල ජනතාව සමග එකතු වීමට ඉඩ නොදුන් දෙමළ ජාතිත සන්ධානය අභිබවා  සිංහල දේහපාලන පක්ෂයකට බහුතර කැමැත්ත දුන්නේ මේ තත්වය නිසයි. ඒ නිසා අප රට බෙදුම්වාදයට තල්ලු කරන ඉන්දියානු දේශපාලන බල අධිකාරිය මේ යථාර්තය සම්බන්ධව දැනුම්වත් කරලීමටද ඔවුන් සමග ගනුදෙනු බේරා ගැනීමටද  හැකියාව තිබිය යුතුය. එසේ නොවුණු හොත් බෙදුම්වාදී න්‍යයා පත්‍රය ක්‍රියාක්මක කිරීමට මේ ආණ්ඩුව ලවාම පිඹුරුපත් දියත් කිරීමට මේ විජාතික බලවේග පෙළ ගැසෙනවා නියතය.එයට ඉඩ නොතැබීම මාලිමාවට කැමැත්ත ප්‍රකාශ කල සියලු දෙනාගේම වගකීමයි. මන්ද පොහොසත් රටක් ලස්සන ජීවිතයක් යන අරමුණ ජය ගන්නට එවිට නොහැකි වන බැවිනි.ලක්ෂ හැටක ජනතාවක් චන්දය ප්‍රකාශ නොකර නිවසට වී සිටියේ පක්ෂ දේශපාලන ක්‍රියාකාරකම් තවදුරටත් ඉවසීමට නොහැකි බැවිනි. මාලිමාව සිය යහපත් අරමුණු වල පිහිටා නොසිටියහොත් මේ සියලු දෙන රට හැර යනවා නිසැකය.දේශපාලනය කරන්නට ද අපට රටක් ඉතිරි නොවනු ඇත.

මතුගම සෙනෙවිරුවන්

         

ගොවියාට කටුපන හාල් මෝලට ඔඩපන

 

       රජය විසින් සහල් සඳහා පාලන මිළක් නියම කිරීම නිසා සහල් වෙළෙඳ පළ උණුසුම් වි ඇත.  නාඩු වශයෙන් නාමකරණය වූ සහල් වර්ගයේ හිඟයක් තිබෙන අතර කීරි සම්බා මිළදී ගැනීමට නොහැකි වන හෝ රුචිකත්වයක් නොදක්වන පාරිභෝගිකයන් අසරණ වී තිබේ. ඒ අතර රටේ නොයෙකුත් තැන්වල තිබෙන ප්‍රධාන සහල් ගබඩා සහ කුඩා ප්‍රමාණයේ සහල් ගබඩා පරීක්ෂා කරමින් දත්ත පද්ධතියක් ස්ථාපිත කරලීමට රජය උත්සාහ දරමින් සිටී.ඉදිරි මාස් කන්නයේ අස්වනු නෙලන විට වී අලෙවි මණ්ඩලයේ ගබඩා වී වලින් පුරවන බව ජනාධිපති තුමා පවසයි.මේ අතර ලංකාවේ ප්‍රධාන සහල් මෝල් හිමියන් පස් දෙනා අතරින් ඩඩ්ලි සිරිසේන මහතා මාධ්‍ය වලට ප්‍රධාන මාතෘකාවක් බවට පත්ව තිබෙන්නේ ඔහු පළ කරන මතවාදාත්මක අදහස් හේතුවෙනි.

          අතීත ලංකාවේ මෙවැනි සහල් ප්‍රශ්නයක් තිබුණේ නැත. ගොවියා වගා කරන්නෙකු වූවා සේම පරිභෝජනය කරන්නෙකුද විය.නමුත් ඔහු අලෙවිකරුවකු නොවීය. කොළඹ ඇතුළු ප්‍රධාන නගරවල නාගරික ජනගහනයේ වර්ධනයත් සමගම විවිධ අවස්ථාවන්හිදී පැවති රජයන් ට සහල් පිළිබදව මිළ පාලනයක් ඇති කරන්නට සිදු විය.ඉංග්‍රීසි ආණුඩුවටද මේ සහල් මිළ සහ සහල් හිඟයට පිළිතුරක් නැති විය. ඒ නිසා 1942 දී පමණ සහල් සලාක ක්‍රමයක් ඇති කරන්නට සිදු විය. 1953 දී  හාල් සේරුවක මිළ ශත විසිපහේ සිට ශත හැත්තෑව දක්වා එක වරම ඉහළ ගිය අවස්ථාවක එම තත්වය දඩ මීමා කරගෙන හර්තාල් පවා ඇති විය.ඒ නිසා ඩඩ්ලි සේනානායක ආණ්ඩුවට ඉල්ලා අස්වීමට ද සිදු විය.

        1817 ජාතික විමුක්ති අරගලය දැඩි ලෙස මර්දනය කල බ්‍රිතාන්‍ය පාලනය  ඌව වෙල්ලස්ස ගොවිබම් දහස් ගණනක් ගිනි තබා විනාශ කිරීමෙන් අනතරුව 1848 අරගලයෙන් ද පීඩා විඳි ගොවි ජනතාව ආර්ථික වශයෙන් බෙලහීන විය. බිත්තර වී පවා සපයා ගනු නොහැකිව සිටි සමයක ඉංග්‍රීසි ආණ්ඩුව මැදහත්ව නුමුහුන් බිත්තර වී සැපයීමට රජයේ ගොවිපලවල් සූදානම් කිරීම නිසා හතළිහ දශකය වන විට රටේ ගොවි ජනතාව අතර ප්‍රබෝධයක් ඇති විය. පරාක්‍රම සමුද්‍ර ව්‍යාපරය, මින්නේරුය ,ඇල්ල කන්තලේ ව්‍යාපාරය, ගල්ඔය වැනි ගොවි ජනපද පිහිටුවීම මගින් සශ්‍රීකි ඉඩම් පරිහරණය කරමින් ගොවීන් රටේ වී නිෂ්පාදනය තර කළහ.ඒ සමගම වී අභිජනනය කිරීම සදහා මහඉලුප්පල්ලම ,බතලගොඩ ,බොම්ඹුවල වැනි පරියේෂණායතන පිහිටුවීමත් බිත්තර වී ගොවිපළවල් පිහිටුවීමත් නිසා නව හරිත විප්ලවයකට අඩිතාලම දැමිණ. ආහාර හා කෘෂිකර්ම සංවිධානය මගන් ලද ආධාර මත කෘෂීරසායන සහ රසායනික පොහොර පැකේජ ලබා දීමත් නෑඹුල් පොළවේ ඒ මගින් සරු අස්වනු ලැබීමත් හේතු කොට ගෙන පරිභෝජනයට එහා ගිය වී වෙළඳ පළක් නිර්මාණය විය.

       1972 දී පැවති රජය විසින් වී අලෙවි මණ්ඩලය පිහිටුවා වී මිළදී ගැනීම තුළින් ගොවියා ගේ ආර්ථිකය නැන්වීමට විශේෂ වැඩ සටහනක් ඇරඹීය. රට පුර නිෂ්පාදනය කළ වී මිලදී ගැනීමටත් ගබඩා කිරීමටත් විශාල වී ගබඩා ඉඳි විය.ඒවායේ ඇති කළ සහල් මෝල් මගින් වී සහල් බවට පත් කර සමූපකාර වලට නිකුත් කෙරිණ. මේ නිසා වී වෙලඳ පළ පිළිබඳ විශ්වාසයක් ගොවියා හට තිබුණි. සහල් වෙලෙඳ පළ පාලනය කිරීමට රජයට හැකි විය.විවෘත ආර්ථිකය හඳුන්වා දීමත් සමග රජය සතු ව්‍යාපාර අධෛර්ය කිරීම සිදු විය. සමූපාකාර ව්‍යාපාරය කඩා කප්පල් කෙරිණ. වී ඇඹරීම සඳහා ලංකාවේ නිෂ්පාදනය කළ නව යන්ත්‍ර පවා දිරාපත් වීමට ඉඩ හැර තිබුණි. ඒවායේ තාක්ෂණය ඉන්දියාවට විකුණා දැමිණ. රටේ නව නිපැයුම් කරුවන් තැනක් නැති විය.   1995 වර්ෂයේ එවකට චන්ද්‍රිකා බන්ඩාරනායක මැතිණිය යුගයේ දී දි.මු.ජයරත්න කෘෂිකර්ම ඇමතිව සිටි කාලවකවානුවේ වී අලෙවි මණ්ඩලය අහෝසි කරලීමට කෙටුම් පත් සකස් කළ අතර පසුව එය කළ නොහැකි වූ තැන මණ්ඩලය අක්‍රීය කර නිළධාරීන් කීප දෙනෙකුට පමණක් පඩි ගෙවමින් තාබා ගත්හ. එසේම වී අලෙවි මණ්ඩලය සතු ගබඩා ප්‍රසිද්ධ ටෙන්ඩර් කැඳවා විකුණා දැමීමට කටයුතු කළහ.(එක්සත් ජාතික පක්ෂ රජය කාලයේ සිට එය සිදු විය) එහිදී ඉන් වැඩි ප්‍රතිලාභ ලැබූයේ  බහුජාතික සමාගම්ය.රජය විසින් ගොඩ නගා නඩත්තු කරනු ලැබූ රාජ්‍ය සම්පත් වන බිත්තර වී ගොවිපළවල් වල පරම අයිතිය පවා ලබා ගන්නට මේ සමාගම් සමත් විය.

    වර්තමාන සහල් අර්බුදය තේරුම් ගන්නට මේ අතීතයට යන්නට අපට සිදු වන බව කිව යුතුය. මන්ද බිත්තර වී සැපයීමේ සිට වී වපුරා අස්වැන්න ගෙන කර  සහල් නිෂ්පාදනය දක්වා ක්‍රියාවලිය ගැට ගැසී තිබෙන්නේ ඉහත දැක්වූ අතීතයෙන් උරුම වී තිබෙන විවිධ ගැටළු සමගින් බව තේරුම් ගත යතුය.  උදාරහරණයක් වශයෙන් නාඩු වශයෙන් අද හදුන්වන සහල් ප්‍රභේදය ට අදාළ වී වර්ගය ගොවියාට   හදුන්වා දී තිබෙන්නේ කෘෂීකර්ම දෙපාර්තමේන්තුවයි. විවිධ බී.ජී. වර්ග , බී.ඩඩ්. සහ ඒ.ටී. වී ප්‍රභේද වලින් මේවා නිෂ්පාදනය වේ.රටේ පාරිභෝගිකයා වැඩි රුචිකත්වයක් දක්වන සම්බා වර්ග අතරට කීරි සම්බා නමින් නව ප්‍රභේදයක් හඳුන්වා දී තිබෙන්නේ ද මෙම දෙපාර්තමේන්තුවයි.වෙළෙඳ පලේ දී එයට ඉහළ මිළක් ලැබුණි. මිළ වැඩියෙන් ලබෙන වී වර්ගය ගොවීන් විසින් වගා කරති. නාඩු හෝ රතු සහල් ලැබෙන වර්ග වගා කරනු ලබන්නේ හම්බන්තොට ගාල්ල මාතර වැනි පළාත් වලය. බිත්තර වී ගොවිපළවල් රජය විසින් පෞද්ගලික අංශයට විකුණා දැමීමත් සමග රජයේ ඒකාධිකාරය අහෝසි කරනු ලබිණ. පෞද්ගලික සමාගම් බිත්තර වී නිපදවන්නේ ලාභ ඉපැයීමටයි.රට පුරා රයිස් කඩ බිහිවීම නිසා කීරි සම්බා වලට විශේෂ ඉල්ලුමක් ඇති විය.සමාගම් විසින් කීරි සම්බා බිත්තර වී නිකුත් කර වැඩි වැඩියෙන් වගා කිරීමට ද දිරි දුන්හ. ඉතින් නාඩු රතු සහල් සහ රතු සහල්  වර්ග හිඟ වීම පුදුමයට කරුණක් නොවේ.

      මේ වන විට රජයේ නිළධාරීන් ප්‍රධාන වී මෝල් කරා ගොස් ඒවායේ තිබෙන වී ප්‍රමාණය පිළිබඳ දත්ත එකතු කරමින් සිටිති. එහෙත් වී මෝල් හිමියාගේ සැබෑ තොග සංචිතය තිබෙන්නේ ගොවියා ළඟ බව බොහෝ අය නොදනිති. අම්පාර, මඩකලපුව, පොලොන්නරුව, අනුරාධපුර වැනි ප්‍රධාන වශයෙන් වී නිෂ්පාදනය කරන දිස්ත්‍රික්කයන්හි ගොවින් විසිදාහක් පමණ ප්‍රමාණයක් ප්‍රධාන මෝල් හිමියන් සමග බැඳී සිටිති. මේ බැඳීම ඇති කරන්නේ ඔඩපන නමින් හඳුන්වන ණය දීමකිනි. මේ ණය ක්‍රමය මුලින් හඳුන්වා දුන්නේ ලංකා බැංකුව ,මහජන බැංකුව වැනි රාජ්‍ය බැංකු විසිනි. ගොවියාගේ වී තොග නිවසේ රඳවා තබා ගැනීමට අඩු පොළියට ණය දීම මෙහි ක්‍රමයයි. වී මිළ ඉහළ යන විට වැඩි මිළකට වී විකිණිමට මේ මගින් හැකි වෙයි. අද වන විට මේ ඔඩපනය ක්‍රියාත්මක කරනුයේ වී මෝල් හිමියන්ය. ඔවුහු ගොවින් තෝරා ගෙන බිත්තර වී ලබා දී කෘෂීරසායනද ලබා දි තවත් ජීවන සහනාධාරද සපයමින් ගොවියා ඇද බැඳ තබා ගනිති. අස්වනු නෙලන කාලයට ගොවිපළට යන මොල් හිමියන්ගේ නියෝජිතයන් ඇප් එකක් මගින් කුඹුරේ තිබෙන වී ප්‍රමාණය මැන ගන්නා අතර ගොවියා තමන්ගේ වී ටික වේලා නිවසේ ආරක්ෂිතව ගබඩා කරයි. වෙලෙඳ පලේ සහල් මිළ ඉහළ යන කාලයට මෝල් හිමියා විසින් තවත් අමතර මුදලක් ගොවියා අත මිට මොලවා වී ටික රැගෙන යන අතර ඉන් අධික ලාබයක් ලබති. ඊට අමතරව ඇතැම් ගොවිබිම් වලදී  ඇප් එකක් මගින් අස්වැන්න පෙරසේම  මැන භූතයන් යොදවා ගොයම් කැපීමට මුස්ලිම් දෙමල කොන්ත්‍රාත්කරුවන් යොදවති. ඔවුහු කෙලින්ම මෝල හිමියාගේ ටැංකි වලට වී පුරවන අතර මෝල් හිමියා ඒවා සිය ගබඩාවට ගෙන වියළා ගබඩා කර ගනිති. මේ ක්‍රම දෙකින්ම අප ඉගෙන ගත යුත්තේ ගොවියා කෙරෙහි වන බැඳීම රඳවා තබා ගැනීමට මෝල් හිමියා සකස් කල ගිවිසි ක්‍රමයයි. එය එක් අතකින් මානුෂික වන අතර නව ගොවි වහල් ක්‍රමයක්ද නිර්මාණය කිරීමට සමත් වී තිබේ.

     වී අලෙවි මණ්ඩලය වසා දැමීමත් පසුව එය අක්‍රීය මට්ටමින් සිදු කරන අකාර්යක්ෂම ක්‍රියා පිළීවෙත නිසාවෙන්ද ගොවියාට රජය කෙරෙහි බැඳීමක් නැත. ලබා ගන්නා සහල් කෙදිනකවත් සමූපාකාරයට ලැබෙන්නේ නැත. ඒ නිසා අඩු ආදායම් ලබන අයට සහනයක් නැත. පහල මධ්‍යම පන්තියටද සහනයක් නැත. රජය කළ යුත්තේ සහල් මෝල් හිමියන් සමග රණ්ඩුවකට යෑමේ ක්‍රියාවලිය නොවේ. ඔවුන් මෙරට වෙළඳ පළ ආර්ථිකයට දක්වන දායකත්වය රජයට සපුරාලිය නොහැකිය. නමුත් රජයේ වගකීම විය යුත්තේ ‌ගොවියා සහ පාරිභෝගිකයා අතර සිදුවන ක්‍රියාදාමය සාධාරණව යුක්ති සහගතව සිදු වන්නේ යන්න පීළිබඳ විශ්ලේෂණය කොට එයට කලමනාකරණ ක්‍රියාවලියක් සැකසීමයි. රජයේ කෘෂිකර්ම දෙපාර්තමේන්තුවේ වගකීම වනුයේ  විවිධ වර්ග වල බිත්තර වී නිපදවා  එකාධිකාරය පාලනය කර ඒ ඒ වර්ග ගලප්පා ගත හැකි දිස්ත්‍රික්කයන්ට සහන මිළට ඒවා බෙදා හැර පාරිභෝගිකයගේ රුචිකත්වය අනුව වෙළඳ පළට අවශ්‍ය සහල් නිපදවීමේ පදනම සකස් කිරීමයි. ඒ අතර කුඩා ප්‍රමාණයේ සහල් මෝල් හිමියන්ටද වී මිළඳ ගැනීමට ණය නිකුත් කර මේ වෙලඳපල සමබර කර ගත හැකිය. කලින් කලට මාධ්‍ය සංදර්ශන පවත්වමින් මේ ප්‍රශ්ණ තොරොම්බල් කිරීමෙන් ගොවියාටවත් පාරිභෝගිකයාටවත් ආර්ථිකයටත් වැඩක් නොවන බව දැන්වත් වටහා ගත යුතුය.

මතුගම සෙනෙවිරුවන්

 

කපුගොල්ලෑවේ තුඩපත මගින් හෙළිවන ‌ෙඑතිහාසික උරුමය

 

                         

            උතුරු මැද පළාතේ යාන් ඔය නිම්නය අතිශයින් සංවේදී ජාතික උරුම සහිත ප්‍රදේශයකි. ප්‍රාග් ‌ෙඑතිහාසික සොහොන් වලින් හෙළිවන ආදී මිනිසා පිළිබඳ කතාව මෙන්ම අනුරාධපුර මහා ශිෂ්ඨාචාරයට සම්බන්ධ විශේෂිත සිද්ධස්ථානයන්හි නටබුන් විශාල වශයෙන් පැතිර පවතින ප්‍රදේශයකි.පදවිය වාහල්කඩ සහ නාම්බකඩ යන මහා වාපී ශිෂ්ඨාරයේ ඉහත්තාව වන මේ කලාපය තුළ ඉපැරණි වාරිමාර්ග නෂ්ඨාවශේෂයන් රාශියක නටබුන් ද හමුවන බව කිව යුතුය. යාන් ඔය හරස් කර තැනු ගල් අමුණු සහ ඒ සම්බන්ධ ව ලියැවුණු ශිලා ලේඛන පවා එහි දක්නට ඇත.හුරුළු වැව ජල පෝෂක ප්‍රදේශයෙන් ඇරඹෙන යාන් ඔය උතුරුදෙසට ගමන් කර නැගෙනහිර ට හැරී පුල්මුඩේ වෙරළ තීරයෙන් මුහුදුට එක්වන බැවින් රජරට සශ්‍රීකත්වය මොනවට කියා පෑ වටිනාකම් රැසක් ඉස්මතු කළ හැකි තෝතැන්නකි.

         අතීතයේ දී හොරොව්පතාන ආසන්නයේ බැඳි ගල් අමුණක් ආශ්‍රයෙන් දිය හරවා ගෙන ගොස් පදවිය ට දැමීම සඳහා විශාල යෝධ ඇලක් තිබුණි.  එවැනි යෝධ ඇළවල් හි සරළ තාක්ෂණයන් මගින්  ජලය ගෙන යෑම පිළිබඳ නිදර්ශනයන් මේ ප්‍රදේශයේ ඇත. හෙරොව්පතානෙන් පැමිණි ඇළ දුටුවැව තුලානේ කපුගොල්ලෑව වැවේ දිය කඩුල්ලෙන් පන්නවා ඉදිරියට ගෙන ගොස් ඇත.කපුගොල්ළෑව කුඩා කපුගොල්ලෑව වීරසෝලේ කුංචි කුළම මරදන් මඩුව වැනි ගම්මාන රැසකින් සමන් විත මේ කලාපය අතීශය සශ්‍රීක ය. දිය උල්පත් ගහන කලාපයකි. මේ නිසා ජනතාව ජීවත් කරවීමට මහත් ආයාසයක් දැරිය යුතු නොවේ. මෙම නිම්නයේ පැවති ‌ෙඑතිහාසික ගම්මානයක් වශයෙන් සැළකෙන කපුගොල්ලෑව නුවර යුගයේ දී ඉතා වැදගත් රාජකීය ගමක් බවට පත් වීමේ ඉතිහාසයක් මතු කර ගැනීමට හැකි තුඩපතක් නැතිනම් සන්නසක් එම ගම්මානයේ වර්තමානයේ ජීවත්වන මුදලිනායක වෙද මහතාගේ නිවසින් මතු කරගන්නට හැකි වුණි. සර්වාංග වෙද පරපුරක වර්තමාන පුරුක වශයෙන්සැලකෙන ඔහුගේ නිවසේ ඇඳක් යට ට්‍රන්ක පෙට්ටියක සැඟව තිබූ මේ තුඩපත මේ ප්‍රදේශයේ ඉතිහාසයට වැදගත් ආලෝකයක් සපයන බව පෙන්නුම කළ හැකිය.

       පදවිය සහ වාහල් කඩ යන මහා වැව් දෙකට ඉස්මත්තේ පිහිටා තිබෙන මෙම ගම්මානය අනුරාධපුර යුගයේ සිට ‌ෙඑතිහාසික පුවත් සැපයූ පෙදෙසක් වෙයි. කපුගොල්ලෑව ට නුදුරින් වූ තාමර වැව ටැම් ලිපිය  කුංචි කුලම ටැම් ලිපිය ඉරිපින්නියාව ටැම් ලිපිය ආදී ශිලා ලේඛන වලින් පැහැදිලි වන්නේ අනුරාධපුර යුගයේ දී මහා විහාරය සතු පිරවෙන් සඳහා ප්‍රත්‍ය සැපයීමට මේ පෙදෙස් වෙන්ව තිබූ ආකාරයයි. කපුගොල්ලෑව පන්සල අසළින් හමු වූ කැඩී බිඳි ගිය ටැම් ලිපයෙන් ද අනාවරණය වන්නේ අනුරාධපුර යුගය අවසාන භාගයේ කුසලාන් කොට මේ ගම් දුන් වගයි.මහ කපු ගොල්ලෑව කුඩා කපු ගොල්ලෑව අසළින් ගලා යන යෝධ ඇළ වාහල් කඩත් පදවියත් අසල පැන්නුමකට ළගා වී ඒ මහා ජලාශ පෝෂණය කර ඇත. ඉතින් මේ ‌‌ෙඑතිහාසිකතත්වය පසුබිමේ සිට නුවර යුගයේ ලියන ලද කපු ගොල්ලෑව තුඩපත විශ්ලේෂණය කළ යුතුය.

       මේ තුඩපතේ හැටියට මහනුවර රාජ්‍ය සමයේ දී පුංචි රාළ නම් වෛද්‍යවරයෙකු රජ වාසලේ වෙදනාවන් වශයෙන් සහ මහ ගබඩාවේ නිලමේ වහයෙන් සේවය කර තිබේ. එකල උඩරට බෙහෙත් ගෙයි අත්පොත නම් ග්‍රන්ථයක් තිබුනේලු. රජ වාසලේ සිටින කුමර කුමරියන්ට රජුන්ට වැළඳෙන ලෙඩ රෝග සමනය කරදිමට මේ වෙදනාවන් අත තිබූ බලගතු ඖෂධ උපයෝගී වූ බව පැහැදිලි වෙයි. රජු ඉදිරියේ වෙදනාවන් කල දස්කම් ගැන අපේ රටේ එතරම් සාහිත්‍යයක් නිර්මාණය වී නැත. කොරියානු දේශයේ රජුන්ගේ මහ වෙදනා ගැන රචනා කළ කතාවක් ටෙලි නළුවක් විලස කලකට ඉහතදී ප්‍රචාරය විය. එහෙත් අප රටේ ඒ පිළිබඳව හෝ ඔවුන්ගේ පෞරුෂයන් ගැන ඉස්මතු කරන්නෙකූ දක්නට නොහැකිය. කපුගොල්ලෑව වෛද්‍යවරයා සෙංකඩගල මහනුවර රජ වාසලේ වෛද්‍යවරයෙකු වූ වා සේම රදළපවුලට නෑ කම් කියූවෙක් බව පැහැදිලිය. මේ වෙදකමෙන් කල දස්කම් නිසා ඔහුට ගම්වරයක්ලැබුණි. ඒ හුරුලු පළාතේ මහ පොතාන කෝරලයේ දුටුවෑ තුලානේ  පිහිටි කපුගොල්ලෑවයි.මේ ඒ තුඩපතේ ඇතුළත් විස්තරයයි.

ශකවර්ෂයෙන් එක්වා දහස් හයසිය දහයට පැමිණි මෙම වර්ෂයෙහි  පොසොන් මස ගුරුදින පංචවිතත තිතිය ලත් මේ හුරුලු පත්තුව බද දුටුවෑ තුලානේ කපුගොල්ලෑවෙ භූමි ප්‍රවේනි සැලැස්ම ගැන කපුගොල්ලෑවට සෙන්දු දුන්වත්තෙගොමත් සහා භූමි ප්‍රවේනි සැලැස්ම පිණිස මහ වාශලට පුන්චි රාළ නිලමෙ වෙදකන් කරපු බවට ලියාදෙන තල්පොත.

මා ඉන් නැගෙනඉරට කිරවනාහින්නද බස්නාඅතට ඔයද ශවුමට මුන මල ගහද වුතුරට ගොඩවලද මෙම මයින් සහ ගොඩ මඩ ඇතුළුව කොරලේ ගමට පුන්චි රාල නිලමේට ගැබඩැ රාකාරිය අත්හැර මෙගන්දෙක ලැබුනා ඇත.මීට වගත් මෙගෙම සළු වඩන නිලමෙද මහතැන පෙනගෙ මුහන්දිරමද මහ අරමුදලෙ වන්නකු නිලමෙද රන් ආවුධ මණ්ඩප්පෙ ලෙකමද අතපත්තුවෙ මුරෙ සිටින මුහන්දිලමද වහල්කඩ මොහන්දිරමද වන්නි දෙදිශාවෙ නිලමෙද වුඩකට්ටුවෙ විදානෙද වුඩුනුවර රට දවටලෙ වඩිගත්තුනද නුවර කලාවිය දිශාව ඇතුළව මහනුවර මහඅදිකාරන් නිල මෙහෙවර වන පිලිමතලව්වේ  රාජකරුණා සෙනෙවිරත්න  අභය කෝන්  පණ්ඩිත රාළහාමි වම්හ.

   ශකිවර්ෂයෙන් 1610 යනු ක්‍රි.ව.යෙන් 1688 ලෙසට දැක්විය හැකිය.දෙවන රාජසිංහ රාජ්‍ය කාලය ක්‍රි.ව. 1687 න් අවසන් වන අතර දෙවන විමලධර්මසූරිය රජුගේ පළමුවන රාජ්‍ය වර්ෂය 1688 ට යෙදි ඇත. මේ රජුගේ පත්වීම ට තිබුණු බාධක බොහෝය. හිටපු රජුගේ යම් අයථා ක්‍රියා නිසා ඇතිවූ නිලඹේ කරැල්ලෙන් පසු රජුගේ අතිජාත පුත්‍රයා පවා මරණයට පත් වූ බව පැවසේ .ඉන්පසු වයස්ගත රජු සමග විවාහ වූ ලාබාල බිසවකගේ කුමරුවා දෙවන විමලධර්මසූරිය විය. මේ කලබලකාරී කාල පරිඡේදයේ රාජකීය වෛද්‍යවරුන්ට පැවරුණු රාජකාරි සුවිශේෂ වී යැයි සිතන්නට හැකිය. වෛද්‍ය කර්මයට අමතරව පුන්චිරාළ නිලමේට ගබඩාවද භාර දී තිබේ.ඒ රාජකාරියෙන් ඔහු මුදවා හුරුලු පළාතේ ගමක් අස්වැද්දුමට දී තිබෙන්නේ විශේෂ හේතුවක් නිසායැයි සිතන්නට හැකිය.මේ තුඩපතින් පුන්චිරාඝට බලය පවරා දී ඇත්තේ පිළිමතලව්වේ මහ අදිකාරන් තුමා බව පැහැදිලිය.මේ තුඩපත ද රැගෙන පුන්චි රාළ සමග තවත් සහෝදරයෙක්ද පැමිණි බව කියැවෙන අතර ඔවුන් සමග ගමට බහිරව පුද් සිරිත් ද බෝ වුණ බව පැවසෙයි..

     අනුරාධපුර යුගයෙන් පසු වල් වැදුණු මේ ගම් යලි ජනාවාස කිරීම මගින් ලන්දේසීන් ගෙන් වන තර්ජනයන් මගහැර ගැනීමට කල්පනා කලබවද සිතන්නට හැකිය. වර්ෂ 1688 න් පසු මහනුවර නායක්කර් යුගයේ දී එනම් 1788 දි කපුගොල්ලෑව අසල තිඹිරිවැව ගමේ ලේකම් විසින් වරාගන් දී මෙම ගම මිලට ගත් බව කියැවෙන තුඩපතක් ද දක්නට ඇත.කෙසේ වෙතත් මේ තුඩපතේ දක්වා ඇති සීමා මායිම් වලින් කීපයක් අදටත් දක්නට තිබෙන බව පෙනේ. කිරවනාහීන්න ඒ නමින්ම තිබෙන අතර ගොඩවල ගොඩවල මූකලාන යනුවෙන් සිටී.හල්මිල්ලාව ඔය බස්නාහිරට ඇත. ඉඩම් නිරවුල් කිරීමේ ආඥ පනත යටතේ 1975 වර්ෂයේ දී කපුගොල්ලෑව ගම නිරවුල් කිරීමේ දී මෙම තුඩපත පිළිගත් බවට මහනුවර ජාතික ලේඛනාගාරයේ පවතින මේ තුඩපතේ පරිවර්තනයෙන් පෙනේ.ඉඩම් නිරවුල් කිරීම අනුව පුන්චිරාල නිලමේ ගෙන් පැවතෙන සතරවන පරම්පරාවේ අයට ප්‍රවේනි ඉඩම් වශයෙන් අක්කර 136 ක්  ලැබී තිබෙන අතර අක්කර 2229 ක් රජයේ ඉඩම් ලෙසට ප්‍රකාශයට පත් කර තිබේ.

      පුන්චිරාල නිලමේ ගෙන් පසු ඔහු ළඟ තිබූ සර්වාංග වෙදකම ඔහුගේ දරුවන් අතර බෙදී ගොස් කහටගස්දිගිළිය අසල ගොම්මලෑව විහාරස්ථානයේ නායක ස්වාමීන් වහන්සේ විසින් පවත්වාගෙන ගොස් ඇති බව පෙනේ. ඒ අතර  උන්වහන්සේ ගේ සහෝදරයන් සහ ඥාතීන් සර්ප වෙදකම ඇස් වෙදකම සහ කැඩුම් බිඳුම් වෙදකම යන විශේෂඥතාවයන් රැකගෙන පැමිණ තිබෙන අතර වර්තමාන පරපුරේ මුදලිනායක වෙදමහතා ට පෙර කී ස්වාමීන් වහන්සේ මගින් වෙදකම සත්ත කොට භාර දී තිබේ.‌ෙඑතිහාසිකවෘත්තාන්තයක් පසුබිමේ පවතින මේ තුඩපත මගින් උතුරු මැද පළාතේ පුරාණ ගමක විත්තියද යටත් විජිත සමයේ දී ඇති වූ වෙනස්කම්ද පරම්පරික උරුමයන් හා වර්තමාන භාවිතයන් අතරවන ගැටීමද මනාව හෙළි කරයි.

මතුගම සෙනෙවිරුවන්

මැකෝ ගෙ පොලීසියෙන් සාහිත මාසය වාරණය කරයි

 

                               

                 දිවයින පුවත්පතේ මාධ්‍යවේදී එරික් ගාමිණී ජිනප්‍රිය මහතා විසින් රචනා කළ එන්පීපී කතාව සහ ජේවීපී ක්‍රියාව නම් කෘතිය ජනගත කිරීමට යොදා ගෙන තිබුණේ සැප්තැම්බර් මස 04 බුද දිනයේ දීය.සාහිත්‍ය මාසය ඇරඹීමත් වර්තමාන ‌ෙද්ශපාලන තුළ සාකච්ඡා කල යුතු වැදගත් මාතෘකාවක් වීමත් නිසා ජනතාව අතර යම් සංවාදයක් ඇති කිරීම මෙම ජනගත කිරීමේ අරමුණ විය.නමුත් එම දිනයේ අචාර්ය එන්. එම්. පෙරේරා මධ්‍යස්ථානයට කඩා වැදුණු පොලිසිය මෙම උත්සවය පැවැත්වීම නතර කිරීමට උපෙදෙස් ලබා දී ඇත.මැතිවරණ සමය බැවින් මෙය වෙනදාට ක්‍රියාත්මක පොලිසිය නොව මැතිවරණ කොමිසමේ  පොලීසිය වී යැයි දැන ගන්නට ඇත.

         2023 අවුරුද්දේ අංක 03 දරණ මැතිවරණ වියදම් නියාමන පනත පාර්ලමේන්තුවේ දී සම්මත විය.ඊට අමතරව මැතිවරණ ප්‍රචාරක කටයුතු පාලනය කිරීම සඳහා වනවැදගත් නීතියක් මාධ්‍ය උපමාන නමින් ගැසට් කරන්නට යෙදී ඇත.අප දන්නා පරිදි මනාප චන්ද ක්‍රමය ප්‍රචලිත වීමත් සමගම මැතිවරණ අපේක්ෂකයන් විසින් වියදම් කරන මුදල කෝටි ගණනින් වැඩි විය.එම මුදල් හා පක්ෂ වල වත්කම් පිළිබඳ කිසිම තොරතුරක් ද සමාජ ගත නොවීය. එ නිසා මැතිවරණය සමය යනු එක්තරා ආකාරයකට කළු සල්ලි සුදු කරන සමයක් බවට පත් විය.මැතිවරණ නියාමන පනතක අවශ්‍යතාවය පැණ නැගී තිබුණේ මේ පසුබිම මතයි. මැතිවරණ කාල පරිඡේදය තුළ මැතිවරණ පනත අනුවත් මැතිවරණ නියාමන පනත අනුවත් ස්වාධින මැතිවරණ කොමිසමට කටයුතු කිරීමට බලය ලැබී ඇත. එම ක්‍රියාවන් දේශපාලන බලය යොදා නැවැත්වීමට නොහැකිය.මෙය හොඳ තත්වයති ප්‍රජාතන්ත්‍රවාදය තහවුරු කරලීම පිණිස ගන්නා ලද යහපත් තීරණ අතරට වැටෙයි.

         මෙවර පැවැත්වෙනුයේ ජනපතිවරණයකි. රටේ විධායක ජනපතිවරයෙකු සිටින කාලවකවානුවක ඔහුද අපේකෂකයෙකු වූ විට නිතැතින්ම යටකී මැතිවරණ නියාමන පාලන නීතියට ඔහුද යටත් වෙයි. ජනපතිවරයා රටේ සේනාධිනායකයා වන බැවින්  ජාතික ආරක්ෂාව ඉටු කරලීමේ ව්‍යවස්ථාමය   වගකීම ඔහු සතු බැවින්  යම් යම් ක්‍රියා මාර්ග ගැනීමට ඔහුට කටයුතු කළ හැකි විය යුතුය. එයට බාධා කිරීමට මැතිවරණ කොමිසමට නොහැකිය. නමුත් ඔහුගේ අපේක්ෂකත්වය තුළ ජනපතිවරයාගේ භූමිකාවතමන්ට වාසිදායක ලෙසට ඉස්මතුවන්‌ෙන් නම් මැතිවරණ නියාමන නීතියට පටහැනිය.පසුගියාදා ජනපතිවරයාගේ මූලිකත්වයෙන් පැවති රැස්වීම් වලදී නියමිතව තිබූ භෝජන  සංග්‍රහයන් නැවැත්වීමට මැතිවරණ කොමිසම ක්‍රියාකර තිබේ.එහෙත් තැපැල් චන්දය අභිමුව තිබිය දී රාජ්‍ය සේවක වැටුප් වැඩි කිරීමට කරන යෝජනා එළි දැක්වීමට කටයුතු කිරීම පිළිබඳව මැතිවරණ කොමිසමේ අවධානය යොමු වූයේ නැත. දෙසැම්බර් මාසය වන විට සකස් කළ යුතු අයවැය යොජනා මේ අවස්ථාවේ ප්‍රකාශ කිරීමට යෝජනා කිරීමම ජනපතිවරයාගේ බලය මත කරන චන්ද දූෂණයකි.එසේම ත්‍රීවීල් රියදුරන් ජනපති ලේකම් කාර්යාලය අසලට ගෙන්වා   අතට සන්තෝෂම් දී රථ වල ස්ටිකර් ඇලවීමට ක්‍රියාකිරීමද ජනපති තනතුර අවභාවිතා කිරීමකි. එයට වඩා බරපතල ප්‍රශ්ණයක් වූයේ ජනපතිවරණ සමයේ රටට පැමිණි ඉන්දීය විදේශ අමාත්‍ය අජිත් දෙවොල් සමග ගිවිසුම් අත්සන් කිරීමට ජනපතිවරයා  පෙළඹීමයි. මේ කාලය තුළ ඔහුද අපේක්ෂකයෙකු වන බැවින් ජාතික ආරක්ෂාව පිළිබඳ කටයුත්තේ දී හැර අනෙක් කටයුතු වලට රාජ්‍ය සම්පත් යොදා ගැනීම ඒවා අනිසි විදියකින් ප්‍රචාරය කිරීම නොකළ යුත්තකි.මෙවැනි තත්වයන් පාලනය කිරීමට මැතිවරණ කොමිසම අපොහොසත් වී ඇති බව කිව යුතුය.

      මැතිවරණ වියදම් පිළිබඳ සම්පූර්ණ ලේඛනයක් මැතිවරණය පවත්වා දින විසි එකකින් කොමිසමට ඉදිරිපත් කළ යුතු බවට නීතියකි.අප දන්නා පරිදි මේ ජනපතිවරණයේ දී කෝටි ප්‍රකෝටි ගණනින් මුදල් වියදම් කිරීම දක්නට ලැබේ. එක් අපේක්ෂකයෙකු විසින් එක් චන්ද දායකයෙකු වෙනුවෙන් වියදම් කළ යුතු මුදල වන්නේ රැපියල් 109 කි. එක් චන්ද දායකයෙකුට රුපියලක් වියදම් කළද එක් කෝටි හැත්තෑ එක් ලක්ෂයක් වියදම් කිරීමට හැකිය. මෙවැනි මුදල් කන්දරාවක් පක්ෂයකට ලැබෙන්නේ කෙලෙසකදැයි ජනතාව දැන ගත යුතුය. දිවයිනේ තබන සෑම රැස්වීමකටම බස් යොදා සෙනග අදින බව කවුරුත් දන්නා රහසකි.පිටස්තර දිස්ත්‍රික්ක වලින් බස් යොදා සෙනග ඇදීම පාලනය කිරීමට කොමිසම උත්සුක වී නොමැත.එවැනි රැස්වීම් වලින් ප්‍රකට වන්නේ කෘතිම ජන මතයකි. රැළි වලින් නොමග යන ජනතාවට ප්‍රතිපත්ති ගරුක අපේක්ෂකයෙකු තෝරා පත් කර ගැනීමට අවස්ථාවක් උදා නොවේ. රැස්වීමකට කූඩාරම් ගැසීමට පවා කෝටියක් පමණ වියදම් කරන අපේක්ෂකයන් සිටිති. පෝස්ටර් මුද්‍රණය පෝස්ටර් ගැසීම කූඩාරම් ගැසීම වැනි මැතිවරණ ප්‍රචාරක ක්‍රියා භාර ගෙන තිබෙන ප්‍රචාරක ආයතන රැසකි. පාක්ෂිකයන් දායකත්වය  ගනු වෙනුවට මැතිවරණ සමය මෙම ව්‍යාපාරිකයන්ගේ  ලාභය උපරිම කර ගැනීමේ අවස්ථාවක් බවට පත් කරගෙන තිබේ  මේ වියදම් කරන මුදල ලැබෙන්නේ දේශීයවද ඒවායේ මූලාශ්‍ර කෙබඳුද විදේශ රාජ්‍ය නොවන සංවිධාන වලින් ලැබෙන්නේ ද තානාපති අංශ වලින් වියදම් කරන්නේ ද යන්න දැන ගැනීමට ජනතාවට තිබෙන අයිතිය මේ මැතිවරණ පාලන නීතියෙන් සීමා කොට තිබේ. මන්ද මැතිවරණය අවසන් වී කරන ඉදිරිපත්   කිරිම් යොදා ගැනෙනුයේ නීති විරෝධී ප්‍රචාරක කටයුත්තක දී ලැබෙන දඬුවම් ගැන සළකා බැලීමට පමණක් වන නිසාය.අනෙක ඒ වන විට කොමිසමේ බලතල අවසන් වී ඇති බැවින් පත්ව සිටින ජනපතිවරයෙකුට විරුද්ධව කටයුතු කිරීමේ හැතියාක් නැතිබව ද දැක්විය යුතුය.

          මැතිවරණ වියදම් නියාමනය සහ මාධ්‍ය උපමාන සම්බන්ධව මෙවැනි අඩු ලුහුඬුකම් පවතින විට ඒවා පක්ෂ සමග සාකච්ඡා කොට යාවත්කාලීන කර ගැනීම මැතිවරණ කොමිසමේ වගකීමකි. එවැනි දෙයක් සිදු නොවන බව පෙනේ.පක්ෂයකින් ඉදිරිපත් වන අපේක්ෂකයෙකුට අනෙක් පක්ෂයක අපේක්ෂකයෙකුගේ ප්‍රතිපත්ති සහ හැසිරීම් විවේචනය කිරීමට ඉඩ තිබෙන්නේ වාචිකව පමණකි. ලිඛිතව ඉඩ නැති බව දැන ගන්නට ඇත. දිවයින මාධ්‍යවේදී එරික් ගාමිණී මහතා පක්ෂයකට ගැති පුද්ගලයෙකු නොවේ. ඔහු ස්වාධීන ජනමාධ්‍යවේදියෙකි. දේශපාල විචාරයකි. එවැනි පුද්ගලයෙකුට මැතිවරණ සමයේ වුවද සීමා මායිම් නැත.ගත් කතුවරයෙකුට සාහිත්‍ය මාසයේ දී ලැබෙන අවස්ථාව වෙනත් මාසවලදී ලැබෙන්නේ නැති බවද මතක් කළ යුතුය.

     සදය විවේචනයකට කවදත් පුවත්පත් වල  ඉඩකඩ විවර විය යුතුය. පෞද්ගලිකව මඩ ගසනවානම් පුවත්පත් කොමිසමට පැමිණිලි කිරීමට හැකියාව ඇත.එරික් ගාමිණී මහතාගේ දේශපාලන කෘතිය ජනගත කිරීම සහ සංවාදය නැවැත්වීමට විවේචනයට බඳුන් වූ පක්ෂය මුල් වූයේ ද එසේත් නැතිනම් ඒ පක්ෂයට සහාය දක්වන ඇමරිකානු තානාපතිනිය මුල් වූයේ ද යන්න අප නොදනිමු. පසුගිය කාලයේ දී තානාපතිනි ජූලි චන් තානාපතිවරුන්ගේ ආචාර ධර්මද නොසලකා හරිමින් මැතිවරණ කොමසාරිස් තුමා හමු වන්නට ගිය බව මාධ්‍ය වලින් දුටුවෙමි.මේ අතර හිරු මාධ්‍ය ජාලයේ විකාශනය වූ විමල් වීරවංහ මහාතා සාභාගි වූ සළකුණ වැඩසටහනද අතුරුදහන් කෙරී ඇත.ඒ සිද්දියෙන්ම අපට දැන ගත හැක්කේ කාටද රිදුණේ කවුරුද වාරණයට පෙළඹුණේ යන්න පමණි. අනාගතයේ දී මෙවැනි වාරණයන් තවදුරටත් බලාපොරොත්තු විය හැකිය.

මතුගම සෙනෙවිරුවන්

මේ ගතවන්නේ පක්ෂ දේශපාලනයේ අවසාන සමය ද

 

                         

         ජනපතිවරණ සමය එළඹී ඇත.රටේ නායකයා තේරීම ට ජනතා රැළි ගොඩනන්වමින් තිබේ.ඉන් විශාලතම ව ඉහළට එසැවුණු රැල්ලෙන් නව ජනපතිවරයා පත් විය හැකිය.මේ රැළි බිහි කරනුයේ මුදල් යහමින් විසි කරමීනි.රැළි වලට එකතු වන ජනතාවට නිශ්චිත අරමුණක් ඇතැයි සිතිය හැකි නොවේ.රැළි බීහි කරන්නේ පක්ෂ විසින් බැවින් ඇතැම් විට පක්ෂයේ අරමුණ ජනතාවට ඇතැයි සිතිය හැකිය.නමුත් දැන් එයද වෙනස් වෙමින් පවතී.පොහොට්ටු පක්ෂ මානසිකත්වයේ සිටි බොහෝ පිරිසක් රනිල් ගේ බෝට්ටුවට එකතු වී සිටිති.පක්ෂයක් ගොඩ නැගෙනුයේ ප්‍රතිපත්ති සහ අරමුණු අනුව වුවද මෙතනදී ප්‍රතිපත්ති පසෙකින් තබා බලය පැවැත්ම සහ මුදල් වෙනුවෙන් එක පිළකට ‌ෙගානු වී සිටිති.

    1917 දී ලංකා ජාතික සංගමය පිහිටුවා ප්‍රතිසංස්කරණවාදී දේශපාලනයට නැඹුරු වූවද ලංකාවේ ප්‍රථම පක්ෂය වශයෙන් පිළිගනු ලබනුයේ 1935 දී බිහිවූ ලංකා සම සමාජ පක්ෂයයි.එවකට ඉන්දියාවේ බිහිවූ ස්වාධීනතා සහයෝගිතා ව්‍යාපරයෙන් ද රුසියාවේ ට්‍රොස්කි ප්‍රමුඛ සතරවන ජාත්‍යන්තරයේ ආශ්වාදයෙන් මෙරටට පැමිණි පිලිප් ගුණවර්ධන සහ කොල්වින් ආර්.ද සිල්වා වැනි විදෙස් ආයතන වල ඉගෙනුම ලැබූ විද්වතුන්ගේ නායකත්වයෙන්ද මේ පක්ෂය බිහි විය.1934 දී වැල්ලවත්ත රෙදිමෝල තුළ සිදු වූ වැඩ වර්ජනයට මූලිකත්වය දෙමින් වාත්තීය සමිති නායකයෙකු වූ ඒ.ඊ.ගුණසිංහ මහතාට අභීයෝගයක් එල්ල කිරීමට සමසමාජ නායකයන්ට හැකි විය.

    ලංකාවේ පක්ෂ දේශපලනයේ ආරම්භයේම ඇත්තේ විදෙස් අභාෂයෙන් ලැබූ ප්‍රතිපත්ති සහ අරමුණු බව මෙයින් පැහැදිලි වනු ඇත.1947 දී මුල්ම මැතිවරණයට ඉදිරිපත් වූ එක්සත් ජාතික පක්ෂය ට අයත් වූවෝ නම් මිනිරන් අරක්කු රේන්ද සහ රජයේ ඨානාන්තර සහ ඉඩම් හිමියන්ගෙන් සමන්විත ජන බල‌ෙව්ගයකි.ඒ පක්ෂය මෙහයවීමට  මුල් තැන් ගත් ඩී.එස්. මිනිරන් වෙළෙදාමෙන් ඉදිරියෙට පැමිණ අමද්‍යප ජාතික සටන මෙහය වූ එෆ්.ආර්. ‌ෙග් අනුප්‍රාප්තියා විය.විදෙස් අධ්‍යාපනය නිසාවෙන්ද බ්‍රිතාන්‍යයන් සමග කළ ගනුදෙනු නිසාවෙන් ද ඔවුන්ගේ පක්ෂ ප්‍රතිපත්ති සහ අරමුණු ද පෙළ ගැසුනේ ජාත්‍යන්තතර ප්‍රතිපත්තීන්ට අනුකූලවයි.අනතතුරුව බිහිවූ වාමාංශික පක්ෂ ද එ.ජා.ප. ය වනුවට ඉදිරියට පැමිණි ශ්‍රී ලංකා නිදහස් පක්ෂය ද මෙහයවූවන් බොහෝ පිරිසක් වි‌‌ෙදස් අධ්‍යාපනයෙන් පෝෂණය වී ඒ මත අදහන්නන් වූහ.

      1815 වසරේ ලංකාව ගිවිසුමකින් බ්‍රිතාන්‍යයන්ට රට පවා දුන් පසු 1818 දී සිදුවූ පරාජය නිසා ද 1848 අසාර්ථක කෑල්ල නිසාවෙන්ද ලංකාවට යටත් විජිතයක් බවට පත් වන්නට සිදු විය. මෙයට එරෙහිව පැන නැගුණු පානදුරාවාදය සහ අමද්‍යප ව්‍යාපාරය නියෝජනය කරන ලද්දේ මෙරට ග්‍රාමීය ප්‍රභූ පන්තියයි. අනගාරික ධර්මපාලයන් විසින් කුළු ගන්වනු ලැබූ මේ පිරිස ඔහුගේ අභාවයෙන් පසුව ක්‍රමානුකූලව යට කී පක්ෂ තුන මත ‌ෙගානු විය.මේ පක්ෂ විසින් වරින් වර රාජ්‍ය බලය ලබා ගනිමින් සිය පාක්ෂිකයන් සැනසීමට උත්සාහ දරා ඇත. අනගාරික ධර්මපාල තුමා අනුදත් මතවාදී ප්‍රවේශය ‌‌හෝ වසර දෙදහස් පන්සීයයක ඉතිහාසයෙන් ලැබුණු පන්නරය මේ පක්ෂ වලට ඇතුළත් කර ගන්නා ලද්දේ යම් කිසි පමණකින් හෝ සිරිමා බණ්ඩාරනායක යුගයේ දී පමණකි.‌නූතන යුගයේ තාක්ෂණික දියුණුව සංනිවේදන මාර්ග වල දියුණුව නිසා ඇති වූ ගෝලීය ප්‍රවණතා මීට හේතු වන්නට ඇති නමුත් දේශපාලන ප්‍රගමනයට හෝ සමාජ ප්‍රගමනයට මේ පක්ෂ කිසිසේත්ම උපයෝගී නොවීය.මූලික පක්ෂ තුන බිහි වීමෙන් පසු සෑම මැතිවරණ අවස්ථාවකදීම නව පක්ෂ බිහි වීම නිසා පුද්ගලවාදී කල්ලි කණ්ඩායම් වල ග්‍රහණයට දේශපාලනය නතු විය.නූතන ප්‍රජාතන්ත්‍රවාදී ධාරාව තුල මෙම පක්ෂ ක්‍රමය නිසිලෙස හැඩ ගස්වා ගැනීමටවත් සංවාදයක් ඇති නොවීම ඛෙදවාචකයකි.ඒ වෙනුවට විධායක ජනපති ක්‍රමයේ අඩුපාඩු පිළිබඳව සිදුවන නිරන්තර සාකච්ඡා වල ප්‍රතිඵලය වූයේ සියලු ප්‍රශ්ණ වලට මුල එම ක්‍රමයේ ආඥාදායකත්වයයි මතයක් සමාජය තුළ පැතිර වීමයි.

   මෙරට අතීත සමාජය කුල වශයෙන් බොදී සිටියහ.ගම්වසම් යටතේ ශිල්ප ශ්‍රේණි වලට සිය සේවා රාජකාරි ඉටු කිරීමට සිදු විය.ඒ සමාජ බෙඳීම රාජ්‍ය ඒකීයත්වයට සහ සමාජ ඒකාග්‍රතාවයට බාධාවක් නොවීය.සමාජයේ ජීවත් වූ කොයි තරාතිරමකම කණ්ඩායමක් හෝ අනෙක් ජන කොටස් සමග සමගියෙන් වීසීමට අවශ්‍ය සහිඳියාව බිහි කරන ලද්දේ බුදු දහම විසිනි. ‌බුදුදහමේ ඉගැන්වීම් පදනම් කරගෙන රජු විසින් නීති පනවන ලදහ. සතරවන මිහිඳු රජු කළ අනුරාධපුර ශිලා ‌ෙල්ඛනය මගින් ගම්වාසීන් බෙදා හදාගෙන ජීවත් විය යුතු යැයි ආඥා පනවා තිබුණි.වර්තමාන පක්ෂ දේශපාලනය තුල පෙර පැවතී කුල ක්‍රමය පදනම්ව සහ විවිධ ජන කොටස් පදනම්ව බෙදීම් වර්ධනය විය. පක්ෂයේ අනුගාමිකයන් විශ්වාස කරන ප්‍රතිපත්ති  වෙනත් කණ්ඩායමක් අනුගමනය නොකරන්නේ නම් එතැන ගැටීමක් වර්ධනය විය.වාමාංශික පක්ෂ වල පවතින මාක්ස්වාදී මූල ධර්මයන් තුළ හැඩ ගැ‌සෙන්නවුන් ඇතැම් විට සමාජ වෛරකක්කාරයන් බවට පත් විය. ඔවුහු ධනවාදයට එරෙහි වුවද යම් කිසි අවස්ථාවක දී තමන් වෙත ධනය එක් රැස් වූ විගස ධනවාදියෙකු බවට පත් විය.ඉඩම් හිමි ධනවතුන් සහ විවිධ ව්‍යාපාර පන්තීන් අනුගමනය කරන පක්ෂ තුල වර්නය වූයේ වංචනික බලාපොරොත්තු පුද්ගල කේන්ද්‍රීය බල ආධිපත්‍ය සහ තක්කඩි කමයි.මෙවැනි තත්වයක් යටතේ පක්ෂ සාමාජිකත්වය දරන මතය ද එයම විය. කොමිස් දේශපාලනය අල්ලස් ගැනීම් වෙළෙඳ පළ ක්‍රමයේ අයථා ගනුදෙනුතුල ඇති වූ තරඟය නිසා රටේ සාමයට විශාල බාධාක් ජනිත වී ඇත. ජාතියක් වශයෙන් රට දියුණට ගෙන යෑමට තිබුණ ප්‍රධාන බාධාව වශයෙන් මේ පක්ෂ දේහපාලනය හඳුනාගන්නට හැකි වනුයේ ඒ නිසාය.

     වසර අනූවකට ආසන්න කාලයක් තුල පක්ෂ විසින් රටේ බිහි කළ චින්තන දරිද්‍රතාවය සුළු පටු නොවේ.මේ වන විට ප්‍රධාන පක්ෂ සියල්ල යැ‌පෙනුයේ විදෙස් මුදල් වලිනි. මහා පරිමාණ රැස්වීම් පැවැත්වීමට එවැනි මුදල් ගලා යෑමක් නැතිව කළ නොහැකිය.පක්ෂ වල අනුගාමිකයන් ගේ රැළි බිහිවන්නේ මේ මුදල් පොම්ප කිරීමේ සීඝ්‍රතාවය අනුවයි.රටේ මුදල් වංචනික ලෙසට අත්පත් කර ගැනීම මුදල් විශුද්ධ කරණය පාතාල සමාජිකයන් විසින් ඩුබායි වැනි ආර්ථික කලාප වල පවත්වාගෙන යන මාෆියා ව්‍යාපාර ආදී බෝහෝ දේ වලින් රට ආපස්සට ගොස් තිබේ.එහි අවසාන ප්‍රතිඵලය නම් ස්වදේශීය දේශපාලකයන්ට රට කරවීමට හැකියාවක් නැතැයි යන ආකල්ප වර්ධන වීමයි.ඉන්දීය දේශපාලනය සහ ඇමරිකන් යටත් විජිත දේශපාලනය රටේ අරක්ගෙන තිබෙන්නේ මේ නිසාය.මෙවර ජනපතිවරණයේ දී වෙනසක් ඇති කරන්නේයැයි පාරම්බාන සියලුම පක්ෂ මේ ඛේදවාචකයට ගොදුරුවී අවසන්ය.ජනතාවට පක්ෂ ක්‍රමය තිත්ත වී ඇත.රනිල් වික්‍රමසිංහ මහතා ඒ අවිනිශ්චිත මානසික තත්වය සිය බල ‌දේශපාලනයට යොදා ගනිමින් සිටී.ප්‍රජාතන්ත්‍රවාදයේ සියළුම යහපාලන මූල ධර්මයන් උල්ලංඝණය කරමින් ඔහු යෙදී සිටින රංගනය කුමන විපතකින් ‌ෙකළවර වන්‌ෙන් දැයි කිසිවෙකුත් නොදනිති.වසර දෙදහස් පන්සීයක ඉතිහාසයක් ති‌බෙන ‌ෙප්‍රෟඩ ජාතියකට ‌ෙමවැනි අභාග්‍ය සම්පන්න කාල පරිඡේදයකට මුහුණ දීමට සිදු වීම සමකළ  හැක්කේ සීතාවක යුගයේ සිදුවූ සිදුවීම් වලට පමණකි.නමුත් මේ අවසානය නොවේ. බුදුදහ‌ෙම් චිර පැවැත්ම උදෙසා රට වෙනස් විය යුතුය. පක්ෂ දේශපාලනයද ඒ නිසාම අවසන් විය යුතුය.පක්ෂ වල අනුගාමිකයන් නොවී මේ පිළිබඳව සබුද්ධිකව කල්පනා කරන පිරිසක් රට තුළ බිහි විය යුතුය.

මතුගම සෙනෙවිරුවන්