පිවිසිය

ආයුබෝවන්!
තෙරුවන් සරණයි,

වරින් වර පුවත් පත් වල සහ වාර ප්‍රකාශනයන් හි පළ වූ මාගේ ලිපි සමුච්චය මෙම බ්ලොග් අඩවියෙහි ඇතුලත්ය. ඉතිහාසය පුරාවිද්‍යාව සිංහල ගොවිතැන වාස්තු විද්‍යාව වැනි විෂයන් අරභයා සංග්‍රහ කරන ලද මෙම ලිපි එක් තැනක ගොනු කොට තැබීමෙන් පාඨකයා හට පහසුවක් සැලසීම මෙහි අරමුණය. එයට අමතරව විවිධ කේෂ්ත්‍රයන් හි කරුණු ඇතුලත් නව ලිපි ද මෙයට එක් කරමි.
වසර දෙදහස් පන්සීයයකට වඩා එහා දිව යන ඉතිහාසයක් ඇති ජාතියක් වශයෙන් අපගේ පාරම්පරික උරුමයන් හි සුරැකියාව මුල් කොට මෙම සියලු ලිපි සම්පාදනය වේ. මෙහි අඩංගු කරුණු සහ පාරම්පරික දැනුම උපුටා ගැනීමට අවසර ඇත. එහෙත් එය ජාතියේ උන්නතිය වෙනුවෙන් පරිහරණය කරන්නේ නම් මාගේ ව්‍යායාමය සඵල වූවා වෙයි.
ඉතිහාසයේ ජාතිය හමුවේ පැවති අභියෝග රැසකි. ඒවා සියල්ලටම අප සාර්ථකව මුහුණ දුන්නෙමු. අද දින ද එය එසේ විය යුතුය. සිංහල බෞද්ධ සංස්කෘතියෙහි හරය මැනවින් වටහා ගෙන නැවතත් ඒ අභිමානවත් මහා සම්ප්‍රදාය තහවුරු කරලීමට සැවොම ‍එක්වෙමු.

Wednesday, November 15, 2017

ජාතිවාදී බලය බෙදීම ගැසට් කිරීම ඇරඹේ

                                 

         නව ව්‍යවස්ථාවක් පිළිබඳ යෝජනා තව වරක් යටපත් වී ඇත. පළාත් පාලන මැතිවරණයට දින නියම කරලීම නිසා  ව්‍යවස්ථා අතුරු වාර්තාව මදක් පැත්තක තබා තිබෙන බව දක්නට තිබේ.ලබන මාර්තු මාසයේ ජිනීවා මානව හිමිකම් සැසිවාරය නිමිති කොට එය නැවත වරක් කරළියට පැමිණීමට ඉඩ ඇත.කෙසේ වෙතත් යහපාලන රජයේ ඒකායන පරමාර්ථය කුමක් හෝ උප්පර වැට්ටියක් යොදා දෙමළ සහ මුස්ලිම් අන්තවාදීන් සැනසීමයි.ඒ සඳහා හොඳම උදාහරණය අඹගමුව ප්‍රාදේශීය සභා සීමාව තුනකට කැඩීමේ ගැසට්ටුව නිකුත් වීමෙන් පසු පෙන්නුම් කර තිබේ. පළාත් පාලන සභිකයන් සංස්ථාපනය කිරීමේ ගැසට් පත්‍රයට පළාත් සභා සහ පළාත් පාලන ඇමති ෆයිසර් මුස්තාපා මහතා  අත්සන් තබන ලද්දේ නොවැම්බර් මස 02 දිනදීය. එය දින දෙකක් තුළ මහජනතාවගේ දැන ගැනීම පිණිස මුද්‍රණයෙන් ප්‍රකාශයට පත් කළ හැකිය. යම් විරෝධතාවයක් තිබේ නම් නීතිමය ස්ථාවරයකට එවිට යා හැකිය.නමුත් ඇමතිවරයා විසින් අත්සන් කරන ලද මෙම ගැසට්ටුව අන්තර්ජාලයේ ප්‍රසිද්ධියට පත් කරන ලද්දේ දින නවයක් ඉකුත් වීමෙන් පසුවයි.එම ගැසට්ටුවේ අඹගමුව ප්‍රා දේශීය සභාව පිළිබඳ නිවේදනයත් තමන්කඩුව ප්‍රා දේශීය සභාව පිළිබඳ නිවේදනයත් අඩංගු නොවිණි. ඒ වෙනුවට එම කරුණු යොදා අංක 2043/57 නමින් තවත් අති විශේෂ ගැසට්ටුවක් නිකුත් කෙරී තිබේ.
         .1980 දී ගම් සභා අහෝසි කරලීමෙන් පසු පැවති පළමුවැනි පළාත් පාලන මැතිවරණයේ දී අඹගමුව ප්‍රාදේශීය සභා බල ප්‍ර දේශය නිර්ණය කෙරිණ. එහිදී පත් වූ මන්ත්‍රී සංඛ්‍යාව විසිඑකකි. එයින් 13 ක්ම දෙමළ මන්ත්‍රීවරුන් වෙති. එහෙත් පළාතේ වාසය කරන සිංහල ජනතාව එයට වෙනස් කමක් නොපා සාමයෙන් වාසය කළහ. මේ කාලයේ සිටම අලුතෙන් පුරවැසි බව ලැබූ දෙමළ ජනතාව වෙනුවෙන් වෙනමම පරිපාලන බල ප්‍ර දේශයන් ඇති කර ගැනීම සඳහා දෙමළ දේශපාලනඥයන් තර්ක කළහ. නමුත් එයට ඉඩ නොලැබුණි.ඒ මන්ත්‍රී ආසන 13ක් හිමිව තිබියදීය. 2013 සීමා නිර්ණ කටයුතු ආරම්භ කරලීමෙන් පසු නුවර එළි දිස්ත්‍රික් ලේකම් කාර්යාලයේ පවත්වන ලද සෑම රැස්වීමකදීම මෙම දෙමළ දේශපාලනඥයන් වෙනමම පරිපාලන ප්‍ර දේශ කඩා ගැනීමට  සටන් කළහ. එසේම තමන් ගේ කොට්ඨාශ යන් සඳහා දෙමළ නම් තබා ගැනීමටද අවසර ඉල්ලූහ. නමුත් මෙම කමිටු රැස්වීම් වලට සාභාගි වූ හිටපු  ප්‍රා දේශීය සභා මන්ත්‍රී හෙළප්‍රිය නන්දරාජා මහතා ඇතුළ අයගේ තර්ක හමුවේ මෙම ජාතිවාදී ඉල්ලීම්වලට ඉඩ නොලැබුණි.
       නමුත් සීමා නිර්ණ කටයුතු අවසන්ව එම ගැසට් පත්‍රය නිකුත් වීමෙන් පසුව මනෝගනේෂන් දිගම්බරන් වැන දේශපාලනඥයන්ද රවුෆ් හකීම් ෆයිසර් මුස්තාපා වැනි මුස්ලිම් දේශපාලඥයන් ගෙන් ද සමන් විත හමුවක් අගමැති ගේ ප්‍රධානත්වයෙන් රැස්වී නැවත එම ජාතිවාදී ඉල්ලීම් සාකච්ඡා කරනු ලැබිණ. එහිදී එම ජාතිවාදී ඉල්ලීම් වලට අනුමැතිය ලැබුණු අතර පළාත්සභා ඇමතිවරයාට තිබෙන බලතල ප්‍රකාරව 2017 නොවැම්බර් මස 02 දින මෙම බල ප්‍ර දේශය අඹගමුව නෝර්වුඩ් සහ මස්කෙළිය යනුවෙන් කොටස් තුනකටද නුවරඑළිය බල  ප්‍ර දේශය ආගරපතන කොටගල සහ නුවරඑළිය යනුවෙන් කොටස් තුනකටද බෙදා වෙන් කරන ලදී. මෙම කැඩීම තුළින් ඉස්මතු වන ජාතිවාදී බල තුලනය මෙසේ වෙයි.
        ශ්‍රී පාද රක්ෂිතයට ආසන්නයේ ම තිබෙන ග්‍රාම නිළධාරි කොටස සීතගඟුලයි.එය මස් කෙළියට කඩා ඇත.මස්කෙළි කොටසේ ග්‍රාම නිළධාරි වසම් 10 කි. තෝරා පත් කරගන්නා සභිකයන් සංඛ්‍යාවද 10 කී.එක් වසමකට එක් මන්ත්‍රී වරයෙකු බැගිනි.ලැයිස්තුවෙන් තවත් මන්ත්‍රී වරු 06 දෙනෙකි. මෙම ප්‍ර දේශයේ සිංහල ජනතාව පන් දහසක් පමණ දිවි ගෙවූවද ප්‍ර දේශය පුරාම විසිරී සිටින බැවින් ඔවුන් හට කිසිම නියෝජනයක් නොලැබේ. එහෙත් වතු ආශ්‍රීතව පොකුරු වශයෙන් දිවි ගෙවන දෙමළ ජනතාවට විශාල මන්ත්‍රීවරු පිරිසක් ලැබේ. ඒ පාරවල් හදන්නට ලයිට් දෙන්නට වැසිකිලි කැසිකිලි හදන්නටය. එහෙත් ඒවා දැනටමත් සම්පූර්ණ කර ඇත.  නෝර්වුඩ් කොටසේ ග්‍රාම නිළධාරි කොටස් 17 කි. තෝරා පත් කරගන්නා මන්ත්‍රීවරු 12 කි. ලැයිස්තුවෙන් 08 ක් හිමිවේ. මේ කොටසට හැටන් දිකඔය පෙදෙසින් ද ග්‍රාම නිළධාරි වසම් එක කර තිබෙන්නේ දෙමළ නියෝජනය වැඩිවන ආකාරයටයි. බහුතරයක් සිංහල ජනතාව ජීවත් වන අඹගමුව කොටසේ ග්‍රාම නිළධාරි වසම් 40 කි. තෝරා පත් කරගන්නා මන්ත්‍රී වරු 13 කි. ලැයිස්තුවෙන් 08 කි. මේ කොටසටද හැටන් දික්ඔය කොටසින් ග්‍රාම නිළධාරි වසම් කඩා දමා තිබේ.ඒ අඹගමුව බල ප්‍ර දේශයටද දෙමළ නියෝජනය ලැබ ගැන්මටයි. අතැම් ග්‍රාම සේවා වසම් කීපයක් එකතු කර එක් කොට්ඨාශයක් තනා ඇත. අඹගමුව ඓතිහාසික සෙල් ලිපිය පවතින සෙල් ලිපි වසම ද වෙනත් වසම් කීපයක්ද එක් කර එලෙස එක් මන්ත්‍රී කොටසක් ඇත කර තිබේ.ඒ සිංහල මන්ත්‍රී සංඛ්‍යාව තුනී වන ලෙසටය.
       නුවර එළි දිස්ත්‍රික් ලේකම් කාර්යාලයේ පැවති සීමා නිරණ කම්ටු රැස්වීම් වලදී අවධාරණය කළ එක් කාරණයක් නම් පැරණ ග්‍රාම වසම් වල නම් වෙනස් නොකරන ලෙසයි. මෙම ගැසට්ටුව මගින් පහළ ලෙච්චමී ඉහළ ලෙච්චමී තෙන්මදුරි යනුවෙන් මස් කෙළිය වසමේ සහ නෝර්වුඩ් කොටසේ කොට්ඨාශ වල නම් අළුතින් යොදා ඇත. මෙම වසම් කඩා ඇත්තේ   ජන ඝනත්වය අනුව වුවද භූගෝලීය විවිධත්වය ආගමික හා සංස්කෘතික විවිධත්වය ආදී අනෙකුත් නිර්ණායක නොසලකා හැර ඇත.
       නව සිය පණහ දශකය වන විට. නුවර එළි දිස්ත්‍රික්කයේ පරිපාලන ප්‍ර දේශ බවට( ආදායම් පාලක කොට්ඨාශ) පත්ව තිබුණේ උඩ හේවාහැට කොත්මලේ සහ වලපනේ වශයෙනි. අඹ ගමු ඇතුලත්ව තිබුණේ කොත්මලයටයි. පසුව ගම් සභා සීමා නිර්ණය කිරීමේදී අඹගමුව උතුර සහ අඹගමුව දකුණ වශයෙන්ද එය සළකුණු කර තිබේ.මේ කාලයේ මෙහි වතු වල සිටි දෙමළ ජනතාවට චන්ද බලය හිමිව නොතිබුණි. පුර වැසි කමද නැත. සිරිමා මැතිණිය සිරිමා ශාස්ත්‍රී ගිවිසුමෙන් වතු දෙමළ ජනතාවගෙන් ලක්ෂ පහක් පමණ ඉන්දියවට යැවීමට ගිවිස ගත්හ. නමුත් 1965 බලයට පත් වූ ඩඩ්ලි සේනානයක ආණ්ඩුව ඉතාමත් ජාතිවාදී ලෙස අනාගත දෙමළ චන්ද වලට තිබෙන ආශාව නිසා ඔවුන් ගෙන් වැඩි කොටසක් මෙහිම නවත්වා ගත්හ.මේ කාලයේ නුවර එළි මන්ත්‍රී වරයාව සිටි විලියම් ප්‍රනාන්දු මහතා ශාන්ති පුර ගාමීණී පුර ඇතුළු සිංහල ගම්මාන රාශියක් බිහිකරන ලද්දේය. ඒ උඩරට සිංහල ජනතාවට සිදුවූ ඓතිහාසික අසාධාරණය සමහන් කිරීමටයි. එහෙත් එතුමා සිංහල මෙන්ම දෙමළ ජනතාවටද සිය ගම්මාන ව්‍යාපෘතින් තුළ තැනක් දුන්හ. නමුත් 1970 දශකයෙන්  පසු මෙ තත්ත්වය වෙනස් විය නුවර එළිය ආසනය නුවර එළිය මස් කෙළිය බවට පත් විය. එක්සත් ජාතික පක්ෂ රජය දෙමළ වතු කම්කරුවන්ට දිව්රුම් පෙත්සමකින් චන්ද බලය ලබා දුන්හ. එයින් සිදු වූයේ නුවර එළි දිශාවේ සිංහල ජනගහනයේ චන්ද බලය යටපත් වීමයි.
         දැන් වර්තමාන යහපාලන රජය යටතේ නව කඳුකර ගම්මාන අමාත්‍යංශයක් ඇති කර තිබේ. එයින් දෙමළ වතු කම්කරුවන්ට පර්චර්ස් 07 ක් පමණ ප්‍රමාණයක් නිවසක් සාදා ගන්නට ලබා දෙනු ලැබේ. එහෙත් උඩරට සිංහල ජනතාවට සිදු වූ අසාධාරණ කම් සමහන් කරන්නට එකදු නිවාසයක් සෑදීමට එයින් අනුමත නොකෙරේ. ඒ වෙනුවට අද ඔවුන් ගේ උත්සාහය වී ඇත්තේ සෑම ග්‍රාම නිළධාරී කොට්ඨාශයකටම එක් මන්ත්‍රී වරයෙකු බැගින් පත් කරගෙන අනාගත මලයහ නාඩුවට පාර කැපිය හැකි දෙශපාලන බල තුලනයක් සාදා ගැනීමයි.එවිට දිගම්බරන් මනෝ ගනේෂන් වැනි දේශපාලනඥයන්ට කඩේ යන දේශපාලන හෙංචයියන් බිහි කර ගත හැකිය. අඹ ගමුව ප්‍රා දේශීය සභාව කොටස් තුනකට කැඩීමෙන් එහි පළමු පියවර ඇරඹේ. මෙම ප්‍රා දේශීය සභාවේ හිටපු සභාපති නගුලේස් මහතා සීත ගගුල සහ මරේ වසම් වල ආසන්නයේ දැනටමත් ඉඩම් මිළදී ගනිමින් සිටී. එසේම මීට කලකට ඉහත කොත් ඇල්ලන වසම ආසන්නයෙට කඩා වැටුණු  ගුවන් යානයේ සිටි මුස්ලිම් වන්දනා කරුවන් සඳහා සොහොන් කීපයක් දැනටමත් මේ වසමේ ඉඳි කර ඇත. මුස්ලිම් දේශපාලනඥන් ගේ බලාපොරෙත්තුව වන්නේ මෙම් වසම් වල තමන්ට රිසි බලයක් ගොඩනගා ගෙන පල්ලි ඇටවීමටයි.ශ්‍රී පාද රක්ෂිතය අවට ඉඩම් නව බෙදීම නිසා මස්කෙළිය ප්‍රා දේශීය සභාවට අයත් වේ. මාවුස්සා කැලේ සමන් දේවාලයද මස් කෙළියට කැඩී තිබේ.එසේම ශ්‍රී පාද මාර්ගයේ කැලිකසල බැහැර කිරීමද  කඩ බදු දීමද මින් පසු මෙම දේශපාලනඥයන් අතට පත් වනු ඇත. ඉදිරියේදී මස් කෙළිය සඳහා නව ප්‍රා දේශීය ලේකම් කාර්යාලයක් පවා ස්ථාපිත කරලීමට ඉඩ තිබේ.මේවා අනාගත සැලසුම්ය.

         ඉංග්‍රීසීන් ගේ තාඩන පීඩන වලට හසු වුණ සිංහලයන් සදා කල් අසරණය. ඔවුන්ට ඔවුන් ගේ නව පරම්පරාවට නව ඉඩමක් නව නිවසක් පිලබඳ බලාපොරෙත්තුව සිහිනයක් පමණි. ඒවා සියල්ල මේ යහපාලන රජයේ වසල ප්‍රතිපත්ති මත සුණ විසුණු ව යයි. අනාගත මලය නාඩු ව තුළ ඇවිලෙන ජාති වාදී ගැටුම් නිවන්නට මේ දේශපාලනඥයක් කිසිවකුත් ඉතිරි නොවුණු ඇත. ශ්‍රී පාදය පවා අන්‍යාගමිකයන් සතු වීමට පසුබිම සැකසෙනු යයි කීම හුදෙක් හිතළුවක් නොවේ.එදාට සුසුම් හෙළනු ඇත්තේ අපේ අනාගත දරු පරම්පරාවයි.


Saturday, November 4, 2017

යහපාලන රජය ජාතිවාදී චන්ද පොරොන්දුවක් ඉටු කරයි. ශ්‍රී පාද සමනොල අඹගමුවෙන් වෙන් කරයි.

                               

                  බුදුන් වහන්සේ ලංකාවට වැඩම කළ තෙවැනි ගමනේදී සුමන සමන් දෙවියන් ගේ ආරාධනයෙන් සමනොල කන්ද මස්තකයට පිවිස එහි තමන් වහන්සේ ගේ ශ්‍රී පාදය තැබූ බව ඓතිහාසික ජන ප්‍රවාදයන්හි මෙන්ම වංශකතා ප්‍රවෘත්ති වලද දැක්වෙයි.ශ්‍රී පාද මස්තකයට ළඟා වන මාර්ග නවයක් පමණ තිබේ. ඉන් ප්‍රධාන මර්ග දෙකින් එකක් රත්නපුර පළාබත්ගල හරහාද අනෙක හැටන් හරහාද වැටී ඇත. පළමු වන විජයබාහු රජු ශ්‍රී පාද නමස්කාරයට සිත් ඇතිව එහි ළඟා වීම නිමිති කොට පළාබත්ගල ශ්‍රී පාද මාර්ගයට යාබදව ගිලීමලේ විහාරස්ථානයේ ශිලා ලේඛනයක් කරවූහ.ගිලීමලය බඹරබොටුව ආදී ගම් ශ්‍රී පාදයට පූජා කළහ. එයට සමාන තවත් ලිපියක් ගිනිගත්හේන නගරයට ආසන්නයේ අඹගමුවේ සන්ක්ලයින් නමැති තේවත්තක පැරණි විශ්‍රාම ශාලාවක් ඉදිරිපස පිහිටුවා ඇත.මෙහි සඳහන් වන්නේ ශ්‍රී පාද ස්ථානයට කළ යුතු වත් පිලිවෙත්  මෙන්ම මගීන් උදෙසා දන්හල් පැවැත්වීම සඳහා පිදූ  ගම්වරයන් ගැනයි. උඳුවප් මස පොහෝ දිනයෙන් ආරම්භ වන ශ්‍රී පාද වන්දනා සමය අවසන් වන්නේ වෙසක් පොහොයෙනි. එම කාලය තුළ ශ්‍රී පාද රජ මාවත ලෙසින් සැලකෙන රත්නපුර මාර්ගයත් හැටන් මාර්ගයත් නඩත්තු කරනු ලබන්නේ එම පළත් වල ප්‍රා දේශිය ලේකම් කාර්යාල සහ ප්‍රා දේශිය සභා මගිනි. හැටන් මාර්ගයේ තිබෙන එකම ප්‍රා දේශී සභාව අඹගමුව ප්‍රා දේශීය සභාවයි.  
        මෙම සෙල් ලිපියට අනුව විල්බාව කෙල ගමුව තිනියගල සොරගොඩ ලියවළ බදුලු වනය කොටවැල්ල කලඟ වෙල මකුළුමුල අඹගමුව වැලිගම්පළ සහ උලපනය යන ගම්වල ගොඩ මඩ ඉඩම් වලින් ලැබෙන රාජ්‍ය භාගය නොහොත් බද්ද ශ්‍රී පාද ස්ථානයට පෙර රජ දවස් සිටන් පරිත්‍යාග කිරීමක් සිදුව තිබේ. පදලස් දා පිහිටි  සමනොළ කුලෙහි කම්නවාම් පුද සිතියම් වැට දලවනුවට හා මෙහි දා වන්දනට සිවු දෙසින් වැඩි මහ සඟුන් වහන්සෙ ට වටනා පිඬු පසයට හා සෙසු ද වන්දනට රැස්වන ආගත දුබ්බා ගතයනට දෙන දන්වැට ට හා රජරට මඟැ අගෙ පස්ගවුයෙකැ දන්හලක් බැගින් කරවා දානෝපකරණ ඇති කොට දනුදෙනු කොට යනුවෙන් සඳහන් වන්නේ එම ක්‍රියාවයි.වර්තමානය වන විට එවැනි ක්‍රම වේදයක් නැතත් අඹගමුව කුරුවිට සහ රත්නපුර ප්‍රා දේශීය සභා විසින් ශ්‍රී පාද මාර්ගයේ කඩ බදු දීම් වලින් ලැබෙන ආදායම යොදවනු ලබන්නේ මගින් ගේ ගමන් පහසුව සඳහා තනා ඇති අම්බලම් සහ මාර්ග නඩත්තු කිරීම පිණිසය.එම පරිපාලනය ඉංග්‍රීසීන් ගේ යුගයේදීද එලෙසම සිදුව ඇත. එම නිසා නුවර දිස්ත්‍රික්කයට අයත් උලපනය වැනි ගම්මාන අත් හැරණද අනෙක් සියළු ගම්මාන සමගින් අඹගමුව ප්‍රා දේශීය සභා බල ප්‍ර දේශය නිර්ණය ව තිබේ.එය මෙතෙක් පැවති රාජකාරි බල ප්‍ර දේශයයි .
         අඹ ගමුවට වර්තමානය වන විට ග්‍රාම නිළධාරී වසම් 67 ක් තිබේ.ගම්මාන 302 ක් තිබේ.කොට්ඨාශ තිස්පහකි.වතු 136 කි. මෙහි සමස්ත ජනගහනය 210000 කී.  එහි සිංහල 23% ක් දෙමළ 70% ක් සහ මුස්ලිම් 6% පමණ ජීවත් වේ. 1980 ට ප්‍රථම මෙම බල ප්‍රදේශ අඹගමුව උතුර ගම් සභාව සහ අඹගමුව දකුණ ගම් සභාව වශයෙන් කොටස් දෙකකට වෙන් කර තිබුණි. එකල සමස්ත බල ප්‍රදේශයම  පාරම්පරික සිංහල වැසියන් ගේ ගම්මානයන් කේන්ද්‍ර කොට ගෙන නියෝජනය වී තිබුණි. නමුත් 1987 දී ප්‍රාදේශීය සභා පණත සම්මත කරගත් පසු එයට සමගාමීව වතු දෙමළ ප්‍රජාවට පුර වැසි කම් ලැබුණි. එයින් සිදු වූයේ සමස්ත බල ප්‍රදෙශයේ නියෝජනයේ ප්‍රධාන පාලන බලතල දෙමළ ජනතාවට ලැබීමයි. 2011 පළාත් පාලන චන්ද විමසීමේ දී අඹගමුව ප්‍රා දේශීය සභාව නියෝජනය කරමින් සිංහල මන්ත්‍රී වරු හත් දෙනෙකු පත් වූ අතර දෙමළ මන්ත්‍රී වරුන් දහතුන් දෙනකු පත්ව එහි සභාපති ධූරයද වතු දෙමළ ප්‍රජාවට හිමව තිබුණි. නමුත් පාරම්පරික සිංහල වැසියන් ගේ සහනශීලිත්වය නිසා ගැටුම් නිර්මාණය නොවුණි. සාමාන්‍ය දෙමළ ජනතාවද සිය වතුවල පොකුරු ගම්මානයන් වශයෙන් සිටි අතර  සිංහල ගම්මාන සියල්ල විසිරුණු වසම් වශයෙන් තිබේ. මෙහි ප්‍රතිඵලය වූයේ සිංහල ගම්මානයන්හි යටිතල පහසුකම් දියණු කිරීමේදී වැඩි අවධානයක් යොමු නොවීමයි. දේශපාලනඥයන් චන්ද කාලයට ජනතාව රවටමින් ඇතැම් විට ජාතිවාදී  ලෙස කටයුතු කරමින් සිය බලය තහවුරු කරගත් අතර තොන්ඩමන් මුතු සිවලංගම් මෙන්ම වත්මන් වතු දෙමළ ප්‍රජාව නියෝජනය කරන දිගම්බරන් වැනි අය නිතරම උත්සාහ දරන ලද්දේ සිය වතු දෙමළ චන්ද පදනම් ආරක්ෂා කරගැනීමේ ක්‍රියා දාමයක නිරත වීමයි. ඔවුන්ගේ දැඩි ඉල්ලීම වූයේ මෙම අඹ ගමුව ප්‍රාදේශීය සභාව කොටස් තුනක් කඩා ගැනීමයි. ජේ.ආර්. ජයවර්ධන පාලන සමයේදී මෙන්ම අවසාන වශයන්ම මහින්ද රාජපක්ෂ යුගයේදීද එම ඉල්ලීම් නැවත නැවතත් ඉදිරිපත් විය . නමුත් එම ඉල්ලීම කිසිවිටකත් ඉටු නොවුණි.
           වත්මන් යහපාලන රජය පත් වීමේදී මහින්ද රාජපක්ෂ මහතා සහමුලින් පරාජය කරගැනීම අත්‍යවශ්‍ය විය. ඒ සඳහා ඔවුහු දෙමළ මුස්ලිම් දේශපාලනඥයන් සමග රහස් ගිවිසුම ඇති කර ගත්හ. අද සිංගප්පූර් සම්මුතිය වශයෙන් ඉදිරියට පැමිණෙන්නේ එයයි. දෙමළ ජාතික සංධානය සමග ඇති කරගත් ගිවිසුම ගැනද මැතිවරණ සමයේදී තිස්ස අත්තනායක මහතා හෙළි කර තිබුණි. කෙසේ වෙතත් වතු දෙමළ දේශපාලනඥයන්ට දුන් ප්‍රධාන පොරොන්දුවක් වූයේ අඹගමුව මෙන්ම නුවර එළියද නියෝජනය වන ප්‍රාදේශීය සභා  කොටස් හයකට කඩා ගැනීමයි. එසේම උඩරට වතු කරයේ දෙමළ ජනතාවට අවශ්‍ය යටිතල පහසුකම් සඳහා වෙනම ඒකකයක් පිහිටුවීමට ඔවුහු එකඟතා ඇති කර ගත්හ. ජනාධිපති වරණයෙන් පසුව 2016 මැතිවරණයේ දී මෙම පොරොන්දු ඉල්ලීම් වලට සහතිකයක් ලැබුණ අතර ඒ අනුව කඳුරට නව ගම්මාන අමාත්‍යංශයක් පිහිටුවන ලදහ. එසේම මෑතකදී එස්.බී. දිසානායක අමාත්‍යවරයා විසින් ඉදිරිපත් කරන ලද උඩරට  සංවර්ධන අධිකාරියේ සඳහන් වනුයේ උඩරට ඉඩම් වෙනත් අයට ලබා දීමේදී යථොක්ත අමාත්‍යංශයෙන් විමසිය යුත බවයි. මෑතක ඉදිරිපත් කරන ලද ව්‍යවස්ථා සම්පාදක මණ්ඩලයේ අතුරු වාර්තා වේ නිරීක්ෂණ තුළද කඳුරට දෙමළ ප්‍රජාව වෙනුවෙන් මලයහ නමින් වෙනම පාලන ඒකකයක් යෝජනා කර තිබේ.කෙසේ වෙතත් අඹගමුව ප්‍රාදේශීය සභා බල ප්‍රදේශය මස්කෙළිය නොර්වුඩ් සහ අඹ ගමුව යනුවෙන්  ද නුවර එළිය ප්‍රාදේශීය සභාව කොටගල නුවරඑළිය සහ ඩයගම යනුවෙන් ද වෙන් කරලීමට ගත් තීරණය තනිකරම දේශපාලන පොරොන්දුවක් බවට ඇමති ෆයිසර් මුස්තාපා මහතාද තහවුරු කර තිබේ. මෙවර එයට මූලිකත්වය නෙ කටයුතු කරන්නේ ජාතික භාෂා ඇමති මනෝගනේෂන් මහතාය.
           මෙම වෙන් කිරීම සඳහා වන ඉල්ලීම සිදු කරන අවස්ථාව වන විට පළාත් පාලන බල ප්‍රදේශ සීමා නිර්ණ ගැසට් පත්‍රය නිකුත් කර තිබුණි. නමුත් දෙමළ දේශපාලනඥයන් ගේ ඉල්ලීම මත යම් යම් සංශෝධන කර නැවත 2017 දී එය නිකුත් කෙරුණි. දැන් එම සීමා නිර්ණ කමිටුවද අවසන්ය. එහෙත් පසුගියදා පක්ෂ නාකයන් ගේ රැස්වීමක් කැඳවූ අගමැති රනිල් වික්‍රමසිංහ මහතා අඹගමුව බල ප්‍රදේශ තුනකට කැඩීමේ යෝජනාවට අනුමැතිය ගෙන ඇත. එහෙත් එම රැස්වීමට නුවර එළිය නියෝජනය කරන කිසිම සිංහල මන්ත්‍රී වරයෙකු සභාගගී වී නැත. මනෝගනේෂන් දිගම්බරන් රවුෆ් හකීම ෆයිසර් මුස්තාපා වැනි  මෙරට සුළු ජන වර්ග නියෝජනය කරන දේශපලනඥයන් පමණක් එයට සාභාගි වී තිබේ. අනතුරුව මෙම යෝජනාවට කැබිනට් අනුමැතියද ගෙන තිබෙන්නේ ශ්‍රී පාදය ජනාධිපතිවරයා යටතේ තිබෙන්නේ යැයි කියමිනි. එහෙත් මේ පළාතේ ඉඩම් සීඝ්‍රයෙන් අන්සතු වන්නේද රජයේ අනුදැනුමෙනි. විශේෂයෙන්ම මුස්ලිම් ව්‍යපාරිකයන් ශ්‍රී පාදය අවට ඉඩම් ගැන ඇස ගසා ගෙන සිටිති. ඔවුහු හෝටල් සංකීර්ණ හදන මුවාවෙන් මේ වන විටත් විශාල ඉඩම් ප්‍රමාණයක් මිලදී ගෙන තිබෙන්නේ ශ්‍රී පාද පාලනය බෞද්ධයන්ගෙන් පැහැර ගෙන තමන් යටතට පත් කර ගැනීමේ චේතනාවෙන් බව පැහැදිලියි.නමුත් අඹගමුව ප්‍රා දේශීය සභා සිංහල මන්ත්‍රීවරු මැදිහත්ව කීප වරක්ම මෙම වෑයම අහෝසි කරන්නට කටයුතු කර ඇත.අඹ ගමුව කොටස් තුනකට කඩන ගැසට්ටුව නිකුත් කළ පසුව ශ්‍රී පාදයේ අවසාන ගම් වසම වන සීත ගඟුල ( අංක 320 B) පාලනය වනු ඇත්තේ මස්කෙළිය ප්‍රදේශීය සභාවෙනි. එහි සමස්ත බලයම ජාතිවාදී පදනමින් (ජනගහනය පණස්දාහකට එක් බල ප්‍රදේශයක්) දෙමළ ජනතාවට අයත්ය එවිට ශ්‍රී පාද ස්ථානයට යනෙන ගමන් මාර්ගයත් තානායම් සහ වෙළෙඳ බලපත්‍රයන් සියල්ල පාලනය කරනු ලබනුයේ ඔවුන්ය. එවිට කුමක් සිදු වනු ඇත්දැයි ජනධිපතිවරයාට පවා දැක ගත හැකි වනුයේ පත්‍ර මාර්ගයෙනි.
        එදා ඉංග්‍රීසි පාලන සමයේ පවා අඹගමුව  ගම් සභාවට ශ්‍රී පාදය අත් කර දී තිබුණේ සෙල් ලිපියේ සඳහන් රාජ්‍ය භාරය මෙන්ම පුදපූජාවන්ද මේ පාරම්පරික සිංහල ගම් වලට අයත්ව තිබූ හෙයිනි.එය අන්සතු කිරීම මෙන්ම අවහිර කිරීමද බුද්ධ ශාසනය කෙළසීමකි. පැරණි රජ වරුන් පැනවූ ව්‍යවස්ථා උල්ලංඝණය කිරීමකි. මෙම නව සීමා නිර්ණයට අප විරුද්ධ විය යුත්තේ මූලික අයිතිවාසිම් කඩවීම ගැන පමණක් සිතා නොව එය සමස්ත ජාතියේම ජාතික අයිතිවාසිකම් කඩවීමක් සේ සලකමිනි.වයවස්ථා කඩදාසියේ අකුරු වෙනස් කරමින් කරන ජාතිවාදී බලය බෙදීම සම්පූර්ණ වනු ඇත්තේ   භූමිය තුළ සැබෑ ලෙසටම ජාතිවාදී ලෙසට කොටස් කැඩීමෙනි. එය අනාගත ජාතිවාදී ගැටුම් වලට නව ප්‍රවේශයක් වනු නියතය.


      

Tuesday, October 24, 2017

යූඑන්පී ව්‍යවස්ථා වාර්තාව ශ්‍රී ලංකා කාරයන්ට පිළිගන්න පුළුවන්ද

                  

          එක්සත් ජාතික පක්ෂයේ නායක රනිල් වික්‍රමසිංහ මහතා ව්‍යවස්ථා සම්පාදක මන්ඩලයේ මෙහෙයුම් කමිටු වල අදහස් ඇතුලත් සංක්ෂිප්ත අතුරු වාර්තාවක්  පාර්ලිමේන්තුවට ඉදිරිපත් කර ඇත. එම වාර්තාවට අමතර වශයෙන් ශ්‍රීලංකා නිදහස් පක්ෂය හෙළ උරුමය දෙමළ ජාතික සන්ධානය ඒකාබද්ධ විපක්ෂය ඇතුළු පක්ෂ කීපයකම අදහස් ද ඊට අමුණා තිබේ.එක්සත් ජාතික පක්ෂයේ අදහස් මෙම ඇමුණුමට ඇතුලත් කර නොමැති බැවින් අතුරු වාර්තාව මගින් පිළිබිඹු වන යෝජනා එක්සත් ජාතික පක්ෂයේ යෝජනා බව අපට පිළිගන්නට සිදුව තිබේ.ඒ අනුව බලන විට නව ව්‍යවස්ථාවක් සකස් කිරීම පිණිස උපයෝගී වන අවසාන වාර්තාවක් එළි දක්වා නොමැත. ජනාධිපති මෛත්‍රීපාල සිරිසේන මහතාද දීපවාලී උත්සව කතාවේදී පවසා තිබෙන්නේ තවමත් ව්‍යවස්ථා කෙටුම් පතක් පිළිබඳ අවසන් නිගමනයකට එළඹ නොමැති බවයි. නමුත් අගමැති වරයා ඉහතකී අතුරු වාර්තාව මෙම මස අවසානයේ දී පාර්ලිමේන්තුව තුළ විවාදයකට බඳුන් කිරීමට අදහස් කර තිබෙන බව ප්‍රකාශ කර ඇත.
    අගමැතිවරයාගේ අතුරු වාර්තාවෙහි අන්තර්ගතය සලකා බලන විට එම යෝජනා සියල්ලේ ඉලක්කය වන්නේ දෙමළ බෙදුම්වාදීන් වන දෙමළ ජාතික සන්ධානයට අවශ්‍ය වන උපරිම බලය බෙදා හැරීමක් ඇත කළ හැකි යෝජනා ඉදිරිපත්  කිරීමයි.උපරිම බලය බෙදීම යන්නෙන් අපට පැහැදිලිව ගම්‍යා වන්නේ 1987 දී ජේ.ආර්. ජයවර්ධන මහතා විසින් ගෙනා 13 වන ආණ්ඩුක්‍රම ව්‍යස්ථා යෝජනා තුළ තිබෙන නමුත් දැනට ක්‍රියාත්මක නොමැති පොලිස් හා ඉඩම් බලතල ඇතුළු පළාතකට අවශ්‍ය සවයං පාලන බලතල ලබා දීමට සූදානම් අවන ආකාරයයි.නිදසුනක් වශයෙන් ගතහොත් වර්තමාන ව්‍යවස්ථාවේ පස් වන වගන්තියේහි දැක්වෙන දිස්ත්‍රික්ක විසිහතර සහ දේශසීමා වෙනුවට පළාත් වල දේශ සීමා යන්න අන්තරුගත කිරීම දැක්විය හැකිය.විසිවන සංශෝධනය මගින් පළාත් සභා මැතිවරණය ජාතික මැතිවරණයක් ලෙසට අසම්මත ලෙසට සම්මත කරගන්නේ ඉදිරියේදී ස්ථාපිත කළ යුතු(උතුරුනැගෙනහිර) පළාතට අනන්‍යතාවයක් ලබා දීමටයි.එවැනි පළාතක් ව්‍යවස්ථාවෙන් බහි වුණහොත් එම පළාත තුළ වසන ජනතාවගේ කැමැත්ත ( පළාත් සභා මැතිවරණයකින් ) විමසා ශ්‍රී ලංකාවෙන් වෙන් විය හැකි ප්‍රතිපාදන සකස් කර ගත හැකිය.
       නමුත් ජනාධිපතිවරයා නායකත්වය සපයන ශ්‍රී ලංකා නිදහස් පකෂය සිය යෝජනා මගින් දක්වන්නේ එවැනි බලතල බෙදීමකට ඔවුහු එකඟ නොවන බවයි.ඔවුහු වත්මන් ආණ්ඩුක්‍රම ව්‍යවස්ථාවේ 1 සිට නව වන ව්‍යවස්ථාව දක්වා කිසිම සංශෝධනයක්( ජාතික ගීය ඇරුණු කොට) අපේක්ෂා නොකරති.එයින් කියැවෙන්නේ13 වන ආණ්ඩුක්‍රම ව්‍යවස්ථාව ක්‍රියාත්මක කිරීමේදී ජේ.ආර්. විසින් පැනවූ සීමා කිරීම් එලෙසම පවත්වාගෙන යායුතු බවයි. නමුත් ඔවුහු එම අන්තයේ සිට නැවතත් එ.ජා.ප. අතුරු වාර්තාවට එකඟ වෙමින් පළාත යන්න බලය බෙදා හැරීමේ ඒකකය ලෙස පිළිගනී. එලෙසම ඉඩම් හා පොලිස් බලතල සම්බන්ධයෙන් පළාතකට සැලැස්වෙන බලතල ගැන ලිහිල් අදහස් පල කරමින් එකඟ වෙමින් ලියා දක්වා ඇත.කෙසේ වෙතත් ඔවුහු සමස්ත වශයෙන් 13 වන ආණ්ඩුක්‍රම ව්‍යවස්ථාව තුළ පමණක් කටයුතු කළ යුතු බවට අදහස් ප්‍රකාශ කර තිබේ.
        රජයේ පාර්ශව කරුවෙකු වන ජාතික හෙළ උරුමයද එම මගම ගනිමින් සිය අදහස් දක්වා තිබ්.ඔවුහු ශ්‍රී ලංකා නිදහස් පක්ෂයට වඩා ස්වාධින ව අදහස් පළ කරමින් සිය නිරීක්ෂණ ඉදිරිපත් කර තිබෙන්නේ යූඑන්පී වාර්තාව පොඩි පට්ටම් කරමිනි. අනුපූරකතාවය පිළිබඳ අදහස් පළ කිරීමේ දී වාර්තාවේ පැණ නගින කරුණුත්  සැබෑ අනුපූරකතාවය අතරත් පරස්පරයක් ඇති බවට දක්වා තිබෙන අදහසින් ඒ පිළිබඳ ගම්‍යා වේ.මේ තත්ත්වය මෙසේ වුවද පසුගිය සැතැම්බර් 20 දින පාර්ලිමේන්තුවට ඉදිරිපත් කරන ලද විසිවන සංශෝධන පණත තුළින් කාන්තා නියෝජනය සහතික කරන අතර තුර වත්මන් ව්‍යස්ථාවේ 4වන වගන්තිය සංශෝධනය කරලීමට ඔවුහු එකඟතාවය පළ කර තිබේ.එනම් පළාත් සභා මැතිවරණය ජාතික මැතිවරනයක් දක්වා ඔසවා තැබීමට කරන ලද අතිරේක සංශෝධනයයි.එයින් ගම්‍ය වනුයේ ශ්‍රීලංකා නිදහස් පකෂයද නොමග යවමින් අගමැතිවරයා විසින් සිය මතයට ඔවුන් නම්මවා ගෙන ඇති ආකාරයයි. පාඨලී චම්පික රණවක අමාත්‍ය වරයාද සිය නිරීකණ මගින් ස්වාධිනව අදහස පළ කර ඇති නමුදු ඔහුද අගමැතිවරයාගේ උගුලේ පැටලී විස්සට ඡන්දය භාවිතා කොට තිබේ.
       ව්‍යවස්ථාවක් අනවශ්‍ය බව පවසන පිරිස ඊට විකල්ප ඉදිරිපත් කළ යුතු බව ජනාධිපතිවරයා පවසයි. විකල්ප ඉදිරිපත් කරලීමට නම් ප්‍රශ්ණයක් තිබිය යුතුය. මෙරට දෙමළ ජනතාවට අනන්‍ය වූ වෙනමම ප්‍රශ්ණ නැති බව තර්කානුකූල ලෙස ඔප්පු කර අවසන්ය.සාමාන්‍ය දෙමළ ජනතාවටඅවශ්‍ය වන්නේ රටේ අනෙක් මිනිසුන් මෙන් දිවි ගෙවන්නටයි. නමුත් විදෙස් මුදල් වලින් යැපෙන රාජ්‍ය නොවන සංවිධාන සහ දෙමළ දේශපාලනඥයන් ඊට ඉඩ නොතබති. උතුර සහ නැගෙනහිර ඒකාබද්ධ කොට වෙනම කලාපයක් නිර්මාණය කොට ඒ සඳහා ස්වයං පරිපාලන බලතල ස්ථාපිත කර ගැනීම මේ අන්තවාදී පිරිසගේ අභිලාශයයි. එලෙස වෙනම කලාපයක් දෙන්නට තරම් ඔවුනට තිබෙන අයිතිය කුමක්දැයි සෘජුව ඇසුවහොත් කිසිවකුට දෙන්නට පිළිතුරක් නැත. දෙමළ නිජබිම් සංකල්පය නමැති ව්‍යාජ ඉතිහාසයක් පෙන්වා විදෙස් බලවතුන් මුලා කිරීමෙන් හෝ වසර තිහක් තිස්සේ කොටුව සිටි සාමාන්‍ය මිනිසුන් ඇන්දවීමෙන් පලක් නැත. ප්‍රශ්නය වන්නේ දකුණේ ජීවත් ව සිංහල දේශපාලනඥයන් බහුතරයක්ද මෙම මිථ්‍යා මතවල එල්බ ගෙන සිටීමයි. පසුගියදා වවුනියාවේ සංචාරයක නියුතු අගමැති රනිල් වික්‍රමසිංහ මහතාද ප්‍රකාශ කර තිබුණේ වවුනියාව ඇතුළු උතුර දෙමළ රජවරුන්ද පාලනය කොට ඇති බවයි.නමුත් ඒ කුමන දෙමළ රජු දැයි පෙන්වා දෙන්නට ඔහු අසමත්ය.ජනාධිපතිවරයා ප්‍රශ්නයට විසඳුමක් සෙන්නට යැයි කියන්නේ ඔහුද මේ මිථ්‍යාවේ පැටලී  සිටින බැවිනි.
          කෙසේ වෙතත් ශ්‍රීලංකා නිදහස් පක්ෂය රටේ ඒකීය බවට හෝ බුද්ධාගමට තිබෙන තැන අහිමි කරලීමට අකමැතිය.ඔවුහු  බලය බෙදීමේ ඒකකය ලෙස පළාත පිළිගන්නේ  රනිල් වික්‍රමසිංහ මහතාගේ වැරදි මග පෙන්වීම මධ්‍යයේ බව පැහැදිලිය. ඒ නිසා කළ යුතු වන්නේ සියළුම දේශපාලන පක්ෂ වල නිරීක්ෂණ අනුව අවසන් අතුරු වාර්තාවක් ඇති කරලීමයි. ඒ සඳහා නැවත මෙහෙයුම් කමිටුව රැස්වී තීරණය ගත යුතුය. එසේ නැතහොත් දැනට තිබෙන වාර්තාව පාර්ලිමේන්තුව තුළ විවාදයට ගැනීම  යනු අනෙක් පක්ෂ වල මතය නොසලකා හැරීමකි.මේ පිළිබඳව ශ්‍රී ලංකා නිදහස් පක්ෂයේ නිමල් සිරිපාල ඇමතිවරයා මෙන්ම පාඨලී චම්පිත ඇමතිවරයාද අගමැතිවරයා ගෙන් සෘජුව ප්‍රශ්ණ කළ යුතුය.සැප්තැම්බර් 30 වනදා කිරීමට යෝජිත විවාදය සදාචාරවත් නොවන බව පෙන්වා දිය යුතුය.ඒකාබද්ධ විපක්ෂය නියෝජනය කරන දිනේශ් ගුණවර්ධන මහතාගෙන්ද අපි එවැනි ප්‍රකාශයක් බලාපොරොත්තු වෙමු.      කොහොමටත් නව ව්‍යවස්ථාවක් අවශ්‍ය යයි ශ්‍රී ලංකා නිදහස් පක්ෂය මැතිවරණ පොරොන්දුවක් දී නොමැත. සියළුම පක්ෂ එකඟ වූ මතය නම් මැතිවරණ ක්‍රමය වෙනස් කරලීමයි. එය විකෘති ලෙසට වෙනස් කොට විසිවන සංශෝධනය නමින් පළාත් සභා මැතිවරණය ජාතික මැතිවරණයක් තැනට ඇද දමා ඇත්තේ එක්සත් ජාතික පක්ෂයේ කපටි උපාය මගිනි. එම නිසා මහා නායක ස්වාමීන් වහන්සේලා ගේ මතයට එක්කෝ ගරු කළ යුතුය. මේ අවස්ථාවේ දී රටේ දුගීභාවය නැති කොට ණය බරින් නිදහස් කරලීමට කටයුතු කරනවා හැරෙන්නට පවතිනා රජයකට කළ හැකි විශේෂ දෙයක් නැත. යුද්ධය දැන් අහවරය. යුධ අපරාධ සොයා බැලීමෙන් වත් සත්‍ය සෙවීමෙන්වත් අබමල් රෙණුවක් තරමින් රටේ සංවර්ධනයට ඉදිරිගමනට ප්‍රයෝජනයක් නැත. මේ බැව් ජාතික ආණ්ඩු උගුලේ සිරවී සිටින ශ්‍රී ලංකා කාරයන් දැන ගත යුතුය.


         

Friday, October 13, 2017

ව්‍යවස්ථා සර්පයා එළියට පනී- ඒකාබද්ධය නයි නටවයි

                             
             නව ආණ්ඩුක්‍රම ව්‍යවස්ථාවක් සෑදීම සම්බන්ධව මහජන අදහස් විමසීමේදී එයට සාක්ෂි ලබා දී තිබෙන්නේ හාරදහසකටත් අඩු සංඛ්‍යාවකි.එයිනුත් උතුරේ සහ නැගෙනහිර රාජ්‍ය නොවන සංවිධාන වලින් ලබා ගත් නියෝජනය අති මහත්ය. ඔවුහු සංවිධානාත්මකව තමන් දරන ජාතිවාදී අදහස් එම කමිටුවට ඉදිරිපත් කර තිබේ. නමුත් මේ රටේ බහුතරයක් වන සිංහල ජනතාව නියෝජනය කරන සංවිධාන වලින් හෝ අස්ගිරි මල්වතු සංඝ සභාවෙන් හෝ අදහස් ලබා ගැනීමට මෙම කමිටුව අසමත්ව තිබුණි. ඉන්පසු මෙම කමිටු වාර්තාවත් ව්‍යවස්ථාදායක මණ්ඩලයන්හි අතුරු වාර්තාවනුත් සැලකිල්ලට ගෙන අග්‍රාමාත්‍ය වරයා සැප්තැම්බර් මාසයේදී අවසාන අතුරු වාර්තාවක් පාර්ලිමේන්තුවට ඉදිරිපත් කරන්නට යෙදුණි .එම කෙටුම්පත ට අමුණා පාර්ලිමේන්තුව නියෝජනය කරන  ශ්‍රී ලංකා නිදහස් පක්ෂය දෙමළ ජාතික සංධානය ජනතා විමුක්ති පෙරමුණ ජාතික හෙළ උරුමය වැනි පක්ෂ මගින් ව්‍යවස්ථාව සඳහා ඉදිරිපත් කරන ලද යෝජනාවන්ද දක්වා තිබේ. නමුත් එක්සත් ජාතික පක්ෂයේ ස්ථාවරය දක්වා නැත.එහෙත් අපට පිළිගත හැකි වන්නේ අතුරු වාර්තාව මගින් පිළිබිඹු වන්නේ එම පක්ෂයේ අදහස් බවයි. එම වාර්තාව තුළ යටකී පක්ෂ  බහුතරයක අදහස් සහ යෝජනා අන්තර්ගතව නොමැත. එසේ තිබියදීත් අගමැතිවරයා රට පුරා පැවති රැස්වීම් වලදී මෙන්ම මල්වතු මහානායක හිමියන් අභිමුවේදීද කියා ඇත්තේ මෙම අතුරු වාර්තාව අනෙකුත් සියළු පක්ෂ වල එකඟතාවය මත සකස් කොට ඇති බවයි.මෙම ප්‍රකාශය පට්ටපල් බොරුවකි.
          මෙම අතුරු වාර්තාව එළියට දමන දිනයට ප්‍රථම දිනයේ පළාත් සභා  මැතිවරණය සම්බන්ධව විසිවන සංශෝධනය පාර්ලිමේන්තුවේ දී  සම්මත කර ගත්හ. මෙම විසිවන සංශෝධනය යනුවෙන් වූ අංක 195 සහ 204 යනුවෙන් පණත් දෙකක් පාර්ලිමේන්තුව තුළ තිබූ බව පැවසෙයි. අවසානයේ ජූලි මාසයේ ඉදිරපත් කරන ලද කාන්තා නියෝජනය සම්බන්ධ පණත මූලික කරගෙන එම අරමුණු ද පෙරදැරිකර ගෙන  යටකී පණත් දෙක තුළ පැවති අදහස් සහ අමතරව තවත් කරුණ 33 ක්ද අන්තර්ගතව මෙම පණත සම්මත කර ගෙන තිබේ. මෙම අරුම පුදුම හයිබ්‍රිඩ් පණතේ මූලිකව කරුණු දෙකක් ඉස්මතු කර ඇත. එකක් නම් පළාත් සභා මැතිවරණය එකම දිනයකදී පැවැත්වීමට දැක්වූ ප්‍රතිපාදනයයි. අනෙක නම් ඉදිරිමැතිවරණයකදී කොට්ඨාශ ක්‍රමයට සියයට පණහක්ද සමානුපාතික ක්‍රමයට සියයට පණහක්ද වශයෙන් ජනතා නියෝජිතයන් පත් කර ගත යුතු බවයි. මීට කලින් පක්ෂ නායකයන්ගේ සම්මේලනයේ දී එකඟව තිබෙන්නේ සියයට හැටක් කොට්ඨාශ ක්‍රමයටත් සියයට හතළිහක් සමානුපාතික ක්‍රමයටත් යන පදනමයි. එහෙත් යටකී පණත එනම් කාන්තා නියොජනය වැඩි කිරීමේ අරමුණ පෙරදැරි කොටගෙන ඊට කිසිසේත්ම අදාළ නෙවන පළාත් සභා මැතිවරණ සංශෝධනයක් ගෙනවුත් ඇත. පාර්ලිමේන්තු සම්ප්‍රදාය තුළ කාරක සභා අවසථාවකදී සිදු නොකරන සංශෝධන රැසක් ගෙනවුත් ජනතාවගෙන් වසන් කරන ලද ලියවිල්ලක් ලෙසට එය හොර පාරෙන්ම සම්මත කර ගෙන ඇත.
        මෙම ලියවිල්ලෙන් සිදුවන්නේ කුමක්ද.මෙය තමන්ගේ මූලික අයිතිවාසිකම් කඩවීමක් සේ සලකා මේවන විටත් හිටපු අග විනිසුරු සරත් නන්ද සිල්වා මහතා නඩු පවර තිබේ. එයට සහායට නීතිඥ කළ්‍යානන්ද තිරාණගම මහතාද නඩුවට එක්ව තිබේ. මේ නඩුවට විරුද්ධව මේ වන විට ප්‍රති විරෝධතාවයක්ද  සුමන්තිරන් මන්ත්‍රී වරයා මෙන්ම නීතීඥ වැලිඅමුණ මහතා විසින් ද ඉදිරිපත් කර  තිබේ. එයට පදනම්ව තිබෙන්නේ ජනතා පරමාධිපත්‍ය  භුක්ති විඳිමීට තමන්ට ඇති අයිතිය පිළිගන්නා ලෙසටයි.
         මේ ජනතා පරමාධිපත්‍ය යනු කුමක්ද 1978 ආණ්ඩු ක්‍රම ව්‍යවස්ථාවේ තෙවන වගන්තිය මගින් කියැවෙන්නේ  ශ්‍රී ලංකා ජනරජයේ පරමාධිපත්‍ය  ජනතාව කෙරෙහි පිහිටා ඇත්තේය.පරමාධිපත්‍ය අත්හළනොහැක්කේය.පරමාධිපත්‍යයට පාලන බලතල මූලික අයිතිවාසිකම් සහ චන්ද බලය ද ඇතුලත් වන්නේය. මෙම ජනතා පරමාධිපත්‍ය ඊළට හතරවන වගන්තියෙන්ද අර්ථ දක්වා තිබේ. එහි (ඉ) කොටසේ එය සඳහන් වන්නේ මෙසේය.
 (ඉ) අටලොස් විය සම්පූර්ණ කර ඇත්තා වූ ද මෙහි මින්මතු විධිවිධාන සලස්වා ඇති පරිදි ඡන්ද හිමියකු වීමට සුදුසුකම් ලැබ තමාගේ නම ඡන්ද හිමි නාම ලේඛනයේ ඇතුලත් කරනු ලැබ සිටින සෑම පුර වැසියෙකු විසින්ම ජනරජයේ ජනාධිපතිවරයා තෝරා පත් කිරීමේ ඡන්ද විමසීමේදී ද පාර්ලිමේන්තු මන්ත්‍රීවරයන් තෝරා පත් කිරීමේ මැතිවරණයේදීද ජනමත විචාරණයකදීද ඡන්ද බලය ක්‍රියාත්මක කළ හැකි විය යුතු වන්නේය.මෙයින් කියැවෙන්නේ කුමක්ද ජනාධිපතිවරණය මහ මැතිවරණය සහ ජනමත විචාරණය මගින් ජනතා පරමාධිපත්‍ය ක්‍රියාත්මක වන බවයි. මෙය වෙනස් කිරීමට නම් සැබවින්ම ජනතා කැමැත්ත අවශ්‍ය වේ.
      1987 දී දහතුන් වන ආණ්ඩුක්‍රම ව්‍යවස්ථාව පාර්ලිමෙන්තුවේදී සම්මත කර ගන්නා කල්හි එය ජනමත විචාරණයකින් සම්මත වූයේ නැත. ඒ වෙනුවට තුනෙන් දෙකේ බලයෙන් ජනතා කැමැත්ත නොවිමසාම සම්මත කර ගන්නා ලදී. එවිට පළත් සභා පැවැත්වීම යම් ප්‍රමාණයකින් නීති විරෝධී වන්නා සේම එම මැතිවරණයද ජනතා පරමාධිපත්‍ය පිළිබිඹු නොකරන හෙයින් ජාතික මැතිවරණයක් බවට පත් නොවේ. නමුත් රජය හොර පරෙන් ගෙනා පණතක් මගින් සම්මත කර ගෙන ඇත්තේ පළාත් සභා මැතිවරණයත් ජාතික මැතිවරණයක තත්ත්වයට දමමින්ය. මෙම ක්‍රියාව නීති විරෙධී වනවා සේම අනාගතයේ ඇති කරන්නට යන දෙමළ පාලන ඒකකයට අවශ්‍ය පදනම දමා ගැනීමද එයින් සිදු වේ. සුමන්තිරන් මහතා සරත් නන්ද සිල්වා මහතාගේ නඩුවට ප්‍රතිවිරෝධතා ඉදිරිපත් කරමින් තර්ක කරන්නට උත්සාහ දරන්නේ පළාත් සභා මැතිවරණය ජනතා පරමාධිපත්‍ය ක්‍රියාත්මක කිරීමද භුත්තිවිඳීමද සහතික කරන බැවින්  එය නීති ගත කරන ලෙසටයි. රට බෙදන ව්‍යවස්ථා සර්පයන් දැන් මල්ලෙන් එළියට පනින්නට පටන් ගෙන තිබේ.
         ප්‍රභාකරන් ඇතුළු කොටි සංවිධානය රජයට එරෙහිව යුද්ධයක් දියත් කරන ලද්දේ ඔවුන් බලාපොරොත්තු වන ඊලාම් දේශය උතුරු නැගෙනහිර පළාත් වල පිහිටුවීම පිණිසයි. ඒ සඳහා උතුරේ සිටි සිංහල ජනතාව පළවා හරින ලදහ.සිංහලයන් ජීවත් වූ භුක්ති විඳින ලද ඉඩම් පන්සල් පාසල් සියල්ල ඔවුන් ගේ කොටි මහවිරු පවුල්වලට පවරා දී ඇත. යුද්ධය අවසන් වූ පසු මේ තත්ත්වය තවත් සීඝ්‍ර විය. නැගෙනහරි ප්‍ර දේශයේ සිංහලයන් සතු ඉඩකඩම් වලට ව්‍යාජ ඔප්පු තිරප්පු සාදන ලදී. අවතැන් වූවන් නැවත පදිංචි කිරීම සඳහා පිහිටුවන ලද ජනාධිපති කාර්ය සාධක බලකාය සිංහලයන් උදෙසා සිය යුතුකම ඉටු කරන ලද්දේ ඉතාමත් මන්දගාමීවයි. වවුනියාව දකුණේ සිංහල ගම්මාන පහක් සෑදුවද අවශ්‍ය ඔප්පු තිරප්පු ලබා දීමද ඡන්ද බලය ගබා දීමද ප්‍රමාද කරන ලදී. අවසානයේ 2013 -14 සීමා නිර්ණය යටතේ මේ ගම්මාන සියල්ල නොයෙකුත් ප්‍රා දේශීය ලේකම් කොට්ඨාශ  සහ දිස්ත්‍රිකයන්ට කඩා උතුරට අවශ්‍ය නියෝජනය දුර්වල කොට ඇත.මේ අතර මරිච්චකට්ටුව ආශ්‍රිතව කැලය කපමින් මරක්කලයන් මෙන්ම විදේශ වලින් ගෙනා සරණාගතයන්ද පදිංචි කිරීමට බද්යුදීන් ඇමතිවරයාට ඉඩ දුන්හ. අද එහි රජයේ අවසරයකින් තොරව අරාබිකාරයන් බැස ආධාර ලබා දෙමින් මරක්කල කලාපයක් නිර්මාණය කරමින් තිබේ. උතුරේ මහ ඇමතිවරයාට බලය ලබා ගන්නට මග පාදා දුන්නේ ගිය රජයයි. දැන් ඔහු ජාතිවාදීව සිය පළාත් සභාව තුළ සිංහල ජනතාවට විරුද්ධව නෙයෙකුත් පණත් සම්මත කරගනිමින් ඇත. උතුරේ බුදු පිළිම ඉවත් කිරීම හමුදා කඳුවරු ඉවත් කිරීම ඒ සියල්ල සිදු කිරීමට පසුබිම සැකසෙමින් ඇත.රනිල් වික්‍රමසිංහ මහතා බලයට පත් වූ පසු ගිය රජය පැවති කාලයේ ඉතා සෙමන් සිදු වූ ඇතැම් දෙමළ ජාතිවාදී ක්‍රියා මෙන්ම මුස්ලිම් අන්තවාදී ක්‍රියා උත්සන්න විය.මේ දෙපිරිසට භූමිය තුළ සිංහලයන් ගෙන් තොරව හිතුවක් කරගන්නට ඉඩ දෙමින් ඇත. දැන් අවශ්‍යව ඇත්තේ බලය බෙදා ගැනීමේ ව්‍යවස්ථා කරදාසියට මුද්‍රා තැබීම පමණකි.
           පාර්ලිමේන්තුව තුළ තුනෙන් දෙකේ ඡන්දයෙන් ව්‍යවස්ථා කෙටුම්පත සම්මත කර ගැනීමද ජනමත විචාරණයකින් දිනීමද ලෙහෙසි පහසු නොවන බව ආණ්ඩුව දනී. එයට පෙර 13 වන ආණ්ඩුක්‍රම ව්‍යවස්ථාව පරිදි ප්‍රධාන රජයට තිබෙන සබඳකම් එකින් එක ඉවත් කිරීම  උපක්‍රමයක් ලෙසට ක්‍රියාත්මක වෙමින් තිබේ.එනම් මධ්‍යම ආණ්ඩුවේ පාර්ලිමේන්තුවක් සහ උතුරේ තවත් පාර්ලිමේන්තුවක් බිහි කිරීමේ ව්‍යවස්ථා ප්‍රතිපාදනයයි. කොළඹ අගමැති සහ උතුරේ මහ ඇමති අතර බලය බෙදා ගැනීම යන තැනට සිංහල ජනතාව දක්කා ගෙන යෑම මේ අනුව සිදු වෙමින් පවතී. එවිට උතුරේ  සහ නැගෙනහිර බුද්ධ ශාසානයට ප්‍රමුඛ තැන ලැබෙන්නේ නැත.
         විසිවන සංශෝධනය නීති විරෝධීව සම්මත කරන කල ඊට විරුද්ධව පාර්ලිමේන්තුව තුළ අරගල නොකරන ඒකාබද්ධ විපක්ෂය උතුරේ ජනතාව දිනා ගැනීම නලා පිඹී.ව්‍යවස්ථා සම්පාදක මණ්ඩලයෙන් ඉවත් නොවන ඔවුන් දිනෙන් දින රනිල් වික්‍රමසිංහ සහ සුමන්තිරන් ලාගේ උතුලට හසු වෙමින් ඇත.ඊළඟට අතුරු වාර්තාව පාර්ලිමේන්තුව තුළ විවාදයට ගන්නේ ඡන්ද විමසීමකින් තොරවයි. ඉන්පසු අමාත්‍ය මණ්ඩලයේදී එය සම්මත කර ගනු ඇත.එවිට ඒකාබද්ධ විපක්ෂය ව්‍යවස්ථාවට සුජාත බව දී අහවරය. ඔවුන් කවදත් තේරුම් නොගත් එක් දෙයක් නම් ලංකාවේ සිංහල දේශ ප්‍රේමීන් නොමැති තැන ජයග්‍රහණයක් නොලද හැකි බවයි.පක්ෂ දෙකකට වෙන්ව සිටින සිංහල ජනතාව පක්ෂ මානසිකත්වයෙන් ගලවා සැබෑ දේශමාමකත්වයෙන් කුළු ගන්වා රට බෙදමේ කුමන්ත්‍රණය පරාජයට පත් නොකර කරන මේ නයි නැටවීමෙන් අහිකුණ්ටකයාද පරලොව යනු ඇත.





Thursday, September 21, 2017

මහානාම රජ දවසදී චීනයට යැවූ බුදු පිළිමයක් ගැන හෙළිවෙයි

                            


             චීනයත් ලංකාවත් අතර දිගු කාලීන සම්බන්ධයක් ඇත.ක්‍රි.ව. පළමුවැනි සියවසේ දී වසභ රාජ්‍ය කාලයේදී චීනයට යැවූ දූත පිරිසක් නිසා සේද මාර්ගය හරහා මෙන්ම මුහුදු මාර්ගය හරහාද ලංකාවත් චීනයත් අතර වෙළෙඳ ගනුදෙනු ඇරඹුණු ආකාරය ඉතිහාසයේ දක්වා තිබේ. චීනය බුදු දහමට ආකර්ෂණය වීම නිසා ඔවුහු ලංකාවේ තැන්පත්ව තිබූ දන්ත ධාතූන් වහන්සේ ගැන දැඩි උනන්දුවක් දැක්වුව   බව පැවසෙයි. මේ පිළිබඳ චීනය සතුව තිබෙන වැදගත් ම මූලශ්‍රය නම් පියන්-ඉ-ටියන් නම් වාර්තාවයි. ක්‍රි.පූ. පළමු වන සියවසේ සිට පහලොස් ව සියවස දක්වා අඛණ්ඩව චීනයත් සමග ලංකාවේ සිංහල රාජ සභාව ඇති කරගත් මිතුදහම නොබිඳී පැවතී ඇත. නමුත් පෘතගීසීන් ඇතුළු යුරෝපීයන් ගේ පැමිණිම නිසා මෙම සම්බන්ධය පසුව යටපත් විය. මේ වන විට නැවතත් චීනය සමග අප දැඩි සම්බන්ධයක් ආරම්භ කර තිබේ. පෙරදිග ලොකයේ බලවත් රටක් වන චීනය සමග සම්බන්ධය මැනවින් කළමනාකරණය කර ගැනිම රාජ්‍ය තාන්ත්‍රිකව සිදු විය යුත්තකි. එසේ නැතහොත් දේශපාලන බල අරගලයක්ට මැදි වුවහොත් කුඩා රටක් වශයෙන් සිදු වන අවාසිය ඉතා දැඩි විය හැකිය. එම නිසා මෙම ලිපියෙන් දක්වන සංස්කෘතික සබඳ කම් ඉතා වැදගත් බව පෙන්වා දිය යුතුය.
           ලංකාවට දන්ත ධාතූන් වහන්සේ  වැඩමවා පැමිණීමෙන් සිංහල බෞද්ධ සංස්කෘතියට නව පුනර්ජීවනයක් ඇති විය. සිංහල රාජ්‍යත්වය ශක්තිමත් විය. කිත්සිරිමෙවන් රජුගේ මුණුපුරු දෙවෙනි උපතිස්ස රාජ්‍ය කාලයේ මෙන්ම මහානාම රජු (ක්‍රි.ව.412-432)කළද මෙම ශක්තිය තුළින් විදෙස් සතුරන් පරාජයට පත් කර ගැනීමට හැකි විය. මහානාම රජු මහා වංශයේ හැටියට ලම්භකර්ණ වංශයට අයත් වෙයි. ඔහු සිය අවසාන කාලයේදී දෙමළ සතුරන් ගේ ආක්‍රමණකට ගොදුරුව සැඟව සිටියේය. ඒ කාලයේ දිවයිනේ අප්‍රකට ව සිටි පැරණි යක්ෂ ගෝත්‍රික පිරිස් විසින් ඔහුගේ ආක්ෂාව සලසන  ලද බව ජන ප්‍රවාදයන්හි දැක්වෙයි. මේ නිසා මෙම යක්ෂ ගෝත්‍රිකයන් සතුව තිබූ පැරණි විශ්මිත දැනුම මගින් බොහෝ දේ ආරම්භ කරන්නට ඔහුට හැකි විය. වැව් කර්මාන්තය ඉන් එකකි. පැරණි යක්ෂ ගෝත්‍රිකයන් ගලින් වැඩ ගත් පිරිසකි. එම නිසා ගල් යොදා කරන ලද විශිෂ්ට නිර්මාණයන් මේ අවදියේදී රාජ සම්මානයට බඳුන් විය.
      ක්‍රි.ව. පස්වන සියවසේ  මුල් කාලයේදී මහානාම රජු විසින් දූතයන් පිරිසක් චීන රාජ්‍යයට යවන ලදී. එට හේතුව වන්ට ඇත්තේ දිගින් දිගටම එල්ල වන සතුරු අක්‍රමණයන්ට මුහුණ දීමට අවශ්‍ය ආර්ථික ශක්තිය ගොඩ නගා ගැනීමට පසුබිමක් සකසා ගැනීම විය හැකිය. පියන්-ඉ-ටියන් ග්‍රන්ථයේ සඳහන් වන පරිදි මෙම දූත පිරිස අත ඇත්දත් සහ ඒ ආශ්‍රයෙන් තැනූ භාණ්ඩ මැණික් ආදී වටිනා තෑගි යැවුණි. මෙම දූත පිරිස විසින් ගෙන යන ලද අගනාම තාග්‍යය වූයේ බුදුපිළිමයකි. අඩි හතරයි අඟල් දෙකක්  පමණ උස මෙම පිළිම වහන්සේ නීල ගරුඬ(හරිත මිණි) නොහොත් ජෙඩ් ගලින් නෙලන ලද්දක් විය. මෙම හරිත මිණි නමින් යුතු ගල් ලංකාවේ හමුවන එකම ස්ථානය නුවර එළිය දිස්ත්‍රික්කයේ රුපහ ප්‍ර දේශයයි. වලපනේ සිට කී.මී. පහළොවක් පමණ ගිය විට මේ ගම්මානය හමු වෙයි.මෙම ගල ලා කොළ පැහැති ස්වභාවයෙන් යුක්තය. පිළිම නෙලූ කල්හි ඇතැම් විට අඳුරු කොළ පැහැයෙන්ද ඇතැම් විට විනිවද පෙනෙන ලා කොළ පැහැයෙන්ද යුක්ත වෙයි.
      මෙම බුදු පිළිමය සහ දූත පිරිස චීනයට ගිය කාල වකවානුව චීන රාජාවලියේ සඳහන්  සුන් රාජ වංශය බලය පවත්වාගෙන ගොස් ඇත.. චීනයේ නැන්කින් වල එකල අගනුවර රැඳී තිබුණි. රජු මෙම බුදු පිළිමය දැක  බොහෝ සතුටට පත්ව එම පිළිම වහන්සේ නැන්කින් හි වෝ-කොන් නම් බුද්ධ මන්දිරයේ තැන්පත් කොට පූජා පැවැත්වූහ. රාජ දූතයන්ට  සම්මාන සත්කාර කොට එම දූත පිරිස වසර දහයක් පමණ එහි නවත්වා ගෙන සිටි බව දැක්වේ.ඉන්පසු දිගින් දිගටම චීනයත් ලංකාවත් අතර වෙළෙඳ ගනුදෙනු මෙන්ම බුදු දහම හා බැදුණු රාජ්‍ය තාන්ත්‍රික ගනුදෙනු සිදුව ඇත. විශේෂයෙන් භික්ෂූන් වහන්සේලා ධර්ම ග්‍රන්ථ රැගෙන එහි වැඩමවා තිබේ. මහානාම රජු දවස ඔහු ගේ අවසාන කාලයට පෙර ෆාහියන් භික්ෂුව ලංකාවට වැඩම කර ඇත. උන්වහන්සේ ලංකාවේ බොහෝ සිද්ධස්ථාන වැඳ පුදා ගෙන සිය ගමන් චාරිකාව අරභයා වැදගත් වාර්තාවක්ද සටහන් කර තිබේ. මහානාම රජු ගෙන් පසු ක්‍රි.ව. 426 දී මෙහෙණින් වහන්සේලා කීප දෙනෙකුද චීනයට වැඩම කර ඇති බව දැක්වේ.
           මහානාම රජු දවසදී චීනයට වැඩම කරවන ලද නීල ගරුඬ පාෂණයෙන් නිර්මිත බුදු පිළිමය ඉතා වටිනා ඓතිහාසික වස්තුවකි.ඒ පිළිමය ආශ්‍ර යෙන් චීනයේ බොහෝ පිළිම නෙලූ බවද සඳහන් වෙයි.ඉතාමත් මෑතක් වන තුරු රුපහ ග්‍රාමය අවට මෙම ගලෙන් රූප  නෙලන ශිල්පීන් වාසය කර තිබේ. මහානාම රජු ඉතාමත් සමීපව ඇසුරු කළ යක්ෂ ගොත්‍රිකයන් ගේ එක් රාජධානියක් වන්නේ මෙම ප්‍ර දේශයයි.මන්දාරම් නුවර පදිය පැලැල්ල වලපනේ රුපහ ආදී පැරණි ගම්මාන සියල්ල ඔවුන්ගේ වාසස්ථාන වෙයි. මේ රජකීය සම්බන්ධය උඩ නීල ගරුඬ පාෂාණයෙන් බුදු පිළම තනා රජුට පරිත්‍යාග කරන්නට ඇති බව නිසැකය.

        මෙම නීල ගරුඬ පාෂණය පිළිබඳ එම ප්‍ර දේශයේ තිබෙන ජන ප්‍රවාද බොහෝය. එක් ජනප්‍රවාදයකින් කියැවෙන්නෙ රාවණ රජු  සීතා රැගෙන විත් මෙම ප්‍ර දේශයේ ගල් ගුහාවක සඟවා සිටි බවයි. සීතා දිය නෑමට සූදානම්ව සිටියදී ඇය සොයා හනුමන්තා පැමිණයේය. එවෙලෙහි රාවණා විසින් සීතා සුදු රෙද්දකින් ආවරණය කොට සඟවා තැබූ බව කියැවෙයි.ඒ සීතා රෝගී වී ඇති බව පෙන්වීමටයි. හනුමන්තා රාවණා ගේ ඉල්ලීම පරිදි නැවත ඉන්දියවට ගොස්  සීතාට ප්‍රතිකාර පිණිස නීල ගරුඬ කැබැල්ලක් ගෙන ආපසු පැමිණි නමුත් ඒ වන විට රවණා සීතාව වහන් ටෙ එතනින් පැන ගොස් තිබුණි. හනුමන්තා එම ගල් කැබැල්ල එතැනම දමා රාවණා සොයා ගියේය. නීල ගරුඬ පාෂණය සාමාන්‍යයෙන් ලියලන පාෂාණයකි. කලක් ගත වන විට ගල් පර්වතයක් ලෙසට එය ලියලා වැඩුණු බව කියැවෙයි.
         අදටත් රුපහ කොටඹෙ ග්‍රාමයේ මෙම නීල ගරුඬ පාෂාණය දක්නට හැකිය. ඒ මතින් සිසිල් දියෙන් පිරි දිය දහරාවක් ගලා බසී. මෙම දිය දහරාවෙන් ස්නානය කළ විට බොහෝ අසනීප වලින් සුව වන බව පැවසේ.එසේම යම් බඩ රුජාවක් සෑදුණු විට මෙම ගල් කැබැල්ලක් උරච්චි කර බොන්නට දීමෙන් සනීප වන බවද කියැවෙයි. මෙම දිය ඇල්ල අසල වාසය කරන පාරම්පරික ගැමියෙකු මා සමග පැවසුවේ විශේෂයෙන්ම කුෂ්ට රොගීන් ඉන් සුව වන බවයි. එය අත්දැකීමක් බවද මෙම ගල් කැබැල්ලක් දෙහි ඇඹුලෙන් උරචිච් කර එම ස්ථානයේ කීප විටක ආලේප කළ කල්හි එම කුෂ්ටය සනීප වන බවද ඔහු පැවසීය. සැබවින්ම මෙම නීල ගරුඬ පාෂණය දැක ගන්නට එම සිසිල් දියෙන් නා ගන්නට ඈත සිට සංචාරකයන් මෙම ස්ථනයට පැමිණෙති.නුවර එළි දිස්ත්‍රික්කයේ සංචාරක කලාපයක් ලෙසට මෙය නම් කර ඇත. වලපනේ ප්‍රා දේශීය සභාව විසින් මෙම ස්ථානයට බැසීම පහසු කරවනු වස් පඩි පෙළක් සකස් කර ඇත. නමුත් තව දුරටත් එම ස්ථානයේ අගය වැඩි කරගත හැක්කේ මෙම ඓතිහාසික සිදුවීම් සටහන් කොට තබන පුවරු ප්‍රදර්ශනය කරමින් සංචාරකයන්ට මෙය විවෘත කර දීමෙනි. නමුත් සංචාරක ආගමනයෙන් මෙම ගම් වාසීනට යම් යහපත් ප්‍රතිඵලයක් අත් විය යුතුය. නීල දණ්ඩාහීන්න ප්‍ර දේශීය ලේකම් වරයා මෙන්ම රපහ ග්‍රාම නිළධාරී කසුන් මහතාද මේ පිළිබඳ දැඩි අවධානයෙන් සිටින බැව් මා හට දැනුණි . එයට හේතුව මෙම ගල් පර්වතය විනාශ කිරීමට ඇතැම් අය පෙළඹෙන බැවිනි. කෙසේ වෙතත් චීනයත් සමග අතීතයේ විශාල සබඳකමක් ගොඩ නැගූ  චීනය අගය කළ නිර්මාණයක් නෙලූ  නීල ගරුඬ පාෂාණය ජාතික වස්තුවක්  බව කිව යුතුය.

Monday, September 4, 2017

ජිනීවා සමුළුවට විවෘත ලිපියක්

                                             
           මානව හිමිකම් කවුන්සිලෙයේ විසිහත් වන සැසිවාර යේදී මානව හිමිකම් කොමසාරිස්වරයා විසින් සිදු කළ වාචික කරුණු දැක්වීමේදී ශ්‍රී ලංකාව යුධ අපරාධ කර ඇති බව උලුප්පා දක්වා ඇත.එම කරුණු දැක්වීම අනුව ශ්‍රී ලංකා රජය සහ ඇමරිකා එක්සත් ජනපදය එක්ව ශ්‍රී ලංකාවට එරෙහිව යෝජනාවක් ඉදිරිපත් කර සම්මත කළහ. එහිදී සංහිඳියාව සහ වගවීම ප්‍රවර්ධනයට කිරීමට එකඟ විය යුතු බවද දෙමුහුන් අධිකරණයක් ස්ථාපිත කළ යුතු බවද ශ්‍රී ලංකා ආණ්ඩු ක්‍රම ව්‍යවස්ථාවේ 13 වන සංශෝධනය සම්පූර්ණයෙන් ක්‍රියත්මක කිරීමට මෙන්ම එය ඉක්මවා යන බලය බෙදීමකට එකඟ විය යුතු බවටද එහිදී ප්‍රකාශ කර ඇත. මෙම කාරණා යලි යලිත් මතක් කරමින් ශ්‍රී ලංකා රජයට බලපෑම් කරමින් ඇත.එයට හේතුව මානව හිමිකම් නියෝජිතයන්ට මෙම මානව හිමිකම් කටයුතු සඳහා අත පෙවීමට ඉඩදීමේ රජයේ එකඟතාවයයි. එසේම මහජන ආරක්ෂක පණත සංශෝධනය කරමින් ත්‍රස්තවාදය වැලැක්වීමේ පනත අහෝසි කළ යුතුය යන බලපෑමද කොට ඇත. ඒ තත්ත්වය තුළ 2015 වසරේ සිට ගත වුණු කාල වකවානුවේදී ශ්‍රී ලංකා රජය අතුරුදහන් වූවන් සඳහා වූ පනතක් සම්මත කර ඇත. එසේම සංහිඳියාව සහ වගවීම පිනිස ලංකාවේ නීති රිති අධ්‍යාපනය ආදී ක්ෂේත්‍රයන්හි ව්‍යුහාත්මකවෙනස් කම් රාශියක් කරමින් තිබේ.මෑතකදී බෙන් එමර්සන් මහතා ලංකාවට පැමිණ ඉහතකී තීන්දු තීරණ ගැනීමේ ප්‍රමාදයන් ගැන තර්ජනාත්මකව විමසා තිබේ. මානව හිමිකම් කොමසාරිස් තුමනි.ඔබට ලැබී තිබුණු සාක්ෂි පට්ටපල් බොරු යයි වෙනත් වාර්තා වලින් ඔප්පු වී තිබියදීත් මෙලෙස ස්වාධීන රාජ්‍යයකට බලපෑම් කිරීම සහ තර්ජනාත්මකව සැලකීම කුමන අන්දමේ රාජ්‍ය තාන්ත්‍රික කටයුත්තක් දැයි විමසමි.බ්‍රිතාන්‍ය මෙන්ම ඇමරිකාවද මානව හිමිකම් උල්ලංඝණය කරන කල්හි නිශ්ශබ්දව සිට ශ්‍රී ලංකාව කෙරෙහි පමණක් ඇඟිල්ල දිගු කරන්නේ දෙමළ ගෝලීය සංසදයෙන් ඔබට යහමින් මුදල් ගෙවා ඇති නිසා නොවේද.
          වර්තමානයේ මානව හිමිකම් වෙනුවෙන් පෙනී සිටින මහා බ්‍රිතාන්‍ය 1815 වසරේ දී ගිවිසුමකින් ලංකාව භාරගත් පසු මෙරටදී කරන ලද යුධ අපරාධ රාශියක් තිබෙන බව මේ මොහොතේ දී මතක් කර සිටිමි. සිංහල ජනතාව සහ රදළවරු මූලික කරගෙන 1817 දී ඇතිවූ විමුක්ති අරගලයේදී සහ 1848 ඇති වූ මාතලේ නිදහස් අරගලයේදී ලංකාවේ සිංහල ජනතාවට අරභයා විශාල වශයෙන්  යුධ අපරාධ සිදු කිරීමට බ්‍රිතාන්‍ය හමුදාව කටයුතු කර ඇත.1817 විමුක්ති අරගලයට මේ වන විට වසර දෙසීයක් සපීරී තිබේ. බ්‍රිතාන්‍ය සොල්දාදුවන් සහ නිළධාරීන් සිංහල පිරිමින් සහ කුඩා දරුවන් අමානුෂික ලෙස ඝාතනය කළ ආකාරය පිළිබඳ වාර්තා රාශියක් ඇත. එසේම සිංහල ජනතාවගේ වතු පිටි කුඹුරු ගිනිතබා විනාශ කරමින් ගවයන් ඝාතනය කොට ළිං වලට එම මළ කුණු ඇද දමා දුර්භික්ෂයක් ඇති කර නිහීන ලෙස අරගලය පරාජය කළ හැටි පෙන්වා දිය හැකිය.එසේම මෙම අරගලයට නායකත්වය දුන් රදළයන් රාජ ද්‍රොහීන් ලෙසට නම් කර රටින් පිටිවහල් කරන ලදී. ඔවුන් ගේ දරුවන්ට හිමි විය යුතු වරප්‍රසාද පවා අහිමි කරන ලදී.අදටත් මාතලේ මහනුවර පමණක් නොව නැගෙනහිර පළාතේ පවා ප්‍ර වේනි ඉඩ කඩම් වල උරුමය තහවුරු කරගනු බැරිව සිංහල පැරණි පරම්පරා දුර්වලව සිටී.
      අප මුතුන් මිත්තන් මහා බ්‍රිතාන්‍ය රජුට රට භාර දුන්නේ මෙවැනි අපරාධ කරන්නට නොවේ. පෙර සිරිත අනුව රට පාලනය කරන්නටයි. එම ගිවිසුම ද උල්ලංඝණය කරමින් බ්‍රිතාන්‍ය යටත් විජිත ආණ්ඩුව 1948 තෙක් අඛණ්ඩව රට පාලනය කර ඇත. ඉන්පසු රට ස්වදේශිකයන් අතට භාර දුන්නද මහ රැජිනගේ බලපෑමෙන් මිදෙන්නට ඉඩ නුදුන්හ. උතුරු සහ නැගනහිර ප්‍ර දේශ 1766 ට පෙර සිංහල රජුන් යටතේ පාලනය වූ පළාත් ය. එම ප්‍ර දේශ වල සිංහල ජනතාව විශාල වශයෙන් ජීවත්ව සිට ඇත. නමුත් බ්‍රිතාන්‍ය යන් බලයට පත් වූ පසු මලබාරයෙන් ගෙන්වූ වහලුන් එම ප්‍ර දේශ වල පදිංචි කරමින් රටේ දේශපාලන අස්ථාවරත්වයක් ඇති කර තිබේ. දැන් එම මලබාරයන් ගෙන් පැවතෙන මෑත පුරපුරේ දේශ පාලනඥයන් ලක් රජයෙන් සවයං පාලනයක් ඉල්ලවති. එහිදී ඇති වූ සිවිල් අරගලයේදී හමුදාව යොදවා එය පාලනය කර ත්‍රස්තවාය පරාජය කරන් ලද්දේ රටේ සාමය සහ නීතිය ආරක්ෂ කර ගැනීමටයි. එහිදී ත්‍රිවිධ හමුදාවේ නිළධාරීන් දිවි පරදුවට තබා ත්‍රස්තවාදය පාලනයට රජයට සහාය දැක්වූයේ රජයේ අණ පරිදිය.රටේ ආරක්ෂාව තහවුරු කිරීම ත්‍රිවිධ හමුදාවක වගකීමයි. එම නිසා එම ක්‍රියාන්විතයේ යෙදී සිටි සියලුම හමුදා නිළධාරීන්ට විශේෂ මුක්තියක් හිමි විය යුතුය.මහා විජයබාහු රජු ගේ පනාකඩුව තඹ සන්නසේ සඳහන් පරිදි  පෙර රජ දවස  රජු වෙනුවෙන් කළ සේවයට ලබා දුන් විශේෂ මුක්තිය  මගින් හෙළි කරනුයේද එවැනි වරප්‍රසාදයක් හමුදාවට හිමි විය යුතු බවයි..
         බ්‍රිතාන්‍ය යන් සහ ලන්දේසීන් විසින් පදිංචි කරනු ලැබූ මලබාර් වහලුන් ගෙන් පැවත එන කිසිවකුට රටේ පවතින බලය දුර්බල කොට සවයං පාලනයක් දීමේ අවශ්‍යතාවයක් නැත. වර්තමානයේ රටේ ජීවත් වන සිංහල දෙමල මුස්ලිම් ජනතාව සියල්ලම රට වැසියන් ලෙසට සැලකුවහොත් ඔවුන් ගේ එදිනෙදා වැඩ කටයුතු පහසු කර ගැනීමටත් දේශපලන වැඩ කටයුතු වල යෙදීමටත් තිබෙන නිදහස උපරිමයෙන් පවතින බව කිව යුතුයි. 1815 දී බ්‍රිතන්‍ය න් ට රට භාර දෙන කල්හි රටේ දේශපාලන බලය මැනවින් ශක්තිමත්ව තිබුණි. රජු රටේ භාරකරු විය. නමුත් ගම් මට්ටමින් පැවති ගම් සභාව සහ පළාත් මට්ටමින් පැවති රට සභාව ආදී තැන් වල ජනතාවගේ වැඩ කටයුතු කර ගැනීමට අවශ්‍ය බලයක් ප්‍රදානය කර තිබුණි. නමුත් සියල්ලන්ම රජුට යටත්ව එම රාජ කාරි ඉටු කළහ. බ්‍රිතාන්‍යයන් රට භාරගත් මුල් කාල වකවානුවේදී 1833 න්  පසු මෙම රාජකාරි ක්‍රමය අහෝසි කරන ලද්දේ විය. ඉන්පසු රටේ පරිපාලනය බිඳි වැටුණ අතර මහ ගංවතුර සමයන්හිදී වාරිමාර්ග  බොහොමයක් කැඩී බිඳි ගියහ. බ්‍රිතාන්‍ය ජාතිකයන්ට තමන් කළ වැරැද්ද තේරුම් ගියේ එවිටයි. ඉන් පසු ඔවුහු ක්‍රමයෙන් රටේ සංස්කෘතිය තෙරුම් ගනිමින් ගම්බද පරිපාලන ක්‍රම ශක්තිමත් කළහ.එහි පළමු පියවර වූයේ 1871 ගම් කාර්ය සභා පණතයි. ඉන්පසු 1920 දක්වා මෙම පණත් සංශෝධනය මගින් ගම් සභාවලට යලි බලය පවරමින් බ්‍රිතාන්‍ය ආණ්ඩුව නීති රීති සකස් කළහ.
          1916 දී බස්නාහිර පළාත් ඒජන්ත වරයා වූ ජේ.බී. ප්‍රෙෂර් මහතාගේ මූලිකත්වයෙන් පළාත් පාලන ක්ෂේත්‍රය පිළිබඳ කරුණු සොයා බැලීමට කොමිසමක් පත් කර ඇත. මෙහි වාර්තාව 1918 දී පිටවිය. මෙම වාර්තාව පදනම් කරගත් රජය 1920 අංක 11 දරණ පළාත් පාලන ආඥා පනත සහ 1924 අංක 9 දරණ ගම්කාර්ය සභා ආඥා පනත් දෙක සම්මත කර ගෙන ඇත.1924 පනතින් විශේෂ වෙනස්කම් දෙකක් මූලිකව ඇති කරන ලදී. ඒ නම් මෙතෙක් නිල බලයෙන් ගම් කාර්ය සභාවල මූලිකත්වය ගෙන කටයුතු කළ ගම් මුලෑදෑනීන් ඉන් ඉවත් කිරීමයි. අනෙක නම් අතුරු ව්‍යවස්ථා සම්පාදනය ට හැකි වන පරිදි ගම් කාර්ය සභාවේ බලතල පුළුල් කිරීමයි.1927 දී පත් කරනු ලැබූ ඩොනමෝර් කොමිසම මගින් ලංකාවේ පළාත් පාලනය පිළිබඳ පුළුල් අදහස් විමසා වාර්තාවක් සකස් කළහ. එහි ප්‍රතිඵලයක් වශයෙන්  1932 සහ 1933 පනත් මගින් ගම් සභිකයන් පත් කිරීම ඇති කරන ලදී.මෙහි උච්චතම අවස්ථාව නම් 1938 අංක 60 දරණ ගම් කාර්ය සභා ආඥා පනතයි. මේ මගින් පළත් පාලන ආයතන තව දුරටත් පුළුල් කරන ලදී. මේ යටතේ සෑම ගම් කාර්ය සභාවත්ම පොදු දේපළ තබා ගැනීම පොදු මුද්‍රාවත් තබා ගැනීම බදු අය කිරීම සහ  ව්‍යවස්ථා පැනවිය හැකි නීතිගත සංස්ථාවක් බවට පත් වීම සිදු විය.
          1946 අංක 53 පනත මගින් මෙතෙක් ගම්සභා සහ නගර සභා සඳහා වූ මැතිවරණ නීතිය වෙනස් කොට සියලුම පළාත් පාලන ආයතන මැතිවරණ කොමසාරිස්වරයා යටට පත් කරන ලදී.එසේම 1945 අංක 43 පනත මගින් සියලුම පළාත් පාලන සේවකයන් පළාත්පාලන සේවා කොමිසම යටතට පත් කර ඇත. 1955 දී රජය විසින් පත් කරන ලද චොක්සි කොමිසම මගින් පළාත් පාලන ආයතන වල ස්වයං පාලන හැකියාව විමර්ශනය කොට යෝජනා ඉදිරිපත් කර තිබේ. මේ නිසා 1971 අංක 48 දරණ පනතින් ආදායම් එකතු කිරීමේ වගකීම ද 1977 අංක 24 දරන පනතින් පළාත් පාලන ආයතන ප්‍රධානීන්ට අයවැය අනුමැතිය දී සම්බන්ධයෙන් ද බලතල පවරා ඇත. ඒ අතින් බලන කල්හි පූර්ණ බලතල බෙදීමක් මෙම සභා හරහා සිදුවී ඇති බව පැහැදිලි වෙයි. නමුත් 1977 කාලයේදී කොටි ත්‍රස්වාදීන් විසින් දියත් කළ රට බෙදීමේ ඊලාම් සටන නිසා බිය පත් වූ රජය 1980 අංක 35 දරන පනතින් දිස්ත්‍රික් සංවර්ධන සභාවන් පිහිටුවීමට තීරණය කළහ. ඒ එකළ විපක්ෂ නායකායාව සිටි ඒ .අමිර්තලිංගම් සැනසීමටයි.රජය ගත් මෙම අදූරදර්ශී තීරණය නිසා ගම්සභා සහ සුලු නගර සභා සියල්ල අහෝසි විය.1980 ජූන 30 වන විට ගම්සභා 547 ක් සහ සුලු නගර සභා 83 ක් පවත්වාගෙන පැමිණ ඇත.දිස්ත්‍රික් සංවර්ධන සභා ඇති කිරීම නිසා ග්‍රාමීය ජනතාවට ඉතාමත් සමීපව කටයුතු කරල ආයතනයන් අහෝසි විය.එම ප්‍රතිසංස්කරණ  කරන ලද්දේ පැවති එක්සත් ජාතික පක්ෂ රජයයි. ඒ වෙනුවට දිස්ත්‍රික් සංවර්ධන සභාවලට අමාත්‍යංශ 11කට අදාල විෂයයන් 15 ක් පවරනු ලැබූහ. පාර්ලිමේන්තු මන්ත්‍රී වරුන්ද මෙම සභා වල අසුන් ගෙන කටයුතු කළහ.එයින් සිදු වූයේ ජනතාවට බලය යෑම නොව දේශපාලන නායකයන් හට බලය ලැබීමයි. එහිදී ගමේ ඇති නියෝජන අඩුව සම්පූර්ණ කරලීමට 1981 දී ග්‍රාමෝදය මණ්ඩල පිහිටුවනු ලැබූහ.නමුත් මේ කිසිවකින් ගම් මට්ටමේ ප්‍රශ්ණ විසඳීම පහසු නොවීය.ඒවා අවසානයේ දූෂිත ආයතන බවට පත් විය.පසුව ඉන්දීය රජයේ බලපෑමෙන් ඇති කළ පළතා සභා නිසා මෙම දූෂීත භාවය දෙතුණ තෙගුණ විය. බලය දේශපාඥයන්ට හුවමාරු වීමෙන් ඇති වූ දුර්භාග්‍ය අද මුළු රටම වෙලා ගෙන ඇත.
       1987 දී නැවත උප දිසාපති කොට්ඨාශ මටිටමින් ගම් කාර්ය සභා පාලන ප්‍රදේශ එක් කර ප්‍රාදේශීය සභා පිහිටුවීමට කටයුතු කරන ලද අතර. අද රට පුරා මහ ජන චන්දයෙන් තේරී පත්වූ සභිකයන් සහිතව ප්‍රා දේශීය සභා ක්‍රියාත්මක වෙයි. ඒවා තුළින් රට පුරා සෑබෑ ලෙසටම බලය බෙදා හැර තිබේ.පරිපාලනය ශක්තිමත් කර තිබේ.නමුත් පළත් සභා පනත මගින් එම බලය නැවත උදුරා ගෙන ඇත.2015 වර්තමාන ආණ්ඩුව පත් වූ පසු දිගින් දිගටම පළාත් පාලන චන්දය කල්දමමින් ජනතාව සතු බලය අව භාවිත කරමින් සිටින්නේ මානව හිමිකම් කොමසාරිස් ඇතුළු ජාත්‍යන්තර ආයතන විසින් ලබා දුන් න්‍යාය පත්‍රය ක්‍රියාත්මක කිරීම උදෙසා කල් මැරීමටයි.මෙවැනි ක්‍රියා යහපාලන ගණයේ උසස් ක්‍රියා නොවේ. දේශපාලන තක්කඩියන්ගේ අමන ක්‍රියා වේ. එම නිසා සැප්තැම්බර් 11 වන දිනට රැස්වන මානව හිමිකම් සමුළුවේදී ශ්‍රී ලංකාවේ සැබෑ තත්ත්වය වටහා ගෙන ව්‍යාජ සාක්ෂි ඉවත දමා ලංකාවේ ස්වාධීන පැවැත්මට හිතකර යෝජනා පමණක් සම්මත කර සැබෑ රාජ්‍ය තාන්ත්‍රිකයන් ලෙසට  හැසිරෙනු ඇතැයි  බලාපොරෙත්තු වෙන් සිටිමි.



      

Saturday, August 26, 2017

බළන්ගොඩ ගල්ලෙනකින් හමු වූ යකාගේ සිතියම

                          


             ලංකාවේ ප්‍රාග් ඓතිහාසික යුගය අලෝකමත් කරන බොහෝ සාක්ෂි පසුගිය කාලයේදී සපරගමු පළාතෙන් ලැබිණ. මහාචාර්ය ශිරාන් දැරණියගල කල්තොට ආසන්නයේ බෙල්ලන් බැඳි පැලැස්සේ කරන ලද කැණීමකින් ආරම්භ කරන ලද මේ ගවේශණයන් බෙහෙවින්ම සම්පූර්ණත්වයකට පත් කරන ලද්දේ මහාචාර්ය රාජ් සෝමදේවයන් විසිනි. බළන්ගොඩ කූරගල බිම්තැන්නේ කිරිමකුල්ගොල්ල ගල්ලෙනක තිබූ අප්‍රකට ලෙන්ලිපියක කෙටි පාඨයකින් ඔහු මෙම පැරණි යුගයේ අයිතිකාරයන් වන්නේ යක්ෂයන් බවට විශේෂ අනාවරණයක් කළේය. එයින් නොනැවතුණු මහාචාර්ය වරයා  හල් දුම්මුල්ල හුණු ගලා ගල වැනි ගල්ලෙන් කැණීම් වලට ලක් කරමින් මෙම සංස්කෘතියේ සුවිශේෂතා කුමක්දැයි ශාස්ත්‍රීය දත්ත මගින් පෙන්වා දෙන ලදී. මෙම සංස්කෘතිය අවම වශයෙන් වසර හයදහසක් පැරණි බව ඔහු කාබන් නිර්ණයන් මගින් සනාථ කලේය.එසේම හුණු ගලා ගල කැණීමෙන් හමු වූ පුරාණ යාතු කර්ම සඳහා භාවිත වූ යෝනිගල අතීත මානවයාගේ දැනුම් පරාසය මෙන්ම සභ්‍යත්වය පිළිබඳවද ඉඟි පළ කළ බව සඳහන් කළ යුතුය. මීට වසර දෙකකට පමණ පෙර සිට ඔහු බළන්ගොඩ ඉළුක් කුඹුර ආසන්නයේ ලුණු ගල්ගේ අළු ගල්ගේ  සහ වවුල්ගල්ගේ  යන ස්ථාන වල කැණීම් වල නිරතව සිටී. එහිදී අනාවරණය වූ විශේෂතම කාරණය නම් මීට වසර හයදහසකට පමණ පෙර ලංකාවේ පුරාණ මිනිසුන් භාවිත කළ ධාන්‍ය වර්ග 35 ක් පිළිබඳ උද්භිද විශ්ලේශණයකට ප්‍රවිෂ්ට වීමයි. අඩක් පිලිස්සුනු වී ඇට සහ ධාන්‍ය මගින් කියැවෙන්නේ පුරාණ මිනිසා ගේ ආහාර සංස්කෘතියේ විවිධත්වයයි.දැන් ඔහුගේ නවතම සොයා ගැනීම සමාජය ඉදිරියේ අනාවරණය වී ඇත. බළන්ගොඩ ඉළුක් කුඹුරට නුදුරු පරගහමඩිත්ත පින්නගල කන්දේ බාදාහේන ගල්ගේ නම් ස්ථානයේ තිබී පුරාණ යක්ෂ ගෝත්‍රිකයන් විසින් නිර්මාණය කළ භූමි දර්ශනයක් නිරාවරණය කරගෙන තිබේ. මෙ සටහන ලියැවෙන්නේ ඒ සඳහාය.

          පරගහමඩිත්ත ගම්මානයට පිවිසිය හැකි මාර්ග දෙකක් ඇත. එකක් නම් ඕපනායක උඩවෙල මං සන්දියෙන් හැරී අකරැල්ල හරහා පරගහමඩිත්තට පැමිණීමයි. නැතහොත් බළන්ගොඩ ඉළුක් කුඹුර පනාන මාර්ගයේ පැමිණ පරගහමඩිත්තට ළඟා විය හැකිය.මෙම මාර්ග දෙකම සංවර්ධන නුවූ ග්‍රාමීය මාර්ගයන්ය.පරගහමඩිත්ත බාදාහේන ගල්ගෙයට පිවිසීමට ඉතා දුෂ්කර අඩිපාරක් ඔස්සේ පල්ලම් බැසිය යුතුය.මහාචාර්ය සෝමදේව මහතා ඇතුළු ශිෂ්‍ය කණ්ඩායම උදේ හවස මෙම අඩි පාර දිගේ පහළ ඉහළට යමින් කරන ගවේශණයට ගම්මුන් ගෙන් ලැබෙන සහයෝගයද ඉතා උසස් මට්ටමක පවතී. පරගහ මඩිත්ත පරමදර්ශනාරාමයේ පූජ්‍ය ගල්ඉන්නේ ධම්ම දේව ස්වාමීන් වහන්සේ ගේ මග පෙන්වීම යටතේ මහචාර්ය තුමන්ට ලැබෙන සහාය නොවන්නට මෙම අපූරු ගල්ගෙය සොයා ගැනීම ද දුෂ්කර විය හැකිව තිබුණි.
          මීටර දෙසීයක් පමණ එක දිගට දිවෙන බාදා හේන ගල්ලෙන පින්නගල කන්දේ පාමුළ පිහිටා ඇත. මීට කලින් මහාචාර්ය සෝමෙදේව මහතා විසින් ගවේශණය ට ලක් කළ අළුගල්ගේ මෙම කන්දට ප්‍රතිවිරුද්ධ පැත්තේ පිහිටා තිබේ. ඒ අනුව නිගමනය කළ හැක්කේ මෙම කඳු වැටි සියල්ලකම බෑවුම් වල පැරණ මානවයාගේ වාසස්ථාන පිහිටා තිබෙන බවයි. පසුගිය මාසයේ මහාචාර්ය සෝමදේව මහතා ඉළුක්කුඹුරට නැවත පැමිණි පසු වවුල්ගල්ගේ  කැණීම් පටන් ගෙන ඇත. එම කැණීම් වලින්ද ධාන්‍ය වර්ග ගල් ආයුධ විශාල ප්‍රමණයක් මේ වන විට ලැබී ඇත.එසේම ලුණුගල්ගෙයින් ලැබුණු සිදුරු කීපයක් සහිත ගලට සමාන  ගලක් වවුල් ගල්ගෙයින්ද   ලැබීමෙන් ඇති වුණු කුතුහලය ඉමහත්ය. මෙතෙක් එවැනි ගල් ගැන තිබූ මතය නම් කැකුණ තැලීම සඳහා යොදා ගත් පහසු උපකරණයක් බවයි. නමුත් මහාචාර්ය තුමා සිය පරිකල්පනය මගින්  මෙම ප්‍රහේලිකාව විසඳන්නට ගත් උත්සාහය මත නව මතයක්ද ඉදිරිපත් කර තිබේ. ඒ නම් සෘතු භේදය හඳුනාගන්නට  පැරණියන් අහසේ තරුරටා ගලේ කොටවා යොදාගත් බව කියැවෙන මතයයි.එලෙස තරු රටා යොදාගත් පුරාණ මානවයන් ලෝකයේ විවිධ තැන් වල විසූ බව විද්‍යාඥයන් පෙන්වා දී ඇත.වවුල් ගල් ගේ කැණීම් වලින් පසු බාදාහේන ගල්ගේ ගවේශණයට යොමු වන්නට හේතු වූයේ ගැමියන් ගෙන් සහ පරගහමඩිත්ත විහාරස්ථානයේ නායක ස්වාමීන් වහන්සේ ගෙන ලැබුණු ඔත්තුවක් අනුවයි. මෙහිදී  මහාචාර්ය තුමා ගේ මහත් කුතුහලයට ලක් වූයේ ගල් ලෙන මධ්‍ය යේ පැවති තරමකට විශාල  පිහිටි ගලක කොටන ලද සිදුරු සමූහයක් ඇස ගැටීමෙනි. මීට කලින් මෙවැනි ස්ථාන ගැන වාර්තා තබන මහාචාර්ය ශිරාන් දැරණයගල මහතාගේ අදහසද වූයේ පැරණි මානවයා විසින් මෙවැනි ගල් සිදුරු කැකුණ තැලීමට භාවිතා කළ බවයි. එහෙත් මහාචාර්ය රාජ් සෝමදේව මහතා ඊට වෙනස් මගක යමින් නව මතයක් දැන් සමාජ ගත කර තිබේ.එය මෙසේය.

    පැරණි මානවයා විසූ ගල්ලෙන් සහ ඔවුන්ගේ ක්‍රියාකාරකම් රාශියක් විසිවන සියවසේ ලෝක ප්‍රකට පුරාවිද්‍යඥයන් ගේ පරීක්ෂාවට ලක්ව තබෙනවා.පුරාණයන්ගේ භූමි දර්ශන සටහන් ගැන ඔවුන් විශෙෂයෙන්ම ගවේශණය කරමින් නිශ්චිත අදහස් සමාජ ගත කර තිබෙනවා.කැතරිනා ස්මිත් නම් විද්‍යඥවරිය  (prehistoric cartography ) නම් නිබන්ධනයේ ගල් වල සහ මැටි පුවරු වල කොටන ලද භූමි දර්ශන ගැන අදහසක් පළ කොට තිබෙනවා 1920 දී මෙම ශිලා සටහන් ගැන කළ ගවේශණ එම කෘතියේ අන්තර්ගතයි.මෙම විද්‍යාඥයන් මේ සටහන් සඳහා යොදන්නේ ස්වප්න දර්ශන නාමයයි. පරගහමඩිත්ත බාදාහේන ගල්ලෙනෙන් අප මතු කරගත් සිදුරු සහිත පිහිටි ගල ලංකාවේ ප්‍රථම වතාවට හඳුනාගත් එවැනි භූමි දර්ශනයක් ලෙසට දැක්විය හැකියි.  දැන් මෙම භූමි දර්ශනය අප ප්‍රස්ථාර ගත කරමින් සිටිනවා. මෙම භූමි දර්ශනය මගින් හෙළිවන වැදගත්ම කාරණය නම්  කඳු වැටි බෑවුම් වල ජීවත් වූ අතීත මානවයා  ආහාර සහ දඩයම් සොයා යෑමට සහ භූමිය බෙදා හදා ගැනීමට කළ කළමනාකරණයි.  මෙම  සිදුරු සහිත ගලෙහි ස්පර්ශ ලාංඡනයත් අඳිනු ලබන  ප්‍රස්ථාරයත් අන්තර්ජාල සිතියම් මත ප්‍රක්ෂේපණය කිරීමෙන් මෙම ජීවන රටාව විද්‍යාත්මකව තේරුම් ගන්නට අප ඉදිරියේ බලාපොරොත්තු වන බව කිව යුතුයි. ක්‍රි.පූ.3000 සිට විජයාගමනය තෙක් කාලවකාවානුව තුළ අපගේ ඉතිහාසයේ ඇති හිඩැස පුරවන්නට මෙම කරුණු ඉවහල් වන බවද ප්‍රකාශ කළ යුතුයි.

         මහාචාර්ය සෝමදේව මහතා සොයාගත් මෙම සිතියම ගැන ගැමියන් ගේ ප්‍රකාශන විවිධය. ඔවුහු මෙයට හුලවාලියා වී කෙටූ ගල යයි කිවූහ. මහාචාර්ය තුමා ගේ ඇසින් බලා අප මෙයට යකාගේ සිතියම යයි කියමු. මෙහි සිදුරු යම් පරිමාණයකට කොටා ඇති බවද පෙනේ. පින්නගල කන්දේ බෑවුමේ පැවති ප්‍රධාන ගල් ලෙන් තුන ඊට නුදුරින් ඇති සිරස් අතට පිහිටි ගල් ලෙන් ලොකු සිදුරු වලින්ද ග්‍රීෂ්ම සෘතුවට යොදා ගත් වාසස්ථාන කුඩා සිදුරු වලින්ද සළකුණු කොට ඇති බව මහාචාර්ය තුමා පවසයි. ප්‍රධාන ගල්ලෙන් දෙකක් අතර පරිමාණය විග්ගුස්සකි.( අඟල් හතරහමාරයි).ප්‍රධාන සිදුරු තුනම එක් කර බලන කල්හි වියතකි. ඒ අතින් බලන කල්හි වසර හය දහසකට පෙරසිටි මානවයා  මැනුම් සැලසුම් කරන්නටද ආරම්භ කර ඇති බව කිව හැකිය. පසු කලයේදී වැව් අමුණු ආදී සංකීර්ණ තාක්ෂණික ව්‍යුහයන් සකස් කරන්නට ඇත්තේ මේ දැනුම් සම්භාරයේ විකාශනයෙනි.ඉතින් මෙවැනි දැනුම් සම්භාරයකට හිමිකම් කිවූ අතීත හෙළයාට අද ඇති තැන කුමක්ද මහාචාර්ය තුමා අපගෙන් අසන ප්‍රශ්ණය එයයි.


Friday, August 18, 2017

ශාසනය වනසන ගුණ්ඩුව -කතිකාවත් තොණ්ඩුව


          2015 වසරේ පාර්ලිමේන්තුවට ඉදිරිපත් කරන ලද ථේරවාදී භික්ෂු කතිකාවත් ලියාපදිංචි කිරීමේ පණත් කෙටුම්පත සම්මත කර ගැනීමේ සංවාදය නැවතත් ඇරඹී තිබේ. පසුගියදා බුද්ධ ශාසන උපදේශක මණ්ඩලය රැස්වූ අවස්ථාවේදී අධිකරණ හා බුද්ධ ශාසන ඇමතිවරයා මෙම පණත් ලියවිල්ලේ නවතම සංශෝධනයක් භික්ෂූන් වහන්සේලා අතර බෙදාහැර ඇත. අපට පෙනෙන ආකාරයට නම් මෙලෙස බෙදා හරින ලද ලියවිල්ලේ නඩු තීන්දුවෙන් ප්‍රකාශ කළ කරුණු ඇරුණු කොට එතරම් වෙනස්කමක් දක්වා නැත. එසේම සංශොධනයක් ඉටු කරන්නට නම් කලින් ඉදිරිපත් කරන ලද පණත පාර්ලිමේන්තු න්‍යාය පත්‍ර යෙන් ඉවත් කොට තිබිය යුතුය. නමුත් එලෙස කළ බවක්ද දැන ගන්නට නැත.
      භික්ෂූන් වහන්සේලා සම්බන්ධව අතීතයේ පටන්ම කරන ලද සැලකිල්ල ඉමහත්ය. පැරණි භික්ෂු සමාජයේ පවා වැරදි කරන භික්ෂූන් වහන්සේලා සිටියහ. ඒ තත්ත්වය පාලනය උදෙසා විනය නීති පැනවීමට බුදුන් වහන්සේ වරින් වර කටයුතු කර තිබේ.බුදුන් වහන්සේ ගේ පරිනිර්වානයෙන් පසුව උන්වහන්සේ ධර්මය මුල් කොට විනය මුල් කොට( ධර්ම විනය දෙක ශාස්තෘ වන බව) කටයුතු කරන්නයැයි උපදෙස් දී තිබුණි. පසු කාලයේදී මේ අදහස් ඇතැම් ශිලා ලේඛණ වල ද සටහන්ව තිබේ. උදාහරණයක් වශයෙන් දහවන ශත වර්ෂයට අයත් පස්වන කසුප් රජුගේ අනුරාධපුර පුවරු ලිපිය දැක්විය හැකිය.එහි මෙම කාරණය සඳහන් වන්නේ මෙලෙසය.
        නිකායෙහි සංඝයා හිඳ විසඳා නිම විය යුතු සංඝයා විසින් නොනිමවන කල්හි සම්දරුවන් හා රැස්ව විචාරා නිමවා පැමිණි පැමිණි සෙයින් දඬුවම් කරනු මැනවි. සංඝයා කැඳ හෝ බත් ආමර්ෂණය කොට කරන විවාදයක් ඇතොත් සම්දරුවන් යවා භික්ෂූන් සන්හුන් කොට හඹු ගන්වනු මිස බලහත්කාරයෙන් හඹු නොගැන්විය යුතු.    භික්ෂූන් වහන්සේලා අරභයා නීති රීති පැනවීමේ දී උන්වහන්සේලා රැස්ව හිඳ කතිකා කර නොගත හොත්  පමණක් රජයෙන් මැදිහත්ව එයට පහසුකම් සැපයීම මිස රජයෙන් නීති පැනවීමක් පෙර නොවීය.එහි ගැඹුරු අර්ථය සෙල් ලිපි වල අවධාරණය කර තිබෙන්නේ ධර්ම විනය පිළිබව බුදුන් වදාළ කරුණු පෙර රජවරුන්ද පිළිගත් බැවිනි.. පෙර සිරිත යනුවෙන් පැවසෙන්නේ එයයි. යම් විරෝධතාවයක් ඇතොත් බලයෙන් මෙන් රජයේ නීති රීති ක්‍රියාත්මක කිරීම මෙහිදී අත් හිටුවා තිබේ. නිකායෙහි ඇතුළත් නීති රීති අනුව මහා සංඝයා අරභයා විනය ක්‍රියාකිරීමේ බලය සංඝයාටම පවරා තිබීම බුද්ධ නීතියටද අනුකූලය. දැනට ලංකාවේ ක්‍රියාත්මක නිකායන්හි යම් යම් කතිකාවත් සංග්‍රහ කරතිබෙන්නේ මෙම බුද්ධ නීතියට අදාළවයි. එම නිකායන්හි ලේකම් කාර්යාලයේ එම කතිකාවත් ලියාපංදිංචි කර තිබේ. එවිට නැවතත් රජයේ ලියාපදිංචි කිරීමක් අවශ්‍ය වන්නේ නැත. සිදු විය යුත්තේ රජය විසින් එම කතිකාවත් පිළිගැනීමට බලාත්මක කිරීමට කටයුතු කිරීමයි.
       මහණකම නැතිවන ඡෙද්‍යගාමිණී ආපත්තීන් හතරක් තිබේ. පාරාජිකා ලෙස සැලකෙන්නේ එම ආපත්තීන් හතරය. මෙය භික්ෂුණින් වහන්සේලාට අටක් වේ. පාරාජිකා හැරුණු විට ඉතිරි ශික්ෂා පද සියල්ලම උට්ඨානගාමිණී ශික්ෂා පද වේ. භික්ෂූත්වය නැතිවන්නේ පාරාජිකා ආපත්තීනට පැමිණීමෙන් පමණි. සෙසු ආප්ත්තීන්ට පැමිණි විට එම ආපත්තීන් ගෙන් විමෝචනය වන්නේ කෙසේදැයි සඟ විනය තුළ පැහැදිලිව දක්වා තිබේ. භික්ෂූන් වහන්සේලා සම්බන්ධයෙන් ඇතිවන ඕනෑම ගැටළුවක් විසාඳාගත හැකි ආකාරය සඟවිනය තුළ නිර්දිෂ්ට වේ. භික්ෂුව ඒ අනුව ජීවත් විය යුතුය. එම විනය අමතක කර භික්ෂූන් වහන්සේලා සඳහා රාජ්‍ය නීතියක් සම්මත කර ගැනීම ධර්ම විනයෙන් නිර්දිෂ්ට වන්නේ නැත.නමුත් රටේ පවතින නීති ගරුකළ යුතු බවද එයට භික්ෂූන් වහන්සේලාද අවනත විය යුතු බවද බුදුරදුන් භික්ෂූන් වහන්සේලාට නියම කර තිබේ. එය වැරදි ලෙස අර්ථ කථනය කිරීම මගින් හෝ තේරුම්ගැනීම මගින් රජය ලවා භික්ෂූන් වහන්සේලා වෙනුවෙන් නීතිරීති පැනවීමට කල්පනා කිරීම කිසිසේත්ම නොකළ යුතුය.( පූජ්‍ය පරගොඩ විමලවංශ හිමි -සමස්ත ලංකා ත්‍රෛනිකායික ඒකාබද්ධ මහා සංඝ සභාව )
     කතිකාවත් පණතක අවශ්‍යතාවය භික්ෂූන් වහන්සේලාගෙන්ම පැණ නැගුණු බව රජයෙන් පැවසෙයි.එයට එක් හේතුවක් වන්නේ යම් සංඝ සංස්ථාවක් සම්මත  කරගත් නීති එකඟතාවයන් රජයේ නීති මගින් ඇතැම් විට බලාත්මක නොවීමයි. මෙහි පසුබිම නම් ආණ්ඩුක්‍රම ව්‍යවස්ථාවෙහි නව වන වගන්තිය ප්‍රකාරව බුද්ධ ශාසනය සුරක්ෂිත කොට පෝෂණය කිරීමේ වගකීම රජය බොහෝ අවස්ථාවලදී පැහැර හැර තිබීමයි. හින්දු මුස්ලිම් මෙන්ම වෙනත් ආගමික සංස්ථා සඳහා බ්‍රිතාන්‍ය ආණ්ඩු කාලයේ පටන් සංවිධිත නීති අණ පණත් රජයෙන් සම්මත කර ඇත. ඒ එම ආගමික ස්වරූපයන්ට අනුකූලවයි. රජයේ සාමාන්‍ය නීති රීති අභිබවා මුස්ලිම් කාති උසාවි වලට රජය බලය පවරා දී තිබේ.එහෙත් සංඝ සංස්ථාවකට එවැනි බලයක් පවරා දී නැත.සංඝාධිකරණයකින් එය කළ හැකි වෙත් දැයි මදක් සලකා බැලිය යුතුය.වඩා හොඳම දේ නම් සංඝයා වහන්සේලා ගේ ධර්ම විනය  දෙක සුරක්ෂිත කරලීමට රජයෙන් පහසුකම් සැලසීමයි.බාහිර පළිබෝධ මෙන්ම නොයෙකුත් වාරයන්හි රට තුළ ට වැද්ද ගන්නා ථේරවාදී නොවන සංස්ථා පාලනය කිරීමට පවත්නා නීති ප්‍රමාණවත්ය.එසේම ථේරවාදී නොවන ආගන්තුක යම් සංස්ථාවක් මගින් සසුනට හානි පැමිණෙන් නේ නම් ත්‍රෛයිනිකායික මහා නායක ස්වාමීන් වහන්සේලාගේ ඉල්ලීම පරිදි එම පළිබෝධ ඉවත් කරලීමට රජයට කටයුතු කළ හැකිය. අවශ්‍ය වන්නේ සිවිල් නඩු විධාන සංග්‍රහයට එවැනි නීති ඇතුලත් කර ගැනීමයි.අන්‍යාගම් වලට හරවා ගැනීමට දරන බලහත්කාරයද එවැනි නීති වලින් නැවැත්විය හැකිය.
       රජය පසුගිය වසරේ  ආරම්භයේ සිටම මෙම කතිකාවත් පණත සම්මත කරලීමට උත්සාහ දරනුයේ සසුන ආක්ෂා කර ගැනීමට නොවේ. බෙදුම්වාදය සහතික කරවන නව ව්‍යවස්ථාවක් කෙටුම්පත් කිරීමේ කාර්යාවලියේ දී බෙදුම්වාදයට එරහිව මහා සංඝ රත්නයෙන් නැගෙන විරෝධතා වෙනතකට යොමු කරලීමේ වුවමනාවක් එහි විය.දැන් යළිත් මෙම පණත කරළියට ගෙනවුත් තිබෙන්නේ ව්‍යවස්ථා ක්‍රියාවලිය අවසාන අදියරට පැමිණ තිබෙන බැවිනි.ව්‍යවස්ථාව පිළිබඳ අවසාන වාර්තාව හෝ කෙටුම්පත පාර්ලිමේන්තුවට ඉදිරිපත් කරන අවස්ථාව වන විට මහා සංඝ රත්නය තම සංඝ සංස්ථාව පිළිබඳ ප්‍රශ්ණයට ගැටගසා තැබීම අරමුණ වෙයි.නිකායන් අතර පවා මෙම පණත මගින් භේදයක් ඇති වන කල්හි රජයේ අරමුණ ඉටු කර ගැනීමට පසුබිම සැකසේ.බුද්ධ ශාසන ඇමතිවරයාට එරෙහිව ගෙනෙන විශවාස භංගය වැනි දේ නාටකීය ස්වරූපයෙන් ක්‍රියාත්මක වන්නකි. මෙම ඇමතිවරයා දහනම වන ව්‍යවස්ථා සංශෝධනය සිදුවන අවස්ථාවේදී නව ආණ්ඩුක්‍රම ව්‍යවස්ථාවක වුවමනාව ගැන දැඩිව පෙනී සිටියෙකි.
         එම සංශෝධනය සිදු වන අවස්ථාවේදී දිනේශ් ගුණවර්ධන  මන්ත්‍රී වරයා ඉදිරිපත් කළ වෙනස්කම් පවා නොයොදන්නට අගමැතිවරයාගේ උපදෙස් පරිදි අධිකරණ සහ බුද්ධ ශාසන ඇමතිවරයා කටයුතු කර තිබේ. විශේෂයෙන්ම පාර්ලිමේන්තුව විසිරුවා හැරීම සම්බන්ධයෙන් ජනාධිපතිවරයාට තිබෙන බලතල කප්පාදුවේදී ඉදිරිපත් කළ සංශෝධන ඔහු නොසලකා හැර තිබේ. මේ නයින් බලන විට වර්තමාන කතිකාවත් පණත් කොටුම්පතද ඔහු විසින් හෝ වෙනත් ඇමතිවරයෙකු විසින් ( ඔහු ඉල්ලා අස්වුවහොත්) භික්ෂූන් වහන්සේලාට අවශ්‍ය සංශෝධන නොසලකාම සම්මත කර ගැනීමට ඉඩ තිබේ. 1980 දී දකුණු කොරියාවේ ජනාධිපති තනතුරට පත් චුන් ඩු හේවොන් නම් පුද්ගලයා විසින් එරට බුදු සසුන දුර්බල කිරීමට මෙවැනි ප්‍රතිසංස්කරණ කර ඇත. පන්සල් වලට බදු පනවා ඇත. විහාරස්ථා ඉඩම් ජාතික උද්‍යාන බවට පත් කර ඇත. මේ නිසා එම රටේ බුදු සසුන සීඝ්‍රයෙන් වැනසුනි. වර්තමාන අගමැතිවරයාද චේතනාන්විතවම බුදු සසුන මෙන්ම රටේ එකීය භාවයද විනාශ කිරීමට කටයුතු කරන්නෙකි.නව දේශීය ආදායම් පණත හරහා ඔහු පන්සල් වලින් බදු එකතු කිරීමටද යෝජනා කර තිබේ.දඹුල්ල පූජා භූමිය රජයට පවරා ගැනීමට උත්සාහයක් දරමින් සිටී. එම තත්ත්වය තුළ මුහුණු දෙකක් ඇති ඇමතිවරුන් ගැන වඩාත් සැලකිලිමත් වෙමින් මෙම කතිකාවත් පණත ප්‍රතික්ෂේප කරලීම මහා සංඝරත්නයේ යුතුකමකි.උන්වහන්සේලාට බුද්ධ නීතියට වැඩි යමක් නොතිබෙන බව සමාජයටද රජයටද කියාපෑම මෙහිදී තරයේ කළ යුතුය.එසේ නැතහොත් ශාසනයට වැටෙන්නේ තොණ්ඩුවකි.

         


Saturday, July 22, 2017

ආයුර්වේද පණතට දොස්තර වික්‍රමසිංහ විරුද්ධ වෙයි

                                 
            ලන්දේසීන් සහ ඉංග්‍රීසීන් යටතේ පැවති ආණ්ඩු ක්‍රමයන්හි දේශීය වෙදකමට නිසි තැනක් අත් නොවීය. ග්‍රාමීය වෛද්‍යාවරයා ඔවුන්ට වෙදරාළ විය.එයි වෙදරාළ මෙහෙට වරෙන් යයි ඇමතූ සුදු දිසාපතිවරු මෙන්ම සිංහල දිසාපතිවරුද  එකල වූහ. 1926 දී පමණ රාජ්‍ය මන්ත්‍රණ සභාවේ දී දේශීය වෙදකමට ලැබිය යුතු තැන පිළිබඳ කතාබහක් ඇති විය. ඒ අනුව බාලසිංහම් නම් මන්ත්‍රී වරයා යටතේ ස්වදේශ වෛද්‍ය උපදේශක සභාවක් පත් කරන ලදී. මෙම තත්ත්වය මත 1928 කෝට්ටේ පාරේ වෛද්‍ය විදුහලක්ද රෝහලක්ද බෙහෙත් සාදන ස්ථානයක්ද ඇති කරන්නට ඉංග්‍රීසි ආණ්ඩුව කටයුතු යෙදූහ. පසුව එස්.ඩබ්.ආර්.ඩී. බණ්ඩාරනායක මහතා මෙම උපදේශක සභාවේ සභාපති වූවායින් පසුව 1937 ද පමණ කවිරජ් දාස් ගුප්තා මහතා යටතේ කොමිෂන් සභාවත් පත් කර තිබේ. මෙහි කොමිෂන් වාර්තාව අනුව ආයුර්වේද දෙපාර්තමේන්තුවක් පිහිටුවා වෛද්‍ය වරු ලියාපදිංචිය ඇරඹී දේශීය ආයුර්වේදය නව මුහුණු වරකින් ඉදිරියට පැමිණියේය.
         1956 ජයග්‍රහණයේ දී බණ්ඩාරනායක මහතා නැවතත් දෙශීය වෙදකමට අවශ්‍ය ස්ථානය ලබා දීමේ අභිප්‍රායෙන් සිටියද එතුමාගේ හදිසි අභාවයෙන් පසුව එය ඇණ හිටින. නමුත් 1960 බලයට පත් වූ සිරිමා බණ්ඩාරනායක රජය යටතේ ආයුර්වේද පණතක් පාර්ලිමේන්තුවට ඉදිරිපත් කරන ලදී. මෙම පණත ඉදිරිපත් කරන ලද්දේ සෞඛ්‍ය ඇමති වෛද්‍ය ජේ. පී. ඔබේසේකර මහතා විසිනි. එම පණත දෙවනි වර කියැවීමේදී විවාදය මදක් උණුසුම් විය. බදුල්ල මහජන මන්ත්‍රී වෛද්‍ය බී.එච්. බණ්ඩාර මහාත එහීදී කරන ලද දීර්ඝ දෙශනය 1961 මැයි 18 දින හැන්සාඩ් ගත වී තිබේ.මේ එයින් උපුටා ගත් කොටස් කීපයකි.
      දැනට වුවත් නොයෙක් වර්ග වල ආයුර්වේද බෙහෙත් කෙළවරක් නැතිව ඉනිදියාවෙන් අපේ රටට ගෙන්වා ගන්නවා. අපේ ඇතැම් වෙද්‍යවරුන් කපාඩියා සමාගම වැනි සමාගම් වල සාප්පු වලින් ආයුර්වේද බෙහෙත් වර්ග මිළයට ගන්නවා. ඒවා ඉන්දියාවෙන් ගෙන්වන්නට පටන් ගෙන තිබෙන්නේ ඒවා අපේ රටේ නොසාදන නිසයි. මේ රටේ වෛද්‍යවරුන් නව බෙහෙත් වර්ග ඉන්දියවෙන් ගෙන්වා ගන්නට වෙනත් හේතුවක් නැහැ. ඒ හේතුවෙන් අපේ රටෙන් විශාල ධනසම්භාරයක් ඉන්දියාවට ඇදී යනවා. මේ අයුර්වේද පණතේ සඳහන් කර තිබෙන අන්දමට ඖෂධ නිෂ්පාදනය කිරීමේ මධ්‍යස්ථානයන් ඇති කර එම බෙහෙත් බෙදාහැරිමේ ක්‍රමයකුත් ඇති කිරීමෙන් මේ රටට විශාල ආර්ථීක උන්නතියක් ඇතිවන බව මතක් කරන්නට ඕනෑ.මේ රටේ වැවෙන අරලු බුලු නෙල්ලි හාතාවාරිය රසකිඳ කොතෙක් තිබුණත් ඒවත් සමහර විට ඉන්දියවෙන් ගෙන්වනවා. මෙවැනි අමු බෙහත් වර්ග එකතු කර රජය මගින්ම ඖෂධ බවට හරවා මේ රටේ ආයුර්වේද වෛද්‍ය වරුන්ට බෙදා දීමේ ක්‍රමයක් ඇති කළහොත් ඒ මගින් මහජනතාවට සෙතක් සැලසෙනවාත් හැර මේ රටේ ආර්ථිකයත් පෝෂණය වනවා.
       දැනට තිබෙන සෑම ආරෝග්‍ය ශාලාවකම ආයුර්වේදය පිළිබද වෙනම අංශයක් ඉක්මනින් ඇති කරන්න පිළිවන්. ඒ සඳහා වැඩි මුදලක් යන්නේ නැහැ. ඉංග්‍රීසි වෛද්‍ය ක්‍රමයට සුව කළ නොහැකි රෝග සඳහා ආයුර්වේද බෙහෙත් තිබෙනවා.
    මෙම විවාදයට එක් වූ ගාල්ල මන්ත්‍රී ඩබ්.දහනායක මහතා පළ කළ අදහස් මෙසේය. අලුතෙන් ආයුර්වේද ඉස්පිරිතාල පිහිටුවීම සුදුසු යයි සෞඛ්‍ය ඇමති තුමා කීවත් ඇමති තුමා මුදල් අමාරුකම් කියාවි.මේ රටේ සෑම ප්‍රධාන නගරයකම තිබෙන රෝහල් වල අඩු ගණනේ එක වාට්ටුවක් වත් ආයුර්වේද වෛද්‍ය ක්‍රමය අනුව වෙදකම් කිරීමේ වැඩ පිළිවෙලක් ඇති කිරීමට කටයුතු කිරීම සුදුසුය. චීනයේ බටහිර වෛද්‍ය ක්‍රමය අනුව පුහුණුවූ වෛද්‍යවරුන් සිටින්නේ ස්වල්ප දෙනයි. එහෙයින් වැඩි පිරිසක් ප්‍රයෝජනය ලබා ගන්නේ පැරණි වෛද්‍ය ක්‍රමය අනුව වැඩ කටයුතු කරන වෛදවරුන්ගෙනුයි. සමහර ලෙඩුන් බටහිර වෛද්‍ය වරුන් වෙත යවන අතර අනෙක් අය අනෙක් වෛද්‍ය වරුන් වෙත යවනවා. ඇයි අපටත් එවැනි වැඩ පිළිවෙලක් කරන්න බැරි. සෑම ඉස්පිරිතාලයකම ආයුර්වේද වෛද්‍ය ක්‍රමය අනුව බෙහෙත් කරන වාට්ටුවක් තිබිය යුතුය.
         මෙම ආයුර්වේද පණත සම්මත කර ගැනීමට සෘජුවම විරුද්ධ වූ මන්ත්‍රීවරයා වූයේ අකුරැස්ස මන්ත්‍රී දොස්තර එස්.ඒ. වික්‍රමසිංහ මහතාය. දෙස්තර වරයෙකු වූ ඔහු මෙම පණතට විරුද්ධ වීම පුදුමයක් නොවේ. දහනායක මහතා කතා කරන විට ඔහු කියා සිටියේ ඇටයක් කැඩුනම නිකම්ම එකට එකතු වෙනවා ඒක පාස්සන්න බෙහෙත් තෙල් පත්තු අවශ්‍ය නැහැ කියලයි.එහිදී දහනායක මහතා කියා සිටියේ ඉංග්‍රීසි වෛද්‍ය ක්‍රමය මගින් කකුල් කපා දමන්නේ එම නිසා වෙන්නට ඇති කියාය. දොස්තර වික්‍රමසිංහ මහතා මෙදී වැඩි දුරටත් පවසා  සිටි කරුණු මෙලසෙය.
    වෛද්‍ය ශාස්ත්‍රය සම්බන්ධයෙන් පමණක් නොව අනික් හැම ශාස්ත්‍රයන් සම්බන්ධයෙනුත් පුරාණ ඥානයත් වර්තමාන ඥානයත් යන දෙකොටසම සම්බන්ධ කර සම්පූර්ණ ශාස්ත්‍රයක් සම්පූර්ණ නවීන විද්‍යාවක් ඇති කිරීමයි අද ලෝකයේ සෑම තැනකම සිදු වන්නේ. කවුරුත් පිළිගන්නා ඥානවන්ත ක්‍රමය ඒකයි. නමුත් මෙම පණත ඉදිරිපිත් කර තිබෙන පිළිවෙල අනුව අද ලෝකයේ වෛද්‍ය විද්‍යාවන් දෙකක් තියෙනවාය යන අදහසක් ඉදිරිපත් වෙනවා. කතා නායක තුමනි. විද්‍යාත්මක අන්දමට මනුෂ්‍යයාගේ සනීපාරක්ෂාව ඇති කිරීමට මනුෂ්‍යයාගේ ලෙඩ රෝග සුව කිරීමට එකම ක්‍රමයයි ලෝකයේ තිබුණේ. තියෙන්නේ. නවීන වෛද්‍ය විද්‍යාවට පැරණි වෛද්‍ය ක්‍රමයේ වැදගත් කොටස් අඩංගු කර ගන්ට ශක්තිය නැතිකම. ඒ දුර්වලකම මේ වෛද්‍ය ක්‍රම දෙක වෙන්කරලා ගෙන යන්ට ඕනෑ යන තර්කය ඉදිරිපත් කිරීමට හේතුවක් නොවෙයි. මා ගරු පාර්ලිමේන්තු ලේකම් තුමා ඉදිරියේ ප්‍රකාශ කර සිටිනවා මේ විධියේ පණතක් ඉදිරිපත්  කර තිබෙන්නේ අයුතු බලපෑම් උඩ වෙන්න ඕනෑය.කියා. වෛද්‍ය ශාස්ත්‍රය පිළිබඳව මූලික ප්‍රතිපත්ති මොනවාද කියා නොදැන මනුෂ්‍ය ජීවිත වෙනුවෙන් වගකීමට සුදුසු අය කවුරුන්ද නුසුදුසු අය කවුරුන්ද යන්න හරි අවබෝධයකින් නැතිව මේ පණත පිළියෙල කොට තිබෙන අතර එවැනි දේ ගැන මේ පණතේ එකම වචනයක් එකම වාසගමක් වත් සඳහන් වී නැහැ. ගරු කතා නායක තුමනි. නවීන ක්‍රමයට පුහුණුව ලැබ වෛද්‍ය වෘත්තියෙහි යෙදී සිටින ඇතැම් වෛද්‍ය වරුන් අතින් පවා වැරදි කෙරෙන එක ඇත්තයි. තමන් උගත් ශාස්ත්‍රය අයුතු අන්දමට පාවිච්චි කර පුද්ගලික ප්‍රයෝජනය සලසා ගන්නා අය සිටිනවා. යම් මනුෂ්‍යයකුට ඇතිවන විපතක් තම පුද්ගලික ප්‍රයෝජනය පිණිස යොදා ගැනීම ධනපති ක්‍රමයේ මූලික දෙයක් හැටියට හඳුන්වන්න පිළිවන්. යම් මනුෂ්‍යයකු විපතකට වැටුනාම එවැනි වෛද්‍යවරුන් වැඩියි. ඇතැම් දෙනා ඒ අවස්ථාවෙන් අයුතු ප්‍රයෝජන ගන්නවා එම ක්‍රමයම ධනපති ක්‍රමයේ දූෂිත වැඩ පිළවෙලක් ලෙසට හඳුන්වන්නට පිළිවන්.
         ආයුර්වෙද පණත ඉදිරිපත් කර සම්මත කර දැන් වසර ගණනාවක් ගතව ඇත. ලංකාවේ දේශීය වෛද්‍ය ක්‍රමය සැලකිය යුතු දියුණුවක් ලබා තිබේ. ආයුර්වේද රෝහල් වලින් නොමිළයේ ප්‍රතිකාර ලබන අසරණ රෝගීන් සංඛ්‍යා ඉතා විශාලය. මේ වෙනුවෙන් රජය විශාල මුදලක් කැප කරයි. එය සාමාන්‍ය මහජනතාවට බලවත් සහනයකි. වර්තමානය වන විට මෙම ක්‍රමය දෙස රජය බලන්නේ වෙනත් කෝණයකිනි. ආයුර්වේද මූල ධර්ම අනුව සාදන බෙහෙත් වෙනුවට නවීන රසායනික ක්‍රම මගින් නිපදවන ශාකසාර හඳුනවා දෙන්නට උනන්දුවක් ඇතිව තිබේ. එසේම වර්තමාන සෞඛ්‍ය ඇමතිවරයා විසින් ඉන්දීය ශාක ඖෂධ නිපදවන සමාගම් ලංකාවට වැද්දගැනීමට කරන තැත නව ප්‍රවේශයකට පත් වී තිබේ. ඒ නම් ආයුර්වේද පෞද්ගලික රෝහල් ඇති කරලීමටද ඒ යටතේ ආයුර්වේද අධ්‍යාපනය ලබාදීමටද  ගිවිසුම් අත්සන් කිරීමට උත්සාහ දැරීමයි.මේ මගින් දේශීයව පවතින වෛද්‍ය විද්‍යාල අර්බුදයට පත්වනු ඇත. ආයුර්වේද පණතට විරුද්ධ වුවත් දොස්තර වික්‍රමසිංහ මහතා එදා මේ දුෂ්ට ධනවාදී ක්‍රම හෙළා දැක තිබේ.


Monday, July 10, 2017

බලු කපුටු වන්නට කැමැත්තෝ දඹුල්ලට අත තබන්න

                           

          පසුගියදා අස්ගිරි මහා විහාරයේ දී රැස්වුණු ත්‍රෛයිනිකායික මහා සංඝ රත්නයේ මූලිකත්වයෙන්   රජයට ඉදිරිපත් කරන ලද යෝජනා සංඝ ආඥාවක් බවට පත් විය.මහා සංඝ රත්නය විෂයෙහි එවැනි බලයක් නොමැති බව එන්.ජී.ඕ. බත් බැලයන් සහ දේශපාලන කුක්කන් ද මාක්ස් සරණ ගිය ඇතැම් හිමිවරුන්ද පවසති. සංඝ ආඥාවන් මෑත කාලයේ පමණක් නොව අතීතයේ රජුන්ටද  නිකුත් කර තිබේ. මේ සංඝ ආඥාව වර්තමාන විධායකය ව්‍යවස්ථාදායකය සහ අධිකරණය මගින් නිකුත් කරන ආඥාවක් මෙන් නොව ඊට වඩා බලවත්ව ඉහළින් තැබෙන බුද්ධ නීතියේ සම්ප්‍රදායයි. එය අද ප්‍රකාශයට පත් වනුයේ කන්ද උඩරට මහනුවර වැඩසිටින ලක් ජනතාවගේ මුදුන් මල්කඩවන් දළදා වහන්සේ ගේ ආනුභාවයෙනි.සිංහල බෞද්ධ ජනතාවත් මහා සංඝ රත්නයත්  සිය වගකීම දක්වනු ලබනුයේ දළදා වහන්සේට පමණකි.ජනාධිපතිවරයා හෝ අගමැතිවරයා  පත්වූ පසු දළදා වහන්සේ වැඳ නමස්කාරකොට ආශිර්වාද ලබන්නේ මෙම සම්ප්‍රදාය අඛණ්ඩ අවිච්ඡින්නව පැවතෙන හෙයිනි.
        වර්තමාන සංඝ ආඥාව ප්‍රකාශ කිරීමෙන් පසු ජනාධිපතිවරයා මහනුවරට පැමිණ මහා සංඝ රත්නය බැහැ දුටහ. සංඝ ආඥාවෙන් ප්‍රකාශ වන කරුණු පිළිගත්හ.සත්‍ය සෙවීමට කොමිසමක් පත් කරන බවද දැන්වූහ.ව්‍යවස්ථා කොටුම්පත මහා සංඝ රත්නයට ඉදිරිපත් කරන බවද දැන්වූහ.එහෙත් ජාතික උරුමයන් භාර ඇමැතිවරයා ගෙන් එම විෂය ඉවත් කිරීමට කරන ලද ඉල්ලීම අගමැතිවරයාගේ කැමැත්ත මත කරන බව කියා සිටියහ. මෙයින් ගම්‍ය වන්නේ කුමක්ද.අගමැතිවරයාගේ කැමැත්ත නොමැතිව තීරණාත්මක වෙනසක් කිරීමට ජනාධිපතිවරයාට නොහැකි බවයි. මහ නායක හිමිවරු කුමක් පැවසුවද නව ව්‍යවස්ථාවක් ගෙන එන බව අගමැතිවරයා මන්නාරමේදී කළ ප්‍රකාශය මත මෙය තව දුරටත් තහවුරු විය.
      රන්ගිරි දඹුලු රජමහා විහාරය ලෝක උරුමයක් ලෙස නම් කර ඇති බැවින් තමන්ට තිබෙන බලතල ප්‍රකාරව ප්‍රවේශ පත්‍ර අච්චු ගසා මධ්‍යම සංස්කෘතික අරමුදල මගින් මුදල් අය කිරීම ආරම්භ කරන බවට ඇමතිවරයා යලි යලිත් ප්‍රකාශ කරයි.දැන් එහි තවත් පියවරක් වශයෙන් දඹුලු විහාරය තාවකාලිකව වසා දමන්නට තීරණය කර තිබේ.ඇමතිවරයා දඹර අමිල හිමි පුරා විද්‍යා අධ්‍යක්ෂ බෞද්ධ කටයුතු කොමසාරිස් ඇතුලු පිරිසක් එක්ව එම තීරණය ගත බව මාධ්‍ය වාර්තා කර ඇත.මධ්‍යම සංස්කෘතික අරමුදල ආරම්භ වූයේ 1980 වසරේ වුවද සංස්කාතික ත්‍රිකෝණ ව්‍යපෘතිය පිළිබඳ අදහස මතුව එන්නේ පැරිස් නුවර දී පැවැත්වුණු යුනෙස්කෝ සමුලුවේදීය . පසුව 1970 දී ලක්ෂ්මන් ජයකොඩි සංස්කෘතික ඇමතිවරයාගේ නියෝගයෙන් සංස්කෘතික ත්‍රිකෝණ නාමය ස්ථාපිත කර ඇත. සංස්කෘතික හා ආගමික ස්මාරක සංවර්ධනය කිරීමේ අරමුණින් ද සංස්කෘතික ප්‍රවර්ධනයට දායක වන කලාකරුවන් නගා සිටුවීමේ පුළුල් අරමුණින් ද පිහිට වූ මේ අරමුදල පුණ්‍යාතනයකි.  මධ්‍යම සංස්කෘතික අරමුදලෙහි සභාපති වරයා වන්නේ නිල බලයෙන් අගමැතිවරයාය. සංස්කෘතික ඇමති සංචාරක ඇමති හින්දු සංස්කෘතික ඇමති පුරාවිද්‍යා අධ්‍යක්ෂ ජනරාල්  මුදල් අමාත්‍යංශ ලේකම් ඇතුළු රජයේ නියෝ ජිත පිරිසක්ද අගමැතිවරයා නම් කරනු ලබන පුද්ගලයන් දෙදෙනෙකුද මේ අරමුදල නියෝජනය කරයි.1998 පුරාවස්තු සංශෝධන පණත මගින් සුදුසු ස්ථාන වලින් මුදල් අය කිරීමේ බලය අධ්‍යක්ෂ ජනරාල් වරයාට ලැබුණි.සුදුසු ස්ථාන යනුවෙන් දැක්වෙන්නේ රජයේ ඉඩම් වල පවතින ස්මාරකයන් හෝ ආරක්ෂිත ස්මාරකයන්ය.රෝලන්ඩ් සිල්වා හිටපු පුරාවිද්‍යා කොමසාරිස් වරයා ගේ කාලයේ ඔහු විසින් සිය බලතල ප්‍රකාරව මධ්‍යම සංස්කෘතික අරමුදල සඳහා විදේශීය මුදල් සොයා ගත්හ.යුනෙස්කෝ ශ්‍රී ලංකා සංස්කෘතික ත්‍රිකෝණ ව්‍යාපෘති ඇරඹෙන්නේ එතැනිනි.පසු කාලයේ එම යුනෙස්කෝ ව්‍යාපෘති අවසන් වූ කළ මධ්‍යම සංස්කෘතික අරමුදලට මුදල් නැති විය. රජයේ භාණ්ඩාගාරයෙන් ලැබුණද එය ප්‍රමාණවත් නොවීය.එම නිසා ප්‍රවේශ පත්‍ර වලින් මුදල් අය කිරීම ආරම්භ කරන ලද්දේ යටකී පුරාවස්තු ආඥා පණතේ බලතල යටතේය.රෝලන්ඩ් සිල්වා මහතා සිය බලතල යොදවාගෙන පුරාවිද්‍යා දෙපාර්තමේන්තුව විසින් කළ යුතු ශාස්ත්‍රීය  කැණීම් සංස්කෘතික ත්‍රිකෝණ ව්‍යාපෘති හරහා ඇරඹීය. පොළොන්නරුවේ තිවංක පිළිමගෙය රන්කොත් විහාරය ආදී තැන් එකල මෙම ව්‍යාපෘති මගින් හානියට පත් කරන ලදැයි චෝදනා එල්ල විය.මේ තත්ත්වය ඇති වූයේ සංස්කෘතික ත්‍රිකෝණය සිය බල සීමාවෙන් එපිට පුරාවිද්‍යා වැඩ කටයුතු වලට පෙළඹීමෙනි. එහෙත් පුණ්‍යාතනයක් වන මධ්‍යම සංස්කෘතික අරමුදලේ මූලික අරමුණ වනුයේ එය නොවේ.
       වර්තමාන රජය පත් වූ පසු අධ්‍යපන ඇමතිවරයා හීන් සීරුවේ මධ්‍යම සංස්කාතික අරමුදල් පණත ට සංශෝධන කීපයක් ගෙනවුත් තිබේ. අගමැතිවරයාට තිබෙන බලතල වලට අමතරව ඇමතිව‍රයාගේ ලේකම්වරයාද පාලක මණ්ඩලයට ඇතුලත් කරගෙන ඇත. ඒ සංස්කෘති ඇමතිවරයා සහ ලේකම් යන පදය වෙනස් කොට රේඛීය අමාත්‍යංශයේ ඇමති සහ ලේකම් යනුවෙන් යොදමිනි. අද වන විට මෙම ආයතනයට සේවකයන් 1600 ක් පමණ අලුතින් බඳවා ගෙන ඇත.පුරාවිද්‍යා ස්ථාන විසිනවයක් සඳහා ප්‍රවේශ පත්‍ර අලෙවි කරුවන් 12ක් අලුතින් බඳවා ගෙන තිබේ.එසේම සීගිරිය ව්‍යාපෘතියේ කොන්ත්‍රාත් පදනමින් සේවය කළ සීගිරිය අවට ගම් වාසීන් හතලිස් දෙනෙකු පමණ සේවයෙන් ඉවත් කොට කුරුණෑගල දිස්ත්‍රික්කයේ තමන්ගේ චන්ද දායකයන් විසිදෙනෙකුට පමණ ස්ථීර රැකියා ලබා දී තිබේ.එමෙන්ම සංස්කෘතික ත්‍රිකෝණයේ සේවය කළ පැරණි අයගේ වැටුප් වර්ධක අඩකින් කපා හැර තිබේ.වර්ෂයකට රුපියල් දෂලක්ෂ 3600 ක් පමණ ආදායමක් මෙම සංස්කෘතික අරමුදල උපයා ගන්නේ යැයි කියති.එම සැබෑ ආදායම ජනතාවට හෙළි කළ යුතුව ඇත.මෙම මුදලින්  සියයට විසිපහක් පමණ පුරාවිද්‍යා සංරක්ෂණ කටයුතු පිනිස නිදහස් කිරීමටද එකඟතාවයක් තිබේ. එහෙත් පසුගිය කාලයේදී විශේෂඥයන් ගේ හිඟය නිසා මෙම මුදලෙන් දෙපාර්තමේන්තුව භාවිත කොට තිබෙන්නේ සියයට පහත් දහයත් අතර ප්‍රමාණයකි.
       අගමැතිවරයාගේ සහ ඇමතිවරයාගේ බූදලයක් බදුවූ මධ්‍යම සංස්කෘතික අරමුදල් පණතේ බලය මගින් මහා විහාරය පාලනය කිරීම ඇමති වරයාගේ අභිප්‍රායයි. දෙමල ඩයස් පෝරාවෙන් සහ එන්.ජී. ඕ. බත් බැලයන්ගෙන් යැපෙන ආණ්ඩුව ඊට එරෙහි වන ඕනෑම බලයක් ශූන්‍ය කිරීමට මුලු ගැන්වෙන බව මෙම සිද්දියේදී පෙන්නුම් කර තිබේ.උතුර සහ නැගෙනහිර සඳහා වෙනම සවයං පාලනයක් ලබා දීමට ආණ්ඩුව ගත් ප්‍රතිපත්තිමය තීරණය ට එරෙහි වන මහා සංඝරත්නය හෑල්ලුවට ලක් කොට අකර්මණ්‍ය කිරීම මෙහි අරමුණයි.අවසානයේ ව්‍යවස්ථාව තුළ බුද්ධ ශාසනයට හිමි තැන අවසන් කොට අනාගමික රාජ්‍යයක් දක්වා ගෙන යෑමට යෝජනාද අගමැති වරයා ගේ වාර්තාවේ දැනටමත් අඩංගුය. දඹුල්ල සිද්දිය තුලින් මේ තරමටම ඇමතිවරයාගේ උද්දච්ඡ කම ඉහවහාගොස් තිබෙන්නේ එහෙයිනි.
      1931 විහාර දේවාලගම් පණත 1940 පුරාවස්තු ආඥා පණත මෙන්ම 1980 මධ්‍යම සංස්කෘතික අරමුදල් පණත ආදී සියල්ල ඉංග්‍රීසීන් රට භාර ගත් පසු ඔවුන්ගේ නීති රීති පද්ධතිය යටතේ මෙරට වර්තමාන ආණ්ඩු විසින් ඇති කරන ලද නීතිමය ලියවිලි වේ. නමුත් මෙම නීතිවලට ඉහළින් මෙරට සාම්ප්‍රාදායික ව්‍යවස්ථා ලියවිලි කීපයක් තිබේ. ඒවා නීති පොතේ නොමැති වුවත් ගලේ කොටවා තිබෙන බව ද ඉර හඳ පවතිනා තාක් කල් වලංගු වන බවද පෙන්වා දිය යුතුය.එයින් එකක් නම් අනුරාධපුර ජේතවන විහාරය අසළ  රත්න ප්‍රාසාද භූමියෙහි පවතින දහවන සියවසට අයත් පස්වන කසුප් රජගේ සෙල් පුවරු ලිපියයි. එහි 53 වන ඡේදයේ මෙලෙස සඳහන් වේ.පිරිවෙන ලදුවන් තමන්ට නියම කල වස්තුවෙන් වැඩි ඉතිරි වූ තාක් දෙයින් සංඝයාගේ දාසයන්ට උපස්ථාන කොට කර්මාන්ත නව කර්මාන්ත පූජා චිත්‍ර කර්ම කොට වැඩියෙන් ඇතොත් ඉඩම් ගැනීම මැනවි.
       මෙයින් කියැවෙන්නේ කුමක්ද ගම් බිම් වලින් සහ රජය විසින් නියම කළ දීමනාවන් ගෙන් ලබන ලද ආදායම පරිහරණය කරන ආකාරයයි. එම මුදල් සහ වැඩ කටයුතු පරිපාලනය කරනුයේ පිරිවෙන් හෝ විහාර භාර සංඝරත්නය විසිනි. විහාර දේවාලගම් පණතින් විකෘති ලෙස ආවරණය වන්නේ ද මෙම සම්ප්‍රදායයි. එබැවින් දඹුලු විහාරයෙන් යම් මුදලක් එකතු කරන ලද්දේද ඒම වස්තුව පරිභෝග කීරීමේ සම්පූර්ණ අයිතිය හිමිවන්නේ විහාර පාලනය කරන මහා සංඝ රත්නයටයි. එයින් විහාර සංවර්ධනය කිරීමටද චිත්‍ර කර්මාන්ත සංරක්ෂණයට සහ පවත්වාගෙන යෑමටද චිත්‍ර ශිල්පීන්ට ගෙවීමටද අවශ්‍ය බලය පවරා දී තිබේ.එම මුදල් පරිපාලනය කිරීමට රජය මැදහත් විය හැකි නමුත් ඒවා වෙනත් කටයුතු වලට යෙදීමෙන් හෝ පුද්ගලික පරිභෝජනයට යෙදවීමෙන් බලු කපුටු වෙන්නට හැකි බවද එම සෙල් ලිපි පාඨවලින් පැහැදිලි වේ.
         රජය විසින් මධ්‍යම සංස්කෘතික අරමුදල පිහිටුවන ලද්දේ මහා සංඝරත්නය විසින් කරනු ලැබූ මෙම ඓතිහාසික කාර්යයන්ට යම් කිසි මූල්‍ය ශක්තියක් ලබා දීමටයි.එම ආයතනය පුණ්‍යාතානයක් බවට පත් කරන ලද්දේ එහෙයිනි.2002 බුද්ධ ශාසන ජනාධිපති කොමිසමේ පළමු නිර්දේශය මෙහිදී සිහිපත් කළ යුතුය.  බුද්ධ ශාසනය යන්නට එහි පැහැදිලි නිර්වචනයක් ලබා දී තිබේ.තථාගතයන් වහන්සේ නවලෝකොත්තර ධර්මය සංඝ රත්නය විහාරාංග සහිත විහාර්ස්ථාන ආරණ්‍ය සේනාසන හා භාවනා මධ්‍යස්ථාන බෝධි වෘක්ෂ ස්තූප පිළිම ගෙවල් ධාතු මන්දිර බණ පොත් හා පුස්තකාල ආදී වශයෙන් එහි අර්ථ විවරණයක් තිබේ. ආණ්ඩුක්‍රම ව්‍යවස්ථාවේ නව වන වගන්තිය ප්‍රකාරව බුද්ධ ශාසනය සුරක්ෂිත කොට පෝෂණය කිරීම රජයේ වගකීමයි. මේ සඳහා පිහිටුවා තිබෙන ප්‍රමුඛ ආයතනයක් වන මධ්‍යම සංස්කෘතික අරමුදලේ කාර්ය භාරය විය යුත්තේ ඉහතකී ශාසනික දේපළ ස්මාරක සංරක්ෂණය කිරීම ප්‍රවර්ධන කිරීම ආදී කටයුතු සංවිධානයයි.පුරාවිද්‍යා දෙපාර්තමේන්තුවේ විශේෂඥ සහාය ලබාගත යුත්තේ එම කටයුතු මනා ලෙසට විධිමත්ව කරවා ගැනීමටයි. එහෙත් ඊට හාත්පසින්ම වෙනස් ලෙසට අරමුදල් එකතු කරමින් සංස්කෘතික උරුමයන් විකෘති කිරීම් වලට භාජනය කරලීමෙන් මෙතෙක් ගෙන ගිය වැඩ පිළිවෙල  වර්තමාන අමතිවරයා විසින් වැඩි දියුණු කර තිබේ.  තමන්ගේ චන්ද දායකයන් හට රැකියා ලබා දෙන ආයතනයක් බවට මධ්‍යම සංස්කෘතික අරමුදල පත් කරගෙන තිබේ.අගමැති වරයාගේ බලය මෙහිදී අයුතු ලෙසට ප්‍රයෝජනයට ගෙන ඇත.
       ගලේ කොටවා තිබෙන පුරාණ සෙල් ලිපි පාඨ මගින් හෙළිවන බලය නැවත ස්ථාපිත කොට සිංහල රට බෞද්ධ රාජ්‍යයක් බවට පත් කිරීම සඳහා මහා සංඝරත්නය පෙරමුණ ගැනීමට දැන් කාලය පැමිණ ඇති බව මෙම සිද්දි වලින් පැහිදිලි වේ.දඹුලු විහාරයේ ප්‍රවේශ පත්‍ර අලෙවියට මධ්‍යම සංස්කෘතික අරමුදලට ඉඩ නොදීම එක් පියවරකි.බුද්ධ ශාසනයට එරෙහි දුෂ්ඨ බලවේගයක් ලෙසින් ක්‍රියාත්මක වන වර්තමාන ආණ්ඩුව විසින් කෙටුම්පත් කර තිබෙන රට බෙදන ව්‍යවස්ථාව සහමුලින්ම ප්‍රතික්ෂේප කිරීම සඳහා ජනතා පෙළ ගැස්වීමද අත්‍යවශ්‍ය වේ. දළදා හාමුදරුවන් කෙරෙහි පවතින භත්තිය  සහ ජනතාවගේ වගකීම වැඩි වර්ධන කොට  එම බලය රට පුරා පිළිගැනුමට ලක් කිරීමෙන් රටේ නායකයන්ද එයට හිස නැමීමට සිදු වනු ඇත.